Diskursu husi S.E. Primeiru-Ministru Kay Rala Xanana Gusmão nian

DISKURSU HUSI
SUA EXSELÊNSIA PRIMEIRU-MINISTRU
KAY RALA XANANA GUSMÃO
HO OKASIAUN SERIMÓNIA GRADUASAUN ESTUDANTES
FINALISTAS UNTL NIAN
Sentru Konvensoens Díli
26 Novembru 2012

Magnífiku Reitor, Prof. Dr. Aurélio Guterres
Señor Ministru Saúde
Señor Ministru Edukasaun
Distintus Membrus Parlamentu
Señores Membrus Governu
Distintu Korpu Dosente
Señor Embaixador Kuba
Distintus Konvidadus
Doben graduandos no sira nia família,
Serimónia ohin nian ne’e, kona-ba graduasaun estudantes medisina 450, la ós ona
formalidade akadémika hanesan bai-bain, maibé sai núdar marku istóriku ba iha
dezenvolvimentu Timor-Leste nian, nebé ita tenki selebra ho laran kontente.
Graduasaun ba Rai ida ne’e nia oan lubun boot ida, iha setor ida nebé esensial tebes
ba ita nia povu, hanesan saúde, sai motivu ida atu ita sente haksolok duni, tamba fó
esperansa nebé boot liu tan ba futuru.
Tanbe ne’e maka ha’u mós, ho laran kontente, mai partisipa iha serimónia ida ne’e,
hodi hato’o ha’u nia admirasaun nebé klean tebes ba jovens sira né, ba-sá maski
hasoru difikuldades oi-oin, iha tinan hirak nia laran, sira la desiste.
Imi nia esforsus, hodi kontribui ba konstrusaun ita nia Estadu sosial, fó duni onra ba
sakrifisius nebé ita nia Povu hasoru, atu liberta ita nia Rain, no loke futuru ida nakonu
ho konfiansa ba ita-nia labarik sira.
Imi nia dedikasaun hatudu lolós ita-nia Povu nia espíritu, nudar lutador no tuba-rai metin
nian. Nuné, hanesan ita nia veteranos no mártires sira, iha tempo kotuk, imi agora tama
iha lista heróis foun iha tempu ida ne’e.
Señor Embaixador Kuba,
Ha’u labele haluha hato’o ba ita, ami hotu nia agradesimentu wain, tan Kuba bele simu
ho laran luak jovens atus-ba-atus, hodi valoriza sira ho koñesimentus no preparasaun
téknika, atu sira bele hala’o sira nia obrigasoens ba povu, iha área medisina.
Ha’u husu ba ita, Señor Embaixador, atu hato’o ba belun boot nebé ha’u respeita tebes
Komandante Fidel Castro, ba Presidente Raul Castro, ba Governo no Povo Kuba
tomak, la ós deit haú nia agradesimento pessoal, maibé mós husi timoroan tomak, no
ami sei nunka haluha ami nia belun diak sira.
Exselênsias
2 / 6

Señoras no Señores
Tinan ida ne’e, hanesan hotu-hotu hatene, ita komemora datas importantes nebé
simboliza prosesu nebé foin hahú ba ‘konstrusaun Estado no konstrusaun Nasaun’
nian.
Fundamental ba imi jovens hotu, nebé ohin halibur iha ne’e,liu-liu tanba konsidera katak
imi halo parte ba elite intelektual foun timornian, hodi imi bele entende didi’ak prosesu
ida ne’e no koñese didi’ak mós ita nia istória.
Tenki tau nafatin deit iha imi hotu nia hanoin katak independensia, nebé ita foin festeja
nia tinan 10, iha 20 de Maio kotuk, ita hadau ho sofrimentu barak.
Nunka bele haluha katak, iha ita nia ezistensia badak ida ne’e, nudar Estadu, ita halo
sala barak no hakat periodus síklikus instabilidade nian. Ita sidi, bain-hira ita hala’o knar
boot no difisil atu harí, no tanba né maka ita tenki husu duni asistensia internasional atu
mai ajuda ita hodi rekupera no mantén ordem públika.
Maibé tuir ritmu rasik ba konstrusaun Estadu no Nasaun nian, ita hatene aprende ho ita
nia errus, hodi hadok-an husi sirkunstansias difiseis sira né hotu, nebé baibain mosu iha
Rai sira nebé liu husi passadu resente konflitu no violensias nian.
Tinan sira ikus né, felizmente, sai tinan paz no seguransa nian, nebé ajuda tebes atu
harí bases ba kreximentu ita-nia Rain nian, atu konstrói ita nia Nasaun no dirige ita-nia
esforsus atu halakon moris-kiak.
Sei iha tinan 2012 nia laran, iha klima diak ba paz no estabilidade, ita hala’o ronda 2 ba
eleisoens presidensiais, nebé komunidade internasional konsidera hanesan livres no
justas no, iha fulan Julhu, Povo timoroan ba vota dala ida tan, hodi hili V Governo
Konstitusional.
Governu foun ida ne’e simu misaun atu kontinua konsolida ka hametin instituisoens
fundamentais nudar Nasaun pasifika no demokrática ida, no atu garante kontinuasaun
ba kreximentu ita-nia ekonomia.
Ita haré daudauk retirada nebé gradual husi UNMIT no ISF, hodi hakotu sira-nia
operasoens ba paz iha Timor-Leste.
Ita tama iha faze foun iha ita-nia istória, iha fase nebé ita simu tomak ona, knaar atu
kaer rasik ita nia destinu. Kabe ba ita, katak, iha timoroan tomak no, liuliu, iha jovens
Nasaun ida ne’e nian, nia liman laran atu assume responsabilidade hodi contribui atu
labele tan fó hakat ba kotuk, iha períodu ida nebé ita buka atu konsolida susesus nebé
ita hetan kona-ba paz no estabilidade.
Ho espíritu ida ne’e, maka ita sei taka selebrasoens tinan ida ne’e nian, iha 28
Novembro, iha Same, hodi celebra aniversáriu 37 nian ba Proklamasaun
3 / 6

Independensia no mós tinan 100 ba rebeliaun nebé ikus hasoru dominiu português,
nebé koñesida hanesan Revolta Manufahi.
Ita hakarak atu datas hirak né, ita festeja iha tinan 2012 nia laran, nebé liga ita ba ita nia
pasadu resente luta ba independensia nian no ba to’o hun no abut husi tempu uluk liu
nian, hamutuk halo ita sai úniku iha kontextu rejiaun no mundu tomak nian, bele serve
mós hodi hatudu ka afirma ita-nia Nasaun hanesan soberana, iha paz no toleransia nia
laran no hakat ba dezenvolvimentu.
Exselênsias
Señoras no Señores
Doben graduandos,
Ita nia mehi no hakarak ba konstrusaun instituisoens Estadu nian maka legitima ka fó
razaun atu halo investimentu ba dezenvolvimentu ita nia rekursus umanus no, ho
hanoin luan oitoan, ba iha kapital sosial Nasaun nian.
Planu Estratéjiku Dezenvolvimentu tau ênfase boot, katak realsa dignidade umana,
hatúr ás liu interesse selu-seluk.
Estadu iha obrigasaun atu kria kondisoens nesesárias hodi nuné timoroan tomak –
nebé Nasaun nia rikusoin lolós – bele saudáveis liu tan, instruidus liu tan no iha asesu
boot liu ba justisa, ba informasaun no ba kultura.
Ne’e, mak sai nudar premissa ka kompromisu atu harí Nasaun ida nebé justa no
dezenvolvida.
Aktualmente, Timor-Leste konta ho médikus espesialistas 13, médikus medisina jeral
139, enfermeirus no enfermeirus assistentes 1.271, parteiras 427 ho téknikus saúde
416.
Ba numerus sira né, iha tan aumentu ho graduadus ohin nian.
Maski seidauk bele, iha futuru nebé badak, atu Timor-Leste konta lós deit ho nia
kuadrus rasik, hodi kontinua presiza maun-de-obra kualifikada husi liur, ita sei haka’asan
neineik kona ba kestaun ida né.
Ba ida né, importante ba imi atu labele haluha katak imi nia estudus la ramata ohin.
Serimónia ida ne’e la ós katak imi nia formasaun hotu ona iha ne’e, maibé hanesan deit
hakat ida atu loke tan nafatin imi nia matenek.
Karreira nebé imi hili ezijente tebetebes no, iha mundu global ohin loron nian, ho nia
mudansas kona ba dezenvolvimento teknolojia nian, ema sira nebé sei hetan susesu
profissional mak sira nebé buka aumenta nafatin sira nia matenek, sira nebé iha néon
nakloke atu bele aktualiza-an beibeik, hodi partisipa diak liu tan iha dezenvolvimento
sosiedade nian.
4 / 6

Doben graduandos,
Dezafius nebé imi sei hasoru, iha imi nia servisu laran, mak dezafius nebé País ne’e
rasik enfrenta.
Ha’u nia apelu ba imi mak: atu konsentra, ho vontade maka’as, ba ezerse imi nia
misaun, hodi ita nia povu bele apresia jerasaun foun intelektuais no profissionais. Ita nia
povu sei triste tebetebes, wainhira sira rona katak imi hahú preokupa deit no ezije barak
liu kona ba imi nia direitus, hodi haluha tiha imi nia deveres atu servi, ho kariñu no ho
devosaun, moras sira nebé presiza imi nia asistênsia.
Besik metade ita nia populasaun moris iha kondisoes kiak tebetebes, ho dificuldades
atu garante seguransa alimentar ba sira nia an rasik, ho mós ita sei iha hela infraestruturas
bázikas nebé seidauk diak, no buat sira né hotu iha nia implikasoens ba
estadu saúde populasaun nian.
Taxa mortalidade infantil, mak iha labarik 1.000 nebé hetan horis, mate 44. Taxa
mortalidade labarik menus tinan 5, maka iha 1.000, mate 64, no mós 53% hetan
mulnutrisaun krónika, no 49% enfrenta malnutrisaun. Tuberkuloze no malária sei
maka’as tebes, iha 100.000, ema 133 mak iha tuberkuloze no, iha 1.000, ema 104 mak
sofre malária.
64% deit husi populasaun mak hetan asesu ba bé-mos no 43% deit mak iha asesu ba
saneamentu báziku.
Ne’e maka dezafius nebé ita tenki resolve, ho resposta intersektorial, ho hatene katak
atu halo buat sira né, falta de rekursus humanus kualifikadus mak ita nia obstákulu
boot.
Ida né mak imajem Timor-Leste nian, ho tinan 10 ukun-an.
Iha Setembru 1999, ha’u mós ba participa iha Assembleia do Miléniu, iha Nova Iorke,
iha nebé Nasoens Unidas hasai Objetivus Dezenvolvimento Miléniu nian, atu alkansa
to’o 2015. Liu tiha 20Maio2002 ona, mak Timor-Leste compromete-an ba Objetivus sira
né, baibain mós temi nudar MDG.
Tuir hotuhotu hatene ona, Secretario-Geral Ban Kii-moon foin mak estabelese Painel
Alto Nivel ida, atu aborda problema ida ne’e no atu hasai ajenda foun ida, ba depois de
2015, tamba la iha país subdezenvolvido ida mak bele kumpri MDGs sira né iha 2015.
Hotuhotu hatene mós katak Timor-Leste nia oan ida mós halo parte iha Painel ne’e, tan
nia méritu duni, tanba kbit lideransa nebé Dra. Emília Pires hatudu ona iha grupu
Estadus frágeis, nebé habolu ‘g7+’.
Oras daudaun ne’e, Governu servisu hela hodi prepara kondisoens atu, iha finais
Fevereiru 2013, bele simu, iha Dili, ‘experts’ nebé sei mai husi rai barak iha mundu, atu
5 / 6

hala’o debate, hodi oinsá ita bele aprezenta propostas konkretas ba Painel Alto Nivel,
nebé fo tulun ba Secretario-GeraL ONU.
Governu, iha tinan lima oin mai, sei kontinua investe iha dezenvolvimentu setor saúde,
iha níveis oioin:
Iha nível institusional no lejislativu, nebé sei abranje jestaun, apoiu no rekursu, atu nuné
servisus saúde bele hala’o ho efisiensia, profisionalismu no lalais. Ita mós loke dalan ba
servisu privadu saúde nian, nebé sei halo parte integrante husi sistema nasional saúde
nian, no mós sei tau atensaun boot ba fornesimentu aimoruk esensiais, ba sistemas
diagnostiku nian no ba fornesimentu ran nian.
Iha nível infra-estruturas, sei hala’o reabilitasaun no konstrusaun Postos de Saude iha
País tomak, no mós reabilitasaun sentrus komunitárius saúde nian no expansaun
Ospital Nasional ho ospitais referrais.
Iha nível promosaun saúde jeral, sei tau matan ba programas nutrisaun, liuliu ba labarik
no inan sira, ba programas vasinasaun, asesu ba bé-mós no saneamentu baziku, no
mós ba programas edukasaun kona-ba prevensaun moras. Saude materna no saúde
infantil, liuliu kona-ba redusaun taxa mortalidade infantil, sei kontinua hanesan
prioridade.
Ita sei kontinua investe maka’as iha desenvolvimentu rekursus umanus, to’o ita
konsegue tiha objectivu atu iha, pelo menus, médiku ida, enfermeirus 2, parteiras 2 no
tekniku laboratoriu 1, iha suku idaidak iha ita nia Rain (suku sira nebé iha mínimu
populasaun 2.000).
Ne’e mak vizaun dezenvolvimentu sustentável, ba ita-nia País. Timor-Leste só bele livre
lós ona, bain-hira iha ona kbit atu fornese bens esensiais ba nia povu no bain-hira povo
nia oan sira rasik mak presta servisus sira né.
Ohin, ho imi nia graduasaun, ita fo hakat ida tan ona ba Vizaun no Hanoin ida ne’e.
Muitos parabéns no votus ba susessu!
Kay Rala Xanana Gusmão
26 Novembru 2012
6 / 6