Voltaren Dolo töflur 25 mg

FYLGISEÐILL: UPPLÝSINGAR FYRIR NOTANDA LYFSINS
Voltaren Dolo ® 25 mg húðaðar töflur
Kalíumdíklófenak
Lesið allan fylgiseðilinn vandlega þar sem hann veitir mikilvægar upplýsingar um notkun
lyfsins.
Þetta lyf er fáanlegt án lyfseðils. Engu að síður er nauðsynlegt að taka Voltaren Dolo á réttan hátt til að
ná sem bestum árangri.
- Geymið fylgiseðilinn. Nauðsynlegt getur verið að lesa hann síðar.
- Leitið til lyfjafræðings ef þörf er á frekari upplýsingum eða ráðum.
- Leitið til læknis ef sjúkdómseinkenni versna eða lagast ekki eftir 3 daga.
- Látið lækninn eða lyfjafræðing vita ef vart verður aukaverkana sem ekki er minnst á í þessum
fylgiseðli eða ef aukaverkanir sem taldar eru upp reynast alvarlegar.
Í fylgiseðlinum:
1. Upplýsingar um Voltaren Dolo og við hverju það er notað
2. Áður en byrjað er að taka Voltaren Dolo
3. Hvernig taka á Voltaren Dolo
4. Hugsanlegar aukaverkanir
5. Hvernig geyma á Voltaren Dolo
6. Aðrar upplýsingar
1. UPPLÝSINGAR UM VOLTAREN DOLO OG VIÐ HVERJU ÞAÐ ER NOTAÐ
Voltaren Dolo inniheldur díklófenak sem tilheyrir flokki bólgueyðandi gigtarlyfja (sem ekki eru sterar
(NSAID)). Voltaren Dolo hefur verkjastillandi áhrif og dregur úr bólgulíkum einkennum.
Voltaren Dolo dregur hratt úr vægum verkjum svo sem:
- bakverkjum, höfuðverk, tannpínu, tíðaverkjum, gigtverkjum.
Verið getur að læknirinn hafi ávísað lyfinu við öðrum sjúkdómi eða í öðrum skömmtum en tiltekið er í
þessum fylgiseðli. Ávallt skal fylgja fyrirmælum læknis og leiðbeiningum á merkimiða frá lyfjabúð.
2. ÁÐUR EN BYRJAÐ ER AÐ TAKA VOLTAREN DOLO
Ekki má taka Voltaren Dolo
• ef þú ert með ofnæmi fyrir díklófenaki eða einhverju öðru innihaldsefni Voltaren Dolo (talin
upp í kafla 6)
• ef þú hefur fengið ofnæmisviðbrögð við lyfjum sem notuð eru við verkjum, bólgu eða hita, svo
sem díklófenaki, íbúprófeni eða acetýlsalicýlsýru (sem einnig er notuð sem blóðþynningarlyf).
Ofnæmisviðbrögðin geta verið astmaeinkenni, öndunarerfiðleikar, húðútbrot, þroti í andliti og
nefrennsli. Ef þú ert í vafa skaltu hafa samband við lækni eða lyfjafræðing
• ef þú ert með magasár eða sár í þörmum
• ef blóð er í hægðum eða hægðir eru svartar (einkenni um blæðingu í meltingarvegi)
• ef þú ert með alvarlegan nýrnasjúkdóm eða lifrarsjúkdóm
• ef þú ert með alvarlega hjartabilun
• ef þú ert á síðustu þremur mánuðum meðgöngu
• ef fækkun blóðflagna er alvarleg
1

Gæta skal sérstakrar varúðar við notkun Voltaren Dolo
Hafðu samband við lækni áður en notkun Voltaren Dolo hefst:
• ef þú hefur verið með maga- eða þarmasjúkdóma, t.d. magasár, blæðingu eða svartar hægðir. Ef
þú hefur einhvern tíma fengið magaóþægindi eða brjóstsviða eftir að hafa tekið verkjastillandi
eða bólgueyðandi lyf
• ef þú ert með skerta hjarta-, lifrar- eða nýrnastarfsemi
• ef þú ert með astma
• ef þú notar önnur verkjastillandi lyf eða bólgueyðandi lyf
• ef hætta er á vökvaskorti (t.d. vegna sjúkdóms, niðurgangs eða fyrir/eftir stóra skurðaðgerð)
• ef þú ert með sjúkdóm sem hefur áhrif á blóðstorknun eða aðra blóðsjúkdóma, þ.m.t. sjaldgæfur
lifrarsjúkdómur sem nefnist lifrarporfýría.
Ef eitthvað af ofantöldu á við um þig, skaltu leita ráða hjá lækni eða lyfjafræðingi áður en þú tekur
Voltaren Dolo.
Gæta skal sérstaklega að eftirfarandi:
Lyfjum eins og díklófenaki getur fylgt aukin hætta á hjartaáfalli og heilaslagi. Hættan eykst við notkun
stórra skammta og við langvarandi notkun.
Ekki má veita meðferð:
- með stærri skammti en ráðlögðum skammti sem er allt að 3 töflur á sólarhring eða
- lengur en í 3 sólarhringa.
Ef þú ert með hjartasjúkdóm, hefur fengið heilaslag eða telur að þú sért í hættu hvað þetta varðar
(t.d. ef þú ert með of háan blóðþrýsting, sykursýki, of hátt kólesteról eða ef þú reykir) skaltu hafa
samband við lækni eða lyfjafræðing áður en þú tekur Voltaren Dolo.
Voltaren Dolo getur dulið einkenni sýkingar (t.d. höfuðverk og háan hita), þannig að erfitt getur
verið að greina þær. Ef þú leitar til læknis vegna lasleika skaltu ávallt láta lækninn vita að þú takir
Voltaren Dolo.
Ef þú notar verkjastillandi lyf við höfuðverk í langan tíma getur höfuðverkurinn versnað og orðið
tíðari (höfuðverkur vegna ofnotkunar lyfja). Hafðu samband við lækni ef þú finnur fyrir þessu eða ert í
vafa. Hugsanlegt er að hætta þurfi meðferðinni.
Notkun annarra lyfja
Látið lækninn eða lyfjafræðing vita um önnur lyf sem eru notuð eða hafa nýlega verið notuð, einnig
þau sem fengin eru án lyfseðils.
Talaðu við lækni áður en þú tekur Voltaren Dolo ef þú ert á meðferð með:
• litíum eða lyfjum við þunglyndi sem eru sértækir endurupptökuhemlar serótóníns (SSRI) svo
sem flúoxetín eða paroxetín
• dígoxíni (sem er hjartalyf)
• ACE-hemlum eða betablokkum (lyfjum við of háum blóðþrýstingi og hjartabilun)
• metótrexati (lyfi við ákveðunum gerðum krabbameins eða gigt)
• sykursýkilyfi, öðru en insúlíni
• þvagræsilyfi (til að auka magn þvags)
• lyfi sem notað er til að koma í veg fyrir blóðtappa (blóðþynningarlyfi eða segavarnarlyfi svo
sem heparíni eða warfaríni)
• öðrum bólgueyðandi eða verkjastillandi lyfjum svo sem acetýlsalicýlsýru og íbúprófeni
• barksterum (lyfjum við bólgum í líkamanum)
• ciclósporíni eða takrólímus (lyfjum sem m.a. eru notuð handa sjúklingum sem gengist hafa
undir líffæraígræðslu)
• ákveðnum sýklalyfjum (kínólónum við bakteríusýkingum)
• blóðfitulækkandi lyfjum (kólestýramíni, kólestipóli)
2

• súlfinpýrasóni (gigtarlyfi) eða vorikónasóli (lyfi við sveppasýkingum)
• fenýtóín (lyf við flogaveiki).
Ef Voltaren Dolo er tekið með mat eða drykk
Taka skal lyfið inn með glasi af vatni. Töfluna á að gleypa heila og hana má hvorki tyggja né mylja.
Til að ná hámarksverkun á að taka töfluna inn fyrir máltíð.
Meðganga og brjóstagjöf
Leitið ráða hjá lækni eða lyfjafræðingi áður en lyf eru notuð.
Meðganga
Láttu lækninn vita ef þú ert þunguð eða telur að þú gætir verið þunguð. Þú mátt ekki taka Voltaren
Dolo.
Það er sérstaklega mikilvægt að Voltaren Dolo sé ekki notað á síðustu þremur mánuðum
meðgöngunnar því það getur skaðað ófætt barnið eða valdið erfiðleikum í fæðingu.
Díklófenak getur, eins og önnur bólgueyðandi lyf, dregið úr líkum á þungun. Þessi áhrif hverfa þegar
þú hættir að nota Voltaren Dolo. Ef þú ráðgerir þungun, eða átt erfitt með að verða þunguð, skaltu
ræða það við lækninn.
Brjóstagjöf
Konur sem hafa barn á brjósti mega ekki nota Voltaren Dolo, það getur verið skaðlegt fyrir barnið.
Láttu lækninn vita ef þú ert með barn á brjósti.
Akstur og notkun véla
Voltaren Dolo hefur ekki áhrif á hæfni til aksturs og notkunar véla.
Voltaren Dolo getur hins vegar, eins og á við um önnur verkjastillandi lyf, valdið aukaverkunum í
mjög sjaldgæfum tilvikum, svo sem sjóntruflunum, sundli og syfju. Ef þú færð slíkar aukaverkanir
skaltu hvorki aka eða nota vélar. Hafðu samband við lækninn, ef þú færð slíkar aukaverkanir.
Hver og einn verður að leggja mat á getu sína til aksturs og starfa sem krefjast óskertrar árvekni. Eitt
af því sem getur haft áhrif á slíkt er lyf, vegna verkunar sinnar eða aukaverkana. Lýsing á verkun og
aukaverkunum er í öðrum köflum fylgiseðilsins. Lesið því allan fylgiseðilinn. Ef þörf er á skal ræða
þetta við lækni eða lyfjafræðing.
Mikilvægar upplýsingar um tiltekin innihaldsefni Voltaren Dolo
Voltaren Dolo inniheldur súkrósa. Hafðu samband við lækni áður en þú notar þetta lyf ef læknirinn
hefur sagt þér að þú þolir ekki ákveðnar sykurtegundir.
3. HVERNIG TAKA Á VOLTAREN DOLO
Takið lyfið alltaf eins og læknirinn hefur sagt til um. Ef þú ert ekki viss um hvernig á að nota lyfið
leitaðu þá upplýsinga hjá lækninum eða lyfjafræðingi.
Fullorðnir og unglingar eldri en 14 ára
Byrjið á að taka 1 töflu, þegar einkennin koma fram. Takið síðan 1 töflu á 4 til 6 klst. fresti eftir
þörfum, þó að hámarki 3 töflur á sólarhring.
Töfluna á að gleypa heila með glasi af vatni. Til þess að ná hámarksverkun á ekki að taka töfluna inn
með máltíð eða rétt eftir lok máltíðar.
3

Aldraðir
Aldraðir geta verið of næmir fyrir Voltaren Dolo og öðrum verkjastillandi lyfjum.
Fylgja skal leiðbeiningum nákvæmlega og nota eins fáar töflur og hægt er til að draga úr einkennum.
Það er sérstaklega mikilvægt fyrir aldraða sjúklinga að láta lækninn vita tafarlaust ef fram koma
aukaverkanir.
Börn
Börn yngri en 14 ára mega ekki nota Voltaren Dolo nema samkvæmt fyrirmælum læknis.
Ekki taka of mikið af Voltaren Dolo
Taktu Voltaren Dolo ekki lengur en í 3 sólarhringa. Hafðu samband við lækninn ef einkennin hverfa
ekki eða ef þau versna. Lækninum ber að ganga úr skugga um að einkennin séu ekki af völdum
alvarlegs sjúkdóms.
Notaðu ekki stærri skammt en ráðlagður er. Mikilvægt er að þú notir eins lítinn skammt og hægt er til
að draga úr verkjum og að þú notir Voltaren Dolo ekki lengur en nauðsynlegt er.
Ef stærri skammtur en mælt er fyrir um er tekinn
Ef of stór skammtur af lyfinu hefur verið notaður, eða ef barn hefur í ógáti tekið inn lyfið skal hafa
samband við lækni, sjúkrahús eða eitrunarmiðstöð (sími 543 2222).
Ef gleymist að taka Voltaren Dolo
Ef þú hefur gleymt að taka einn skammt, skaltu taka hann um leið og þú manst eftir því. Ef komið er
að næsta skammti skaltu sleppa skammtinum sem gleymdist. Ekki á að tvöfalda skammt til að bæta
upp skammt sem hefur gleymst að taka.
4. HUGSANLEGAR AUKAVERKANIR
Eins og við á um öll lyf getur Voltaren Dolo valdið aukaverkunum en það gerist þó ekki hjá öllum.
Sumar aukaverkanir geta verið alvarlegar. Hafðu samband við lækni ef þú færð einhverja
eftirtalinna aukaverkana:
Sjaldgæfar aukaverkanir (koma fyrir hjá 1 til 10 af hverjum 1.000 sjúklingum):
Slæmur magaverkur, blóðugar eða svartar hægðir, blóðug uppköst
Öndunarerfiðleikar og þyngsli fyrir brjósti
Skert nýrnastarfsemi
Gulleita húð eða augnhvítu (einkenni lifrarbólgu)
Mjög sjaldgæfar aukaverkanir (koma fyrir hjá 1 til 10 af hverjum 10.000 sjúklingum):
Ofnæmisviðbrögð með þrota í andliti, munni, tungu eða koki, oft ásamt útbrotum og kláða. Lost
Útbrot með blöðrum, flögnun húðar, rauð eða ljósfjólublá húð, blöðrur við munn og augu
Bráð nýrnabilun, breyting á útliti eða magni þvags
Óvenjulegar blæðingar eða marblettir sem koma óvenjulega auðveldlega, hár hiti, eða
viðvarandi hálssærindi
Lifrasjúkdómar
Ristilbólga
Aukaverkanir sem koma örsjaldan fyrir (koma fyrir hjá færri en 1 af hverjum 10.000 sjúklingum):
Brjóstverkur, yfirlið, hjartabilun
Skyndilegur og slæmur höfuðverkur, hnakkastífleiki, taltruflanir og krampar
Vefjaskemmdir í vöðvum
Lungnabólga
Lifrarbilun
4

Lyfjum eins og díklófenaki getur fylgt aukin hætta á hjartaáfalli og heilaslagi.
Aukaverkanir sem ekki eru alvarlegar
Aðrar aukaverkanir, sem geta komið fram, eru að jafnaði vægar. Nokkrar þessara aukaverkana hafa
verið tilkynntar í tengslum við stærri skammta af díklófenaki, virka efnisins í Voltaren Dolo, sem
notaðir hafa verið í langan tíma. Ef einhverjar af þessum aukaverkunum koma fram hjá þér skaltu hafa
samband við lækni eða lyfjafræðing.
Mjög algengar aukaverkanir (koma fyrir hjá fleiri en 1 af hverjum 10 sjúklingum):
Niðurgangur, meltingartruflanir
Algengar aukaverkanir (koma fyrir hjá 1 til 10 af hverjum 100 sjúklingum):
Magaverkur, ógleði, uppköst, vindgangur, hægðatregða, lystarleysi
Höfuðverkur, sundl, suð fyrir eyrum
Húðútbrot
Aukið magn lifrarensíma
Blóðþrýstingshækkun, þroti á handleggjum, höndum, fótleggjum og fótum (bjúgur)
Sjaldgæfar aukarverkanir (koma fyrir hjá 1 til 10 af hverjum 1.000 sjúklingum):
Ofsakláði, exem og bólga í húð
Ofnæmi
Nefrennsli
Svefnleysi, óróleiki, skapsveiflur, kvíði
Mjög sjaldgæfar aukaverkanir (koma fyrir hjá 1 til 10 af hverjum 10.000 sjúklingum):
Hjartsláttarónot, lengdur blæðingartími, meðvitundarskerðing
Aukaverkanir sem koma örsjaldan fyrir (koma fyrir hjá færri en 1 af hverjum 10.000 sjúklingum):
Sjóntruflanir, heyrnarskerðing
Vistarfirring, martraðir, minniserfiðleikar, krampar og skjálfti, breyting á bragðskyni
Æðabólga
Látið lækni eða lyfjafræðing vita ef vart verður við aukaverkanir sem ekki er minnst á í þessum
fylgiseðli eða ef aukaverkanir sem taldar eru upp reynast alvarlegar. Þar með er hægt að tilkynna
aukaverkanir til Lyfjastofnunar og bæta þannig þekkingu á aukaverkunum.
Sjúklingar og aðstandendur þeirra geta einnig tilkynnt aukaverkanir beint til Lyfjastofnunar.
Leiðbeiningar eru á heimasíðu Lyfjastofnunar (sjá „Aukaverkanir“) www.lyfjastofnun.is
5. HVERNIG GEYMA Á VOLTAREN DOLO
• Geymið þar sem börn hvorki ná til né sjá.
• Ekki skal nota Voltaren Dolo eftir fyrningardagsetningu sem tilgreind er á öskjunni á eftir
„fyrnist“. Fyrningardagsetning er síðasti dagur mánaðarins sem þar kemur fram.
• Ekki má fleygja lyfjum í skólplagnir eða heimilissorp. Leitið ráða hjá lyfjafræðingi um hvernig
heppilegast er að losna við lyf sem ekki þarf að nota lengur. Þetta er gert til þess að vernda
umhverfið.
5

6. AÐRAR UPPLÝSINGAR
Hvað inniheldur Voltaren Dolo
- Virka innihaldsefnið er kalíumdíklófenak 25 mg
- Önnur innihaldsefni eru magnesíumsterat, póvídón, vatnsfrí kísilkvoða, natríumsterkjuglýkólat,
maíssterkja, tríkalsíumfostat, örkristallaður sellulósi, makrógól 8000, rautt járnoxíð (E172),
títantvíoxíð (E171), talkúm (E 553), súkrósi.
Útlit Voltaren Dolo og pakkningastærðir
Útlit
Voltaren Dolo eru litlar, ljósrauðar, sykurhúðaðar töflur.
Pakkningastærðir
Voltaren Dolo er til í 10 og 20 stk. pakkningum.
Ekki er víst að allar pakkningastærðir séu markaðssettar.
Markaðsleyfishafi og framleiðandi
Novartis Healthcare A/S
Lyngbyvej 172
2100 København Ø
Danmörk
Umboð á Íslandi:
Artasan ehf.
Suðurhrauni 12a
210 Garðabæ
Þessi fylgiseðill var síðast samþykktur í febrúar 2012.
6