Markeboek Elsen 1549-1856 - Hofmarken

geschenckt sal. Hendrich kindt en Geertken kindt en naer desen daege sall niemandt geen
gebroock moegen anslaen ofte verkoopen.
Item noch huyden desen dach hebben die gemeene Erffgen. samptlijck gegunt die hoffstedde
daer Haestkens vrouwe woont, nu ter tijt derselver hoffstedde sall Jan van Laer erffl.
beholden, dan sall den Ehrentfeste Jan van Laer betaelen Geert Hessels seven Dalers min
thien St.
Item noch soo heeft den holtrichter mett den gemeene erffgenaemen averkommen, datt een
yeder buyrman sal sine water noch sall maecken en ruymen datter water sijnen ganck kan
holden, bij een poene van een tonne byrs, die daer in bevonden wordt, daermen doen sall
kerckenspreacke als men schouwen will.
Item noch soo heeft den holtrichter mit die gemeene Erffgenaemen overkommen, datt een
yeder buyrman sijn hecke sall maecken, bij een poene van een tonne byrs, soo vaecke die
geswoorne overcomen konnen. Daer mach een yeder sich tho verdenken, datt een jeder hoort
tho maecken.
Colla.ta.
B. Kettwich
Jud. Oldenzal Secr.
Copia.
Anno xv Lxv den xxi dach Augusti (21-8-1565).
Op denselven dach soo is holtspraecke geholden tho Elsen bij Jan van Laer tho Hoenloo, als
holtrichter van Elssen en bijde gemeene Erffgenaemen van Elsen, hebben ettelijcke puncten
geslooten als hyer nae volgen sall.
Item noch opden selven dach soo heeft den holtrichter mette samptlijcke gemeene
Erffgenaemen eendrachtlijck gekoozen drie goede mane, deselve drie goede mane, sollen die
twistige gront, tusschen die van Enter en die van Elssen besichtigen, ofte die van Enter hen
oock tho nae geslach hebben, ofte niet hij van den eersten holtinck daer van een afspraecke
dan tho doene bij d’Erffgen. Ditt selve sollen besichtigen, de procurator Cristoffer Scheele en
Geert Hessels, neffens enelijcke huysluyden binnen Elsen.
Item noch huyden deser dach, soo hebben sich die gemeene buyren van Elsen sich beclaeget,
dattse tho donnestin beswaert mett die schattinge, soo hebben die gemeene Erffgen. die
saecke afgestalt bis ter tijtt dattmen weder schattinge sett, soo sall een yeder Meyer sijnen
Landtheerschap anseggen, dan daer bij te kommen, hyr sint tho gekoomen voor goede mane
die bij de schattinge solt wesen eerstgangen die Ehrentfeste Joan van Laer en die Ehrentfeste
Reynt van Covorden en den Ehrentfesten Roloff van Langen en die Ehrentfeste Jorryen van
Barmanlo en den Pater van Albergen.
Item noch huyden desen dach soo heeft den holtrichter mett kentlijcke der gemeene
Erffgenaemen eene afspraecke gedaen datt een yeder man sall helpen maecken datt Sendich
hecke en voort een yeder buyrman sall maecken alle vervallen hecken, met den vree daer een
yder hoert tho maken aen essche, datt daer geen schaede door en komt, soo verre daer yemant
versuymich inne weze, sall den holtrichter gebrockett hebben een tonne byrs.
Item die holtrichter mett samptlijcke der gemeene Erffgenaemen, hebben die saecke van datt
Convent te Albergen nyttgestelt bis die eersten holtinck, soo verre sie geen bescheyt dan den
brengen, soo sollen sie datt graven landt weder liggen laeten, datt datt Convent angegraven
heeft.
Item die geswoorene sint Geert Wassinck, Willem Leetinck, Evert ten Teunenbrinck ander
Odinck, blijven dit jaer inden eedt, gaen en vroegen der Marcke beste tho doen, naer inholt
der voorst. puncten.
Colla.ta.
B. Kettwich
12