Diccionariu toponímicu del conceyu de Xixón _bicolor_ - El Comercio

Diccionariu toponímicu del Conceyu de Xixón
«Juan de la Bega de Mareo, vezino deste
conzejo de Gijon» (añu 1567), «Pedro
Garçia del Balle, vezino de Mareo, deste
conzejo» (añu 1574). Lo mesmo fai’l Llibru
Ordinariu: «y nonbró a Alonso Garçia del
Balle, de Mareo» (añu 1576). El diccionariu
xeográficu de Madoz (1845-50) cita esti
llugar como «Mareo de los Molinos».
●Otres observaciones sobre’l nome: el
nome anteriormente oficial, «Mareo de
Abajo», ye una castellanización de la
denominación asturiana.
MAREO DE RIBA
Barriu de la parroquia de La Pedrera.
Códigu alministrativu: 24.15.03. Nome
oficial anterior: «Mareo de Arriba».
●Formación del topónimu: topónimu
compuestu formáu por dos elementos. El
primeru ye’l topónimu Mareo, de significáu
y orixe desconocíos 30 . El segundu ye riba,
variante del alverbiu arriba nesti tipu de
compuestos, frecuentes por demás na
toponimia d’Asturies. Esti topónimu
escríbese en palabres xebraes, porque
caúna d’elles caltién el so acentu propiu,
nes sílabes «re» y «ri».
●Etimoloxía: pa la etimoloxía de Mareo, ver
Mareo de Baxo. L’alverbiu arriba y la so
variante riba, amás del alverbiu enriba,
proceden de riba ‘ribera d’un ríu o de la
mar’ (ribera, xustamente, ye un deriváu),
sustantivu que tien el so orixe nel llatín
RĪPAM, del mesmu significáu. Les
significaciones relacionaes colo alto
debieron crease dende’l puntu de vista d’un
navegante que ve la ribera o oriella como
un territoriu al que se sube (arriba, de a
riba ‘a la ribera, a lo alto’). D’aende
provienen tol restu de significaciones
topográfiques y espaciales.
●Otres observaciones sobre’l nome: ver
Mareo de Baxo. El nome anteriormente
oficial, «Mareo de Arriba», ye una
castellanización ortográfica de la
denominación asturiana.
30 Nun tien nengún sentíu relacionalu
col sustantivu maréu ‘sensación de
desequilibriu, de desorientación’, ‘amoriu,
alloriu’.
La Marquesa
122
Llugar de la parroquia de Samartín de
Güerces, barriu de Santecía.
●Formación del topónimu: topónimu
formáu col sustantivu asturianu marquesa,
femenín de marqués, definíes dambes
como ‘persona con títulu de nobleza per
baxo’l duque y penriba’l conde’.
●Etimoloxía: marqués deriva de marca,
palabra medieval que significaba ‘territoriu
fronterizu’, y polo tanto n’orixe referíase al
‘cabezaleru o gobernante d’una marca o
territoriu de frontera’. Pela so parte, el
significáu primitivu de marca yera’l que
conserva güei de ‘señal pa indicar daqué’
(llendes o cualesquier otra cosa), y ye un
deriváu del verbu marcar, tomáu del
italianu marcare, y ésti d’una llingua
xermánica, el longobardu *MARKAN. El sufixu
femenín -esa deriva del griegu -ÍSA.
La Mata
Llugar de la parroquia de Samartín de
Güerces, barriu de Villaverde.
●Formación del topónimu: trátase del
sustantivu asturianu mata ‘matu, sitiu con
morgazu, con maleza’, ‘conxuntu de plantes
o d’árboles agrupaos nun sitiu’, ‘sitiu onde
se cría un conxuntu de plantes o d’árboles
agrupaos’ (más o menos lo qu’en castellanu
s’espresa con «bosque»).
●Etimoloxía: desconozse de cierto. Hai dos
hipótesis: o bien deriva de dalgún términu
prerromanu; o bien ye evolución del llatín
MATTAM ‘estera d’espartu o xuncu’, aplicao
metafóricamente a un terrenu con mates o
viesques.
●Documentación histórica del topónimu: ye
posible que se faiga referencia a esti
topónimu o al de Valdornón (ver siguiente)
nesta mención del Llibru Ordinariu: «E
luego nonbraron en Santa Olaya a Tomas
de la Mata» (añu 1578).
LA MATA
Barriu de la parroquia de Valdornón. Códigu
alministrativu: 24.01.01. Nome oficial
anterior: «La Mata».
●Ver l’anterior.