Views
1 month ago

AITORMA APRIL-2018 PDF

POKYATWI phan gwnang

POKYATWI phan gwnang haktor swnamnani. Kikenbanio Nelson puila Clekberi Pramary rwngnago swrwngna chengkha. Ulo Hill Town High School tei mungwnang Fort hair University o porikha. Nelson swrwngthani khatungwi swrwngnai tongmani. Okra-chakrarokno borom rwnai tei sakchalairokbai kiching halok narwgwi tongma bagwi bohno hamjakbaio. Jora kisaono Dhalindhoba tei bini bihik, Nelson no bwsala haikhe ma nukkha. Nelson bo bohrokno bini ma-pha haikheno borom khlaio. Boni bagwi 1977 Nelson alongnogo tongphru Dhalindhoba tei bini bihik Jangintabano muito khwlai swikha. Omor bisichio ani pha thwkha, aphani rangrokbo kwrwi, ani ama bo lekha rangya. Ano rwngnogo swrwng rwnani amani rangbo kwrwi. A jora chini bosongni sandai ano swrwng rwnani poja yachakha. Phiya, ani thani ulobo, mungsa sanliya bohrok. Ano bwsa haikhe borok swnamnanino bohrokni samung kotor hinwi bohrok uansukkha. Chini kamini hodao jotono thansakhe tonglaio chalaio, nukhung kotor haikhe tonglaio, chubalaio. Omno chini kamini tongmung. Tabukni holongbai tangjak nogo, a kamini hamjaklaima, chubalaima, tei kwchangkhwchang hoda, kwmai thangkha. Omo haikhe Nelson teibo kwbangma bini kamini koknotwi bini dophani borokrokni kokno khursakha. Sikla chasalok Nelson agini kwcham laibumarok khwnai bwkha dujagu tei bwkha khamjagu. Kha khamjakha bini bosongni borokrok bwswk kha kotor phangwnang tongbaimani, phiya kuphursarokno hamjakgwi, baithang bosongni bising walai suklai wnglai kuphur sarokno tongthai naphainani chubakha. Nelson achainani bisi nwirabachi (250) swkang kuphursarok South Africao phaimani baniya khlaina bagwi phiya jora kisaono kuphursarok hani bugra wngwi thangkha. Boni bagwi Nelson satok jorao, satokjak bosongo se achaima kwlaisio. Haiphano bini dopha, bini kami, bini borok tei bini hukumu, tei laithangjak laibumano twi belai kha hapjak. Boni bagwi boh swikha ‘a jora tabukni hai, chwngsasa tongmaniya, haiphano belai tongthok chathok tei kha kwchangwi tonglaimani. Haktorni twima, twisa, hapung, hathai, bebak chini tongmani buphangni bwthai, mai khulni bugra chwngno tongmani. Hodao kuchuk, hashe, kwrwi, gwnangni pherlaimung kwrwi tongmani.’ Nelson tor rwrwk teibo laibuma saimanrwrwk. Bini dophani borokni kha kotorkhe samung tangmarok tei choba khwlaimarok khwnai, Nelson kha bising-bising swmai tango o hani borokrokni hamarini bagwi, yokna bagwi choba khwlainai. Fort hair School o swrwngwi tongphruno puila politics khwlainao nongkhoro. A jora Dhalindhoba kamini bwrwi khoroksa bai kaina bagwi thiti khwlaikha Nelsonno. Phiya Nelson bini kainani kokno aitorma 24 gosimanliya. Boni bagwi bo bini kiching Aliver Tomb bai Johanesbargo kharwi thangkha. Johonesbargo thangwi nokrok manliya Nelson, tamoni hinba bini sakur kosom. Boni bagwi Johonesbarg yakarwi Alexzandrao tongnani nangkha. Aro boh nukkha kosomsarok bwswk kwrwigwja, kuphur sarok hinkhe gwnang. Kosomsarok kisa jagaono kesep rebekhe ma tongbaio. Bono karwi erengerengno, police phaio tei kosomsarokno romwi twlango. Kosomsarok bwkha thwijakkhe tongbaio. Johonesbargo thangwi tongna bagwi Nelson aro podrepot samung tangna nangkha. Aro bono biyal jora chubamano bo khursakha, aro tongphruno Nelson bwrwi khoroksabai kaijagu. A bwrwini mung Avlin, boh nurseni samung khwlai tongo. Nelson Avlinno kaijakma ulo bini swrwngnani lamao chubajakha. Johonesbargo Nelson sebugo samung tangmani logi, law porina bagwi college o admission nakha. Aphru bini kiching Sisuluni kokbiti bai, Nelson A. N. C. bodolni adong wngo. Aphru Nelsonni thani kuphursarok kosom sarokno satokmani, seplemani teibo satoknani bagwi tei seplena bagwi (Law) kerong swnamani swraisa wngkha. Kosong kosomsarok kirima singsakhe satokjakma abono Nelsonni sikla bwkha soi manliya. Bini bwkha kapna nangkha tei swmai tangna nangkha omo hai satokjakma tei seplejakmani yakni phiyokna bagwi langma tongsak choba khwlai thangnai hinwi. Phainai talo A. N. C. motha bahaikhe samung tangkha abonotwiwi saiman laiyanw… –Kalpana Debbarma

KOKRWBAI Watwi Sikla Talyung talni prapjak salo Nokha mwnwio khrangsawi Sereksa nobar nagkhe sago Telekar thango kolomtwi. Oro-iro tongthaini biyal Sakolom thaih haichuma huijak O sal o sal —— Nwngba tamoswk mwnwijak? Soiliya nini tungpramabai Ih mechenjakha nwngbai. Khairokjadi kisa, riwanw yakpai Nukyade o haa ni bwsarog Bwswksi mwktwi bai kungtwibai Kapjak swlwk-swlwgwi. Nini mwnwimao Khorok tungphlao Ri kwrwi sago Bwsak khamprao, Riwanw je-tong kwrwi Koijao! risidi nokha somrwi Watwi sikla dopsa warwi Haa bahai motom sarwi. Sal moksakha odilasawi Achumsa pherang khorang Iyang salthang babai bwkhak Nokhasom bo khaprumjak Khorang bo gorong-gorong. Twijwlangni twi phab-kwsariwi O sal chwngno khairokjakha Puila watwini thop kwlaikha Ih ani sago kwlaiphaikha. O haa ni bwsarog bwkha-changjakha Nobarbai pherangbai Watwi sikla waphlai tongkha, Haati sa wngkha thangna soiya. Tobisawi kakjaya birman O dophani borokrogni Bera nog kichik , nukhung kwpwla Watwi siprakjak, twi-thop kwlaijak Amani mwktwi watwibai huijak. Tei salbwswk Tei talbwswk Tei bisibwswk Tei molbwswk tongkhu? Yakaknai joto birmanni O haa ni joto borokrogni. Aichukni aitorma chwngkhrop tongphru aitorma 25 Takhuk bising tongtwi Togwla koichik riphuru Salkabai sal chaksawi Phungchang lamsokphru O jorahai tongthok twilwlwk Toksa-tokrogni chi-cha khorang Haphar bai mwchangjak O tongnaithok mannai buphuru? Sal mwnwio dipor bakhwlaiyasak Watwi wabaya nokha phuryasak Tungkhe bo birman Uakhe bo birman, Swbani swraimungba nangwi O dophani kwbangkuk borokrog Tongna nangkha salbrum kabwi. Watwi sikla salchangrio Lamsogo bwkhabai bono Tongna nangbo siprakjagwi Watwi bising-bising. Pherang gurumsai kokbo Lamsogo bwkhabai bono Bolong motomu muikhumu perwi Hathai kitingwi. Nobar kotor phai bo Lamsogo bwkhabai bono Kwlango buphang-uaphang swbawi Mano kisale thapani bol. Sal-prapsai mwnwi tongbo Lamsogo bwkhabai bono Tongna nangbo kolomwi Sal kwrwikhe, mwnak wngkhamo. Hayung kotoro haphar naithogo O Tiprahaa ni bwsarog Biraman-kakganw salsaya-salsa, Mwktwi hujaganw Holongni nog tangjaganw Cha-nwng kaham chawanw Ri-chum kaham chumanw Khumbar naithoktwi chwnawi tonganw. Khaksa babai uarik-khirik O dophani borokno nugwi—— Chongo bolongni bwthai chanai rogbai, Ih! chao chwng, thai-kumun Bolongni kwtwi-kothok bwthai O bwthaio no tongo bithi-brai. Norogni mwnwimabai siya wngwlak Thansa ni phano swbai mangwlak, Norog mwnwima Bukhuk supjaknai suchi-kotor bai.

April 2018
Belluqian Magazine April 2018
Autism Voice April 2018
Yuva Sahyadri Epaper April 18, 2018 to April 24, 2018
Yuva Sahyadri Epaper April 11, 2018 to April 17, 2018