ISSUE #1

40
aibayira vana vevavakadzani semupiro kune zvimwari zvake. Mabhuku aya akapiwha Fata
Seamus Kennolly, weChechi yeRoma, uyo akaraira kuti apiswe.
NezvaRoulet asati auya munyika muno, hatina zvakawanda, asi anonzi akauya mugore
ra1905, achibva Berijiyamu. Matsamba andarava anoratidza kuti Roulet aishorwa
nevavakidzani vake vechirungu, asi aityiwa chose nevatema vemudunhu iri. Izvi zvakange
zvisiri hazvo zvega; ruzhinji rwevarungu vakabvaBhuriteni vaitarisira pasi nekuzvidza vamwe
vachena vakange vabva kunedzimwe nyika. Vakawanda vechiGiriki, Arimeniya nemamwe
marudzi aionekwa naanamudzviti nevamwe veHurumende sevanhu venhando. Pane imwe
memorandamu yemapurisa, yemuna 1936, Roulet anonzi aita “mafambidziro nevatema asina
kufanira.” Ndatsvaga, asi handina kuwana umbowo ungaratidze kuti Roulet akadanana
nemukadzi wechitema.
Ndingati, zvakare, magwaro andarava anonyenyeredza chainyanyoshorwa pamusoro
paRoulet uyu, zvekuti chokwadi chaicho hapana anoziva. Asi, pane mhinduro kubva
kunaBhishopu weChechi YeRoma, achiraira Fata Kennolly, kuti vanopa Roulet mukana
wekuramba zvachose “mabhuku ake nezvidzidziso zviri makare.” Zvimwe, Roulet akange
ahedhuka, ndokusiyana neChechi YeRoma. Asi, ndawana zvakare tsamba yaVaJefferson
Wilbury, veYunaitedhi, vachinyorera vakuru vavo kuAmerika, vachiti vakange vaona vega
“mabasa” aRoulet.
Hapana zvimwe zvinonyorwa pamusoro paVaRoulet, kunze kwebvunzurudzo nemapurisa
yemuna 1937, apo akasungwa nemhosva yekutapa vana vemuvakidzani wake, Robert
Grierson. Mapurisa aive nefungidziro yekuti Roulet aive nechekuita nezvekutsakatika kwevana
vakawanda mudunhu iri, kubvira gore ra1909. Mukufeya-feya kwavo, vakange vanyorerwa
tsamba nemumwe mabharani wehurumende yekuBerijiyamu achiti iye Roulet aive nhererera,
uye akazvarwa kuFuransi. Zvedzinza rake, hapana aiziva zvakawanda. Asi, faira redzinza
rekwaRoulet kuFuransi raive nenyaya yaJacques Roulet, uyo akamiswa pamberi pedare
muna1598 achipomerwa mhosva yekuzvipindutsa kuva chikara chiya chinonzi nevarungu
Werewolf. Zvinonzi vamwe varume vakachifamba musango vakaona mutumbi wemukomana,
wairatidza kunge uchangobva kuurawa, uye makava maviri akaonekwa achitiza. Varume vaya
vakaadzingirira, ndokuwana mumwe mukomana ainzi Jacques Roulet. Maoko ake nemuromo
wake zvakange zvakanuna neropa, uye munzwara dzake maive nenyama yemunhu. Kuti
Jacques Roulet uyu angave tateguru raÉmilien, uye yaive mhuri yaibata zveuroyi nezvemweya
yetsvina?
Zvisinei, Muneneri weMhosva akatadza kugutsa dare neumbowo, Roulet ndokusungurwa
zvake. Asi, pakatsakatika Jane Mickens, mwanasikana wemumwe wevavakidzani vake, Roulet
akadzingwa mudunhu iri nevanhu vakapaka zvombo, imba yake ndokupazwa. Kwaakaenda,
hapana anoziva, asi, muna1958, kwakauya tsamba kubva kumapurisa emuJohanesibhegi
kuSasafurika, vachibvunza maererano nemumwe murume ainzi ‘Rulley’. Rugwaro
rwekupedzisira rwenhoroondo yaRoulet rwunocherechedza rufu rwake muna1967, mushure
mekugara kwemakore akawanda muchipatara chevanorwa pfungwa.