Views
4 months ago

AITORMA APRIL-2018 PDF

KOTHOMA BOKHRI aitorma

KOTHOMA BOKHRI aitorma 10 BUISU TAI GORIA TER B isi kwtalno lamsokna bagwi sachwlang molni kokno belaikheno muito khwlaina nango. A molo kwchangmabo kisa misa nukjagwi tongkho. Buphanguaphang bwlai jori kwlaima tei uaisa – kwtalkhe bedak kupulungkhe bwlai kwkhwrang rotomsaka tei bubar barsakha, omo naikhe bolongjwk rignai yalwlwk kanwi naithothokkhe mwchang tongma haise wngsio. Nobar sip-sip khe dalbidal khumni bahai bai hayung mwchangwi toksa-tokmili pungkhurujak tei bumburaisa khapang udila chawi ayang-oiyang berengjak. Aphuru bedek Kungkila kuhu-kuhu khe khorang kwchangbai tangwi chanairokni khano tongthok rwo. O jorao kamini borokrok huk hogwi paijak. Huk sogwi hugo mai kaina bagwi bisi kwtalni uatwi sep-sepno naisinglai tonglaio. Hatal somlulu khanga tumsi hulai, rojom kosomlani sago salai tongo Checherma jaksa hukni kereng kothoma. Omohai tongthokma jorao chwngno teibo tongthokma rwna bagwi Goria Mwtai khatung khajai Buisu terni bisingtwi chwng bai malaina tei chwngno hamari rwna phaio. Buisu wngkha Tripura dophani mukumu-hukumu bai kwrwngjak tei manijak kaisa ter kotor. Omo bisi kwbangma swkangni simino eba chini dangaima-dangaipha, chingchungma-chingchungpha, daichungma-daichungpha songni amolni simi Buisu ter palaijagwi phaio. Oro sathai kwlaio 1512 bisio Bubagra Dhanya Manikya Lusai Bubagrano Ha sekna bagwi “ Kirat” hani Thangnangsi amchaino yak rwkha. A amchaino yak rwthani Lusai Bubagra bai saktharwi choba khwlaina nangkha. Sal kwdwkma romwi choba wngma yagulo Bubagra Dhanya Manikya o chobao Halam eba Kuki Bubagrano mechenkha. Tripura hani sengkrakrok Kuki Bubagrani thani “Goroya” Mwtaino segwi tubui Rajakhor Rangamatio kiphilwi phailaikha. O choba wngma jorao Buisu ter wngwi tongo. Bubagra Dhanya Manikya sakhlaikha, Kuki Bubagrano chobao mechenma bagwi Raja Hani joto amchaio tongthok-chathok khlai kwplai wngma ter palaijaganw hwnwi. Choba wngwi tongma jorao Buisu terno hani joto amchaini borokrok tongthok-chathok khlai palaimanliya haini bagwi Goria Mwtaino twi-wi teisa Buisu palaijaknai hwnwi. Omo hai kheno Buisu ter tei Goria Mwtai halok kwrwngwi thansakhe palaijagwi phaio. Buisu terni saldokni yagulo kwplai wngma ter palaijakkha hwnwi Buisuni ulni salsini salno “Sena” hwnwibo palaijago. Keboba Buisu terno salsini romwi palaijago hwnwi salaio. Oro sathai kwlaio, Buisu wngkha Goria Mwtaino rwgwi songchajak Tripura dophani kaisa mukumu ter kotor. O ter Hindu tongkwthar bai manijak tei kwrwngjak. Oro Goria Mwtaino twi-wi rwchapmung, mwsamungni bisingtwi tongthok chathok khlai tonglaima nukjago. Aphuru Tripura dophani borokrok baithang kanmung-chumungni haparo haplai naithothok khe bisi kwtalno lamsogo. Bwrwi siklirok khe mare, nabuk tei chwla siklarok khe kiching, bayap khawi narwgo. Buisu bahaikhe Tripura dophani Mukumu-Hukumu bai kwrwngjak kaisa ter kotor wngwi palaijak tei Buisuni salo tamo tamo raidarokno manina nang, omono twi-wi kok kisaswk sukurubwi nailaiyanw. Buisuni puila salno “Hari Buisu” hwno. O salo nok, nokhla, nok gana gini, lama lamthai, kami daikung, kamirok sapsutra khwlai tongna nango. Kamini chwraikhonairok phung aisiri-siri thuma bachai khumulwngni motom khumbarrok kholwi tisao tai o khumbar bai naithok naithok khe khumtang subwi nokni doglam, tailam, Mwtainok sajoklaio. Nokni rih kwchamrok twio twlangwi rih bukhurubwi suwi rwo. Nokni joto manwirok - twk, gola, mairang, tharwk, lota, kabang (Rikhuturuk), rwsami, maiyan, thuyan, omo hai manwirok twi bai suwi satung phwrano. Bwrwirok rih-kabangni rignai,

KOTHOMA BOKHRI risa, ritorok tei podrepod bumulni takjak rih-chumrok kariwi nugul dangdal uao satung phwranlaio, sarik wngkhe teibo rih-chumrokno chap-chap khwlai tisao. “Hari Buisu” ni salo kamini chwrai-khonairok kwtal-kwtal rihchumlaio chemai (chempai), kaiselengo mai dawi kami berai berai mai sarwi rwlaio. Kami borokrok twima-twisao thangwi khum bogo tai mwtai rwlaio. Aphuru “kuchai twi” bai khorok suwi twi tukulaio. Paithago nogo “kawan twi” sarwi rwo. Omo kaisa Tripura dophani mukumuhukumu bai manijak kaisa raida. O raida tabuk phano kami amchaio tongnai Tripura dophani Hodao Tal, Sal, Athukiri hai chwngsai tongkho. Buisuni salni salno eba kwcharni salno “Buisuma” hwno . Buisumani salo Tripura dophani borokrok kwtal kwtal khe rihchum kanlaima tai chumlaima nukjago. Bwrwirok khe dophani rignai kanjak tei risa khajao berjak, khorogo sorjak; yago bangiri (mathia), kharu; yakungo bengki; khajuo surang, sangi; khunjuo uakhum, toya; kotogo chandrahar, rangbwtang, anchwlwi omo hai kanmanwi eba kanrwbairok naithokthok khe kanlaio. Nok brum-brum awang aitorma 11 suklaina bagwi bwrwi siklirok dingi nogo kupulung. Bailing bai awangrok tengailaio. Aphuru chwla siklarok bwrwi siklasani khapang khumbar khokna bagwi dingi nok gana ginio berenglai tongma nukjago. Buisuni salnwisaltham swkango bwrwirok palpal khe bolong halongo ua kwlwi uana uasong tanlaio, twisa ganagini berai lairu, lai bwlai kholwi laidol dolwi horwi tubulaio. Dingio awang sukma yagulo a lairu, lai bwlairok bai awang bwthai (awang bangwi), khlaio. Uasongo dai awang pengo, awang belep thok eba uakpham bai sero. Omo karwibo mami songjak, mami pongjak, maisi songjak, siping tei mairukuno kwsap khe sugwi laru (Agini molni borokrok laduno laru hwno) swnamlaio. Nok brumbrum berai berai sikla-sikli, chwrai-khonai, bura-bwrwichukrok awang chalaio. Aphuru kami kami nogo nogo mami awangni tei biyal kwrwi, chawichawi chabaya. O salo nokni okra-chakrarokno belai kheno manijago. Kwtal kaijakma hik-sai kwnwi buma-bupha tai bwkwrabwkwrajwkni nogo beraina thango. Buma-Bupha tei bwkwra-bwkwrajwkno kwnwikhe gola bai twi tukurwo tai chuak botolsa rwwi khulumo. Omo karwibo takhuk okraroknobo khulumlaima nukjago. Buisumani salo kebo kok tatal saya, malmatarokbo butharya. Omo hai raidarok tabukni molo aswk manijakma nukjakliya, twrwk twrwk khe komorna nai tongo. Phiyaba kami amchairogo amo hai raidarok manijakma kisamisa nukjagwi tongkho. Buisuni paithak salno “Bisi Kwtal” eba atadak hwnwi sinijago. Bisi kwtalni jotono tongthok chathok khe tonglaima

April 2018
Autism Voice April 2018
Yuva Sahyadri Epaper April 11, 2018 to April 17, 2018
Yuva Sahyadri Epaper April 18, 2018 to April 24, 2018
allgäu weit März/April 2018