ud#18 (25828)

№18 (25828)
28 2020-тӥ ар 14-тӥ куартолэзь ГАЗЕТЛЭН КОНКУРСЪЁСЫЗ
Данъяськом Вормонэз
Ӧрӟиез утиз орден
Ӵужатае Николай Александрович
Соколов
вордскиз Алнаш ёросысь
Казакгуртын 1906-
тӥ арын ӟуч семьяын.
Туж шаплы пияш будэм.
1919-тӥ арын, Граждан ож
дыръя, ӵужатае солдатъёсты
валэн Грак ёросысь Бондюгае
келям. «Ты настоящий сокол»
шуиллям соку солдатъёс.
Ӵужатаелэн куд-ог военной
документъёсаз но фамилиез
Сокол гожтэмын.
Быдӟым ож кутскыку, Николай
Александрович Алнаш
ёросысь Кизекгуртысь колхозын
председатель вылэм.
Нош 1942-тӥ арын декабре со
войнае кошке но Гвардейской
латышской стрелковой дивизие
сюре, 121-тӥ отрядлэн
командирез луэ. Войнаысь
бертэ костылен, 2 кияз но чиньыосыз
ваньмыз вылымтэ
ни. Медальёсыз трос вал, шуэ
мамае, но та дырлы 2 наградаез
сярысь гинэ («За отвагу»
медаль но Горд Кизили орден)
бумага шедьтӥм.
Войнаысь бертэмзэ туж
умой тодӥсько ай, вера мамае.
Сӥзьыл вал, пе, анаймы
бусыын ужа, ми, пиналъёс,
дорын. Ӧсэтӥ костылен воргорон
пыриз, бӧрдыса милемыз
ӟыгыръяз. Собере апае
бызьыса бусые кошкиз анайлы
вераны.
Ӵужатае мамаелы войнаын
ожмаськемез сярысь вераллям.
Мылкыдыз секыт дыръя
«ойдо, нылы, кырӟалом» шуэ
но кырӟаны кутске вылэм.
Горд Кизили ордензэ маялляса,
«мынам утисе» шуылоз
вылэм. Огпол сое но разведкае
потэм мукет солдатъёсты
немецъёс шӧдӥллям но ыбылыны
кутскиллям. Пуля орденаз
сюрем но пезьдэм, орден
паньгам.
Нош огпол ӵужатаелэн
отрядэз окружение сюрем.
Ваньзэс ыбылӥллям, ӵужатае
гинэ улэп кылем, канавае
выдэм но кулэм кариськыса
кыллем. Пеймыт луэм бере
потыны малпам, но немецъёс,
ӵаштыртэм куараез кылыса,
ыбылыны кутскиллям. Матазгес
лыктӥллям но, ӵужатае
соосты ыбылэм. Нош ик немецъёс
ыбылыны ӧдъяллям,
таяз учыре тушмон пуля,
паллян пыдаз сюрыса, бур
пыдаз вуэм. Всё, бырон вуиз
малпаса, ӵужатае гранатазэ
лэзем. Кӧня кыллемзэ уг ни
тоды, но ӟуч кылын вераськемез
кылэм но кеськем: «Я
здесь! Я русский!» Озьы улэп
кыльыны кылдэм ӵужатаелы.
Та учырез тодаз вайыса, ӵем
бӧрдылэ вылэм.
Война бере Николай Александрович
сторож но, столяр
но вал, вукоын но ужаз, грамотаез
тодэменыз, бухгалтер
но вылэм. Киыз усто мынэ
вылэм: муръё поттылэм,
сандык, дӧдьы, куас лэсьтылэм.
Война бере ӵужатайме
Сюмси районэ нюлэс кораны
ыстӥллям, отын семьяеныз ог
5 ар улоно луиллям.
1976-тӥ арын 11-тӥ мае
ӵужатае улонысь кошкиз.
Жаль, туж ӧжыт со сярысь
тодӥськом. Ӵужатае, войнаысь
бертыса, дневник нуэ
вылэм, но кулэмез бере гожъямъёссэ
утьыны ӧвӧл валаськеммы.
________
Татьяна ШУТОВА.
Можга ёросысь
Вылын Юри гурт
Тусъёс пыр
Йӧно апайёс
Шаермес котыртӥз,
МГУ-ын ужаз
Галина Тимофеевна
Живаева (Кондратьева)
— история
наукаосъя кандидат,
мынам атаелэн
ӵужодӥгез (двоюродной
сузэрез).
Дэри ёросысь Пыӵанка гуртысь пудо вордон удысын
ужась кышномуртъёс. Туспуктэм лэсьтэмын
1960-тӥ аръёсы, гужем шутэтскон дыръязы.
Та туспуктэмысь
адӟиськом Дэри
ёросысь Пыӵанка
гуртысь йӧно егит
кышноосты — пудо
вордон удысын
ужасьёсты.
Пыдес вылазы лэзиськиллям
Анна Кондратьева
но Антонида
Галанова, сыло Эмилия
Перевощикова, Нина
Кондратьева, Галина
Перевощикова, Зоя Булатова,
Антонида Галанова,
Устинья Зверева.
Ваньзы вордӥськемын
1930-тӥ аръёсы, пичи
дырзы ожгар аръёсы
кемдӥз. Пичиысен ик
кылдӥз соослы, школаын
дышетсконзэс
куспетӥ карыса, секыт
ужез быдэсъяны.
Анна Васильевна
Пыӵанкаямы быземын
Дэри черкогуртысь,
нош Нина Васильевна
— Якшур гуртысь.
Кылемъёсыз ваньзы
ик гуртамы вордӥськемын.
Та нылкышноос
секыт ужлэсь
ноку ӧз кышкаллялэ,
котьку но азьмынӥсь
луылӥзы кунян сюдонын
но, скал кысконын
но. Тыршыса ужамзы
понна соос пӧртэм
грамотаосын, таукаронъёсын,
медальёсын
пусйылэмын. Данъяськымон
нылпи но вордӥзы
та кышномуртъёс.
Жаляса верано, туннэ
нуналлы 3-ез гинэ соос
пӧлысь улэп на. Огез —
мынам анае Нина Кондратьева,
со паллянысен
кыкетӥез. Шутэтскыны
потыса но, трос аръёссэ
колхозын ужаз на. Али
но тэк улыны уг быгаты
— гужемзэ юрт котыраз
берга, толалтэ лымы
сузя. Азбарез но, капка
азез но котьку ик хоккеен
шудоно кадь утялтэмын,
ӵужемын луэ.
Галина Кондратьева
вордӥськиз Ижкарын
1936-тӥ арын 2-тӥ
инвожое. Пичи дыръяз
ӵемысь вуылӥз Дэри
ёросысь Пыӵанка гуртамы,
угось солэн анаез
Мария Николаевна
татын вордӥськемын.
Галялэн Ефим агаез но
солэн кузпалыз Евдокия
Лаврентьевна котьку
шумпотылӥзы нылашлэн
вуэмезлы. Коля но
Пантелей пиосынызы
ӵош шудӥз-будӥз Галя.
Бӧрысь песянаелы но
песятаелы тау каремзэ
ӵемысь мон кылылӥ.
Нылашлы школаын
дышетскон капчиен
сётӥськиз, крезьгуро
школае но ветлыны дыр
шедиз. Юнгес яратӥз
скрипкаен шудыны.
Школаез йылпумъяса,
дышетсконзэ УдГУын
азьланьтӥз, кӧня
ке арзэ татын ик ужаз
но. Пӧртэм экспедициосы
потаса, шаермес
котыртӥз, удмурт калыклэн
сям-йылолъёсыныз
пыр-поч тодматскиз. Бӧрысь
дышетсконзэ Москваын
аспирантураын
азьланьтӥз. Татын ик
кузпалэныз Владимир
Живаевен тодматскиз.
Ижысь Г. Кондратьева музыкальной школаын
дышетскон дыръяз. Туспуктэм лэсьтэмын
1955-тӥ арын.
Галина Тимофеевна
история наукаосъя кандидат
луиз, трос аръёссэ
МГУ-ын ужаз.
Атаезъя Галина Тимофеевна
Трокай Борисовлэн
внучатой племянницаез
луэ. Та визьмо,
йӧно кышномурт туж
данъяське но яратэ
вордскем Удмурт музъемзэ,
калыксэ. Галина
Тимофеевна Москваысь
удмурт землячествоен
туж юн герӟаськемын.
Бадӟым арлыдыз шоры
учкытэк, со али но шумпотыса
маде студентъёслы
Удмурт Элькун но
татысь тунсыко адямиос
сярысь.
Москвае тётя Галямы
доры ӵем вуылӥ
ачим но, нылпиосы но.
Туж данъяськиськомы
соин. Пичи дыръям со
мыным валэктӥз вал:
«Тыныд мынэсьтым
нимме сётӥзы. Мон туж
шумпотӥсько, выжыямы
2 Кондратьева Галяос
луизы шуыса».
________
Галина БУЛАТОВА.
Дэри ёросысь Пыӵанка гурт