Biografie in die pryslied

Die bydrae van Krog
In hierdie vergelyking van drie prysliedere val Antjie Krog se “pryslied” op, aangesien
dit ’n unieke verskynsel is: ’n pryslied in Afrikaans wat doelbewus die konvensies
en middele van Afrikaprysliedere inspan. Só maak Antjie Krog ’n bydrae tot die
genre van die pryslied. In Mhlangeni en Mkiva se prysliedere sien ons hoe die pryslied
hom moderniseer ten opsigte van tematiek en die vernuwing van ou konvensies.
Krog gaan verder: die pryslied word getransponeer én getransformeer tot ’n genre
wat álle kulture van Suid-Afrika toebehoort.
Dink ’n mens aan ’n konsep soos “die Suid-Afrikaanse letterkunde”, is Krog se
gedig ’n teks wat hieraan gestalte gee deur oor die klowe van verdeelde wêreldbeelde
te eggo. Dit sluit ten nouste aan by haar vertalings van poësie uit Suid-Afrika se
inheemse tale in Met woorde soos met kerse en Die sterre sê Tsau (2004). Krog se bydrae is
onontbeerlik vir ’n ver-beelde Suid-Afrikaanse letterkunde. Dit is onderstreep tydens
die tweejaarlikse kongres van die Afrikaanse Letterkundevereniging in September
2006 waar H. P. van Coller en Bernard Odendaal hierdie verskynsel rondom Krog
ondersoek het in ’n referaat getiteld “Antjie Krog as bemiddelaar oor die grense van
Suid-Afrikaanse literêre (sub)sisteme heen”. Viljoen ondersoek ook breedvoerig Krog
se poging in Met woorde soos met kerse om “transformation through translation” (2006:
43) te bewerkstellig.
Slot
’n Teksspesifieke knelpunt wat moontlik die vergelyking tussen Krog se pryslied en
die Xhosa-prysliedere kan ondermyn, is die ooreenkoms tussen Krog se pryslied en
dié van Mhlangeni (reëls 21 tot 24 en 28 tot 30 onderskeidelik). Die vraag ontstaan of
Krog die bewoording van haar gedig vir die vertaling van Mhlangeni s’n gebruik het
of andersom. Moet die datum “10 Mei 1994” gelees word as die datum waarop die
gedig geskryf is, of bloot as ’n (verdere) eksplisiete verwysing na die dag van Mandela
se inhuldiging, naas die frase “in die sandkliphart vandag”? Indien Krog se gedig
eerste geskryf is, hoe verklaar ’n mens dan die duidelike ooreenkoms tussen die tekste?
Was sy by die Uniegebou teenwoordig daardie dag, en sou sy genoeg van die
imbongi se optrede verstaan het om daardie reëls in haar geheue weg te bêre?
Hoewel dit nuttig sou wees om die ontstaangeskiedenis van Krog se gedig te ken,
is dit egter nie volkome noodsaaklik nie. Deur Xhosa-prysliedere doelbewus te betrek,
maak Krog dit duidelik by watter tradisie sy haar aansluit – ’n tradisie waarbinne
kollektiewe outeurskap ’n wesenlike rol speel. Weliswaar funksioneer hierdie
outeurskap sterker binne die memoriserende tradisies (soos Zulu-izibongo), maar selfs
by die improviserende Xhosa-tradisie is dit nie uitgesluit nie. ’n Xhosa-imbongi mag
’n reël of twee van ’n ander imbongi hoor en besluit om dit in sy eie pryslied te gebruik
(Opland 1998: 61). Die feit dat Krog tot háár spesifieke formulering kom, (moontlik)
TYDSKRIF VIR LETTERKUNDE • 44 (2) • 2007 43
02 Van Niekerk 03.pmd 43
7/4/2007, 10:03 AM