Views
2 weeks ago

AITORMA APRIL-2018 PDF

KOTHOMA BOKHRI nukjago.

KOTHOMA BOKHRI nukjago. Kebo samung humung tanglaiya. Aphuru tongthok chathokni lenglama jora. Nukhungni joto borokrok kami phataro beraima nukjakya. Aphuru nogono tongna nango. Nukhungni mwtai rwlaio. Nogo nogo uak, tok ratharwi chao. O salo gwnangsa bigrasa hwnwi kwrwi, jotono thansa. Nogo rijak malmatarokno mai-mui kwbang khe songwi charwo. Bisi kwtalni salo Goria Mwtaino twiwi nok brum-brum berai berai “kherbai” mwsao. Kami khungsa paikhe tei khungsa kamio thangwi mwsao. Mwsanai bodolo borok bangma khorok nwichinwi-nwichithamswk wnganw. Kherbai mwsamungni kai-nwichinwi tal tongo. kherbai bodol kamio phai mwsana bagwi mothani kisamisa raidarok manina nango. Kherbai bodol kamio hapna swkang kami daikungni simi kham tamwi rwchaplai phaina nango. Puilao Goria Mwtai romjak, bini ulo ochai, barua, tangswrai, daowa, Goria songsanai nokphang tei mwsanai rwchapnai bodolrok. Kham tamnai, kham kerenai, sumur subnai a bisingono tongo. Kamio habwi puilao kami phang eba “Roaja”ni nokhlao kherbai bodol mwsana nango. Aboni yagulo kami berai berai nok brum brum mwsalaio. Mwsamungni bisingo rwchapmungbo tongo. Kherbai bodolo risa kolok khe sorjak khoroksa Daowa tongo. Daowa puilao Goria rwchapmung rwchabo, mwsanairok bini khorangno yachagwi bodolsa khe rwchaplaio. Omo hai rwchapmungrok wngkha: Phaibaidi phaibaidi Goria mwsanai Kami kami berainai Nokbwi nokbwi mwsanai Goriani charairok, Goriani bwrwirok Lachi kiri ta wngdi Lachi kiri wngkhwlai Goriano manidi,Goriano khulumdi Oi re Goria,oi re Goria Ma chayani chwng phaya Ma nwngyani chwng phaiya Buisunise chwng phaio Khalinise chwng phaio Roajano asawi Goriase phaibole Hatung hawa rekewi Twibuk twisa basogwi Goriase phaibele Goriano manidi, Goriano khulumdi Maiba khulba barinai Rangchak ruphai nok pongnai Oi re Goria,oi re Goria Eho ho ho ho ho ho ho ho ho Kherbai mwsaphuru amo hai rwchapmungno karwibo podrepod kokthai kholwi “Kok phakwra” haikhai rwchaplaio. Abohai “Kokphakwra” wngkha: Thaichumu thaio thaio Doromai thaio thaio, Saka parani siklaroglai Kama naikhwlai khio, Huchung koreni muiya Huchung koreni muya, Chini parani chwlasa roklai Rignai roman chugya; Yagra naidi naidi Yaksi naidi naidi, Saka parani bwrwisarokno Motom subwi rwdi, Gati lamani holong Gati lamani holong, O parani bwrwisarokni Rinaise gulung gulung, Omo hai “Kokphakwra” sawi rwchapthani kisa-misa kokthai hamyarok nukjago. Omo hai kokthairokno sana nangma bagwi okra-chakrani thani nakarmung sanjao. Goria rwchapmungni aitorma 12 kokthairok sirisitini simi mohaikhai rwchapjagwi phaimani. Phiya jorani yak romwi tabuk twrwk twrwk khe oma hai kokthairokno teibo khwnathothok khe kokthai swlaiwi rwchapjagwi tongo. Mwsai paima yagulo, kherbai bodolni Talrog mwsawi-rwchabwi phunukna nango. Omo hai mwsamungrok wngkha- Gobai mwsamung, Mwkhwra uaying kamani, Mwkhwra abuk chamani, Tokher barmani, Puisa uarmani, dailo kolwi mwsamani, Mayung ua phaimani, Harung mephukma (Gong) khuchumu chamani akorok. Gobai mwsana bagwi bwrwi khoroksa, chwla khoroksa tai joker khoroksa nango. Bwrwikhaibo khangra (twilanga) horjak, chwlakhaibo sati ulta hungjak. Borong khoroknwi kham, sumuini talbaikhai mwsalaiphuru O joker borokno phakwra khlaina nango. Omo haikhai Gobai mwsalaio. Mwkhwra abuk chamani khe khoroksa buma achukjak tai khoroknwi- khoroktham bwsarok mwsamungni bisingtwi bumani abukno chama haikhe phunukjago. Tokher barmani khe khoroknwi achuk rorom khe yakung tolao yak dawi yak bailik balik khe naharlai barlai mwsalaio. Amo hai dalbidal mwsamungrok mwsawi phunukma yagulo nokphang mai, khul, rang, mairung, toktwi, chuak kwthar riwi Goria mwtaini yakung subwi khulumwi rohoro. Keboba mwtai yachakmarok tongkhe uak, tok ratharwi mwtai yachakmungrok swrai swrai khe narwgo. Omo hai nok brum brum kherbai bodol Goria mwtaino twiwi mwsalaio. –Dharinjoy Tripura

DOPHANI KOK aitorma 13 Thanai 03 March 2018 salo sakhlaijakmatwi Tripura Haphango BJP-IPFT achukma bisingtwi kolokma sal romwi Yaksi Bodolni sal habwi sal kwtal khlai kakha khatungmung kwtalni yapri semani bisingtwi. Thanai bisi nwichiba romwi Yaksi Bodol bai naikoljakthani Tipra dophani naimung sanmungrok kwbangma tongphano sabono saui hamno, saboni thani sanwi manno chapbwi manya khlai mamangse 1993 bisio achainai absa kwlwi khoroksa sikla sokna nangkha. Baithangni hao nograise nokphang wngwi kachrebwi tongmani haloktwi Tipra dophani mwkhang khamproma kokrok, abode salai hamsi! O nograirok chini laibuma, kok, hukumu tongmano swlai mankhaise muktwrwi kaham khlai thangjago. Mai ok supungwi chaui mano. Uarak-uarak khlai mwnwiwi manjago. Chwng khaiba kok manya, kok thaisabo paliya. Bwkha simino dulaiwi pekhaktwi-pekhatwi. O pekhakmungno 2018 Tripura Kerongchapnok Chongbario yaphang phuisaui khitarwi rohorkha Yaksi Bodol mungni sothaino. Tabukse hama hokhlai mansio kaham khlai! Khasrangwi, tabukle Tipra dophani mwkhang chwngsanani samungrok tangjaksiuanw uansugwi Tripura Hasteni Chapphang Okra Yakchu Korta Jishnu Debbarmani thani thanai 27 March 2018 salni phung damchar jorao bini nogo thangwi MOVEMENT FOR KOK- BOROKni naimungrokno yapharjao. Puilano Agartala Birkhungkholano Bugra Bir Bikram Kishore Manikya Bahadur Debbarmani mung pharmani bagwi BJP-IPFT hapahangno hambai yapharjao. Teibo hambai yapharjao kainwi Indian Reserve Battalion khlaina kokchapmani bagwi. Phiyaba aboni mung Tipra Reserve Battalion pharnani wngthung. MFK adongrok kolokma bisi romwi naimani sanmungrok wngkha ahai: 1. 1960 bai 1970 bisio Revenue tei Settlement bedek bai Agartala Municipality-o Bugra Jujarupha bai 590 AD bisio chengjakmani Tipra Biskhongno taklaini simino sitokjakthung. 2. Aboni logi-logi Tipra Bisikhongni Bisi Kwtal sal 01 Talhing eba 22 December salo

April 2018
Belluqian Magazine April 2018
Autism Voice April 2018
Yuva Sahyadri Epaper April 18, 2018 to April 24, 2018
Yuva Sahyadri Epaper April 11, 2018 to April 17, 2018
allgäu weit März/April 2018
Yuva Sahyadri Epaper April 3, 2018 to April 10, 2018