Cronica 2009 - SRG SSR

srgssr.ch

Cronica 2009 - SRG SSR

Cronica 2009

10 da schaner

SwissAwards

En il rom d’ina sairada da gala a Turitg vegnan surdads per la 7avla giada ils

SwissAwards.

19 fin 25 da schaner

Dis da film da Soloturn

Per la 44avla giada han lieu durant la quarta emna da schaner ils Dis da film da

Soloturn. La SRG SSR sustegna l’occurrenza dapi blers onns.

17 da favrer

Prolungaziun dal partenadi cun il Schweizer Sportfernsehen

La SRG SSR ed il Schweizer Sportfernsehen prolungheschan lur collavuraziun

contractualmain per quatter onns enfin la fin dal 2012.

7 da mars

Surdada dal Premi dal film svizzer «QUARTZ 2009»

Il Premi dal film svizzer «QUARTZ 2009», che vegn surdà en diesch differentas

categorias a cineastas e cineasts svizzers, vegn per l’emprima giada realisà en il

Center da cultura e congress (KKL) a Lucerna en il rom d’ina sairada da gala

organisada da la SRG SSR.

18 da mars

Convergenza da las medias

Il cussegl d’administraziun da la SRG SSR decida da crear l’onn current entaifer las

regiuns las premissas structuralas ed organisatoricas che permettan da lavurar a

moda convergenta en il sectur redacziunal. Per pussibilitar ina collavuraziun

sistematica duain las unitads d’interpresa, ch’èn anc separadas en Svizra franzosa

ed en Svizra tudestga en ils secturs radio e televisiun, crescher ensemen ad unitads

d’interpresa linguistic-regiunalas – sco quai ch’igl è il cas tar RSI e RTR. En ils

projects da convergenza regiunals na duai betg predominar in medium.

19 da mars

Conferenza da medias annuala e quint 2008 da la SRG SSR

La SRG SSR concluda l’onn da gestiun 2008 cun in deficit da 79,1 miu. francs (2007:

–18,5 miu. francs). Budgetà era in deficit da 57,0 miu. francs, tranter auter pervia da

las duas grondas occurrenzas da sport EURO 2008 ed ils gieus olimpics a Peking

betg refinanziablas dal tuttafatg. Il retgav dal manaschi crescha per 0,7 pertschient e

munta a 1580,7 miu. francs.


26 da mars

Fundaziun da «mxlab sa»

La SRG SSR fundescha la societad gestiunaria «mxlab sa» ed externalisescha

uschia sia plattafurma da musica «mx3.ch». Participadas a la firma èn: la Telvetia

S.A., ina filiala (100%) da la SRG SSR, la Societad svizra per ils dretgs dals auturs

d’ovras musicalas (SUISA) e la Societad Svizra dals Artists Interprets (SIG).

22 d’avrigl

Lantschada dal project naziunal «Convergenza & effizienza»

La SRG SSR nominescha Gérard Tschopp, directur da Radio Suisse Romande, sco

manader general dal project naziunal «Convergenza & effizienza». L’onn da rapport

duain vegnir creadas las premissas structuralas ed organisatoricas che permettan da

lavurar a moda convergenta en il sectur redacziunal.

23 fin 29 d’avrigl

Festival da film «Visions du Réel»

Per la 15avla giada ha lieu a Nyon il festival da film «Visions du Réel». La SRG SSR

sustegna il festival per films documentars dapi blers onns.

24 d’avrigl

Refurma da structuras da la SRG SSR

La radunanza da delegads da la SRG SSR approvescha la revisiun dals statuts ed

uschia la refurma da structuras da la SRG SSR. Cun quai stat la SRG SSR a partir

dal 2010 sut la direcziun strategica unitara dal cussegl d’administraziun da la SRG

SSR e sut la direcziun operativa directa dal directur general. La radunanza da

delegads ed ils cussegls regiunals obtegnan ulteriurs dretgs d’infurmaziun e da

proposta – ed en il rom da las directivas naziunalas han ils commembers da las

suprastanzas regiunalas dretgs da cundecider fatschentas definidas relevantas per il

program.

24 d’avrigl fin 10 da matg

Campiunadi mundial da hockey sin glatsch

A Berna ed a Turitg-Kloten ha lieu il campiunadi mundial da hockey sin glatsch.

Durant quell’occurrenza èn en servetsch 100 collavuraturas e collavuraturs da la

SRG SSR.

2 fin 5 da matg

Festival «Rose d’Or»

A Lucerna ha lieu per la 49avla giada il festival internaziunal da la branscha da

televisiun e divertiment «Rose d'Or». La SRG SSR sustegna l’occurrenza dapi blers

onns.


22 fin 24 da matg

Sentupada Litterara da Soloturn

La SRG SSR sustegna la Sentupada Litterara da Soloturn per la segunda giada cun

in partenadi da medias.

17 da zercladur

Midada dad art. 24 en la concessiun da la SRG SSR

Il Cussegl federal mida art. 24 da la concessiun ed aderescha uschia a la proposta

da la SRG SSR dals 26 da favrer 2009. En consequenza vegn stritgada la

disposiziun vertenta, tenor la quala persunas cun ina funcziun da manar entaifer la

structura d’interpresa da la SRG SSR n’èn betg elegiblas en il cussegl

d’administraziun da la SRG SSR. Quella disposiziun avess sfurzà d’excluder il

president regiunal dal cussegl d’administraziun.

22 da zercladur

Bloccada da las pajas e da las investiziuns e vendita d’immobiglias

Il cussegl d’administraziun da la SRG SSR deliberescha il concept da sanaziun e

decida davart in ulteriur concept valaivel a partir dal 2010. Quellas mesiras, che

prevesan tranter auter ina bloccada da las pajas l’onn 2010, ina bloccada da las

investiziuns e la vendita d’immobiglias, gidan a distgargiar ils quints annuals en la

perioda dal 2010 fin il 2014 per en media 30 miu. francs ad onn ed a reducir ils debits

per 366 miu. francs fin il 2014.

23 da zercladur

Demissiun dad Armin Walpen per la fin dal 2010

L’actual directur general da la SRG SSR, Armin Walpen, annunzia sia demissiun per

la fin dal 2010. La cumissiun da nominaziun dal cussegl d’administraziun maina il

process da recrutaziun per la successiun dal directur general e vegn a proponer

l’entschatta da la stad 2010 al cussegl d’administraziun duas fin trais persunas per

l’elecziun. La radunanza da delegads da la SRG SSR vegn a stuair approvar

l’elecziun. Gia avant in temp ha il vicedirectur general, Daniel Eckmann, decidì da sa

retrair per motivs persunals per la fin da schaner 2011.

28 da fanadur fin 1. d’avust

Radiotour

«Vision Schweiz. Vision Suisse. Visione Svizzera. Visiun Svizra.» Uschia sa cloma il

tema da la Radiotour da quest onn che vegn realisada dals programs da radio DRS

1, RSR La Première, RSI Rete Uno e Radio Rumantsch. En tut las quatter parts da la

Svizra tschertgan teams da redacziun quadrilings novas ideas e projects innovativs.

5 fin 15 d’avust

Festival da film da Locarno

Per la 62avla giada ha lieu en il Tessin il festival da film da Locarno. La SRG SSR

sustegna dapi numerus onns il festival enconuschent sin plaun internaziunal.


12 d’avust

Il DATEC approvescha ils statuts revedids da la SRG SSR

Il Departament federal per ambient, traffic, energia e communicaziun (DATEC)

approvescha ils novs statuts da la SRG SSR che la radunanza da delegads ha

decidì ils 24 d’avrigl. Uschia po vegnir realisada a partir dal 1. da schaner 2010 la

refurma da structuras ch’il Cussegl federal ha pretendì il november 2007.

14 fin 16 d’avust

Festival da musica internaziunal «Alpentöne»

Il festival da musica «Alpentöne» porscha dapi il 1999 mintga dus onns in podium

per musicistas e musicists dal territori alpin. Quels pon preschentar lur lavur creativa

en connex cun il mund alpin ad in public indigen ed a persunas d’ordaifer.

5 fin 6 da settember

Schubertiade – il festival da musica classica

Dapi l’onn 1980 organisescha Radio Suisse Romande mintga dus onns la

Schubertiade – in grond festival da musica classica che vegn adina realisà en in

auter lieu da la Svizra franzosa – quest onn a Payerne.

23 fin 27 da settember

Campiunadi mundial da ciclissem sin via

A Mendrisio vegn organisà il campiunadi mundial da ciclissem sin via. La SRG SSR

producescha sco «Host Broadcaster» il signal internaziunal da questa occurrenza.

Per far quai dovra ella 23 cameras staziunaras ed unitads mobilas cun quatter

cameras da moto ed ina camera da helicopter.

25 da settember

Dieta dals gremis

En il rom da la dieta dals gremis èn s’occupads ils represchentants da las societads

regiunalas a Berna cun il tema «L’uniun purtadra sin via a la nova rolla sociala».

Tematicas sco il «concept dal program», «contacts interns ed externs» ed

«emissiuns criticas envers las medias» furman ils puncts centrals da la dieta ed èn

d’impurtanza per l’activitad futura da l’uniun purtadra.

1. d’october

Nov directur da SR DRS

Iso Rechsteiner, il vicedirectur da Schweizer Radio DRS dapi il 2008 ed avant

manader da las redacziuns regiunalas, vegn elegì sco nov directur da radio

interimistic. Rechsteiner daventa il successur da Walter Rüegg che va en pensiun.


1. d’october

Nov directur da SF

Ueli Haldimann è il nov directur interimistic da Schweizer Fernsehen. Haldimann,

ch’è stà set onns schefredactur da SF e manader da la partiziun Infurmaziun,

daventa il successur dad Ingrid Deltenre che lavura da nov tar l’European

Broadcasting Union (EBU).

15 d’october

Radio digital: anc dapli programs da radio en ina qualitad optimala

Grazia al radio digital DAB+ po la Svizra tudestga uss era recepir World Radio

Switzerland (WRS). En Svizra franzosa vegn vitiers il program da radio DRS

Musikwelle. Ed er il Tessin po profitar dal radio digital: cun DAB+ pon las Tessinaisas

ed ils Tessinais uss era retschaiver DRS 1 e La Première.

29 d’october

Posiziun da la SRG SSR en connex cun il sboz da l’Ordinaziun davart radio e

televisiun (ORTV)

La SRG SSR beneventa la proposta da revisiun da l’ORTV. Igl è impurtant da crear

per emetturs esters e svizzers las medemas premissas legalas e da garantir a tuts la

medema cumpetitivitad. Perquai fa la SRG SSR propostas da midada en sia posiziun

areguard las pussaivladads da far reclama, las interrupziuns da reclama e la

purschida online.

2 fin 9 da november

Cinéma Tous Écrans – premi «Pacte Multimédia»

Per la 15avla giada ha lieu a Genevra il festival internaziunal «Cinéma Tous Écrans»

– in inscunter da la tenda da kino, da la televisiun classica e dals moniturs da las

novas medias. En il rom da questa occurrenza surdattan la SRG SSR e ses

partenaris il premi «Pacte Multimédia» per promover l’innovaziun en il sectur da las

novas tecnologias da communicaziun.

4 fin 8 da november

Dis dals films curts a Winterthur

Ils Dis dals films curts a Winterthur, che la SRG SSR sustegna dapi onns, han lieu

quest onn per la 13avla giada.

9 da november

Sustegn da films documentars

La SRG SSR e sias unitads d’interpresa televisivas surdattan en il rom dal «Pacte de

l’audiovisuel» trais contribuziuns per il svilup da films documentars che duran tut la

saira. Previsa è ina contribuziun dad 80 000 francs ad onn repartida sin maximalmain

set projects.


10 da november

Simposi da qualitad da la SRG SSR

Per la SRG SSR èsi da muntada centrala da s’occupar cuntinuadamain cun aspects

formals e tematics da la qualitad e cun ils standards qualitativs e quai tant en il

mintgadi medial da las collavuraturas e dals collavuraturs, sco er en il discurs cun la

publicitad. A chaschun da l’emprim simposi da qualitad da la SRG SSR han debattà

a Lucerna passa 150 expertas ed experts da medias davart la qualitad e la relevanza

en il service public.

20 da november

Aur per HD suisse sco il meglier emettur da HD via satellit

En il rom d’ina sairada da gala a Venezia obtegna HD suisse il HOT BIRD TV

Award sco il meglier emettur da HD via satellit (Eutelsat). L’otgavel program da

televisiun da la SRG SSR sa fa valair cunter la concurrenza internaziunala ordvart

qualifitgada.

24 da november

Convergenza da las medias en Svizra franzosa

Il cussegl d’administraziun da la SRG SSR decida, en il rom dal project da

convergenza naziunal, d’unir las duas unitads d’interpresa Radio Suisse Romande e

Télévision Suisse Romande a partir dal schaner 2010. Gilles Marchand, fin ussa

directur da TSR, daventa il directur da la nova interpresa Radio Télévision Suisse

(RTS).

27 da november

Rapport «Basegn finanzial 2011–2014»

Per pudair ademplir ses mandat da prestaziun mancan a la SRG SSR per la perioda

dal 2011 fin il 2014 en media 54 miu. francs ad onn. Quai è la conclusiun dal rapport

«Basegn finanzial 2011–2014» che la SRG SSR ha inoltrà al Cussegl federal. Quel

gremi sto ussa decider cun tge mesiras da vart da las entradas u da las expensas

che la SRG SSR duai metter en urden sias finanzas.

12 da december

Credit Suisse Sports Awards

La gimnasta artistica Ariella Kaeslin ed il skiunz Didier Cuche vegnan elegids a

Basilea sco sportista resp. sportist da l’onn.

14 fin 19 da december

Mintga rap quinta!

Il project da collecta singular «Mintga rap quinta!» da DRS 3 e Schweizer Fernsehen

en collavuraziun cun la Chadaina da fortuna rimna la terza emna da december 7 019

284 francs per il cumbat cunter malaria. Var in milliun francs en contant

contribueschan las numerusas aspectaturas ed ils numerus aspectaturs che han

visità il container da vaider sin la Plazza federala.


16 da december

Convergenza da las medias en Svizra tudestga

Il cussegl d’administraziun da la SRG SSR approvescha las directivas da cuntinuar a

concretisar la fusiun da Schweizer Radio DRS e Schweizer Fernsehen. La decisiun

definitiva vegn prendida il zercladur 2010, cura ch’èn avant maun ils concepts

detagliads. Vegnir realisada duai la fusiun da SR DRS e SF alura a partir dal 1. da

schaner 2011.

More magazines by this user
Similar magazines