MICHELE NOSTRADAMUS LE SUE PROFEZIE - Myblog.it

Q.52
Le Roy de Bloys dans Auignon regner.
D'Amboise & semer viendra le long de Lyndre:
Ongle à Poytiers sainctes aisles ruiner,
Deuant Boni.
Q.53
Dedans Bolongne voudra lauer ses fautes,
Il ne pourra au temple du soleil:
Il volera faisant choses si hautes,
En hierarchie n'en fut oncq vn pareil.
Q.54
Soubs la couleur du traicté mariage,
Fait par magnanime par grand Chyren selin:
Quintin, Arras recouurez au voyage,
D'espagnols fait second banc maclin.
Q.55
Entre deux fleuues se verra enserré,
Tonneaux & caques vnis à passer outre:
Huict ponts rompus chef à tant enferré,
Enfans parfaicts sont iugulez en coultre.
Q.56
La bande foible la terre occupera,
Ceux du haut lieu feront horribles cris:
Le gros trouppeau d'estre coin troublera,
Tombe pres Dinebro descouuers les escris.
Q.57
De soldat simple paruiendra en empire,
De robbe coture paruiendra à la longue:
Vaillant aux armes en Eglise ou plus pyre,
Vexer les prestres comme l'eau fait l'esponge.
Q.58
Regne en querelle aux freres diuisé,
Prendre les armes & le nom Britannique:
Tiltre Anglican sera tard aduisé,
Surprins de nuict mener à l'air Gallique.
Q.59
Par deux foix haut par deux foix mis à bas,
L'orient aussi l'occident foyblira:
Son aduersaire apres plusieurs combats,
Par mer chasse au besoing faillira.