Hesch Zyt…

Hesch Zyt…
Gedichtli vor Silvia Tschanz

Inhaltsverzeichnis
Hesch Zyt… ································ 4
Dr Winter… ································ 6
Zyt uf derä Ärde… ··························· 8
Abschied vo dä Bärge… ······················ 10
Mir wüsse nid… ···························· 12
Früeche Winter… ··························· 14
Itz isch es z'spät… ·························· 16
Ds Bächli… ······························· 18
Winternacht… ····························· 20
Äs Chindli meh… ··························· 22
Stimmt das Wort… ·························· 24
Im Früehlig… ······························ 26
Meischterbilder… ··························· 28
Die wyssi Wulche… ························· 30
Dr alt Boum… ····························· 32
Vergissmeinnicht… ·························· 34
Bachstälze… ······························ 36
We d'Sunne ungergeit… ····················· 38
Am See… ································· 40
Gägä trüebi Gedanke… ······················ 42
Söiblueme… ······························· 44
Bärgfieber… ······························· 46
Summermorge… ··························· 48
Der Herbscht… ···························· 50
Scho es Jahr verbi…? ························ 52

Bachstälze…
Im Granium vor em Fäischter, vo Bletter guet v'rsteckt,
ha-n-ig eismau bim giesse, es chlises Näscht entdeckt...
Churz druf, paar Tage speter, lueg' ig no einisch nah,
scho het's sächs chlini Eili, früsch gleit im Näschtli gha...
Vo denn a ha-n-i planget u geng chli gluegt was geit
und ha's voll Freud ou einisch, de Nachbarmeitschi gseit...
De hei mer aube zäme, zum Fäischter use gluegt,
voll Yfer doch mit Vorsicht, erforschet was sech tuet...
Ha gli eis usegfunge, we d'Sunne gschune het,
de liege «miner» Eili, allei i ihrem Bett,
am Abe wes het chuelet, isch d's «Stälzemuetti» cho
und het se voller Vorsicht, unger d'Fittich gno
Chli speter isch de d's Brüete, samt Warterei vrbii,
die zersch fasch blutte Junge, si aui gschlüffe gsi
Doch hei si gli es dickersch, Fäderchleid brcho
u flüge churz drufache, zum erschtemal drvo
Gli wärde si für immer, mis Chischtli de verlah,
drum hoff'i scho für d's nächscht Jahr,'s wärd ume Eili ha...
36

Winternacht…
e stärneklari Winternacht,
für chli ga z'loufe, grad wie gmacht,
dr Mond glänzt uf em früsche Schnee,
millionewys si Stärne z'gseh...
So nach isch schüsch dr Himu nie,
's isch wunderbar, nöi Spure z'zieh...
Fasch d's einzig Grüsch i dere Rueh,
isch d's Rugge unger mine Schueh...
Wyt wäg isch no es Hündli z'ghöre,
wo sich vor häue Nacht laht störe...
20
O d'Gedanke si am gah,
dür d's Wäudli us em Bächli nah...
I lah se zie u gniesse Zyt,
wo mir nöi Muet u Chraft zrugg git

Bärgfieber…
We d'Sunne nach em Winter
all Tag chli wärmer schynt
und d's junge Gras im Früehlig
sech langsam ume b'chymt
Faht d's Chüjerhärz a dopple
und d'Vorfreud tuet fasch weh,
ach chönnt me ändlech obsi,
uf d'Alp, mit Lüt u Veh…
Doch d' Weide si no mutze,
dr Schnee isch fasch no da
und allerhand gilt's z'richte,
bis's heisst «Morn chöi mr ga…!»
Die bsundri Freud am z'Bärg ga,
o we me weiss, 's wird sträng,
laht eim scho chuum me schlafe
und d's Wärch geit ring dür d'Häng...
Chunnt ändlech Zyt zum zügle,
isch d's Veh fasch nümme d's ha,
voll Yfer trappe d'Tierli,
em alte Wägli nah...
D'Gedanke si bim Summer:
«Was wird 's äch hüür aus gäh?»
Gäb's Glück u Fröid, gäb's Chummer,
me wird däich beides näh...
46

Meischterbilder…
Uf alte Meischterbilder,
isch doch no öppe z'gseh,
wie's häll schynt us dr Wulche,
gäg d'Mitti zue geng meh...
Symbolisch würkt so d'Sunne,
wie-n-e stilli Chraft,
wo's o dür dunkli Zyte,
geng ume zue-n-is schafft...
28