november 2010 - Provincie Drenthe

Doelstelling, ok van de taolkaortenwebstee,
is het bevordern van het actief en passief gebroek
van het Drèents
De Neie Teneelgroep die het stuk Meneer mit zien geweer van Jan Veenstra speult
Zangeres Margaretha Kleine op het Nassaucollege in Beilen
Wat döt het Huus van de Taol?
19
Het Huus van de Taol hef as doelstelling
het bevordern van het actief en passief
gebroek van het Drèents; het anfietern van
de streektaol. En dat in de breeidste zin van
het woord. Het wark hew verdeeild over een
aantal beleidsterreinen.
Taolpremotie
Het promoten van de Drentse taol is slim belangriek
veur het Huus van de Taol. Daorom geef wij
lezings en warkwinkels, organiseer wij een streektaolfestival
as !REUR! en aander activiteiten in
meertmaond-streektaolmaond. Boetendien maok
en prissenteer wij in de maande met RTV Drenthe
informatieve streektaolprogramma Jasbuus vol
Drents dat op worteldaogen oetzonden wordt
en schrief wij stukkies veur het Dagblad van het
Noorden en aander Drentse kraanten.
De zogenuumde loketfunctie is ok slim belangriek.
Aal daogen worden der vraogen steld an
het Huus van de Taol. Vraogen over het Drents
vanzölf en over de beteeikenis van Drèentse
woorden, mor ok goenend die een overliedensadvertèensie
in het Drents opstellen willen en
daor hulp bij neudig binnen, weeiten het Huus
van de Taol te vinden. Bij oous kuj terecht met al
je vraogen en wensen op taolgebied.
Onderwies
Het Huus van de Taol is ok slim actief in het
onderwies. Op de peuterspeulzaolen kun wij
het pregram ‘Klaor veur de Start’ oetvoeren en
veurlezen. Veur de basisschooulen heb wij een
jaor of wat leden het lessenpakket Krummels
ontwikkeld. De helft van de Drèentse basisschooulen
hef dat pakket anschaft. Wieder
dooun der een koppel basisschooulen met an het
veurleesproject. Vrijwilligers van het Huus van de
Taol lezen in meertmaond-streektaolmaond veur
in ’t Drèents. Op middelbaore schooulen geef wij
regelmaotig gastlessen over het Drèents.
Op de pabo wark we met an curriculumontwikkeling
en geef wij lessen en gastcolleges. En aal
jaor binnen der ongeveer 200 volwassen die een
cursus volgen op het gebied van de Drentse taol
en cultuur. Die cursussen binnen ontwikkeld deur
het Huus van de Taol en worden geven deur
gekwalificeerde docenten van het Huus van de
Taol.
Drèentse literatuur
Literatuur is een belangrieke uting van de
Drentse cultuur. Stichting Het Drentse Boek,
dat een stee hef in het Huus van de Taol, is slim
belangriek veur de schrieverij in oouze previncie.
De oetgever gef Drèentse boouken en boouken
over Drenthe oet. Aal jaor kommen der gemiddeld
aacht neie titels oet. De oetgave van de
tiedschriften Oeze Volk / Maandewark en Roet
gebeurt onder verantwoordelijkheid van het
Huus van de Taol, dat ok schriefwedstrieden, de
Drentse boekenweek, literaire cafés, schrieversbijienkomsten
en zukswat organiseert. Veur twaalf
uur in de week warkt een redacteur in het Huus
van de Taol, zodat de doelstelling op het gebied
van de schrieverij gooud tot zien recht komp.