Diskurtso kooperatiboak langile-kolektiboan ... - Euskara

Atal enpirikoa
Eztabaida Taldeen azterketa
Ildo beretik, helduagoak, sortzaile edo eta bidegile izan
direnak etsituta sumatzen ei dituzte eta horrek ere gazteago
direnei kalte egiten dietela uste dute. Kooperatiban bide bat
egin dutenak kooperatibako protagonista sentitzen ez badira,
nola sentituko dira gazteak edo eta iritsi berriak?
5.4 Partehartzeaz
Partehartzeari dagokionez, lan antolaketa eta lanpostuari
lotutako partehartzeaz duten iritzian ia denek bat egiten dute.
Arrasateko lan harremanei dagokienean badirudi bakoitzak bereari
bakarrik begiratzen diola. Komunikazioa falta dela diote,
departamenduak euren artean lehiatzeko joera dutela eta ez
dagoela osotasuna ikusteko joerarik.
Gazteek ere badute euren ikuspuntu partikularra gai honekiko.
Izan ere, arduradunak urrin sentitzen dituztela aitortu dute.
Gainera, ardura postuetarako lanpostuak sortzen direnean,
gehienetan ia beti ez bada, kanpotik ekartzen direla salatu
dute. Ez dira aintzat hartuta sentitzen. Aukera gutxi eskaintzen
zaiela uste dute.
Partehartze instituzionalaz, berriz, ikuspegi gehiago aurkitu
ditugu. Organoei dagokionean, organoak egotea eta euren
funtzionamendua garrantzitsua da, nahiz eta kontraesanak egon
eta teoria eta praktikaren artean aldea nabarmena izan. Dena
den, partehartze instituzionala gaurkotu beharra ere aipatu dute
batzuek. Demokrazian sakondu eta organoen funtzio eta egitekoak
berpentsatzeko beharra.
Kritika ezkorrek eta antzuek egiten duten kaltea ere izan da
izpide. Batzuen kritika egitea ona izan daiteke, berau
eraikitzailea eta aldaketarako elementuez osatuta baldin badago.
Aldiz, ernegaziotik egindako kritika ez-eraikitzailea ez dute
gustuko, ez du ezertarako balio. Beste ikuspegi batek, ordea,
kritika beti dela ona dio. Kritika egotea seinale ona dela,
kooperatiba bizirik dagoen seinale.
Urteko Batzar Nagusira joateagatik oparia jasotzearena ere izan
da eztabaidagai. Batzuen ustez, oparia eman beharra sintoma
txarra da, zerbaitek failatzen duen seinale da.
Gazteen artean bada multzo bat organoetan partehartzeko prest
agertu dena. Dena den, kontseilu sozialetik hasi beharko
liratekeela uste dute kontseilu errektoreko kide izateko bisio
gehiago beharko luketela uste baitute.
317