Diccionariu toponímicu del conceyu de Xixón _bicolor_ - El Comercio

Diccionariu toponímicu del Conceyu de Xixón
de la metafonía vocálica (zarramientu de la
vocal tónica) por influencia de la -Ī final
llatina. La presencia del topónimu
Peñaferrul na parroquia de Santa Marta,
conceyu de Siero, avala esta última
hipótesis.
●Referencia al llugar: xunto con Aguda y
Carbaínos, forma’l territoriu históricu llamáu
tovía güei El Cotu Curiel o La Braña’l Cotu
Curiel. Ye tamién el nome d’un regatu.
●Documentación histórica del topónimu: en
documentu del sieglu XVI lléese «castañedo
de Peñaferruz con su heredad». Nel Llibru
del Cai cítase: «y residentes al presente en
las brañas de Aguda, Peñaferruz y Los
Carbaínos de este conzejo de Jixon» (añu
1738); «los barrios de Peñaferruz, Aguda y
Carbaínos» (añu 1798). Nel Catastro del
Marqués de la Ensenada (1752) apaez
como «Peñaferruz» o «Peña ferruz».
Peñafrancia
Llugar de la parroquia de Deva, barriu de
San Antonio.
●Formación del topónimu: topónimu
compuestu formáu por dos elementos. El
primeru ye’l sustantivu asturianu peña (ver
Les Peñes). El segundu ye -francia, que
paez referise engañosamente al país
(Francia), pero que de xuru tien que ver col
modernu verbu asturianu francer o francir
‘romper, quebrar’. Esti topónimu escríbese
nuna sola palabra, porque tien un únicu
acentu na sílaba «fran».
●Etimoloxía: pa la etimoloxía de peña, ver
Les Peñes. Respecto de -francia, pue ser
el femenín d’un antiguu axetivu o participiu
fuerte *franciu -a -o ‘rotu’, del verbu
francer o francir ‘romper’, procedente del
llatín FRĂNGĔRE [fránguere], col mesmu
significáu. En resultes, Peñafrancia pue
interpretase como ‘peña francida, peña
rota’.
●Referencia al llugar: el nome de
Peñafrancia ‘peña rota’ diz mui bien cola
esistencia nel llugar d’una peña d’au surde’l
ríu llamáu Peñafrancia. Na antigüedá esti
llugar debió tar divinizáu, pues el ríu
llámase tamién Deva ‘diosa’ (ver Deva), y
na peña onde naz llevántase la capiya de
La Nuestra Señora de Peñafrancia, niciu
quiciabes d’un cultu orixinariu más antiguu
(ver El Güeyu). La capiella de Peñafrancia
ye de 1689, mandada llevantar pol
149
callóndrigu Luis Ramírez Valdés, prior de la
Catedral d’Uviéu; foi panteón de los
marqueses de San Esteban del Mar, amos
de los terrenos axacentes.
●Documentación histórica del topónimu: nel
Catastro del Marqués de la Ensenada
(1752): «la fuente que Llaman de Peña de
Francia».
●Otres observaciones sobre’l nome: la falsa
reinterpretación que fai relacionar esti
topónimu con Francia, tien producío
tracamundios ortográficos del tipu «Peña
de Francia», qu’apaez, por exemplu, nel
Catastro del Marqués de la Ensenada
(1752) o nel «Plano topográfico del partido
judicial de Gijón», de Demetrio G. Suárez
(1907). Fuera d’Asturies, pero en zona
histórica y llingüísticamente asturianolleonesa,
atopamos la «Sierra Peña
Francia» (qu’apaez escrito tamién como
«Sierra de Peña Francia», «Sierra de la
Peña de Francia») na provincia de
Salamanca, que de xuru nun ye más qu’una
reinterpretación d’un topónimu idénticu al
xixonés.
Les Peñes
Llugar de la parroquia de Santurio, barriu
de L’Aldea.
●Formación del topónimu: trátase del
sustantivu asturianu peñes, plural de peña
‘elevación en terrenu’, que s’aplica tamién a
la porción grande de piedra individualizao o
suelto.
●Etimoloxía: peña vien del llatín PĬNNAM
[pínnam] ‘almena’, por comparanza del
perfil d’un monte o cordal coles almenes
d’una muralla. El plural peñes vien de
PĬNNAS [pínnas].
El Peñéu
Llugar de la parroquia de Llavandera, barriu
de Tueya.
●Formación del topónimu: n’asturianu un
peñéu ye una ‘piedra, peña’, un ‘sitiu onde
hai muncha peña’, o una ‘elevación de peña
nun terrenu’. Trátase d’un deriváu de peña;
ver Les Peñes. El sufixu -éu tien valor
colectivu, como en carbayu → carbayéu,
faya → fayéu.
●Etimoloxía: ver Les Peñes. El sufixu -éu
tien orixe nel llatín -ĒTUM [-étum].