Diskurtso kooperatiboak langile-kolektiboan ... - Euskara

Atal teorikoa
Arrasateko Kooperatiba Esperientziaren oinarri filosofikoak
egituren egokitzapenarekin batera, ordena berria eraiki nahi
bada denon partehartzearen bidez.
Azken finean pertsonaren eta komunitateen emantzipazioa da
kontua, bizitzaren ahalik eta aspektu gehienetan. Baina
emantzipazioari aurrizki arradikal bat jartzen dio:
AUTOemantzipazioaz hitz egingo du. Pertsonek, herriek,
komunitateek izan behar dute beren askapenaren protagonista. Ez
du liberazioan sinisten, autoliberazioan ez bada: norbere
askatasunaren eraikitze diziplinatu eta solidarioa da bidea.
Beraz, pertsona da eraldaketaren oinarria eta subjektu aktiboa;
behetik gorako iraultza izango da.
Heteronomiatik autonomiarako proiektu gisa definitzen dute
Lankidetza liburuko egileek:
“Heteronomiatik autonomiarako proiektua da
arizmendiarra. Gizakiaren portaera eta
jardunbidea kanpo baldintzen determinaziotik
askatu, eta pertsona eta komunitate autoeratuak
aldarrikatuko ditu, lankidetzan oinarritutako
harreman autoarautuen bidez. Kanpo logika
arrotzek administratutako subjektua baino, bere
ekinbidea administratzeko gai den pertsona eta
kolektiboa.” 34
Aipatu dugun bezala, hiru ardatz nagusi ditu Arizmendiarrietaren
pentsamenduak: lana, hezkuntza eta elkartasuna. Komunitatearen
eta pertsonaren garapena bateratzeko, Arizmendiarrietak
bultzatutako eraldaketa-proiektuak hiru ardatz nagusi horiek
izango ditu. Ondoren bakoitzaren inguruko zenbait ideia landuko
ditugu.
1.2 Hezkuntza
Aldaketa edo iraultza zentzu kulturalean planteatu zituen, hau
da, benetako aldaketak pertsona eta komunitatearen kontzientzia
eraldaketatik etorriko zirela uste zuen, eta ez altxamenduen
ondorioz. Arizmendiarrietaren aburuz, gehiengo sozialak bizi
zuen dependentzia material eta kulturaletik askatzeko bidea,
kultura edo kontzientzia aldaketa zen. Horregatik hezkuntzak
berebiziko garrantzia hartuko du Arizmendiarrietaren proiektuan
(hezkuntza zentzu zabalean: izpiritualki, ideologikoki eta
teknikoki). Hezkuntza kooperatiboa gizakion lana komunitatearen
zerbitzura jartzeko tresna moduan ulertu eta aurkeztu zuen.
Hezkuntza AKEren funtsezko balio eta erreminta gisa ulertzen
zuen, beraz. Aski ezaguna da, lehenengo kooperatiba martxan
jarri aurretik Arizmendiarrietak 15 bat urteko hezkuntza-ereite
lan inportante bat burutu zuela.
34 Agirre, N. op.cit. 149. Orrialdean.
60