Diskurtso kooperatiboak langile-kolektiboan ... - Euskara

Atal enpirikoa
Emaitza orokorrak
Bazkidetzek gora egiteko euren lana banatu beharko balute ere,
prest leudeke galdetutakoen artetik %60 (ados edo erabat ados).
Zalantza izan dute %20k eta “ez ados/ez kontra” aukera markatu
dute. Bazkidetzak gora egiteko euren lana banatu behar izatearen
kontra agertu da %15a.
Era berean, interkooperazio sistema ere mantendu beharreko
elementua dela uste du gehiengoak. Mantentzearen alde agertu da
%92a (“ados”: %63; eta, “erabat ados”: %28,6a).
2. Emaitzetatik bildutako ondorioak
Lan hau hastera abiarazi gintuen akuilu nagusia har dezagun
gogoan. Kooperatibagintzari buruz langile kooperatibistek
dituzten diskurtso eta sentipenak identifikatu nahi genituen,
eta honek atzean izan du beste kezka bat: egungo kooperatibak
etorkizuneko proiektu kooperatibo batera abiatzeko izan
ditzaketen aukerak aztertzea.
Izan ere, ingurune akademikoan badira pertzepzioak diotenak
kooperatibismoaren eraldaketa-gogoa iraganeko gauza dela,
jadanik ez dagoela proiektu kooperatiborik (belaunaldi
aldaketengatik, gizarte eta balore aldaketengatik, tamainagatik,
teknokratizazio prozesuengatik…). Badira bestelako iritziak ere,
ingurune enpresarialean eta sozialean. Baina zer diote lanbazkide
kooperatibistek? Horixe jakin nahi izan dugu, pertzepzio
pertsonal mugatuetatik haratago, hurbilketa kualitatibo eta
kuantitatiboa eginez.
Lan-kolektiboaren iritzi eta sentipenetan murgildu ondoren,
ondorio handietako bat izan da badagoela kooperatibagintzari
buruzko diskurtso eraikitzaile bat lan-kolektiboaren baitan,
beste bi pertzepzio-multzorekin nahasian. Eta diskurtso
eraikitzaile horren presentzia kuantitatiboa esanguratsua dela.
Esanguratsua, lan hau abiatu genuenean pentsa genezakeena baino
sendoagoa.
Honek pentsarazten du kooperatibagintza biziberritzeko
potentzial bat egon litekeela. Aldi berean, ordea, aurreko
ondorio horrekiko nolabaiteko kontraesanean, ez dago
etorkizuneko kooperatibagintza horren irudikapen indartsurik.
Nolabait, potentzialki zerbait ereiteko lurra prest legokeela
ematen du, baina hori guztia artikulatuko lukeen norbait edo
zerbait, gidaritza moduko bat, irudikapen bat, falta dela
dirudi.
Zentzu horretan, ez dugu diskurtso artikulaturik aurkitu.
Etorkizunean kooperatibagintzak nondik nora jo beharko lukeen
argitzen duen maparik ez da ageri. Badira, bai, etorkizunerako
pistak, lan-kolektiboaren zati esanguratsuetan mamitzen diren
iritziak:
501