U mo Petru Cirneu_extrait

Dans la même collection
A Frebba, ed altri raconti fantasiosi, Marceddu Jureczek, 2021
Qual’hè chì hà tombu à Gilac ?, Ghjacumu Thiers, 2019
Prix des lecteurs (CDC) 2020
Le dossier Félix Decori, Ghjacumu Fusina, 2018
Nunzia, Marie Guerrini, 2018
Austina, Pierre-Joseph Ferrali, 2017
Le balcon, Jacques Thiers, trad. Anne-Laure Thiers, 2017
Chì ùn sia fattu di guai, Marceddu Jureczek, 2016
U balcone, Ghjacumu Thiers, 2016
Le petit soldat, Jacques Fusina, 2015,
Prix de la CTC 2015
La cour des chats, Jacques Thiers, trad. Anne-Laure Thiers, 2015
Fintantu chì l’erba crescerà, Pierre-Joseph Ferrali, 2014,
Prix des lecteurs (CTC) 2015
I misgi, Ghjacumu Thiers, 2013,
Prix des lecteurs (CTC) 2014
Ieiettu, Guidu Benigni, 2013
L’Ortu di e mo brame, Ghjuvan Battistu Giacomoni, 2011
Ombre di guerra, Jean-Yves Acquaviva, 2011
Prix de la CTC 2012, Prix des lecteurs (CTC) 2012
et Prix Morellini (Conseil général de Haute-Corse), 2012

Libru primu

Iè chì ci sò dinù eo nantu à u nostru Dizziunariu
storicu chì spiega ch’o sò natu in Felce d’Alisgiani
in u 1447 è chì u mo libru De Rebus Corsicis scrittu
in latinu ùn fù publicatu che dui seculi dopu a mo
scumparsa, in l’Antulugia sapiente di scrittori taliani
di Muratori in u 1738. L’averanu forse sculunnatu
quì o culà, almenu u mo nome di scrittore, i nostri
cumpatriotti ma u mo libru l’averanu lettu è chì
cunnosceranu daveru di a mo vita propia ?
S’ellu hè un scordu generale, pruveremu à
ramintà quì l’omu ch’o fui è ciò ch’ella fù a mo vita.
A mo famiglia era stabilita da tempi landani in u
paisolu di Felce d’Alisgiani, à meza Castagniccia è
quelli chì m’anu digià lettu sanu chì u mo antenatu
Ghjuvanni Felce cumbattia à u latu di Ghjudice di
Cinarca in quella guerra trà u partitu di u signoru
cinarchese è u partitu à favore di i Ghjenuvesi,
quellu di Ghjuvanninellu, una lotta tremenda chì
durò ùn sò più quantu.
U fattu si stà chì eranu digià trè anni quandu u
mo antenatu, dopu à tante marchje armate, si cansò
in Ghisoni duv’ellu fubbe ricevutu da u signoru di u
5

6
locu, un certu Guglielmu. Quellu era babbu d’une
bellissima giuvanotta Arienta chì piacì subitu subitu
à Giuvanni chì, cum’elli eranu l’usi tandu, cherse a
manu di quella figliola à u babbu. Quellu, stimendu
chì u giuvanottu mancava forse di tituli è di rangu
in casa soia, a li ricusò. Inghjuliatu, Ghjuvanni si
ne vultò capu calatu è amurbatu in a so pieve di
Castagniccia.
Ma qualchi mese dopu, d’istatina, si tirò torna
cun qualchì amicu fidu in Ghisoni è, à spiccera,
si purtonu à Arienta da cavallu sin’à Felce. Dopu
a cundusse in chjesa à San Damianu, in paese, è
li spiegò a ragione di a scappetta, causa sola di u
rifusu testardu di u babbu, ben ch’ella fussi stata
cusì sincera a so dumanda è senz’altru mutivu chè
l’amore solu. Sperava cusì di scunvince a giuvanotta
postu chì quandu a persona accetta, l’anima seguita,
almenu cusì dice a cridenza vechja.
L’amichi di Ghjuvanni è u prete ellu stessu,
fecenu da avucati, imbulighjendu in l’arringa
tradizione è mudernità, è difatti Arienta accettò
l’argumenti ghjudichendu ch’ella ùn avia micca
appuntu traditu a so famiglia è si lasciò cunduce
à l’altare duv’ellu li messe l’anellu di sposa u so
prumessu, in modu degnu è cumu si deve. Bella
storia, mi dicerete, ma à quelli tempi eranu affari
chì accadianu à spessu, invece chì à a famiglia
d’Arienta ùn li cunvenia mancu appena a manera.
In quattru è trè sette, s’accolsenu ùn sò quanti
di i so partitenti, à pedi o à cavallu, è ancu s’ellu mi
rimpruveranu certi di vede sempre e cose in modu
sprupusitatu, cunfessu ch’elle mi sò sempre piaciute
e narrazioni di l’epupee è di e battaglie à l’antica.
Ecculi dunque per istrada da pudè sbuccà in Felce in

cor di mezanotte è piglià i Filiciaschi à l’appollu. Ma
Ghjuvanni chì si misfidava, avia impustatu ghjente
à e bocche è à u son di u cornu, si sebbe in Felce
ch’ellu era previstu un attaccu à l’alba.
A nostra casa era ben situata in altu di u paese
è prutetta in cundizioni, à latu di l’altre case, è à
u nordu un muru cullava sin’à u tettu, ma in più,
ci avianu edificatu à fiancu une torra di difesa in
legnu, cunsiderata d’utilità maiò pè quelli chì ci
capianu in e guerre. L’assaltu si fece è da ogni parte
s’imburronu tutti cum’è lioni, u babbu d’Arienta in
testa, ma i paisani di Felce ùn eranu senza nunda,
postu chì s’era intesu sin’à Campulori u trostu di
a battaglia è ghjente s’eranu mossi subitu ad aiutà
à Ghjuvanni.
Arienta, davanti à quella baruffa tremenda
decise di mettecisi dinù ella, è s’inframesse, mezu
à colpi è batangate. Parlendu attempu à un campu
è à quillaltru, cù u so curagiu, riescì pianu pianu
à calmà i guerrieri. U so discorsu cummuvente
spiegava a disgrazia chì saria pè e duie famigle, è
per ella stessa, incappiata di sicuru, s’ella accadissi,
trà a morte d’un babbu è quella d’un maritu, è s’elli
ùn s’appaciavanu tutti.
U babbu si lasciò scunvince u primu è vistu a
qualità di tutti quelli chì s’eranu misurati tandu,
ricunnobbe sinceru, ch’ellu ùn avaria di sicuru
ricusatu issu matrimoniu, s’ellu avissi cunnisciutu
subitu u valore veru di Ghjuvanni. S’accunciò dunque
in cundizioni bone quellu passu cusì male ingagiatu
è prestu nacque ancu un Guglielmucciu, chì saria
statu, l’avete capita, u mo babbone paternu !

A mo nascita
8
Avà po a sapite, sò natu in Alisgiani, diocesi d’Aleria,
antica cità nata ancu prima ch’elli sbarchessinu i Rumani
longu à u mareTirrenicu. I mei portanu u nome di Felce,
quellu di u paese nativu, mamma chjamata Coralluccia
è babbu Picinu, tremindui di ghjente distinta, in latinu
« generosis parentibus », volesi dì micca appuntu nobili
ma di sterpa bona : eramu u 9 di nuvembre 1447.
V’aghju parlatu di i mo antichi, in tempu di
Ghjudice di Cinarca, in fin di u tredecesimu seculu,
ma ùn sò ghjuntu eiu chè trè leve dopu. M’anu contu
chì babbu si truvava tandu in Campulori pè u so
travagliu. Dicenu ch’ellu fubbe impressiunatu assai
da u sognu ch’ellu avia fattu, duv’ellu l’era affaccatu
un signoru, cusì ben vestutu, chì l’avia discitatu per
annunzialli ch’ellu l’era natu un « caprettu » chì devia
esse chjamatu Petru. Ci pensava babbu à quellu sognu
quand’ellu si rese contu ch’ellu s’avia lasciatu in casa a
moglia incinta è da parturisce. Vultatu dunque à u più
prestu in paese, mi ti trova à mè, bambinucciu, à usciu
di chjesa di San Damianu. Mi tocca à precisà chì da
Felce à i paesi di Campulori ùn hè tantu luntanu ma
ci vole quantunque un certu tempu ancu attippendu

pè i chjassi muntagnoli : a saperaghju po eiu chì l’aghju
pigliati tante volti !
U fattu si stà chì u curatu era in quella di dammi u
battezimu à nome di Salvadore quellu sceltu da mamma,
ma babbu sempre sottu influenza di quellu sognu, ùn
volse altru nome chè Petru. Ci vole à aghjunghje quì chì
babbu, u poveru omu, ùn ebbe asgiu di vede ingrandà
tantu u so figliolu, chì si morse subitu ondeci mesi
dopu, propiu in Campulori, in casa di u soceru Guaracco
Suerto. L’anu sepellitu ben intesa in cimiteriu di a chjesa
San Damianu, in a tomba di i nostri antenati.
Ùn vi saperebbi mancu precisà di chì male ellu era
mortu, postu chì sò fermatu orfanu da criampulu, è
d’altronde, à quellu dolu si ne aghjunsenu dinù quattru
altri, trè zii da parte di babbu è unu da parte di mamma.
Isse scumparse, prestu prestu una dopu à l’altra, spieganu
a sparita di u patrimoniu di famiglia mancu u tempu di
fà un « amme » ! Era statu spartutu in cinque, postu chì
l’antenatu Guglielmu avia avutu cinque figlioli è ch’ellu
ùn ne fermava più in vita chè unu solu, u più chjucu, chì
d’altronde, era tandu assente di paese.
In quantu à mamma, compiu u viduvale, era stata
rimaritata da a famiglia cum’ella si facia tandu in u casu
d’una veduva cusì giovana. E à ella l’avianu maritata trè
volte. Si capisce ch’in un casu cusì cumplicatu, à mè ùn
mi fermò guasi nunda in manu. Masimu chì e pratiche
di l’epica ùn eranu nè generose nè caritative, ancu trà
di vicini di famiglia, chì s’arrubava à issa più bella, si
mutavanu di notte i termini di e propietà, è i chjosi
cambiavanu patrone da a sera à a matina… Ciò chì vi
dà un’idea di e manere pocu garbate chì usavanu tandu,
in un’isula in pienu scumbugliu, in issu quindecesimu
seculu bellu avanzatu digià. E quale hè chì a si pudia
fà valè, in cundizione orfagna cum’è mè, è senza nimu
vicinu in aiutu ?

Una zitellina difficiule
10
Sò statu cù a mo surella Bianchina fin’à i mo sette
anni. Era una vita di miseria chì si mancava di tuttu,
face ch’ùn manghjavamu chè castagne è pè beie era
sempre acqua. Un ghjornu aghju fattu à Bianchina
una dumanda chì vi parerà forse niscentre, da sapè
s’ella averia castagne abbastanza per ella in casu
ch’o mi ne duvessi andà. Cum’ella mi rispose di sì,
pigliai subitu à strada di l’Ortale duv’ellu stava u
nostru parente Ghilardinu, è chì mi dete à curà a so
banda di e pecure. E ùn tricò mancu, in sopr’à più, à
spugliami di quelli vestitacci ch’ellu m’avia tagliatu
pè fà u mistieru di pastore. Epica veramente trista
per mè, è chì indetta dinù u pessimu statu duv’ella
si truvava tandu a mo povera Corsica.
Nant’à quelli cugini di l’Ortale, si sà ch’ella era
una famiglia impurtante di capurali, issi capimachja
lucali chì s’impunianu à u Medievu cù a so vuluntà di
putere, e so lotte interne è centu patti d’unione trà
d’elli contr’à i Ghjenuvesi o altri nimici lucali. Eranu
pè u più pastori, è s’appughjavanu nant’à unipochi
d’amici fidati chì li ghjuvavanu di forza pulitica nova,
à nome di u populu, da opponesi à i signori in postu.

Tutte isse cose si feranu pianu pianu è u zitellettu
ch’o era tandu ùn pudia induvinà l’aspetti storichi
ch’eranu digià in mossa tandu in l’isula.
À mè mi tuccava à sbrugliami solu è mi ne sò
dunque andatu, senza erziculà, ver di Capicorsu,
duv’ellu s’imbarcava più facilmente. Marinari di u
locu mi purtonu sin’à l’isula d’Elba, propiu di punta
è vicina assai da a nostre rive. Eramu d’inguernu è
ghjunti à locu, mi strascinonu à meza neve alta è
pediscalzu sin’à un paese chjamatu Rio. Da tantu
tempacciu, ùn mi pudianu mancu purtà à zozza è
mi cunfidonu à un scarparu ma eiu mi sentia cusì
male, i pedi strisgiati da i pruni è i spinzoni, è quella
neve è u freddu, chì mi parse di rende l’anima da
tante e pene. Un bagnu d’acqua calla, invece di
risanami, mi fece ancu più male è per divvi, ci volse
à buccami torna in l’acqua fresca pè calmà una cria
i dulori ch’o sentia ind’e ghjambe.
Ma u zitellettu ch’o era ùn mancava quantunque
di resistenza è m’incariconu di guidà un sumere chì
trascinava ferru sin’à u molu duv’elli u imbarcavanu.
L’isula d’Elba era cunnisciuta appuntu pè e so minere
di u ferru ch’ella spurtava per battellu. Sò certi ricordi
più precisi per mè, ma mi venianu solu à pezzi, senza
ch’o m’arricurdessi nè di a mo età precisa, nè mancu
era capace di calculalla da mè stessu.
Da quellu borgu elbanu m’imbarcai torna ma
ver di Piombino, piccula cità abbastanza vicina
nantu a costa taliana. Ci scuntrai un Alemanu
chjamatu Conrad, originariu d’Erfurt, di quessa
mi n’arricordu, chì mi fece cumpagnia è m’insegnò
cum’ellu pobbe e lettere elementarie è qualchì altra
nuzione. Era pocu ma quantunque un principiu
d’amparera, chì mi dete per indettu a pussibilità di
11

vincemi dui danari da mè stessu ed era digià assai
quessa pè u poveru zitellu ch’o m’era sempre tandu.
Cun quellu Conrad, andaimu sin’à Verona, in
piaghja padana, anziana cità d’arte assai cunnisciuta
è ci ebbi l’occasione d’amparà una cria di musica.
Ma a vita veronese durò pocu chì Conrad si truvò
in statu cusì miseru chì fui custrettu di lasciallu.
U ringraziai per ciò ch’ellu m’avia purtatu ellu, ed
eccumi torna pè isse strade, in cor d’inguernu, guasi
spugliatu è senza un sollu in stacca. Ghjunsi cusì in
a cità di Mirandola, duve passai qualchì mese senza
vede una migliurenza vera di a mo vita. Mancu sapia
tandu eiu, ben intesa, ch’un giuvanottu, propiu di i
mo tempi, nasceria in quella cità è diventeria un gran
filosofu è teulogu, sottu à u nome arcicunnisciutu
dopu in u mondu sanu, di Piccu di a Mirandola.

Principiu di i mo studii
Eppuru, pocu tempu dopu, fù propiu in Venezia,
micca tantu luntanu da Mirandola, ch’o principiai
à sviluppà veramente a mo struzzione, è dinù à
Ancona, issu portu di l’Adriaticu, ch’aghju amparatu
un pocu megliu a musica ch’avia principiatu, in
modu piuttostu timicu, à Verona.
À quell’epica mi tramutava assai, non solu
perch’avia bisognu di scopre mondi, paesi è ghjente,
da apremi u spiritu è dissetami di tante sapienze,
ch’ùn avia mai tuccatu chè à pezzi è à bucconi.
Senza parlà di e cundizioni di vita in e cità duve
scalava, postu ch’elle campavanu elle dinù, difficultà
pulitiche è suciali assai, segondu l’evuluzione
di a storia generale di l’Italia à l’epica ch’aghju
cunnisciutu tandu.
Per indettu m’hè toccu à scappà da a cità di
Recanati, causa di persecuzioni messe in ballu
da certi « gattivi ». A manera di chjamà « gattivi »
era aduprata in modu currente da predicatori
assai, chì vucavanu da u locu à l’altru à insegnà
à e cumunità visitate, ch’elle si duvianu liberà da
a gattiva ghjente, quelli gattivi ch’ùn arricavanu
13

14
sempre duv’elli scalavanu, chè male è peghju. E so
prediche parlavanu di a fede in Dio, ch’ùn pudia
soffre nisun tradimentu, a famosa « propaganda
fides » latina, liata di sicuru à a fedeltà di l’omu, chì
devia esse rispettata sempre s’omu si vulia francà,
in modu più sicuru, d’ogni flagellu di u celu.
Eiu, sempre zitellettu, ùn era mancu capace
d’indettà in modu precisu u locu duv’era natu, ma
di u nome di a Corsica mi n’arricurdava benissimu,
è listessa pè quellu di babbu è di a nostra famiglia,
è avia in capu di vultamine à u più prestu in l’isula
mea, à ritruvà a casa paterna. D’Ancona passai
dunque in Cesena, eppo’ in Faenza, cità vicine di
a listessa grande regione, è in l’ultima d’isse cità
ci aghju studiatu a grammatica, à longu è in modu
assai seriu.
Issi passa è veni ùn anu mai impeditu ch’o mi
pudessi perfezziunà quantunque in i mo studii, postu
ch’ella era sempre stata per mè una vulintà di primu
penseru. In più, avia di sicuru una facilità ad amparà
è à tene in memoria tutte e nuzioni chì m’eranu
insegnate. D’altronde, stu passu assignalatu di a mo
vita di giuvanottu fubbe dinù quellu d’una guerra
chì schjattò, propiu in a Romagna duve mi truvava
tandu, trà Bartolomeo Colleoni è i Fiurentini. Ma
a campagna armata di u condottiere di Venezia,
chì ebbe, si sà, una carriera cumplessa, cessò
abbastanza prestu è a pace fù decisa chì mi lasciò
sperà un’aduchjata, da pudè prusegue cumu si deve
i mo studii in anda.
Invece eccumiti un’epidemia chì ci falò
addossu, à noi altri studienti, è u nostru prufessore
si truvò dinù ellu furzatu di ritirassi à Fossombrone.
U seguitai ben intesa in quella cità, ma mi pigliò

tandu una frebba tremenda chì a ghjente di a cità si
spenventonu è mi scacciabuglionu, pensendu ch’o
fussi cuntaminatu. Ed eccumi torna per istrada, di
notte tempu, à bastone in manu, ma ringraziendu
quantunque u Signore d’avemi risanatu in pocu
tempu.
Pobbi ancu ripiglià i mo studii sottu à a
direzzione d’un Sicilianu, ciò chì mi fece torna
suppurtà difficultai è ancu periculi. Ùn ne diceraghju
micca di più ma ci vole à ricunnosce chì, à le volte,
a situazione in certe parti di l’Italia, s’assumigliava
assai à ciò ch’aghju vissutu dopu in Corsica. Mi ne
passai dunque in Pisa è da custì, infine, m’imbarcai
pè a mo isula.

Primu ritornu in casa
16
Cumu l’aghju digià detta ùn mi fermavanu chè
ricordi imprecisi nant’à a mo isula di nascita.
Mi ci volse dunque à infurmami cumu si deve da
ùn perde troppu tempu in ricerche vane. Ma una
spezia di stintu primieru paria ch’ellu guidessi i
mo passi, postu ch’o truvai abbastanza prestu a
casa di famiglia, quella ch’avia vistu i mo anni di
bambinellu cù a mo surella Bianchina. È miracula,
Bianchina era sempre custì, cum’è s’ella m’avessi
aspettatu nant’à u sugliare di a porta, da u primu
ghjornu ch’era partutu à curà e pecure ind’è u
nostru parente di l’Ortale, Ghilardinu.
« Eccu u mo fratellu ! » stridò subitu, cuntenta
di rivede quellu ch’ùn avia più datu nove da tantu
tempu, ed eiu dinù era felice assai, un pocu cum’è
Ulisse di ritornu in casa soia è ricunnisciutu da a
so parente più cara. Parlu d’Ulisse quant’è ch’o
l’avessi lettu à quella epica, ma si sà chì l’opera di
u pueta grecu ùn fubbe daveru trasferita in Italia
cù traduzzioni di l’Iliada à pocu pressu chè da
u quattordecesimu seculu : hè dunque quì una
spirazione di fantasia da parte mea malgradu a mo

erudizione tamanta. Almenu ch’o ùn aghja avventatu
quella traduzzione latina di l’Iliada di u 1362 ch’ellu
lesse Boccaccio. Ch’ella mi sia cuncessa quessa
l’uchjata, in ogni casu, cari lettori muderni !
Ma a nostra mamma ùn era tantu bè : a truvai
ammalata assai è fui infurmatu un pocu di più da
altri di a nostra famiglia ch’o visitai cum’ellu era
l’usu di regula. Amparai cusì ch’elli c’eranu parenti
dinù, cugini più spapersi, in Tuscana è i volsi visità,
à tutti conti, ancu s’ellu mi ci vulia à francà torna u
mare. Ci vole à dì ch’elli eranu tandu più frequenti è
usati assai, issi passa è veni in battellu per noi altri
isulani, ancu s’elli dipendianu assai da u statu di
u mare, è di e so timpeste, senza parlà di i gattivi
scontri, in quelli tempi duv’elli vucavanu in giru à
l’isula marinari pocu quenti.
Ma m’era prumessu à mè stessu, da chjucu
chjucu, d’esse sempre fidu à a mo famiglia è mettia
un puntu d’onore à fà sempre una visita à tutti i
parenti ancu alluntanati. Era un duvere è mi ci
teneraghju sempre, ancu per essene statu dillusu
più d’una volta.
Visite fatte, eccumi torna di ritornu da Tuscana
versu Pianosa, l’isulottu bassu bassu ch’ùn si scopre
bè chè quand’omu li ghjunghje guasi nantu. Ùn
ebbimu tanta diccia tandu, tucchendu quelle rive,
chì tutti i nostri marinari casconu malati. Mi ci volse
à curalli, à asserenalli cum’o pudia chì fubbemu
custretti di rifugiacci inseme in una sapara, da
pudecci aggruttà una cria. Ma a ghjente di Pianosa
eranu vigliacchi quant’è quelli di Fossombrone
ch’aghju digià evucatu : temianu tantu a cuntagione
di a pesta ch’ùn ci volsenu mancu riceve in casa
soia. Ma furtuna chì i marinari si rimessenu in bon
17

18
statu abbastanza prestu è fubbemu guidati fora da
quellu isulottu pocu uspitalieru, gratune à unu di
i marinari praticu di i lochi.
Ma i nostri guai ùn eranu micca finiti, postu
chì ghjunti vicinu à a Corsica, ci pigliò una timpesta
di quelle ! I venti suffiavanu tantu ch’ùn si pudia
più manufrà l’antenna, issu pennone in punta chì
tenia a vela latina, è chì ghjuvava à fà move e vele
alte di i maghji. Da a forza di u ventu s’era rotta a
tagliola chì permettia à i canapi di fà move e vele,
face chì tuttu era statu lampatu via è ghjacianu in
l’acqua u maghju è e vele imbulighjati : a situazione
era diventata più chè critica.
Davanti à tanti elementi cuntrarii, sburrai à
pienghe, micca da a paura ma pensendu à mamma
è à surellama ch’o m’avia lasciatu tandu, quandu u
mo duvere sacru fussi statu d’esse vicinu à elle, di
curalle è nutriscele, senza cuntà ch’ellu mi ci vulia
à pensà à stabilisce e mo surelle in età di piglià
maritu è di fundà dinù ella una famiglia.
Davanti à tamante rispunsabilità ch’o mi sentia
cullà in core, ùn ebbe altra risorsa chè di pisà un
ochju ver di u celu è d’arricumandami fendu un
votu. Mi precipitai à u timone, ch’o pigliai fermu
è decisu in manu, è mi riescì di guidà u battellu
contru à a forza tremenda di u mare è u furore di
i venti. E cusì ch’o possi tene a direzzione è salvai
u battellu da un navifraghju sicuru. U mo votu era
statu suddesfu !
Vultatu in terra, ghjunsi subitu in casa di u mo
babbone paternu, chì forse vi ricurdarete chì babbu
era mortu propiu in a casa di u soceru, Guaracco
Suerto.

E hè propiu in quella casa ch’ellu vense tandu
à truvami u nostru cuginu Gugielmu di l’Ortale,
à pruponemi a cura di l’anime di a chjesa di
Sant’Andria, postu chì, ancu sempre giovanu, i
mo studii m’avianu permessu d’esse digià prete à
quell’epica. Pobbi apre cusì una scola è cum’ella
s’era migliurata dunque a mo situazione persunale,
aghju pussutu marità e mo duie surelle, a mo surella
cunsanguina primanata è l’altra più chjuca. Quessi
sò affari chì costanu assai, ma mi parse ch’ellu fussi
u mo duvere, quant’è l’usi pè i preti, di mantene
a famiglia. Mi ci volse dunque à indebbitami assai
per falli à sunghjuna una bella dota.
Era statu quessu per mè un duvere sacratu,
ma tamante spese, issi matrimonii cun giuvanotti
di famiglie bè, è sopr’à tuttu d’esse cusì stimatu
da tutti quelli ch’eranu sottu a mo responsabilità
di prete, avianu fattu nasce subitu l’inviglia di
tanti. Certi, à u sugettu di i debbiti, si davanu à
discorsi pocu quenti in publicu è mi criticavanu cun
animosità in privatu. Si cunsiderava pocu nurmale
ch’o avessi pussutu favurizà in modu cusì riccu a mo
famiglia, allora ch’era sempre cusì giovanu è ch’era
statu tantu tempu senza ghjunghje in Corsica.
Tuttu paria di poca valia è ognunu si dumandava
cumu puderia riesce à pagà i mo debbiti s’ella ùn
fussi à l’assimbretta, scappendumine una matina, è
ingannendu cusì quelli chì m’avianu fattu cunfidenza
è prestatu solli. Ùn avia mustratu fin’à tandu una
certa facilità à imbarcà, è avia d’altronde abbastanza
stuzzione pè sbrugliami da per mè ! Era ciò chì
curria da più à menu piattu in giru à mè è bastava
da nutrisce tutte e fole scimesche lucali.

Si guastanu l’affari
20
Chì mi tuccava à fà in cundizioni simili ? Davanti à
tante discordie, numicizie è falzità chì pigliavanu
sempre a suprana ind’i paisani, u giovanu prete ch’o
era si sentia straccià u core, di vede quant’ella suffria
da vittima d’issu male a so cara patria. Ma ùn mi
vulia micca lascià purtà da issa andatura murtifera
è à u cuntrariu, m’affannava à circà di mette u bè è
a cuncordia ind’è quelli chì si liticavanu, chì u mo
caratteru era di quelli chì tenianu sempre à calmà
u focu trà di numichi invece d’accatizzà a brusta.
E à dilla franca, qualchì risultatu l’avia digià
ottenutu postu chì certi paisani stetenu à sente e
mo preghere è lentonu l’arme, altri accittonu di
purtà e so litiche davanti à un mezanu, è si tensenu
à a decisione d’un ghjudice, dopu à u so prucessu.
Era quantunque un picculu prugressu, pensendu à
ciò ch’elli eranu i vechji mendi di regulà i so affari
è i cuntrasti suciali, sia à modu persunale, sia cù
l’aiutu di l’amichi. Eppuru malgradu tutti i mo
sforzi è tanti servizii ch’avia pussutu rende à i mo
paisani è à quelli ch’avia propiu in carica d’anima,

invece di calmà naturalmente l’inviglie, non solu e
ripiglionu ma e fecenu dinù cresce.
Un casu veramente dispiacente accadì propiu
ind’i mo lochi d’origine è trà di ghjente ch’o cunniscia
in persona. Un ghjornu guasi tutti l’abitanti di
Campulori s’eranu messi e mani in un locu chjamatu
Gugliani ghjustu sottu à u paese duv’ella era a chjesa
di Sant’Andria : piuvianu e sfrezze e si risicava di
vede corre prestu u sangue, da tamantu u furore
chì s’era scatinatu, da una parte è da l’altra di i più
battaglieri.
Tandu, senza mancu riflette una cria,
pigliendumi in manu un scudu di prutezzione, mi
lampai à mezu à i cumbattenti pè pruvà di falli
cessà. Cume s’o avessi pensatu tandu à a manera
naturale di a mo antenata Arienta, à mezu à quelli
di Felce è di Ghisoni, chì eranu à cuntese per quellu
matrimoniu, sè vo v’arricurdate. E u mo interventu,
cum’è u soiu tanti anni nanzu, avia avutu u meritu di
fà cessà l’azzuffata, almenu pè una stonda, postu chì
pocu tempu dopu, altri partitenti affaccati da i paesi
più in altu, s’eranu lampati in a baruffa, arrabbiati
nant’à quelli chì eranu fermati quaghjò in bassu.
Questi menu numerosi sarianu stati acciaccati, s’o
ùn mi fussi torna inframessu per appacià cum’o
pudia e duie bande rivali.
Stancu, sudatu era, ma quantunque suddesfu
di a mo azzione benefica, quandu mi buscai à
l’impruvisu una petrata in capu chì mi lasciò una
stonda mezu sturdulitu, cù l’impressione spiacente
d’un velu davanti à l’ochji. A mo ferita, quella di u so
giovanu prete, ebbe quantunque l’effettu di fà piantà
ogni litica è tuttognunu pobbe rientrà in casa soia.
U medicu Faticio, di a Casella, ch’ùn eramu mancu
21