Diskurtso kooperatiboak langile-kolektiboan ... - Euskara

Atal enpirikoa
Planteamendu metodologikoa
Kooperatiba eta kooperatibagintza 63 kokatu behar ditugu ikerketa
honen erdigunean. Gaur egungo kooperatibistek, kooperatiba jakin
bateko protagonistek kooperatibagintza nola bizi eta sentitzen
duten aztertzera gatoz. Kooperatibismoaren inguruko zein
pertzepzio nagusitzen diren, pertzepzio horren gainean ze
diskurtso eraikitzen dituzten aztertzera.
Kooperatiba barruan dauden sare ezberdinetara hurbilduz,
aztergai izango ditugu zeintzuk diren harreman- sare horietan
diskurtso dominanteak gaurko kooperatibagintzaren aurrean. Hau
da, azterketa enpirikoaren filtroa pasatu nahi diegu atal
teorikoan aipatu ditugun zentzu krisia eta demokraziari eusteko
zailtasunei. Era berean gaurko kooperatibismoaren aurrean, gaur
egungo protagonistek dituzten bisio ezberdinak identifikatu eta
aztertuko ditugu. Azken batean, gaur egun kooperatiba eta
kooperatibagintzari buruz dauden diskurtso edo iritzi multzoak
identifikatu eta aztertzea izango dugu helburu.
Egungo kooperatibistek kooperatibismoa nola ikusten duten, nola
formulatzen duten jakin nahi dugu. Eta formulazio horretan
zenbat ikuspegi desberdin multzoka ditzakegun, zenbaterainoko
adostasunak dauden, diskurtso kontrajarririk dagoen.
Nola hurbildu galdegai horietara?
1. Esparruaren hautua
Baztertu egin dugu Arrasateko Esperientziaren egungo egitura –
Mondragon Taldea- osatzen duten kooperatiba desberdinetako
laginekin jokatzeko aukera. Bestelakoa da gure hautua:
kooperatiba bakar bateko kolektiboan jartzea gure argazkiaren
markoa. Lan-kolektibo batean zentratu nahi izan dugu ikerketa.
Unitate sozial oso bat da kooperatiba bat, ibilbide jakin bat
egin duena, esperientzia multzo bat pilatu duena. Bertan,
esperientzia, ardura, postu, adin eta kualifikazio desberdineko
pertsonak biltzen dira, helburu bateratua duen unitate
heterogeneo bat osatuz. Unitate horietako batean egin nahi dugu
kooperatibagintzaren diskurtsoen argazkia.
Fagor Arrasate aukeratu dugu horretarako. Kooperatiba historikoa
dugu Fagor Arrasate, MCCren ‘ama’ den gunekoa. Arrasateko
Esperientzian sortutako bigarren enpresa da. Esperientzia honen
ibilbide historiko osoa dauka bere baitan, eta une honetan ere
Fagor Taldeko erreferentzia-enpresetakoa da. Arrasateko
Esperientziaren erdigune geografiko eta soziologikoan kokatzen
da, esperientziak sortu duen kulturaren muinean. Unitate egokia,
beraz, beronetan gertatzen ari diren aldaketak behatzeko.
Tamainaz, handia, baina ez handienetakoa, MCCko kooperatiba
63
Gogora dezagun kooperatibagintza zentzu aspektuari deritzogula,
orokortasunari, kooperatibismoaren zentzuari. Kooperatibaren azterketa berriz
gertuko errealitatearen azterketa litzateke, kasu honetan Fagor Arrasate nahiz
berak parte hartzen duen gainontzeko sare egiturena.
211