Our da la chesa cumünela A las tschantedas dals 31 da ... - Bever

Our da la chesa cumünela
A las tschantedas dals 31 da november e dals 7 da november 2012 ho la
suprastanza cumünela trat las seguaintas decisiuns:
Departamaint da fabrica
Procedura d’annunzcha pel center da tscharer d’Isellas
La procedura d’annunzcha per la posiziun dad ün container per ün center da tscharer
cun in annex üna chamanna da pass vegn appruveda scu l’an passo.
Il rapport da la situaziun da la remisa Isellas - cu proseguir?
La remisa agricula d’Isella chi appartegna a la vschinauncha da Bever es in ün fich
nosch stedi e retscherchas muossan ch’ella stuvess gnir renoveda cumplettamaing.
La suprastanza cumünela decida da la mantgnair e da preschanter da prümavaira ün
credit a’l suveraun.
Revitalisaziun Agnas d’En a Bever – tschanteda dals 26-10-2012
In connex cul nouv cuntschet da l’En vain decis, per faciliter l’ir a pè, cul chavagl u
cun veiculs, da cuvrir la via dal cuntschet cun sablun grob impè da la cuvrir cun terra
naira. A’s tratta dal traget chi cumainza a la fin dal perimeter dal proget da la
revitalisaziun in direcziun da La Punt, fin tar la sortida tar la stalla da chavals.
Dumanda per transports da dovair per abitaziuns principelas
La dumanda d’üna societed da fabrica pel transport da dovair per abitaziuns
principelas d’üna surfabricaziun sülla parcella da la vschinauncha tar l’arsenal vain
refüseda causa cha la suprastanza cumünela nu vezza üngüna pussibilted politica
da rapreschanter üna tela proposta. Impü es il temp per sclarimaints giuridics aunz la
prosma radunanza cumünela inamöd memma s-chars.
Departamaint da trafic, pulizia ed economia forestela
Rapreschantaziun dal büro d’indschegners Toscano AG a reguard la registraziun da
la via chantunela veglia da Samedan-Bever
Il rapport da la registraziun da la via chantunela veglia da Samedan-Bever es avaunt
maun e muossa, cha que nu fo dabsögn da la saner pel mumaint, ma cha’d es
d’examiner in tschinch fin desch ans da fer üna sanaziun totela. Quella fo però be
sen, scha l’adöver da la via es cler e scha l’ingrandimaint, respectiv il bsögn da
sanaziun, vain coordino traunter las vschinaunchas da Bever e da Samedan.
Concept dad incendis da god: discussiun e proceder in avegnir
L’uffizi per prievels da god e da natüra (AWN) ho elavuro ün concept sün giavüsch
da la suprastanza, chi demuossa imsüras da prevenziun e da fabrica. La
suprastanza decida da proseguir eir in avegnir cul concept dad incendis da god e da
sclarir cul AWN Grischun quaunt inavaunt ch’ün tel concept vain finanzio dal
Chantun.
Departamaint da finanzas, furmaziun e planisaziun regiunela
Preventiv 2013/ abuochamaint culla cumischiun sindicatorica e deliberaziun a maun
da la radunanza/deliberaziun da la missiva a maun da la radunanza cumünela
Il quint curraint cun ün regress büdschetto (perdita) da fr. 44’500.00 ed il quint
d’investiziun cun investiziuns nettas da fr. 752’000.00 vain delibero a maun da la
radunanza cumünela dals 30 da november 2012.
Tractandas da la radunanza cumünela dals 30 da november 2012
Las tractandas vegnan fixedas seguaintamaing:
1. Salüd
2. Fabricat nouv dal tunnel da l’Alvra II – preschantaziun dal rapport intermediar
preschanto da la VR SA

3. Appruvaziun da la glista da tractandas/tscherna dals innumbreders da vuschs
4. Appruvaziun dal protocol da la radunanza cumünela dals 27 d’avuost 2012
5. Preventiv 2013
5.1. Piglier cugnuschentscha dal plaun da finanzas 2013-2018
5.2 Fixer impostas e taxas
5.3 Preventiv dal quint curraint
5.4 Preventiv dal quint d’investiziun
6. Parcella 351 da sar Polli Eduardo: dret da construir pü daspera a la parcella
352, vschinauncha politica, per surcuvrir la s-chela chi maina giò’n garascha
7. Parcella 395 da sar Pedrolini Cirillo: dret da construir pü daspera a la parcella
391, vschinauncha politica, per üna chesina da üert
8. Varia, alura finischun da l’an da radunanzas cun mangiativas e bavrandas
La missiva e l’invid a la radunanza vegnan deliberos a maun da la prosma
radunanza cumünela dals
30 da november.
Diversas contribuziuns
A vegnan appruvedas las seguaintas dumandas da contribuziun :
Concours Hippique sün naiv inviern 2013 a San Murezzan
100 ans giubileum dal Parc Naziunel Svizzer
Consultaziun da la revisiun parziela da la ledscha da pas-cha chantunela
Da la revisiun parziela da la ledscha da pas-cha chantunela vain piglio
cugnuschentscha da maniera
positiva, siand cha a vegnan fats amegldramaints illa ledscha chi haun impustüt
consequenzas
positivas per pas-cheders giuvens. A vain desistieu dad üna consultaziun.
Consultaziun dad üna revisiun totela da la ledscha per la promoziun dal svilup
economic in Grischun
La revisiun totela da la ledscha a reguard la promoziun dal svilup da l’economia vain
appruveda ed a vain respundieu al questiunari.
Contrat da fittaunza refüso
I’l ram d’ün barat da fuonz cun ün pur es gnieu do il permiss d’adöver da preda e da
god. Zieva cha’l fittadin nun ho vulieu suottascriver il contrat pertuchand ün töch
terrain cun üna saiv intuorn sün fuonz public (uossa terrain privat) adonta cha ‘d es
gnieu spüert ün fit simbolic, es da metter inavous la saiv darcho sül cunfin privat per
cha’ls drets da la vschinauncha nu sajan pertuchos.
Pavleda per distrer: sancziuns dal guardgiasulvschina
Zieva cha l’inviern passo sun gnieus constatos in vschinauncha dans da ruojer pü
grands, supplichescha la suprastanza cumünela a’l guardgiasulvaschina da
propagher activmaing (cun fögls volants, infurmaziuns e.u.i.) da renunzcher da pavler
la sulvaschina düraunt l’inviern, causa cha s’inscuntra impustüt tschiervs da not in
vschinauncha.
Sustegn da la candidatura per Olimpia 2022
La suprastanza cumünela decida da sustgnair üna candidatura per l’Olimpiada,
causa cha quella maina innovaziun e sforza a la populaziun ed a las instanzas da’s
fer impissamaints a reguard l’avegnir dal marcho globel dal turissem. In princip paun
però gnieus fats be gös in ün ram modero chi sun güstifichabels dals puncts da vista
ecologic ed economic; a nu’s giavüscha d’organiser gös gigantescs scu in oters lös.
Iglüminaziun sülla plazza da glatsch

Las uras d’avertüra da la plazza da glatsch da Bever vegnan adattedas
seguaintamaing: nouv marculdi da las 19.00 a las 21.00, venderdi e sanda adüna fin
a las 22.00, traunter Nadel e Bümaun adüna fin a las 22.00.
Bever, ils 14-11-2012rro