Views
9 months ago

AITORMA APRIL-2018 PDF

KOTHOMA BOKHRI Thinango

KOTHOMA BOKHRI Thinango bini nahormung chini dophani bagwi hamyada eba kahamda wngno abonobo kahamkhe uansugwi nainani nango. Wngyakhe dopha teibo jwngjalo kwlainai. suchawi naikhe nugo khoroksa phanose twidulnai hwnwi hwnjakna chukyakho. Tamoni hwnba chini twidulnairokni vision eba nahormungrok le tongbaio, phiyaba a nahormung joratwino aitorma 8 tangthani bo mungsa soi lamatwi tanglaimung nukjakya. Haikhe bahaikhe le a nahormungo sogwi mansinaiba? sogwi manglak. Ang sak sak twidulnaile wngjagwi tongjaktikha, tamokhe soi Aswk jora chwng twidulnai eba twidulmano twiwi kubangma kokno salaikha tei silaikha, phaidi haikhe tabuk chini Tripura hasteni chini dophani twidulnairokno twiwi silai nailaiyanw bohrok bwswk joratwi soi tei kubui twidulnai eba khe twidulmao khobjak. Chwng jotono sio chini hasteo chini dophao kwbangma chongjak leader eba twidulnai tongo hwnwi. Abo rajnitini (political), tongthar eba dormoni, swrwngnai bodolni, NGO ni, sebuk khwlainai rokni akorok. Puilano rajnitino (political) twiwino nailaigranw. Kubui kok sanathangkhe chini hasteo rajnitini twidulnai chongjak lekha-juka kwrwi kheno tongo. Phiyaba bohrok jotoda kukubui twidulnai wngna? abose wngkha kotor kok. Chwng twidulnairokno twiwi sakao sukrubwi salaimani koktwi thagwi tongbaikha. A nahormungno mukthang khwlaina Soi twidulnai hwnkhe bini sakbaithangni bagwiya, dopha eba luku hamkrai se bini puila nahormung wngna nangnai. Haikhese kukubui twidulnai wngwi mannai. ... Thansa tongwi manyani bagwino chini dophani phan belrwrwk wngwi tongsio. bagwile kaisa kaham planning eba kokchapmung kwrwi, mungsa soi dagimung kwrwi, khoroksa tei khoroksano manilaiya tei aboni bagwi samung twidulnaini tongmungle tongwise manliya hwnkhe bahai khele twidulnai wngwi mabkha ba? Abohaikhe soi twidulnai wngwi manya tei manglak. Leader eba twidulnai tumungno sakni bagwi puila uanswknai hwnkhe, bo soi twidulnai wngwi manya. Soi twidulnai hwnkhe bini sakbaithangni bagwiya, dopha eba luku hamkrai se bini puila nahormung wngna nangnai. Haikhese kukubui twidulnai wngwi mannai. Chini hasteni twidulnairokno naiwi naikhe nukjago bohrok puila sakni bagwi se ulose dopha eba lukuhamkrai. Abohai borokrokni uklogono kwbangkuk borokrok rwkthar laimanibo nukjakugo. Kubui kok sanathangkhe chini twidulnairokni tongmung chamungno nugwi joto borokrok romwi manlailiya sabo soi tei

KOTHOMA BOKHRI saboba soiya. Tangwi omhai wngkhna? Ao chwng kaham khe cherwi naikhe nugo chengphruni simino chini twidulnairok twidulthani chaya tongmani bagwino omohai wngmarok. Khukbai le dopha hamkraini kok twiwi lukurokno jai jai kheno sawi khwnarwkha, phiyaba kokbai simise wngsioba samungole abohai nukjakliya. Aboni bagwino chini dopharok amswk jwngjalo kwlaina nangsina. Abo simidiba tini chini twidulnai rokni chayani bagwi twidulnai rokni bisingobo pherlaimani ebakhe kok banglaimanibo nukjagwi tongo tei aboni loge logeno bodol yakarlawi tei kaisa kwtal bodol songchalaiwi tongmanibo nukjago. Omohai thansa tongwi manyani bagwino chini dophani phan belrwrwk wngwi tongsio. Rajniti bodolo simiya tamo hukumu bodol, swrwngnairokni bodol, swinairokni bodol eba tongthar bodol bebagonose pherlaimung nukjagwi tongo. Omohai wngmani bo twidulnairok chayani bagwino. Kubui kok sana thangkhe chini dophani twidulnairok sakbaithang twidulnai sabono hwn, abonose kaham khe sawi manyakhuna aboni bagwino bohrokni thani soi twidulmungni tongmung nukjakya. Phiyaba bohrok sak sakno twidulnaino wngjagwi tonglaio. Omono chini dophani bagwi swraimung. Khoroksa soi twidulnai wngna thangkha hwnkhe bini soi nahormung, sak bedokmung, borokrokno twidulnani, khatung rwnani, khaswrang rwnani tei imang phunuknani tei bini yakchu swnamwi kwlangnani aborok bebakno tongna nango. Phiyaba chini dophao tabuksak jora abohai khoroksaphano twidulnai bwskango phaikha hwnwi nukjakyakhu. Chwng hayung beremo rwgwi naikhe kwbangma bumung manyaphano, Mahatma Gandhi, aitorma 9 Nelson Mandela, Adolf Hitler, Abraham Lincoln, Martin Luthar King Jr., General Mao, George Washington, Che Guevara, Netaji Subhash Chandra Bose akosongni mung khursawi mano. Bohrokni khoroksa khoroksani langmano twiwi poriwi naikhe bohrok kukubuino soi twidilnai hwnwi saimananw tei abo nangmanino. Paithago o kokno sanai chwng kukubui twidulnai wngna hwnkhe, baithangni bagwi uansukyawi dophani eba joto borokrokni bagwi soi nahormung, sak bedokmung, borokrokno twidulnani, khatung rwnani, khaswrang rwnani tei imang phunuknani tei bini yakchu swnamwi kwlangnani ma swrwnglaithai, hwnkhese chwngbo soi twidulnai wngwi mannai. Ani o swimani keboni bwkhano swbainani bagwiya, tamokhe chwng sak sakni chayarokno teiwaisa kahamkhe uanswkphirwi manthwng hwnwise swijao. Chaya chukyani bagwi nakarjabaidi, aswkno hambai. –Paul Debbarma

Autism Voice April 2018
April 2018
allgäu weit März/April 2018