n Samestelling - ABC4TT

‘n Versameling heerlike, verleidelike, onweerstaanbare,
vetmakende, vermy-die-skaal, warm en koue poedings.
‘n Samestelling deur Anna Eksteen 0822946799
Kopiereg – Anna Eksteen. Nie bedoel vir gratis verspreiding.
Indien jy hierdie eBoek samestelling ontvang sonder om self daarvoor te betaal, kontak
asseblief my (Anna) by bogenoemde nommer vir koste hieraan verbonde.

INDEKS OPGAWE
AGT-LEPEL-POEDING 6
BESSIE-MERINGUE-TRIFLE 4
BLOOSPOEDING 9
DADEL EN GEMMERPOEDING 7
DROËVRUGTESLAAI MET SPESERYE 5
FLUWEELPOEDING 10
FRAMBOSE IN ROSÉ-VONKELWYN-JELLIE 11
GEBAKTE FRAMBOOS-VLA 4
GEBAKTE KAKAOPOEDING 8
GEURIGE KANEELRYSPOEDING 3
GOUESTROOP-EN-KANEELKLUITJIES 6
HANEPOOTPOEDING 7
HEUNING-EN-SULTANA-BROODPOEDING 10
KARAMELPOEDING 8
KARRINGMELK POEDING 3
KERSIE BRANDEWYN POEDING 6
KLASSIEKE SAGO-POEDING 3
KOEJAWEL-EN-KLAPPER-KRUMMELPOEDING 4
KONINGINPOEDING 4
LEMOENPOEDING 9
MA SE KAAPSE POEDING 12
OUTYDSE ASYNPOEDING 9
PANNEKOEK MET LEMOENSTROOP 5
PERSKEPOEDING 11
PIESANG EN KARAMEL POEDING 12
PYNAPPELPOEDING 9
ROMERIGE ROOIBOS-EN-PIESANGPOEDING 11
RYK, SOUSERIGE SJOKOLADEPOEDING 10
SJOKOLADE EN LIKEURPOEDING 3
SUURLEMOENSKUIMPOEDING 8
TELEFOONPOEDING 11
VANIELJERYSPOEDING MET APPELKOOS- COMPOTE 5
WINTERVRUGTE IN ROOIWYN 6
2

GEURIGE KANEELRYSPOEDING
60ml botter 30ml bruinsuiker
15ml kaneel 3 kardemomsade gekraak
750ml gaar witrys 100ml heuning
125g sagte droë appelkose, in kleiner stukkies gesny 175ml gewone jogurt
100g amandels, gerooster en fyn gekap kruisement blare vir garnering
Verhit die botter en roer die bruinsuiker, kaneel en kardemomsade by. Braai sowat 3 minute en roer
dan die rys by. Roerbraai tot die rys warm en oraloor bedek is met die botter en kaneelmengsel.
Skep twee groot eetlepels vol rys in ‘n mooi koppie of glad, skep dan ‘n bietjie heuning, ‘n bietjie
appelkose en ‘n groot skep jogurt oor. Herhaal die lae en sprinkel die amandels oor. Garneer met
die kruisementblare.
SJOKOLADE EN LIKEURPOEDING
5ml kakaopoeier 125ml kookwater
500g malvalekkers (verkieslik net wit) 500ml room, styf geklop
30ml romerige likeur 125ml gekapte neute
100g melksjokolade, gerasper
Los die kakao in die kookwater op en gooi dit in ‘n pot. Laat dit prut en gooi die malvalekkers
daarin. Roer deurentyd tot dit gesmelt het. Laat eenkant staan en roer deur. Vou die styfgeklopte
room by gesmelte malvalekkers. Voeg die likeur en neute by en roer deur. Skep in fyn, individuele
glasies en garneer met gerasperde sjokolade of malvalekkers. Bêre in die yskas tot dit gestol het.
Sit dit voor met room en enige vars vrugte van jou keuse.
KARRINGMELK POEDING
25ml botter 180ml witsuiker
2 eiergele 25ml koekmeel
‘n knippie sout 250ml melk
250ml karringmelk 2ml vanieljegeursel
2 eierwitte, styf geklits
Voorverhit die oond tot 180C. Smeer ‘n diep, vierkantige bak van 24cm. Room die botter en in ‘n
groot mengbak tot dit lig is. Klits die eiergele een vir een by. Voeg die meel, sout, melk en
karringmelk om die beurt by die beslag en meng goed tussen elke byvoeging. Voeg die vanielje
geursel by en vou die styfgeklitste eierwitte in. Giet die mengsel in die voorbereide bak en bak 1 uur
tot goudbruin. Sit voor saam met bessies of aarbeie.
KLASSIEKE SAGO-POEDING
Die oorspronklike resep bevat altyd appelkooskonfyt, maar aarbeikonfyt is net so lekker daarby.
140g sago 750ml melk
100g suiker knippie sout
25ml botter 2 eiergele
50ml aarbeikonfyt 4 eierwitte
100g suiker
Verhit oond tot 180C. Gooi sago in ’n sif en spoel af met koue water. Gooi sago daarna in ’n kastrol
saam met melk en verhit stadig. Kook oor lae hitte totdat dit deurskynend is. Haal kastrol van hitte
af en voeg 100g suiker, sout en botter by. Dan kom die geklitste eiergele by en meng goed. Skep
mengsel in gesmeerde bakkies of koppies. Stip aarbeikonfyt bo-op. Klits eierwitte styf en voeg
suiker lepel vir lepel by. Dit moet ’n stywe meringue vorm. Skep of spuit die meringue bo-op die
sagovulsel. Bak in warm oond vir 20 minute. Lewer 6 porsies.
3

KOEJAWEL-EN-KLAPPER-KRUMMELPOEDING
8 koejawels, geskil en in kwarte gesny 140ml strooisuiker
5ml vanieljegeursel 60ml strooisuiker
125ml koekmeel 110ml koue botter
250ml klapper 100g amandelvlokkies
Verhit oond tot 180C. Meng koejawels, 140ml strooisuiker en geursel in ’n mengbak. Skep in ’n
gesmeerde oondbak van 30cm. Meng 60ml strooisuiker en meel in ’n mengbak. Vryf botter daarby
in totdat dit soos broodkrummels lyk. Voeg klapper en amandels by en meng. Skep mengsel bo-op
die koejawels en bak vir sowat 40 minute tot bros en goudbruin. Sit voor saam met room. Lewer 6
porsies.
GEBAKTE FRAMBOOS-VLA
’n Lekker resep om al die vorige dag te maak. Hou dit in die yskas en versier net voor jy dit voorsit.
350g bevrore frambose, ontdooi 100ml strooisuiker
5 eiergele 500ml room
250ml room, styfgeklop frambose en kruisement-blare om te
versier
Verhit jou oond tot 140C. Plaas die bessies, strooisuiker en eiergele saam in ’n voedselverwerker.
Meng tot glad. Syg die mengsel deur ’n sif. Voeg die 500ml room by en gooi die mengsel in koppies
of bakkies. Plaas die bakkies in ’n oondbak en gooi kookwater tot halfpad teen die bakkies op. Bak
vir 1 uur. Haal uit en laat afkoel. Skep van die geklopte room bo-op en versier met frambose. Rond
af met ’n kruisement-blaar. Lewer 4 porsies.
Onthou as jy bevrore bessies gebruik, moet dit heeltemal ontdooi wees voor jy die eiergele byvoeg,
anders sal die eiergele vries.
BESSIE-MERINGUE-TRIFLE
Dit sal jou letterlik sowat 10 minute neem om te maak. ’n Baie lekker nagereg.
350g vars of bevrore frambose (raspberries) 60ml strooisuiker
8 klaargekoopte meringues 250ml room, styfgeklop
100g swartbessies, vir versiering
Plaas die frambose in ’n mengbak en gooi suiker oor. Meng goed. Breek meringues in stukke. Ek
gebruik ’n lang glas, maar jy kan enige bakkie of glas gebruik. Skep van die gebreekte meringues
onderin. Skep geklopte room bo-op en dan ’n lagie frambose. Herhaal die lae. Skep room bo-op en
rond af met die swartbessies. Sit dadelik voor. Lewer 2 porsies.
KONINGINPOEDING
6 snye witbrood, dun gesmeer met botter 4 eiergele
30ml suiker 900ml melk
10ml brandewyn knippie sout
5ml vanieljegeursel 125ml room
warm appelkooskonfyt 4 eierwitte
30ml strooisuiker
Pak die snye brood in 'n gesmeerde oondbak. Klits die eiergele en suiker goed saam. Voeg die
melk, brandewyn, sout en vanieljegeursel by en klits weer goed. Gooi die room by en klits liggies
saam. Giet oor die brood en laat week vir 20-30 minute. Verhit intussen die oond tot 180C. Sit die
bak in 'n groter oondbak met warm water en bak vir sowat 1 uur. Haal die poeding uit en smeer
warm appelkooskonfyt rojaal oor. Klits eers die eierwitte styf en klits dan die strooisuiker by tot die
mengsel soos meringue lyk. Skep oor die brood en sit terug in die oond teen 160C tot bruin.
4

VANIELJERYSPOEDING MET APPELKOOS- COMPOTE
RYSPOEDING
250ml witrys 1,25 - 1,5 liter (5-6k) volroommelk
1 vanieljepeul, deurgesny en saadjies uitgeskraap knippie sout
125ml suiker
APPELKOOSCOMPOTE
500ml gedroogde appelkose 250ml suiker
125ml rooibostee 80ml brandewyn
1 kaneelstok
Gooi alles vir die ryspoeding (die vanieljepeul word saam met die uitgeskraapte saadjies bygevoeg)
in 'n groot kastrol. Verhit stadig oor lae hitte tot die melk begin kook. Verlaag die hitte en prut terwyl
aanhoudend geroer word, die poeding dik en romerig en die ryskorrels gaar is. Terwyl die poeding
kook, verhit alles vir die compote saam tot die suiker gesmelt is. Kook tot die appelkose sag en die
sous stroperig is. Skep die warm compote oor porsies ryspoeding en sit warm voor. Lewer 6-8
porsies.
PANNEKOEK MET LEMOENSTROOP
Sekerlik een van die lekkerste winternageregte. Probeer hiervoor klein, dun pannekoeke maak.
CRÊPES
300ml koekmeelblom 1ml sout
3 ekstra-groot eiers 250ml melk
125ml water 15ml brandewyn
15ml gesmelte botter
Sif die meel en sout saam. Maak 'n holte in die middel. Klits die eiers, melk en water goed saam en
voeg by die bestanddele. Klits stadig om te meng en dan vinniger tot 'n gladde beslag vorm. Roer
die brandewyn en gesmelte botter by en laat staan vir 30 minute. Giet 'n dun lagie van die beslag in
'n klein pan wat met 'n bietjie botter of olie gesmeer is. Braai oor matige hitte vir een minuut of tot
borrels op die oppervlak verskyn, draai om en braai tot gaar aan die ander kant. Herhaal en hou
eenkant warm. Lewer 16 klein pannekoekies.
LEMOENSTROOP
90ml botter 180ml strooisuiker
sap en fyn gerasperde skil van 3 lemoene skeut vars suurlemoensap
180ml lemoenlikeur (soos Van der Hum of Cointreau) 60ml botter
Verhit die botter en suiker saam. Voeg die lemoensap en skil by en prut tot verdik. Voeg die likeur
en suurlemoensap by en verhit tot dit net wil kook. Verwyder van hitte en roer die botter by. Vou die
pannekoekies in die helfte en dan weer om driehoeke te vorm en pak in die warm stroop. Laat
opkook en sit warm voor met koue skinkroom.
DROËVRUGTESLAAI MET SPESERYE
100g droë vye, gehalveer 100g droë appelkose
100g pruimedante, ontpit 45ml bruinsuiker
250ml warm rooibostee 1 kaneelstok
1 heel steranys
Verhit alles saam in 'n pot oor lae hitte tot die suiker gesmelt is. Prut liggies, sonder 'n deksel, tot
stoperig en die vrugte sag is. Sit voor met dik vla. Lewer 3-4 porsies.
5

WINTERVRUGTE IN ROOIWYN
1 suurlemoen 1 lemoen
750ml water 375ml vrugtige rooiwyn
45ml bruinsuiker 1 kaneelstok
2 pere, gehalveer, geskil, ontpit en in stukke gesny 4 koejawels, gehalveer
2 tamatiepruime (persimmons), geskil,in kwarte gesny 2 appels, geskil, ontkern, in stukke gesny
Gebruik 'n sitrusskiller ("zester") en trek repies skil van die suurlemoen en lemoen af. Druk dan die
sap van albei uit en sit alles saam in 'n kastrol. Verhit stadig oor lae hitte tot die suiker opgelos is.
Verhit tot kookpunt en prut liggies vir 10-15 minute. Sit warm voor met room.
AGT-LEPEL-POEDING
8 gelykvol eetlepels margarien 8 gelykvol eetlepels appelkooskonfyt
8 hoogvol eetlepels koekmeelblom 8 gelykvol eetlepels suiker
10ml koeksoda 500ml melk
Smelt margarien en konfyt oor lae hitte in 'n kastrol. Meng koekmeel en suiker. Los koeksoda in
melk op en meng met droe bestanddele. Voeg gesmelte margarien en konfyt by. Roer om goed te
meng. Die mengsel is loperig. Gooi in 'n gesmeerde bak, sit deksel op en bak in voorverhitte oond
van 180C tot bruin. Die poeding is ook baie geskik vir bevriesing.
KERSIE BRANDEWYN POEDING
125g donker sjokolade 320ml room
320 ml melk 8 eier gele
125ml suiker 80 ml kakao
1 bottel kersies, sonder sap 1 bottel swartbessie konfyt
125ml kersie brandewyn geklitste room
sjokolade koek
Smelt die sjokolade in 'n glas bak bo-oor 'n pot water. Kook die melk en die room saam. Meng die
eiers, suiker en kakao goed. Voeg die melkmengsel by die eier mengsel. Voeg dan die sjokolade
by die mengsel. Laat dit kook en roer dit vir ongeveer 10 minute. Gooi dit in 'n bak en sit "gladwrap"
bo-op die mengsel en laat dit afkoel. Sny die koek in skywe en smeer dit met die konfyt en maak
toebroodjies, Sit die toebroodjies in 'n bak en druk dit goed vas. Gooi die kersies oor die koek en
dan die brandewyn. Maak seker dat al die stukke koek bedek is met die brandewyn. Gooi die
sjokolade vla oor en sit die geklitste room bo-op.
GOUESTROOP-EN-KANEELKLUITJIES
KLUITJIES
250ml bruismeel knippie sout
3ml kaneel 45ml botter
1 eier 15-30ml melk
SOUS
500ml water 250ml suiker
60ml vars suurlemoensap 30ml gouestroop
2ml kaneel 45ml botter
Sif die meel, sout en kaneel saam. Vryf die botter met jou vingerpunte in tot die mengsel
krummelrig is. Klits die eier en melk saam en voeg by. Maak aan tot 'n sagte deeg. Verhit die water,
suiker, suurlemoensap, stroop, kaneel en botter saam tot kookpunt. Knyp stukkies deeg af en sit in
die kokende stroop. Bedek die kastrol en laat kook vir ongeveer 20 minute. (Die kluitjies is gaar as
'n mes wat in een gedruk word, skoon uitkom.) Skep in bakkies, skep die stroop waarin dit gekook
is daaroor en besprinkel met ekstra kaneel of drup ekstra-gouestroop bo-oor. Sit voor met roomys
of vla. Lewer 6-8 porsies.
6

DADEL EN GEMMERPOEDING
STROOP
250ml suiker 250ml water
60ml muskadelwyn
BESLAG
30ml botter 30ml appelkooskonfyt
125ml melk 10ml fyn gemmer
1 eier 250ml dadels, fyngekap
120g ingemaakte gemmer, gekap 20ml koeksoda
250ml koekmeel
STROOP
Gooi al die stroopbestanddele in 'n kastrol en roer dit oor lae hitte totdat die suiker gesmelt het.
Sodra die suiker opgelos het, kan jy die hitte verhoog en die stroop vir 5 minute laat prut.
BESLAG
Verhit die botter, appelkooskonfyt, melk en gemmer in 'n aparte kastrol en roer dit totdat die botter
en konfyt gesmelt het. Klits die eier en roer dit by die gekapte dadels en ingemaakte gemmer. Gooi
die koeksoda by.
Gooi die warm botter-en-appelkooskonfytmengsel by en roer deur. Sif die meel oor die beslag en
vou dit met 'n groot lepel in. Skep die beslag in 'n gesmeerde oondbak (22 x 22 cm) en giet 'n derde
van die stroop oor. Bak dit vir 20 minute. Gooi nog 'n derde van die stroop oor en bak dit vir nog 15-
20 minute of tot gaar. Gooi die laaste stroop oor die poeding sodra dit uit die oond kom en sit dit
voor met room.
HANEPOOTPOEDING
Lekker soet, sit dus vla of room hierby voor.
250ml koekmeel knippie sout
45ml sagte botter 200ml strooisuiker
1 eier 15ml gladde appelkooskonfyt
250ml melk 5ml koeksoda
5ml asyn
STROOP
200ml botter 180ml suiker
45ml gouestroop 125ml kookwater
knippie sout 250 ml hanepoot
5 ml vanieljegeursel
Voorverhit die oond tot 180C en smeer 'n oondbak met botter. Sif die meel en sout saam. Verroom
die botter en strooisuiker goed saam en klits die eier en appelkooskonfyt hierby in. Meng die melk,
koeksoda en asyn en roer by die bottermengsel saam met die droë bestanddele. Skep in die
voorbereide bak. Skep die beslag in die gesmeerde bak en bak vir sowat 30 minute of tot die
poeding goudbruin en deurgaar is.
MAAK INTUSSEN DIE STROOP:
Verhit al die bestanddele, behalwe die geursel, tot die suiker gesmelt is. Verhit tot kookpunt en
kook vinnig vir ongeveer 5-7 minute. Verwyder van die hitte en roer die geursel by. Giet die
kokende stroop oor die warm poeding sodra dit uit die oond kom. Sit warm voor. Genoeg vir 6
mense.
7

GEBAKTE KAKAOPOEDING
Die lekker sousie onderin maak eintlik die poeding!
60ml botter, gesmelt 185ml suiker
1 eier, geklits 5ml vanielje
250ml koekmeel 30ml kakao
'n knippie sout 10ml bakpoeier
185ml melk
SOUS
125ml sagte bruinsuiker gemeng met, 30ml kakao en 400ml swart koffie
Stel oond op 180C. Meng botter en suiker saam. Voeg geklitste eier en dan geursel by. Sif droë
bestanddele saam en voeg dit beurtelings met melk by bottermengsel. Skep in gesmeerde bak.
Sprinkel die bruinsuiker en kakao oor, giet die swart koffie versigtig oor en bak vir sowat 30 minute
tot gaar. Geniet warm, of louwarm, met vla of room.
WENK
Sorg dat die vloeistof die deeglaag bedek.
SUURLEMOENSKUIMPOEDING
Die nagereg-weergawe van suurlemoenmeringuetert.
500ml melk 50ml vlapoeier
50ml kondensmelk of strooisuiker 5ml suurlemoen, gerasperde skil en sap
1 pakkie tennisbeskuitjies, fyngedruk 4 groot eierwitte
250g strooisuiker
Voorverhit die oond tot 200C. Meng 50 ml melk met die vlapoeier in ’n klein beker. Verhit die res
van die melk tot dit net begin kook. Gooi die vlamengsel daarby en roer tot dit verdik. Haal van die
plaat af en roer die kondensmelk en die suurlemoenskil en -sap daarby in. Sprinkel die fyngedrukte
koekies oor die bodem van ’n gesmeerde oondvaste bak of individuele bakkies. Skep die
vlamengsel oor die koekiekors. Klop die eierwitte tot stywe punte vorm. Voeg die strooisuiker
bietjies-bietjies by en klop goed ná elke byvoeging. Klop dit tot styf en skep dit bo-op die vla. Bak vir
15 tot 20 minute in ’n voorverhitte oond tot goudbruin. Lewer 6 porsies.
KARAMELPOEDING
BESLAG
500ml koekmeel 10ml bakpoeier
2ml sout 250ml suiker
60ml appelkooskonfyt 2 eiers
10ml koeksoda opgelos in 45ml asyn 500ml melk
STROOP
500ml suiker 500ml melk
15ml vanieljegeursel 250ml water
125ml botter
Voorverhit die oond tot 200C en smeer ’n oondbak met botter. Sif die meel, bakpoeier en sout
saam. In ’n ander bak, klits die suiker appelkooskonfyt en eiers baie goed saam tot lig en dik (dit
neem ongeveer 10 minute) en vou dit om die beurt met die melk en asynmengsel by die droë
bestanddele in. Giet in die voorbereide oondbak en bak vir ongeveer 45 minute tot goudbruin en
gaar. Terwyl die poeding bak, berei die stroop: Verhit alles saam oor lae hitte tot die suiker gesmelt
is. Bring tot kookpunt en prut vir 5-7 minute. Giet die kokende stroop oor die poeding sodra dit uit
die oond kom. Laat staan vir 15-20 minute en sit voor met roomys, room of vla. Bedien 8-10
porsies.
8

OUTYDSE ASYNPOEDING
SOUS
500ml water 500ml suiker
125ml asyn
DEEG
30ml botter 125ml strooisuiker
2 eiers 375ml koekmeelblom
5ml koeksoda 10ml gemmer
1ml sout 2ml neutmuskaat
30ml appelkooskonfyt
Verhit die bestanddele vir die sous saam tot kookpunt. Laat prut vir 5 minute en laat afkoel.
Voorverhit die oond tot 180C en smeer 'n oondbak met botter. Verroom die botter en suiker tot lig
en romerig. Klits die eiers een vir een by. Sif die droë bestanddele saam en roer dit by. Roer die
appelkooskonfyt by tot goed gemeng. Skep in die gesmeerde bak en giet die afgekoelde sous booor.
Bak vir 30-40 minute tot goudbruin. Sit voor met vla of roomys. Bedien 6 mense.
LEMOENPOEDING
'n Effense variasie op die bekende Japie-se-gunsteling. Dié poeding het 'n fyn koeklagie bo-op en baie sous onder-in.
2 eiers, geskei 250ml suiker
100ml koekmeelblom 250ml melk
180ml lemoensap 15ml fyn marmelade
fyngerasperde skil van 1 lemoen 30ml gesmelte botter of margarien
Voorverhit die oond tot 180C en smeer 'n oondbak van 20cm met botter. Klits die eiergele en suiker
baie goed tot lig en dik. Voeg die meel en melk by en roer tot gemeng. Voeg die lemoensap,
marmelade, skil en gesmelte botter of margarien by. Klits die eierwitte tot stywe punte vorm en vou
in. Skep in die gesmeerde bak en plaas in die groter oondbak. Vul met water tot driekwart vol. Bak
vir 45 minute tot goudbruin. Laat effens afkoel en sit voor. Bedien 6 mense.
PYNAPPELPOEDING
Dié poeding vorm 'n romerige laag onder-in en koek bo-op. Bedien met vla wat gemaak is van klappermelk. Dit gee die
poeding 'n egte tropiese geur.
80ml bruismeel 2ml sout
125ml strooisuiker 2 eiers, geskei
125ml melk 15ml suurlemoensap
100ml fyn pynappel 80ml pynappelsap
Voorverhit die oond tot 180C en smeer 'n oondbak van 22 cm met botter. Sif die meel, sout en
strooisuiker saam. Klits die eiergele saam met die res van die bestanddele tot gemeng en voeg by
die droë bestanddele. Klits tot gemeng. Klits die eierwitte tot sagte punte vorm en vou in. Giet in die
gesmeerde bak en plaas in 'n groter oondbak wat half vol water gemaak is. Bak vir 45 minute tot
goudbruin. Genoeg vir 4-6 mense.
BLOOSPOEDING
2 x 80g braamjellie 450ml kookwater
450ml koue water 397g blikkie kondensmelk
4 groot eierwitte styf geklitste room en aarbeie vir garnering
Los jellie in kookwater op. Voeg koue water by en laat in yskas tot dit begin stol. Voeg kondensmelk
by en klits goed. Klits eierwitte tot goed styf en vou met ‘n metaallepel in jelliemenmgsel in. Gooi in
diep poedingvorm en laat stol in yskas. Keer uit op gladde bord en versier met room en aarbeie.
9

HEUNING-EN-SULTANA-BROODPOEDING
750ml volroommelk 60ml botter
160ml heuning 2ml sout
3 ekstra-groot eiers 5ml vanieljegeursel
750ml grof gekrummelde dag oue witbrood (sonder korsies)
125ml sultanas
Voorverhit die oond tot 180C en smeer 'n oondbak van 20 cm x 30 cm goed met botter. Verhit die
melk en voeg die botter, heuning en sout by. Roer tot die botter net gesmelt is. Klits die eiers en
vanieljegeursel en voeg die melk geleidelik by, terwyl aanhoudend geklits word. Meng die
broodkrummels en sultanas en skep in die gesmeerde oondbak. Giet die melkmengsel oor en laat
staan vir 10 minute. Sit die bak in 'n groter oondbak met warm water en bak vir ongeveer 50 minute
tot ferm. Lewer 8 porsies.
FLUWEELPOEDING
Jy kan enige konfyt gebruik — aarbei-, vye- of frambooskonfyt is ewe lekker.
125ml suiker 2ml sout
180ml koekmeelblom 1 liter volroommelk
4 eiers, geskei 60ml botter
5ml vanieljegeursel 45ml louwarm appelkooskonfyt
60ml strooisuiker
Meng die suiker, sout en koekmeelblom. Verhit die melk tot net onder kookpunt. Giet 'n bietjie
daarvan oor die meel-en-suikermengsel en meng goed. Giet terug by die warm melk en verhit
stadig oor lae hitte terwyl geroer word tot verdik. Klits die eiergele en giet die warm melkmengsel
daaroor. Meng goed en voeg die botter en vanieljegeursel by. Giet in die voorbereide oondbak en
bak vir 40 minute teen 160C. Smeer die appelkooskonfyt oor. Klits die eierwitte tot stywe punte
vorm en voeg die strooisuiker lepelsgewys by. Klits tot dik en blink. Skep op die poeding en smeer
met agterkant van 'n lepel tot die hele poeding bedek is. Bak vir 'n verdere 10-15 minute tot die
punte liggoudbruin is. Sit warm voor met dun vla. Genoeg vir 6 mense.
RYK SOUSERIGE SJOKOLADEPOEDING
SOUS
60 ml kakao 125 ml bruinsuiker
300 ml kookwater
BESLAG
45ml botter 100g donker sjokolade, gekap
125ml melk 2 ekstra-groot eiers
160ml strooisuiker 250ml bruismeel
30ml kakao
Voorverhit die oond tot 180C en smeer 'n oondbak van 24 cm x 24 cm goed met botter. Meng die
kakao, bruinsuiker en kookwater vir die sous saam in 'n beker tot die suiker opgelos is. Hou
eenkant. Smelt botter, sjokolade en melk saam tot glad en laat effens afkoel. Klits die eiers en
strooisuiker liggies saam. Voeg die meel en kakao by die eiermengsel en roer dan die gesmelte
sjokolademengsel by. Klits tot gemeng. Skep in oondbak en giet stroop bo-oor. Bak vir ongeveer
30-40 minute of tot ferm. Laat effens afkoel en sit voor met room of roomys. Lewer 6-8 porsies.
10

PERSKEPOEDING
500ml koekmeelblom 2ml bakpoeier
knippie sout 250ml witsuiker
125ml botter 12 ingemaakte perskehalwes
5ml fyn kaneel 250ml suurroom
2 eiergele
Voorverhit oond tot 180C. Smeer ‘n vlak oondskottel met botter. Sif koekmeelblom, bakpoeier, sout
en 25ml suiker saam. Vryf die botter in die mengsel (lyk soos brood krummels). Pak krummels in ‘n
laag op die boom en langs die kante. Rangskik die perskes mooi daarop, gooi die res van die
witsuiker gemeng met die kaneel oor.Bak 15 minute en gooi dan die suurroom gemeng met die
eiergele oor. Bak 30 minute. Bedien warm of lou met ‘n dun vla.
TELEFOONPOEDING
DEEG
1½ koppies meelblom 1½ koppies melk
1 eetlepel botter 1 eier
1 teelepel koeksoda 1 koppie suiker
1 eetlepel appelkooskonfyt 1 teelepel vanielje
1 teelepel gemmer knypie sout
Klits botter en suiker tot room. Klits eier en vanielje en voeg by. Sif soda, meelblom, gemmer by.
Maak aan met melk en voeg laaste die konfyt by.
SOUS
1 koppie suiker 2- 3 koppies water
Roer tot suiker gesmelt is en bring tot kookpunt. Gooi oor deeg en bak tot gaar.
ROMERIGE ROOIBOS-EN-PIESANGPOEDING
250ml kokende rooibostee gerasperde skil van 1 suurlemoen
1 ml sout 250ml suiker
20ml gelatien 2 ryp piesangs
15ml suurlemoensap 250ml room
30ml karamelkondensmelk
Meng die tee, suurlemoenskil, suiker en sout saam. Sprinkel die gelatien oor en meng goed. Laat
afkoel. Druk die piesangs fyn en meng met die suurlemoensap. Klits die room en karamel saam tot
sagte punte vorm en voeg die piesangmengsel by. Voeg by die teemengsel by sodra dit lyk of dit
wil begin stol. Meng goed en giet in gesmeerde jellievormpies. Verkoel tot gestol en ontvorm in
bakkies of op 'n dienbord. Sit voor met room of vla. Genoeg vir ses mense.
FRAMBOSE IN ROSÉ-VONKELWYN-JELLIE
750ml rosé-vonkelwyn 30ml gelatien
400g frambose 100ml strooisuiker
Sit gelatien in 'n bakkie en sprinkel koue water oor. Smelt die gelatien oor 'n klein kastolletjie met
kookwater. Gooi die vonkelwyn in 'n groot bak en voeg die suiker by. Maak seker dat die vonkelwyn
kamertemperatuur is. Voeg dan die gesmelte gelatien by. Plaas die bak in die yskas net tot die
mengsel aan die kante wil begin stol. Kry nou 'n geskikte vorm en spuit met Spray & Cook. Voeg
die frambose by die vonkelwyn en gooi in die vorm. Plaas in yskas en laat stol. Wanneer dit gestol
is, dompel dit vinnig in warm water en keer uit.
11

PIESANG EN KARAMEL POEDING
8 ryp piesangs 2 houertjies vars room
2 pakkies Tennis beskuitjies 2 blikkies Caramel Treat
10 glans kersies 1 Flake sjokolade
15ml suurlemoen sap
Alles word in lae gepak. Sny piesangs in ringe en plaas dit in die suurlemoensap sodat die piesang
nie bruin raak nie. Eerste laag – begin met een lag beskuitjies. Tweede laag – room jou karamel en
laag dit bo-op die beskuitjies Derde laag – plaas die die piesang ringe bo-op die karamel. Vierde
laag – plaas een houertjie opgeklopte room bo-op die piesangs. Herhaal die eerste vier lae om die
poeding te voltooi. Vir versiering: sny die kersies in die helfte en pak dit bo-op die room. Breek die
Flake fyn en sprinkel oor. Sit die poeding in die yskas tot goed verkil.
MA SE KAAPSE POEDING
1 sponskoek 2 liter vla
1blik perskes 1 pakkie kersies
1 pakkie gekapte neute 1 pakkie rooi jellie
1 pakkie groen jellie 1 blik appelkoos konfyt
1 houer vars room
Maak jellie soos aanwysings op pakkie en sit in yskas om te stol. Sny perskes in stukkies en hou
stroop eenkant. Hou 2 perske skywe heel en eenkant vir garnering. Sny kersies in stukkies en hou
een kersie heel vir garnering. Sny die sponskoek soos brood in dun snye en halveer. Smeer die
snye met appelkooskonfyt soos botter. Vat mooi bak en lyn met vla gevolg met:
1. ‘n laag sponskoek (pak mooi styf teen mekaar) 2. Gooi laag gekapte perskes gevolg met kersies
en neute. 3. Drup liggies met stroop van perkses gevolg met vla. Herhaal lae vanaf 1-3 tot alle
bestanddele op is. Eindig met ‘n laag vla. Klits die room en sit bo-op. Neem vurk en maak jellie fyn.
Pak die jellie rondom bak, een ry rooi en een ry groen jellie (buiterand) Vorm blom met die 4 heel
perske skywe in die middel en sit een heel kersie in die middel Plaas in yskas.
12