TurnàALeghje_Extrait

’
dì infatti chì, quandu ellu iscì stu manuale cusì impurtante, l’università di Corsica
ùn esistia ancu. Ùn ci era cà un muzzicone di struttura di studii d’altu livellu, in
Ecchisi, e famose « Études corses », in lu quatru d’una uzzione, è ci vole à ringrazià
à Paulu Arrighi, à Farrandu Ettori cù tutti quelli insignanti chì inizionu tandu
una cunniscenza insinnata, scintifica, apprufundita di e rialità di a Corsica in ogni
duminiu accustatu.
Dunque solu saranu avanzate e pruposte chì si pensa ch’elle ghjovinu da
migliurà certi particulari ma senza purtà dannu in varuna manera à i principii escinziali
di quellu manuale di l’origine.
Bene intesu, femu nostru l’avirtimentu iniziale di Marchetti è Geronimi :
dicenu tramindui chì, ricurdemula, si chjama lingua corsa l’inseme di e so parlate,
quelle chì sò sempre in usu oghje chì hè oghje è chì e spiccanu in fatta fine pochi
affari, à l’eccezzione di a prununzia.
Ghjè sta prununzia chì dà à ogni dialettu un culore è una musicalità particulare.
U dialettu stessu ghjova à ogni lucutore da strumentu di cumunicazione è
da mezu d’idintificazione à una cumunità linguistica. In la diversità ch’omu parcipisce
di a lingua, ci entre sta prununzia pà a più gran’ parte.
U studiu di u cunsunantisimu, ch’è no chjamemu dinò sistema cunsunanticu,
ùn palesa micca dificultà maiò par ciò chì tocca à a pusizione iniziale di a
cunsunale in la parolla. Ma si cumplicheghja quandu chì a listessa occupa una
pusizione à l’indrentu : ci ghjuvarà dunque un studiu funulogicu sistematicu,
aduprendu l’attrazzi di a linguistica è arrimbenduci à i travagli fatti da i studii corsi
di l’università, sottu à u rigiru iniziale di Marie-José Dalbera-Stefanaggi è, più
tardi, di a squatra chì l’hà assistuta è accumpagnata.`
Da rende sfaticata di più a littura di stu travagliu, certi littori pudaranu forse
truvà u so cuntinutu à le volte zeppu, ci avemu messu uni pochi di riassunti dopu à
i capituli nantu à u cunsunantisimu, u vucalisimu è l’elisione (capituli 10, 12 è 14).
Par tene un discorsu ancu più chjaru, u capitulu 18 prupone un ripigliu sinteticu
di l’inseme di e pruposte ch’è no avanzemu in què u studiu. Infine s’hè pussutu
leghje dinò, in lu sottutitulu di stu libru, ch’ellu s’intindia di parlà di pulinumia è
di standardizazione. Di u cuncettu di pulinumia s’avvidarà omu ch’ellu si ne tene
contu da principiu à fine di stu travagliu, di modu à pudè spichjà tutta a ricchezza
di u corsu in la so variatezza. Ma emu vulsutu dinò pone u prublema di a standardizazione
chì senza quessa, à parè nostru, ùn si pò micca andà da veru verdi a lingua
à u sensu di mezu di cumunicazione di larga sparghjera. Appuntu u capitulu 19
prupone una riflissione nantu à e cundizione chì ci parenu nicissarie da arricà una
mudirnata à a nostra pratica di u corsu scrittu.
Ed avà, à chì a li vularà pruvà à leghje…