Augustus

2
••• REDAKTEURSBRIEF
’n Klein begin kan lei
na groot sukses
Meeste van ons het iewers in
ons lewens met ’n skedonk te doen gehad, daardie
een wat aan die brand gestoot moes word, olie
gelek het of iewers ’n onderdeel gekort het wat
eens op ’n tyd gewerk het. Daardie motor wat jou
so skaam gemaak het dat jy jou kop onder die
paneelkassie wou indruk – egter net totdat dit jou
eie geword het, dan wou jy bars van trots!
Myne was ’n kanariegeel Mazda Sting. Banana,
soos ek haar vroeg reeds gedoop het, was my ma
se kar in die jare toet, toe polisiemotors nog geel
was en juis hieroor was sy oortuig daarvan dat hulle
nooit haar kar sou steel nie. Ek gaan lieg as ek sê
ek was nie bly toe my ma besluit het dit is tyd vir ’n
nuwe ryding nie, maar tot my spyt besluit my pa toe
dat die kar my studentemotor moes word.
Met ’n lisensie in my sak en my geel motor wat
met slegs R200 volgemaak kon word, rits ek die
wêreld vol. Haar ruitveërs het ook later die gees
gegee, maar dit het my nie gekeer op ’n reënerige
dag nie, want ek het net my kop by die venster
uitgesteek en bietjie stadiger gery. Sekerlik die
grootste voordeel wat Banana ingehou het, was die
feit dat ek nooit na haar moes soek wanneer ek by
die winkels uitgekom het nie, daardie giggel-geel het
my altyd reg tussen die oë getref.
Sy het grondpad gery, lusern op haar agtersitplek
SENWES SCENARIO
>
vervoer en ’n vark in haar kattebak veearts toe ge -
neem. Sy was altyd vol gras, perdevoer, hondehare
en boeke. Ek en Banana was basies onafskeid baar.
Banana het egter so ’n paar jaar gelede die
tydelike met die ewige verwissel nadat ’n Putco-bus
alweer voor my ingedraai het. Dankie tog tegnologie
verander en daardie hoofstuk van my lewe
is afgehandel, want vandag spog ek darem met
lugversorging en kragstuur, al moet ek self daarvoor
betaal.
John Deere is self ’n markleier sover dit tegnologie
in die meganisasiebedryf aangaan. Lees op
bladsy 35 meer oor opwindende nuwe verwikkelinge
met betrekking tot hul implemente. Laparoskopiese
bevrugting by skape toon ook hoe tegnologie
verantwoordelik is vir verbeterings in die veebedryf.
Op bladsy 48 vertel Carel Nel waarom hy hierdie
praktyk in sy skaapboerdery geïntegreer het.
Geniet hierdie uitgawe van Senwes Scenario wat
merendeels oor meganisasie en insette handel.
Moenie daardie ou trekker of implement in jou stoor
miskyk nie…Hy is dalk oud, maar nog definitief nie
koud nie.
Elmarie
• Alle regte van die inhoud van Senwes Scenario word voorbehou ingevolge die bepalings van Artikel 12 (7) van die Wet op Outeursreg.
• Die eienaar en uitgewer aanvaar nie aanspreeklikheid vir enige uitlatings in advertensies, promosie-artikels of deur medewerkers nie.
Elmarie
Elmarie
Elmarie Schoeman
Schoeman
Schoeman
www.senwes.co.za • Augustus 2012