Diskurtso kooperatiboak langile-kolektiboan ... - Euskara

Atal teorikoa
Kooperatibismoaren bi logikak
Laugarren estadio honetan, beraz, eskema demokratikoak behea jo
du, eta kooperatibako araudiak ezer jaso ez badu ere norabide
honetan, de facto boterea dagoeneko ez dago kideen eta
ordezkarien esku.
Meister-ek onartzen du ez dagoela probarik laugarren estadioa
esperientzia komunitario guztietan gertatzen dela esateko.
Autore honek kooperatiben bizitza zikloaren gainean gogoeta egin
zuen garaian ez zegoen hori baieztatzerik, baina horixe bera da,
hain zuzen ere, autorearen ustez aztertu beharrekoa.
Badirudi dimentsio txikiko esperientziak direla demokraziaren
murrizte horri aurre egiteko baliabide gehiago dituztenak.
Ikerketa gehiago beharko litzateke, autorearen ustetan,
tendentzia hori konfirmatzeko. Autoreak berak baieztatzen du
egon badaudela bilakaera norabide hori konfirmatzen duten
azterketak, eta mugimendu kooperatiboetako protagonistek beraiek
identifikatzen dute aipatutako tendentzia hori. Asanbladetako
parte hartzearen hozte eta murrizte indartsua litzateke
adibidea. Gainera, parte hartzearen hozte hori ez litzateke
soilik komunitatearen tamainaren ondorio izango, talde txikietan
ere sumatu delako berau.
Laugarren estadio honetan, aipatu ditugun tendentzia horien
ondorioz, horrenbeste aipatzen den hezkuntza kooperatiboak ez du
leku gehiegirik, ez baita beharrik ez eta erabilgarritasunik
ikusten. Autorea prentsa kooperatibistaren iritzi ildo baten
aurka azalduko zaigu, honek guztiak ez baitu esan gura ‘espiritu
kooperatibista’ hil egin denik. Eztabaida honetan Meister-ek
iritzi interesgarria bezain latza azaltzen du: mentalitate
kooperatibistaren errorea, akaso, batasun beharra etengabea izan
behar delako ustea izan daiteke, ez baita arraroa espiritu
kooperatiboa izoztea, ez baldin badago kooperazioarako
beharrizanik. Hau da, kideen bizi mailaren hobetzeak parte
hartzearen aldeko espiritua hoztu egin du. Baina hau gertatu da
langile mugimendu osoan, bai kooperatibismoan, bai
sindikalismoan eta bai langile alderdietan. Meister-en esanetan,
inork ez daki nola egiten zaion aurre eragozpen horri.
Hor legoke Arrasateko Kooperatiba Esperientziaren baitako
kooperatiben buruhaustea ere: nola berritu, batez ere belaunaldi
berriengan sentimendu kooperatiboa?
38