Views
7 months ago

AITORMA APRIL-2018 PDF

KOTHOMA BOKHRI Sabo

KOTHOMA BOKHRI Sabo Dophano aitorma 6 Twidulnai? Soi twidulnai hwnkhe bini sakbaithangni bagwiya, dopha eba luku hamkrai se bini puila nahormung wngna nangnai. Haikhese kukubui twidulnai wngwi mannai. O swngcharo chwng kaham khe cherwi naikhe nuknai borok munuisono karwibo joto malmata, toksa-toktwi eba twio tongnai bebaknino leader eba twidulnai tongmani nukjago. Aborok juda juda bumungbai sinijago. Chwng chini chuchu songni khugo khwnakha Suna kania hwnkheba sikuruk bodolni twidulnai eba ojama hwnwi. Jesa malmata kwthwini han chanani swkang a Suna kania puila khuk musuwi rwyakhe kubuni sikurukrok chawi manyaphu hwnwi chwng khwnao. Abohaikheno chini borok munuisoroknibo twidulnai chongjak tongo. Romdi nukhungni twidulnai eba nokphang wngkha chini apha, kamini twidulnai eba ojama hwnkheba chokdory tei dophani hwnkhe Bubagra eba Rai wngyakheba Hoda Okra akorok. Omobaino chwng sio jesa kaisa bodol eba dophao twidulnai ma se matongthai tei dopha kuchugo kanani eba bwskang agogwi thangnanithangya abo twidulnaini yagose. Chwng kahamkhe rwgwi naikhe nugo je nukhungo Thansa tongwi manyani bagwino chini dophani phan belrwrwk wngwi tongsio. nokphang salbrumno chuakmaikham eba ualai-suklaibaimang tongo, a nukhungni halokbo abohaino chapjakya manilaiya wngmani nukjago. Bwsa bwtwirok kok khwnaya, pora lekhaobo khungsa khungsu nukhungno karwi haino kuchugo kasawi manya wngmanirok nukjago. Aboni bagwino abohai nukhungrogo khachangmabo manya tei biyal birmanbo thakphlaiya wngwi tongmani nukjago. O nukhung haino dopha eba hano twidulnairok chaya hwnkhebo a nukhung haino oroi poroi wngnai. Haikhe twidulnairokni samung bwswk kotor tei nangkukmani abo omobaino sijago Chwng twidulnairokno twiwi sana thangkhe nukjago chini o hayungo kwbangma twidulnairokno tongo. Romdi dopha eba hodani, tongthar (Religion) mothani, political bodol, sikla bodol, lekha swrwngnai bodol, bwrwi bodol, thwngnai rokni, sebuk khwlainai bodol teibo kwbangmano tongo. Hakhe phaidi puilano leader eba twidulnai hwnmani abo tamo tei sabono hwnnai? abono kisa silai nailaigranai. Chwng kahamkhe uansuknaikhe saimano twidulnai wngkha khoroksa borok se ( individual). Abo Uakhira, Tokhirai, Badrai, Nugurai jesaphano wngwi mano. Bohrok wngkha khoroksa khoroksa twidulnai. Phiyaba chongwi rwkheno kukubui twidulnai wngwi manya, bini tongmung tei samung baise bohrokno masininai. Bobohai samungni bisingtwi bohrokno sinimannai hwnkhe? Tongmung kaham tongmani, bodolno eba mothano twidulnani, borokrokno sirwnani eba sicha rwnani, borokrokni khano bini samungni bisingtwi khaphurwnani eba ninangrwnani (influence), eba borokrokno dagiwi kok khwnariwi toninani akorok. Kok thaisabai sana thangkhe amohai se jesa borokrokno twidulna, sirwna eba sicharwna, kok khwnarwna tei lukurokno khaphurwnani eba ninangrwnani rwngo, bohno wngkha twidulnai eba leader. Tabuk twidulma eba leadership khe tamono hwnnai abonobo kisa silaiyanw. Puilano twidulma kok boroni phaikha eba achaikha

KOTHOMA BOKHRI abono chwng kok saheb bai eba engrajibai omo haikhe bijabo mano- ‘The English word ‘leadership’ originates in the ancient root leith, which meant ‘to go forth and die’ as in battle.’ eba o kok engreji kokthai ‘Leadership’ achaikha kwcham kokthai ‘leith’ni abo kok borokbai wngkha ‘Chobao thangdi tei thwidi’ hwnmanise. Engreji kokbai chwng teibo mano- ‘Leadership is the art of leading others to deliberately create a result that wouldn’t have happened otherwise.’ O kokthaini bisingtwi chwng saimano twidulma wngkha belai kotor samung. Omobaino simi thakyakho, twidulnairokni jotoni nangkukmani wngkha bini Nahormung eba Vision. Romdi, abo dophani kaisa chaya tongmungnono sokomornani, dophani manthai sokthaini bagwi motha khlai eba bodol khlai sanmung khlainani akorok wngwi mano. Kaham nahormung kwrwi khe kebo phano kukubui twidulnai hwnjagwi manya. Twidulnaini nahormung ma se matongnai. Wngyakhe abo samung kwrwi puito kwthwi hwnma haise wngnai. A nahormungno baksaba chajakya eba gosiyaphano wngwi mano, phiyaba bini thani abo belai belai nangkukmani. Aboni bagwi langma rwnani phano kiriya wngna nangnai. Tamoni hwnba abose bini langmani kotorkuk samung wngna nangnai, abono karwi tei mungsaya. A nahormungo twiwi borokrokno sirwnani, twidulwi thumsa khlainani, borokrokno kha phurwnani eba chajakrwnani tei a samungni bagwi borokrokno dagiwi kok aitorma 7 khwnarwnanino wngkha twidulma. Twidulnaini tei kaisa samung kotor wngkha- puilono bo je samungno tangnani bagwi chongkha abono twiwi yaphang buchuk cherwi naiwi kaisa kaham chongmung (Planning) eba kok chapnani, aboni yagulo Organizing eba a samungno tangnani bagwi soi borokno chongnani tei aboni ulokhe Directing eba soi lamatwi dagiwi samung khlairwinani tei phaithagokhe Controlling eba mungsa ayang uyang kwsaryatwi chabwi twidulwi kahamkhe jai jaikhlai toninani. O samungrokno wngkha khoroksa kaham twidulnaini sinimari. Phiyaba oro sathai kwlaio twidulma abo kahamphano eba khe hamya phano wngwi mano. Tamoni hwnba chwng nugo twidulnai kwrwng hwnkhe hamyaphano se bo bini bwkhago kwbangma borokroknono khaphurwwi toniwi mono. Aboni bagwi chwng twidulnaino kahamkhe cherwi nainani banta.

April 2018
PDF Learning LABS 2018
Die Grenze April 2018