ORRIA 61

Ikastoletan atzerapausurik ez!
Joan den maiatzan, Nafarroako Ikastolek erantzun irmoa
eta deigarria eman genion Hezkuntza Departamentuak
itunak murrizteko hartutako erabakiari. “Ikasgelak kalera,
Ikastolak herrira” ekimenaren bidez, 15 herritan ikasgelak
plazetara atera genituen, hezkuntza-eredu propioaren eta
euskararen defentsan, eta ikastolak herritik sortuak eta
herriarentzat lanean ari direla berriz ere agerian uzteko.
Sakanatik Baztanera, Beratik eta Bortzirietatik Hegoaldera
eta Erriberara, Zangozatik Iruñerrira, Lizarratik Tafallara,
ikastolen komunitatea (ikasleak, gurasoak, irakasleak
eta langileak) kalera irten zen oinarrizko mezu batekin:
ez dugu onartuko Nafarroako hezkuntzan eta gure semealaben
etorkizunean atzerapausorik ematea. Ikastolen
komunitateak salatu zuenez, itunak kentzeko erabakia
arbitrarioa izan da, eta hartutako erabakian atzera egiteko
exijitu genion Carlos Gimeno kontseilariari. Gure ikastolan
ere patiora atera ginen ikasleak, profesionalak eta gurera
hurbiltzeko aukera izan zuten gurasoak.
Mobilizazioek Nafarroako ikastolen sarea osatzen duten
herri guztietako komunitatearen indarra eta kohesioa
erakutsi zuten. Ikastolek, kalera ateratako ikasgelen bitartez,
argi utzi genuen ez dugula atzerapausorik onartzen
seme-alaben etorkizunean eta Nafarroako hezkuntzan.
Egun horretan, ikastola guztietan irakurritako mezuan,
ikastolak, lehen egunetik, herritik sortuak eta herriarentzat
lanean ari direla adierazi zen. Halaber, berdintasuna eskatu
genuen sare guztientzat, eta auzolanean eraikitako
komunitateari bizkar ematea ez dela bidezkoa adierazi
genuen.
Honela, Hezkuntza Departamentuak erabaki arbitrario
hori atzera bota arte Ikastolek mobilizatzen jarraituko
dugula berretsi genuen. Nafarroa euskaraz josteko eta
hezkuntza-sare herrikoia defendatzeko konpromisoa
agerian utziz, eta gizarte osoari euskararen eta ikastolen
defentsan bat egitera dei eginez.