Qui - Portale B&F

Quand che son trist, sai gnanca mi përché
volentera mia ment torna 'ndaré
a coi temp oramai tanto lontan
quand che mi, giovo, j'era partigian.
E penso a cola neuit pien-a dë steile
seren-a e freida quand le mie parpeile
vorìo saresse për ël grand ginich
e për la seugn, quand che, lassù, ansi j brich
mi j'era ëd sentinela. Ël vent sofiava
gelid e fòrt, con rabia e a më sgiaflava
la mia faciòta ancora da masnà...
Nossgnor che freid! L'avria quasi piorà...
Peui pensava al doman, al nòst avnì
che giovo e veij anssema, dì për dì,
forgiavo ans le montagne e, an lontananssa
seugnava un cel seren con la speranssa
d'un Italia ëd giustissia e libertà,
d'un mond onest, sincer, pien ëd bontà...
E col seugn pòch për vòlta am consolava,
am dasìa forsa e quasi, quasi a smiava
ch'am faseissa passé tuti ij sagrin...
...Adess son veij, camin-o pian pianin,
e l'ai vedù casché ij me seugn pi bei,
ma l'ai sempre sperà che fòrse ël mei
l'aveissa 'ncor da vnì. Fòrse sbagliava
quand che da giovo, anlora, mi sperava
ant un mond ëd giustissia e d'onestà...
Ma véddo che sto mond l'è nen cambià!!
Classe seconda C - a.s. 2008-2009
Istituto Superiore di Primo Grado “E. De Amicis” - Luserna S. G.
8
9