Cuibhle an Fhortain le Morag Law sampler

mòrag law
a’ chidsin bha Mags a’ dèanamh nam mìorbhailean leis
a’ bhiadh mhath ionadail fhad ’s a bha Pete na ‘maître
d’hôtel’ aoigheil, càirdeil. Às dèidh mìos no dhà, nuair a
fhuair iad a-mach gun robh buidheann charthannais airson
leigheas-aillse anns an sgìre thòisich iad air oidhcheannan
sònraichte a chur air dòigh far an robh na prothaidean uile
a’ dol dhan charthannas.
Bha Pete air a dhòigh glan leis a’ bheatha ùir ’s e
a’ faireachdainn mar phàirt de choimhearsnachd an eilein
agus, aig an aon àm, gun robh e a’ toirt rudeigin air ais dhi,
dìreach mar a gheall e nuair a bha Mags cho bochd. Bha ise
slàn agus làidir a-rithist, a’ fàs na bu bhrèagha agus na bu
tharraingich gach là agus bha an dithis aca cheart cho sona
’s a bha iad anns na bliadhnaichean a chaidh seachad.
Chòrd an t-eilean fhèin riutha gu mòr cuideachd. Na
beanntan àrda, na tràighean fada bàna, an t-sìth is an t-sàmhchair,
gu h-àraidh as t-fhoghar no anns a’ gheamhradh nuair
a bha an gnìomhachas na bu shlaodaiche agus ùine aca a dhol
a-mach airson chuairtean air feadh an àite. Chaidh trì
bliadhnaichean soirbheachail seachad gus, mu dheireadh
thall, a chuir iad romhpa pìos fearainn a cheannach airson
taigh a thogail dhaibh fhèin, oir mar a bha Pete an-còmhnaidh
ag ràdh, ‘’S e pìos beag de Phàrras a th’ anns an àite seo, ’s tha
mi airson fuireach ann gu bràth tuilleadh!’
Bha Pete a-nis thairis air trì fichead agus ged a bha an
obair fhathast a’ còrdadh ris, bha e a’ smaoineachadh an
taigh-bìdh a chur air a’ mhargaidh a-rithist. B’ e gnìomhachas
gu math buidhneach a bh’ ann a-nis agus mar sin cha robh
e fhèin no Mags a’ creidsinn gum biodh e duilich idir dhaibh
a reic.
Ach cha b’ ann mar sin a chaidh cùisean idir.
16