Views
6 days ago

AITORMA APRIL-2018 PDF

KOTHOMA BWSA aitorma 16

KOTHOMA BWSA aitorma 16 CHINI HA AMANI THINANG L aibuma rwgwi naikhe nugo bugrarokbai naikoljak haktorokni bere Japanni Monarchyno hayungni kolokkuk romwi bugrarokbai naikoljak ha tei Japanni yagulono wngkha chini Tripura hani achukthai. Phiyaba 1947 bisio chini paithak bubagra Maharaja Bir Bikram Kishore Manikya Deb Barman thwimani yagulo bini bwsajwla Kirit Bikram Kishore Manikya Deb Barman habubagra wngnani omor kasukyani bagwi bini buma Maharani Kanchan Prabha Devino regent (okra) chongwi ha naikolnani barja bokjago. Phiyaba aswk dwgwi manliya, kwbangma chukili tei kubun dophani singkwlwkjakma tei Bharot haktorni koimungbai 1949 bisini October talni salchiba (15th August) bisingono Maharani Kanchan Prabha Devi bai Bharot sorkarni bising Merger Agreement bwlai rigmari (soi) khwlailaimani bisingtwi Tripura ha Bharot haktorobai gwdalnani nangkha tei aboni loge logeno chini hani bisi thamsai barani (3500 years) swlaibo kwbang romwi bubagrarokbai naikoljagwi tongmani molbo paiwi thango. Tripura haste Bharot haktorbai merge khwlaimani yagulono chini dopharokni birmanbo bangwi phairwrwgo. Tamoni hwnba aphruni simino twrwk twrwk chini laibumano sokomornani, manthai seplenani tei ha seknani samung chengjago. Chwng kwbang borokrokno saimano chini paithak bubagra Maharaja Bir Bikram Kishore Manikya Deb Barman kwthang tongphru (1931 bisio) Tripuri dopharok thinango jwngjalo phano kwlaiwimano hwnwi uaswgwi ‘Poncho Tripurirokni’ bagwi Khowai amchoini Kalyanpur tei Kailashahar amchoio chisa rasai (11 lakhs drun) swk ha khatiwi kwlangmani kokno. Phiyaba a khatijak ha tabuk tode tongkho abono twiwi khorok bwswk sawiman abo le siliya. A khatijak ha tabuk tei kwrwikha. 1971 bisio Salka bai Salthang-Pakistan eba Banladesh bai Pakistanni (Hindu bai Muslim) bisingo choba nanglaiphru Bangladeshni khorok Chisa rasaini (11 lakhs) swlaibo kwbang uanjwi hindurok chini hasteo kharwi phaibakha. A phainai-

KOTHOMA BWSA rokno choba paiwi kwchang kwchang wngphru kiphilwi twlangnai hwnwi chini haktorni aphruni montri bokhorok Smt. Indra Gandhi bai Bangladeshni Father of the nation Md. Sekh Majibur Rahomanni bisingo kaisa gosimung bwlaio soi khwlailaikha. A gosimungno Indra-Mujib Chukti hwnwi chwng sawi mano. Phiyaba choba paiwi yoksamani sal (Freedom) manmani yagulophano kiphilrwi twlangjaklia. Tamoni hwnba borokno chini hasteo tongthai riwi Bharot hani citizen ma khwlainai hwnwi kaisa rajnoitik eba political bodol ha kwrwino ha marwnai, tongthai kwrwino nongthai marwnai hwnwi a jorao andulon khwlailaikha. Bharot haktorni aphuruni Home Minister Sardar Ballab Bhai Patel Tripura hasteo bohrokno baknani bagwi ha kwrwi hwnwi sakhe a rajnoitik bodolni adongrok chini bubagra khatiwi kwlangmani a hano phunugwi rwo. Aboni yagulono Poncho Tripurirokni bagwi khatijak ha Banladeshni phainai refuge rokno bagwi rwjago. Aphuru chini borokrokbo ha kwrwino ha marwnai, tongthai kwrwino tongthai marwnai hwnwi chirikhogwi sanlaikha, phiyaba khorok bwswk mankhna? Abo haikheno puila chini ha kwmakha. Chwng jotono Raima-sormani (Saimani) kothomano saimanbaio. Gandachhara Sub-Divisionni a Raima- Sormani twi rwkungni ha panthor (tabuk abono Raima Velley hwnwi sinijago) wngkha chini hasteni mai-khul, muikwthwng, thaikwthwng hamkuknai eba pholinai ha. Phiyaba chini Tripura hasteo phirang (Electric) swnamnani bagwi Dumbur Hydel Power Project achukrwphruo a kahamkuk hanono haste sorkarbo mokol thaikha. Chini dophani sijak nukjakrok borokrok khaduma tei andulon khwlai aitorma 17 phano paithak jora kasuwi manlailiya. Raima- Sorma twisano thewi aro phirang swnamjakkha tei aboni bagwi chini dophani khorok brwichi saini (40,000) swlaibo kwbang borokrok nok-huk yakarwi ma thangbaikha. Tei khwnamani twikhe thangnani soiya borokroknokhe police sengkrakbai, mayungbai khese nok swbaiwi kutulrwi khaphun. Aswk borokrokno kutulrwi rohormani yagulo je borokrokni kagojo tongo borokno simi ah romwi chathwng hwnwi chei tei bini loge musuk masa-maknwi bagwi rwkha tei kagojo kwrwi roknokheba mairung sernwi sertham baino manthai rwjakha mungwi rwya hwnjakya drop ha kwmajaknai rokni yago yapharwi rwjakkha. Abo haikhe aswk maikhul biyal kwrwikhe tongthothok chathothokkhe tongbaimanise paithago le ha kwmawi Tripurani pisa piring jagao tei baksaba Mizoram, Assam rogo thaigwise tongthai naituklaiwi birman nangwi matongwi baikha. Abo bwswkse chini dophani bagwi kha khammani kok. Chwng baksa ba aborokno pogwise thangbai khwna. A salni kokrokno pogwi mannani kokya. Tabuk phano kwbangma borokrok kwthang

April 2018
Belluqian Magazine April 2018
Autism Voice April 2018
Yuva Sahyadri Epaper April 11, 2018 to April 17, 2018
Yuva Sahyadri Epaper April 18, 2018 to April 24, 2018
allgäu weit März/April 2018
Yuva Sahyadri Epaper April 3, 2018 to April 10, 2018
Mahamegha 2561 Bak (2018 April)