Vecjo Testament - Glesie Furlane

Vecjo Testament
Isaje
traduzion dal Ebraic
dal prof. pre Checo Placerean
di Montenars
Cjap. 36 - 37
ZONTE
pag. 1

ZONTE
Cjap. 36 - 37
Cuasi dal dut compagns di 2n; Rès 18, 13 - 20, 19
Cjap. 36
L’INVASION DI SENNACHERIB
1 Al è sucedût tal an cutuardis dal rè Ezechie che
Sennacherib, rè di Assur, al tacà dutis lis sitâts fuartificadis
di Gjude e lis cjapá.
2 Il rè di Assur al mandà Rabshakè cun tune buine trope di
soldats di Lachish a Gjerusalem cuintri dal rè Ezechie.
Chel si postà sul or dal canal de vascje di sore, sul troi dal
cjamp dal lavandâr.
3 Il sorestant dal palàç Eliachim, fi di Chilchijà, Shebna il
segretari, e Joach il cursôr fi di Asaf a saltârin fûr par fevelâ
cun lui.
pag. 2

4 E Rabshakè ur à dite: «Disèit a Ezechie: Il grant rè, il rè
di Assur, al dîs chest:
5 «Su ce cantìn ti fìdistu par jessi sigûr? Ti torni a dî che
lis cjacaris no valin par savê diregi e vê fuarce in vuere.
Alore di cui ti sestu fidât par rivoltâti, cuintri di me?
6 Viôt che tu ti sês fidât di che cjane crevade – dal Egjìt –
ch’e fore e insangane la man di chel che le dopre par
baston. Faraon, rè dal Egjit, al è tâl e cuâl par ducj chêi
che si fidin di lui.
7 Tù tu puedis dîmi:
"Nô o si fidìn dal Signor nestri Diu"».
Ma no èsal Chel che Ezechie j à disfàts i santuaris sui çùcs
e i altars? Ordenant po ‘e int di Gjude e di Gjerusalem: «O
veis di ingenoglâsi dome denant di chest altar?».
8 Poben! fâs une scomesse cul gno paron, il rè di Assur: jo
ti doi doi mil cjavai, se tus sês bon di cjatâ j umign cha
coventin par montàur a cavalot.
9 Cemût rivaràstu mai a fâ sirucâ un sol sorestant, un dai
plui piçui servidors dal gno paron, fidanti dai ciars e de
cavalarie dal Egjìt?
10 E po, âjo tacade cheste tjere par disfâle cence il jutori dal
Signor? Il Signor mi à dite: «Tache cheste tjere e disfile!».
7) La leç dal templi unic a Gjerusalem.
pag. 3

Eliachim, Shebnà e àn dite a Rabshakè: «Par plasé fevèle
in aramaic ai tjei servidors, parcé ch’o lu capín; no sta
fevelânus in ebraic se no e sint dute la int ch’e jè cun tant
di orele su lis muris».
12 Ma Rabshakè al à rispuindût:
«Po crodistu che il gno paron mi vei mandât a fevelâ cussì
cul to paron o cun te? Mi à mandat propit par che int là
su lis muris, condanade a mangjâ la so mierde e a bevi la
so urine insieme cun vualtris».
13 Alore Rabshakè al è jevât in pins e ad alte vas al à dite
par ebraic:
«Sintît lis peraulis dal grant rè, dal rè di Assur!
14 Il rè al dîs chest:
«No stàit a lassâsi imbroâ di Ezechie! Lui nol è in grât di
salvâus.
15 No stait a lassâ che Ezechie us imbussuli di sperâ tal
Signor, disint:
"Il Signor al cjatarà la fate di salvânus; cheste sitât no colarà
tes grifis dal rè di Assur!".
16 No stàit a lâ daûr di Ezechie, parceche il rè di Assur us
dîs chest:
«Faseit la pâs cun me, rindèjsi, e ducj o puedarèis gjoldi
il vuestri vignâl e il vuestri fiâr, 17 e bevi laghe dal vuesti
poç, fint cuant ch’o tornarài a cjapàus sú par menàus tune
tjere come la vuestre, tjere di forment e di most, tjere di
pag. 4

pan e di vignai.
18 No stàit a lassâ che Ezechie us imbussuli disint: "Il
Signor nus salvarà!".
Po i dius dai forescj âno salvade la lor int des grifis dal
rè di Assur?
19 Dulà sono i dius di Chamat e di Arpad? La sono lâts a
finîle chêi di Sefarvaim?
I dius âno podût gjavâ des mes mans Samarie?
20 Cuai saressino i dius di chestis tjeris ch’e àn salvade la
lor tjere des mes grifis, par crodi che il Signor al salvi
Gjerusalem des mes mans?».
21 Lôr e àn tasût e no j àn rispuindût nuje, parceche l’ordin
dal rè al ere chest: «No stàit a rispuindi!»
22 Il sorestant dal palaç Eliachim, fi di Chilchijà, Shebnà il
segretari, e Joach fi di Asaf, il cursor, a si presentârin a
Ezechie cui vistîts sbregâts, e j contârin ce ch’al veve dit
Rabshakè.
19) Chamat, Arpad, Sepharvaim, a son sitats de Sirie, za cuistadis di
Sennacherib.
22) Sbregâsi i vistîts al ere segno che si ere propit fur de gracie di
Diu.
pag. 5

Cjap. 37
A SCONSULTIN ISAJE
1 Cuant che Ezechie al sintì une tâl, si è sbregât i vistîts, si
è vuluçât tun sac, e al è lât te cjase dal Signor.
2 Al à mandât Eliachim, il sorestant dal palaç, Shebnà il
segretari e i sorestants dai predis, vuluçâts tai sacs, là dal
profete Isaje, fî di Amos.
3 E j àn dite:
«Ezechie al dîs chest:
"Cheste sornade a jè vonde brute, plene di cjastics e di vergogne.
I fîs a jàn finît il timp par nassi, ma e mancje la
fuarce di parturîju.
4 Salacor il Signor, to Diu, al metarà daûr une orele lis
peraulis di Rabshakè, che il rè di Assur, so paron, al à mandât
a dî robis di ufindi il Diu ch’al vîf, e il Signor, to Diu,
al cjastiarà lis peraulis ch’al à sintudis. Fâs une prejere par
ce ch’al reste dal popul ch’al ten-dûr ancjemò».
5 Cuant che i servidors dal rè Ezechie a rivârin là di Isaje,
lui ur à dite:
6 «O disarèis chest al vuestri paron: “Il Signor al dîs cussì:
No sta vê pore di ce che tu âs sintût a dî, des blestemis che
i sotans dal rè di Assur e àn tiradis-jú cuintri di Me.
7 Jo j metarài intor un diaulin, e j tocjerà sintî une gnove
che lu fasarà tornâ tal so paîs, e tal so paîs al murarà copât
cu la spade”».
pag. 6

8 Rabshakè al è tornât indaûr e al à cjatât il rè di Assur ch’al
stave batint cuintri Libnà. Al veve savût che il rè al veve
lassade Lachish, parcé ch’al veve vude cheste gnove di
Tirháca, rè di Kush: «Al è partît par fati vuere».
SENNACHERIB AL TORNE A TENTÂ
9 Sintude cheste Sennacherib al mandà int de sô a dî a
Ezechie:
10 «O disarèis chest a Ezechie, rè di Gjude:
“No sta lassâti imbussulâ dal to Diu, che tu ti fidis tant di
Lui, disint:
“Gjerusalem no finissarà tes grifis dal rè di Assur”.
11 Tu âs sintût a dî ce ch’e àn fat i rès di Assur a dutis lis tjeris;
lis àn fruçàdis, e tù tu saressis sparagnât?
12 Ce ur àno zovât i lor dius ai popui che i miei vons e àn
fiscâts, ‘e int di Gozan, di Charan, di Retsef, ai fîs di Eden
ch’a jerin a Telessar?
13 Dulà sono il rè di Chamat, il rè di Arpad, il rè di
Serfarvaim, di Hena e di Iwá?”».
9) Il rè di Kush, alvenastai dal Egjìt, ch’al ere sot dai faraons
nubians, scurs di piel.
12) Gozan, tal Irak, ué Tell Chalas;
Charan, tal Irak, dongje de Turchie;
Retsef, ad or dal Eufrat a çampe;
Telessar, simpri ad or dal Eufrat.
Hena, Iwà, a saràn stadis sitâts salacor tal Irak
pag. 7

14 Ezechie al à cjapât il scrit des mans de int di
Sennacherib, lu à let e po al è lât sú tal templi di Diu e lu
à slargjât denant dal Signor.
15 Ezechie al à fate cheste prejere denant di Diu:
16 «Signor, paron dai soldats, Diu di Israel, che tu sês sentât
sui cherubins, dome Tù tu sês il Diu di ducj i reams dal
mont, Tù tu âs fats i cî e la tjere.
17 Slungje lis tos orelis, Signor, e scolte:
vierç i tiei voi e cjale!
Scolte lis peraulis di Sennacherib ch’al à mandât int de sô
a blestemâ cuintri il Diu ch’al vîf.
18 Al è un fat, Signor, che i rès di Assur e àn fruçât ducj i
popui e lis lor tjeris.
19 E àn butât sul fûc i lor dius, parceche chêi no jerin
signors, ma dome voris de man dai umign, di len o di clap,
e cussì lôr lis àn disfatis.
20 Poben, Signor, nestri Diu, salvinus cumò de so grife, par
che ducj i reams dal mont a sepin che tu sês Diu dome
Tù».
LA RISPUESTE DI ISAJE
21 Alore Isaje, fi di Amos, al à mandât a dî a Ezechie: «Il
Signor, Diu di Israel, al dîs cussì: “Tù tu mi âs preât par
vie di Sennacherib, rè di Assur.
22 Poben ve ce che il Signor al à dite cuintri di lui:
– La fantate, fie di Sion,
no ti cjape sul serio, ti cjol vie;
e spache il ciâf daûr di te
22) «La fantate, fie di Sion»: e jè la sitât di Gjerusalem, plantade
sul çùc di Sion.
pag. 8

la fie di Gjerusalem.
23 Cuintri di cui âstu sbocjonât e blestemât?
cuintri di cui âstu alçade la vôs
e cjalât da rive-jú?
Cuintri dal Sant di Israel!
24 Midiant dai tjei servidors tu âs dit mal dal Signor,
tu âs dite:
“Cu la sdrume dai miei cjars
o soi lât sú su la spice des monts,
su lis cretis dal Liban:
o ài tajâts i siei cedros plui alts
i siei ciprès plui biei.
O soi rivât su la so spice plui alte,
tal cûr dal so bosc.
25 O ài piconât e o ài bevude l’aghe;
sot la plante dai miei pîs
o ài fat suâ ducj i flums dal Egjìt”.
26 Capìstu ben?
Chestis robis lis ài prontadis Jo
ch’al è tant timp,
lis ài imbastidis di agnorums in cà,
e cumò lis fâs.
Tù tu vevis di disfâ sitâts fortificadis,
ridusinlis un grum di clas.
27 La lor int, flape di man,
spaventade e sgrisulade
a jè stade tan’che la jerbe dai prâts,
il lidric dal ort, la jerbe sui cuvierts,
pag. 9

verdure secje ancjemò prin di dâ fûr.
28 Jo o sai cuant che tu ti jevis in pins
e cuant che tu ti sentis,
cuant che tu jessis e cuant che tu jentris.
29 Parcé che tu ti sês metût cuintri di Me,
e la to prepotense a jè rivade fin tes mes orelis,
o ti metarai il gno anel tal to nâs
e il gno smuars tai tiei lavris par fati tornâ indaûr
par che strade che tu ses vegnût.
30 Al è chest il segno par te:
Chest àn si mangjarà ce ch’al è nassût dibessol,
ancje l’an ch’al ven di ce ch’al nas dibessol,
ma tal tierç an o semenarèis,
o seselarèis, o plantarèis vignai
e o gjoldarèis la vuestre robe.
31 Ce ch’al reste de famee di Gjude,
rivât adore a sfuî,
al plantarà ladrîs a bàs e al fasarà pomis ad alt.
32 Parceche la salvece a vegnarà fûr di Gjerusalem,
e la liberazion de mont di Sion.
Il boncûr fint ‘e gjelosie dal Signor,
paron dai soldâts, al fasarà chestis robis».
29) Smuars in bocje e anel tal nâs (o tal lavri) a jerin i segnos e la
veretât dai presonîrs, de int finide tes grifis di cualchidun.
30) Par Ezechie!
32) Il rè di Assur al scugnarà molâ Gjerusalem uniche sitât che nol
è rivât adore di cuistâ in Israel. Alvenastai che la salvece e la liberazion
a vevin di vegnî fûr di lì.
pag. 10

IL DISTIN DAL RÈ DI ASSUR
33 Ve, mo, ce ch’al dîs il Signor
sul cont dal rè di Assur:
«Nol metarà pît in cheste sitât,
nol tirarà nancje une frece,
no si fasarà indenant cui scudos,
e nol imbunirà fossai cuintri di jê.
34 Al tornarà indaûr pe strade ch’al è vegnût
e nol metarà pît in cheste sitât
– dissal il Signor –.
35 Jo o vuardarài cheste sitât e le salvarài,
pal gno boncûr e parvie di Davit gno servidor».
36 Al partì un agnul dal Signor e al pestà tal campament di
Assur centeotantecincmil di lôr. A buinore, cuant ch’al ere
di jevâ, a jerin ducj cadavars.
37 Sennacherib si è cjapât-sú e al è partît. Al è tornât
indaûr e al à vivût a Ninive.
Une dì ch’al ere in genoglon tal templi di Nisroch, il so
diu, i siei fîs Adramelek e Saretser lu àn copât cu la spade
e po a scjampârin des bandis di Ararat.
Assaraddon, so fî, al è deventât rè tal so puest.
37) Une pestelense mandade dal Signor!
pag. 11

Ara piçule, te foranie di Tresesin.
foto di E. Bianco 2003
pag. 12