Is afskilfering nodig of nie? - Skin Renewal

096
MEDIESE EStEtIKA
Is afskilfering nodig of nie?
Almal word ouer en sonskade eis sy tol. Gelukkig kan nuwe uitvindings en mediese deurbrake beskadigde vel verbeter.
Hoewel baie mense in die wêreld afgunstig is op Suid-Afrika se sonskyn,
sukkel meeste van ons met die gevolge van te veel ure buite in die
son. Donker vlekke en velveroudering as gevolg van sonskade kan
reeds gedurende die vroeë twintigs verskyn, veral by dié wat in hul jeug
vlugbal op die strand gespeel het, buitemuurse aktiwiteite beoefen het,
of net dikwels opgekrul het om ’n boek in die son te lees. Ongeveer
90% van alle velveranderinge kom voor as gevolg van aanhoudende
blootstelling aan sonlig. Ultravioletstrale lig beskadig nie alleen die DNA
in die selle van die vel nie, maar onderdruk ook die meganismes wat
beskadigde selle herstel. Die afbreek of uitputting van kollageen, elastien,
hialuroonsuur en ander ondersteunende molekules in die dermis, lei tot
die kliniese veranderinge van gesigsveroudering. Sonder beskerming, kan
selfs net ’n paar minute se blootstelling aan die son elke dag, merkbare
veranderinge in die vel veroorsaak. Sproete, ouderdomsvlekke, fyn aartjies,
onewe velkleur, inflammatoriese hiperpigmentasie, fyn plooie, los
vel, vlekkerige gelaatskleur, aktiniese keratose (dik vratagtige, growwe,
rooi kolle op die vel) en velkanker kan alles aan blootstelling aan die
son toegeskryf word.
Volgens dr. Maureen Allem, stigter van die Skin Renewal-klinieke, is
donker vlekke, veral op die hande en gesig, een van die grootste estetiese
bekommernisse van mans en vroue. Wanneer die tekens van
veroudering en sonbeskadiging eers op jou gesig verskyn, is dit tyd
om met die mees kragtige behandelings en plaaslike terapieë te begin.
Gelukkig kan nuwe uitvindings en mediese deurbrake beskadigde vel
verbeter. Een van die mees effektiewe metodes is chemiese afskilfering.
’n Paar voorsorgmaatreëls moet geneem word voordat enige mediese
afskilfering begin word. Die gebruik van alle produkte wat Retinol en
vitamien A bevat moet drie dae voor aanvang van die afskilfering
gestaak word. Roaccutane-gebruikers moet hul behandeling ten minste
ses maande voor afskilfering staak en enige blootstelling aan die son
moet vir ten minste 14 dae voor die tyd en 14 dae ná die afskilfering
vermy word. Kom ons kyk na ’n paar afskilferingsbehandelings wat
beskikbaar is.
Piruvex-afskilfering
Piruvex-afskilfering kombineer piruviese en laktiese suur wat die vel vernu
deur dooie selle van die oppervlak te verwyder en die groei van
nuwe selle in die basaallaag daaronder aan te wakker. Dit lei tot ’n
gesonder leefsone vir die vel. Die afskilfering is spesifiek ontwerp vir die
behandeling van plooie, veroudering en velvernuwing. Binne ’n week ná
afskilfering, is die verbetering in velkleur en veltekstuur duidelik sigbaar.
Dit is belangrik om te weet dat hierdie behandeling nie ’n eenmalige behandeling
is nie. Om die beste resultate en voordele te verkry (en om
plooie te verbeter) is ’n reeks van behandelings noodsaaklik. Vir optimale
resultate moet hierdie afskilfering elke twee weke vir ’n periode van
twaalf weke plaasvind. Dadelik ná die afskilfering sal die vel pienk en in
sommige gevalle, jeukerig wees. Ná omtrent drie dae, sal die vel begin
afskilfer vir ’n periode van ongeveer vyf dae (soms kan die afskilfering
langer neem). Die meeste afskilfering sal voorkom op die areas waar die
meeste beskadiging was.
Yellow-afskilfering
Hierdie is ’n gevorderde mediese afskilfering wat Beta-afskilfering en
trichloroasetiese suur asook retinoïese suur kombineer om ’n mediumdiepte
afskilfering te veroorsaak. Hierdie afskilfering kan vir alle veltipes
gebruik word en behandel ook post-inflammatoriese pigmentasie, onewe
tekstuur en bontvel, hormonale pigmentasie en aknee. Die behandeling
word gebruik indien normale behandelings soos gesigsbehandelings en
matige afskilferings nie die nodige resultate lewer nie. Matige sosiale
afsondering is nodig vir omtrent drie tot vier dae. Pigmentasie verdonker
dikwels voordat dit beter word – dit is ’n normale verskynsel. Hierdie
dieper afskilfering veroorsaak duidelike velskilfers vir drie tot vier dae
ná die behandeling.
Melanostop
Melanostop is ’n kombinasie-afskilfering wat moeilike epidermale pigmentasie
behandel met aselaïse suur, resorsinol en fitiese suur. Die kombinasie
van chemiese afskilferaars inhibeer die vorming van abnormale
melanienpigmentasie en verbreek die saamklewing van die keratinosiete
in die korneale laag. Melanostop-afskilfering hernu die epidermis deur
dit te verdik en maak die vel ligter. Melanostop kan gebruik word by pasiënte
met hiperpigmentasie, melasma (velverkleurkolle) en ander donker
velverkleurings. Hierdie is ’n ligte afskilfering wat min tot geen sosiale
afsondering benodig nie. Die velskilfering, indien enige, is nie meer as
wat ’n 20% glikoliese afskilfering veroorsaak nie.
Cosmelan en Dermamelan
Cosmelan en Dermamelan is twee behandelings wat slegs deur dokters
aangewend kan word. Die aanwending van meso-estetiese mandeliese
suur onmiddellik voor die maskerbehandeling, kan die resultate van beide
produkte verbeter. Beide Cosmelan en Dermamelan is teen-pigmentasie
behandelings wat melanienpigmentasie op die gesig verwyder. Hierdie
vlekke staan ook bekend as melasma (velverkleuringskolle) of chloasma
(lewervlekke) as die pigmentasie tydens swangerskap verskyn het.
Die verskil tussen die twee behandelings is die feit dat Dermamelan ’n
25% hoër konsentrasie as Cosmelan het en dus aangedui is vir gevalle
van erge pigmentasie. Cosmelan en Dermamelan se behandelings teen
pigmentasie bied ’n reeks voordele in vergelyking met ander tipes teenpigmentasieprodukte
in die mark. In 99% van gevalle, is die verbetering
van vlekke tot 95%. Een week ná die aanvang van die behandeling
is daar reeds ’n beduidende verbetering. Ná ’n reeks behandelings en
volgehoue behandeling tuis, sal die vlekke aansienlik ligter vertoon.
Samevatting
Indien ons sonbeskadigde vel op ’n vroeë ouderdom kan behandel en die
groei van nuwe kollageen kan stimuleer, kan ons die verouderingsproses
daadwerklik vertraag en kan ons dalk met gesonder en mooier velle op
’n latere ouderdom spog.

097