JADRAN PISMO d - Daily Local News on Board

FILIPINO/TAGALOG
KARAPATANG MAGPALATHALA © 2010 – Ang maiigsing balitang nalalathala rito ay mula sa mga
nakalap na ulat sa radyo, telebisyon at dyaryo sa Pilipinas. Sa pamamagitan nito, hinihimok ng ahensya
na ibahagi ang siping ito sa mga kababayang nagnanais na makibalita. Maliban lamang sa mga
impormasyong libre, ang mga bagay na may direktang kopirayt ay hindi maaaring sipiin, gamitin,
kopyahin o paramihin sa kahit anong paraan ng walang lisensya o pahintulot
mula sa tagapaglathala, o ipamigay, o ipadala sa mga indibidwal
o mga barkong hindi suskritor nito.
FOREX
P44.293 sa US$1 (P44.26 kahapon)
MGA ULO NG BALITA
MAGANDANG UMAGA, PILIPINAS!!!
Ang mga sumusunod na balita ay nailathala sa mga
pangunahing pahayagan sa Pilipinas ngayong araw,
HUWEBES, 16 SETYEMBRE 2010
National <strong>News</strong>
• 10 pakakasuhan dahil sa hostage taking crisis
• Comelec, nag-emergency purchase na
• 80% ng US trip ni Noy, iikot sa negosyo
• Mar Roxas sumipa!
• Liderato ng Senado, kinampihan si Sen. Lacson
• Flag Law, inaprubahan na
• Simbahan sabog sa ‘jueteng bishops’
• 19-anyos na survivor, matatagalan pa ang recovery
OFW <strong>News</strong>
• Higpit sinturon dahil sa pagbaba ng dolyar
• Pondo ng OFWs balak tapyasan
• Semilya sa tubig
Regional
• Bahagi ng Mindanao muling nilindol
• Ilang kaanak ng biktima, naniniwala sa panunuhol ng mga Ampatuans
• Kumain ng atay ng tao, hinatulan
• Mister ng misis, nagtataka rin sa biglang uwi ng maybahay
• 'All-out war' vs colorum vehicles
• 12-anyos ibinugaw sa mayor
• 2 Tsino timbog sa P39-milyong shabu
• ‘Vulca Seal’ tinitira ng mga adik
Foreign
• UK visit, malaking hamon sa Santo Papa
• 1,000 trabaho para sa na-trap na 33 Chilean miners, naghihintay
• Isyu ng Israel at Palestine sa Jewish West Bank, patapos na?
• Pamilya sa Hungary, napilitang lisanin ang bahay dahil sa pagsulpot ni Satanas

Sports
• Nagpakitang ‘Gilas’
• Shaq O'Neal, sinampahan ng kasong computer hacking ng dating tauhan
• Phelps ‘di na ‘d best
• Roger Federer, 'absent' muna sa Davis Cup
Showbiz
• Ina ni MJ, kinasuhan ang promoter nito dahil sa pag-hire kay Dr. Murray
• Toni Gonzaga: Robin Padilla, walang kinalaman sa away namin ni Mariel
• Maselang bahagi ng katawan ni Lovi, nilaro sa Youtube
• Robin Padilla, ibabalik na kay Liezl Sicangco ang bunso nilang si Ali
• J.Lo, pumirma na ng kontrata bilang judge sa 'American Idol'
Odds and Ends
• Lalaking may pinakamalaking pagkalalaki sa buong mundo, nagkakaproblema
Trivia Bits
• Pinay beauty queen na tumanggi sa korona
BUOD NG MGA BALITA
PAMBANSA
10 pakakasuhan dahil sa hostage taking crisis
UMAABOT umano sa 10 katao ang posibleng irekomenda na kasuhan ng kriminal o
administratibo sa nangyaring madugong hostage crisis sa lungsod ng Maynila noong
Agosto 23, 2010. Ito ang ipinahiwatig ni Justice Secretary Leila de lima sa initial findings
na isinagawa ng Incident and Investigation Review Committee (IIRC). Ayon kay De Lima
sa 10 personalidad, kabilang umano sa posibleng kasuhan ang isang kagawad ng
media at public official. Tumangging tukuyin o pangalanan ng kalihim kung sino-sino
ang mga ito hangga't wala pang pinal na rekomendasyon. Agad ding nilinaw ni De Lima
na hanggang rekomendasyon lamang ang kanilang kapangyarihan. Samantala, batay
din aniya sa imbestigasyon ang mga bala mula sa M16 armalite rifle ng hostage taker
na si dating police Capt. Rolando Mendoza ang nakapatay sa lahat ng walong mga
Hong Hong tourists. Ito umano ay batay sa corroborating testimonies ng tatlong mga
survivors sa Hong Kong na nagpatibay din sa testimonya ng driver na si Alberto
Lubang.
Comelec, nag-emergency purchase na
INAMIN ngayon ni Commission on Elections (Comelec) Commissioner Gregorio
Larrazabal na napilitan na silang mag-shift sa emergency purchase ng mga kailangan
para sa nalalapit na barangay at Sangguniang Kabataan (SK) elections. Ang nasabing
hakbang ay ginawa ng poll body kasunod ng mga tangkang pagharang sa proseso ng
halalan dahil sa iba't ibang rason. Ayon kay Larrazabal, masyado na umanong kapos sa
panahon dahil sa Oktubre 25 na ang halalang pambarangay subalit hindi pa sila
nakakahanap ng mga supplier. Aniya, kung dadaan pa sa mahabang bidding process
ay tiyak na maghahabol na sila sa panahon at posibleng ilan sa mahahalagang
kagamitan ay hindi na nila makompleto. Kabilang sa mga pangunahing bibilhin ng
Comelec ay ang mga papel, tinta, ribbon at iba pa para sa computerized voters list. Sa
kabila nito, tiniyak ng opisyal na walang secret agenda sa mga kontrata sa kabila ng
hindi na nito pagkakaroon ng bidding. Pinagbatayan umano ng komisyon ang Republic
Act 9184 o Government Procurement Act na nagbibigay pahintulot sa pagbili ng mga
kagamitan ng gobyerno na hindi na dadaan sa bidding process kung ito ay isang
emergency purchase. "We will be posting the list of voters soon, in the next few weeks.
It's an emergency purchase since there is no more time," pahayag ni Larrazabal.

80% ng US trip ni Noy, iikot sa negosyo
BINIGYANG-diin ngayon ni Pangulong Noynoy Aquino na pakikinabangan lalo ng sector
ng ekonomiya ang kanyang biyahe sa Estados Unidos sa Setyembre 20. Sinabi ng
Pangulo na nasa 70 hanggang 80 percent ng kanyang lakad ay may kaugnayan sa
negosyo o pakikipagpulong sa mga business leaders ng US. Ayon sa Pangulo, aasahang
makakadagdag ito ng trabaho para sa mga Pilipino pero tumanggi munang sabihin ang
figure baka daw mausog. Sa nasabing biyahe, nasa 30 hanggang 35 lamang ang
delegasyon ng Pangulo na kinabibilangan ng mga negosyante, ilang miyembro ng
gabinete at staff. Nilinaw din ng Pangulo na wala siyang kapatid na kasama bagkus
isang bayaw lamang na maaaring mauna sa Amerika. "Anong pupuntahan natin dun?
Most of it perhaps 60 to 70, I think it’s closer to between 70 to 80 percent of the
activities there will be discussions with businessmen. To be honest with you, I really
want to tell you the number of jobs that are forthcoming that I am sure of already but
until they tell me personally and they sign the contract medyo quite na lang ako baka
mausog eh. Pero very very significant," ani Aquino.
Mar Roxas sumipa!
PORMAL nang uusad ang election protest sa presidential race ni dating Sen. Mar Roxas
laban kay Vice President Jejomar Binay matapos na itakda kahapon ng Korte Suprema
na siya ring tumatayong Presidential Electoral Tribunal ang preliminary conference sa
kaso sa darating na Setyembre 30. Ang election protest ay inihain ni Roxas dahil nais
nitong mabilang ang may 3 milyong null votes na idineklara ng Comelec na pawang
nagmula pa sa kanyang balwarte. Tiwala si Roxas na kaya nitong maungusan ang may
700,000 lamang ni Binay kung mabibilang ang null votes. Sinabi ni Supreme Court
Administrator at Spokesperson Midas Marquez na si Atty. Bernado Pardo ang
itinalagang hearing commissioner. Ipinaliwanag ni Marquez na sa nasabing conference
pag-uusapan ang mga guidelines na susundin sa buong procedure.
Liderato ng Senado, kinampihan si Sen. Lacson
IDENEPENSA ng liderato ng Senado si Sen. Panfilo Lacson laban sa reklamong isinampa
sa kanya sa ethics committee kaugnay ng patuloy nitong pagtatago sa batas bunsod
ng kinakaharap na kaso na pagpatay sa PR man na si Salvador Dacer at driver na si
Emmanuel Corbito. Ayon kay Senate President Juan Ponce Enrile, hindi tinalikuran ni
Lacson ang kanyang tungkulin bilang senador sa kabila ng kanyang patuloy na
pagtatago dahil sa warrant of arrest na inilabas ng korte kaugnay ng naturang kaso.
"He is not abandoning, so far as I know. Only that he has not come back because there
is a pending warrant against him. When he comes back he will be arrested anyway, so
how can you say that he has abandoned his office? We will study the case," ayon kay
Enrile. Nabatid na sinampahan ng reklamo si Lacson ng Volunteers Against Crime and
Corruption (VACC) sa Senate committee on ethics na pinamumunuan ni Senate
minority leader Sen. Alan Peter Cayetano dahil sa pagkakasangkot nito sa krimen.
Flag Law, inaprubahan na
APRUBADO na sa ikalawang pagbasa ng kamara ang House Bill 456 o ang Flag Law na
naglalayong maitama ang pag-awit sa national anthem ng bansa. Sa ilalim nito, dapat
itong awitin alinsunod sa orihinal na komposisyon ni Julian Felipe at ang pagtindig ng
matuwid oras na patugtugin sa flag raising ceremony at iba pang lugar tulad sa
sinehan. Mahaharap sa pagkakakulong ng anim na buwan o pagmumultahin ng P50,
000 ang sinumang lalabag oras na maging ganap na batas ang panukala. Matatandaan
na ilan sa mga binanatang singers sa maling pag-awit ay sina Martin Nievera at Arnel
Pineda sa mga boxing fight ni Manny Pacquiao. Ang iba pang mang-aawit na nadamay
sa kontrobersya ay sina Christian Bautista, Charice Pempengco Sarah Geronimo, Kyla,
Lani Misalucha at Bituin Escalante.
Simbahan sabog sa ‘jueteng bishops’

NABULAGA ang Catholic Bishops’ Conference of the Philippines (CBCP) sa pasabog ni
Lingayen Archbishop Emeritus Oscar Cruz na walong obispo ang nakasahod ang palad
sa jueteng money. Aminado si CBCP Public Affairs head at Caloocan Bishop Deogracias
Yniguez na ang nasabing rebelasyon ay malaking kahihiyan at insulto sa hanay ng
Simbahan. Dahil dito, sinabi ni Yniguez na dapat kondenahin ang mga Obispo na
nakikinabang sa jueteng payola, kung totoo man ang pasabog ni Cruz. Bunsod nito,
nagpalabas umano ng pastoral statement ang CBCP Permanent Council, kung saan
pinapaalalahanan ang mga kasapi at opisyal ng Simbahang Katoliko na huwag
tumanggap ng abuloy o tong mula sa sugal lalo na sa jueteng at Philippine Amusement
and Gaming Corporation (PAGCOR). Sinabi rin ng Obispo na kailangang gumawa na ng
hakbang ang CBCP upang solusyunan ang intrigang may mga kabaro silang lumilihis sa
paniniwala at adhikaing ispiritwal. Tumanggi naman si Yniguez kung ano ang maaa ring
parusa sa mga kasapi ng CBCP na tumatanggap ng jueteng payola.
19-anyos na survivor, matatagalan pa ang recovery
HONG KONG - Matatagalan pa umano ang proseso ng recovery ng teenager na isa sa
survivor sa nangyaring madugong hostage crisis sa lungsod ng Maynila. Ayon sa mga
doktor sa Hong Kong, bagamat bumabalik na ang focus sa mga mata ng 19-anyos na si
Jason Leung Song-xue, inaasahang matatagalan pa bago maging fully conscious ito.
Ngayong linggo lamang muling sumailalim sa operasyon si Jason upang tanggalin ang
13 bone fragments sa kanyang utak. Ayon sa chief neurosurgeon na si Dr. Dawson
Fong To-sang ng Tuen Mun Hospital sa Hong Kong, nawala na umano ang pamamaga
ng utak ni Jason. Nakakahinga na rin ito kahit walang artificial respirators. Gayunman
ang ibang parte ng ulo ni Jason o skull na pansamantala munang tinanggal upang
maibsan ang pressure ay aabutin pa ng tatlong buwan bago ibalik para maiwasan ang
mga komplikasyon. Sa kabila nito, nabubuhayan naman ng loob ang mga doktor sa
ipinapakitang senyales kahit seryoso ang tinamo nitong brain injury. "Jason is starting a
long journey of rehabilitation," ani Dr. Fong To-sang. "Swelling in his brain and the
blockage of a major vein have eased after the surgery and he can breathe without
artificial respirators. The next step is to help him regain limbs consciousness and to
swallow by himself." Ang ina ni Jason na si Amy Ng Yau-woon ay nakaligtas din sa
hostage drama at nagpaabot ng mensahe ng pasasalamat sa mga suporta at dasal,
BALITANG OFW/KWENTONG MARINO
Higpit sinturon dahil sa pagbaba ng dolyar
IBAYONG paghihigpit ng sinturon ang gagawin ng mga OFWs kasabay ng paglakas ng
piso kontra dolyar matapos pumalo sa 43:1 ang exchange rate kahapon ayon sa
alyansa ng Filipino migrant rights group sa Middle East. Kasabay ng patuloy na
pagtaas sa presyo ng mga pangunahing bilihin, makakaapekto umano ito sa OFWs at
pamilya na umaasa sa kanila. “Obviously, stronger peso against the dollar would
financially hurt if not put OFWs and their families on dire economic drawback
considering the prices of basic goods and services are continuously on the rise for at
least the last months,” ani John Leonard Monterona, Migrante-Middle East regional
coordinator. Ang hanay ng OFWs ang lagi umanong naapektuhan sa tuwing lumalakas
ang halaga ng piso kontra dolyar. Ayon pa kay Monterona, isang Saudi-based OFW na
nagtatrabaho sa abroad simula pa noong 2004, noong 2006, ang dollar-peso exchange
rate ay umaabot sa 48:1, at tumaas pa sa 56:1 exchange rate ng nasabi ring taon. Mas
mainam umano kung makapagpapatupad ang pamahaalan ng mga libreng serbisyo at
benefit programs para sa mga mahihirap gayundin sa mga OFW at kanilang pamilya.
“Foremost to this is working for the lowering of the prices (basic goods and
commodities) including basic services or at least stabilize the prices; the high rate of
inflation is just softly killing our people: the poor farmers and local workers including
OFWs and their families,” dagdag pa ni Monterona.
Pondo ng OFWs balak tapyasan

PLANO umano ng pamahalaan na bawasan ng halos kalahati ang pondo para sa mga
overseas Filipino workers (OFWs) na may kinakaharap na problemang legal sa ibang
bansa. Ayon sa grupong Global Alliance of Overseas Filipino Workers (GAOFWs),
kinokondena nila ang balakin na ito ng administrasyong Aquino dahil sa ang
kasalukuyang pondo na P54 milyon ay hindi na magkasya para matulungan ang mga
OFWs na nakakulong. Ayon sa GAOFWs, may mga OFWs na nakabilanggo, inabuso,
hindi pinapasahod ng kanilang mga amo sa iba’t ibang bansa na nararapat na
mabigyan ng tulong legal. Hindi umano tamang asahan ang mga OFWs na solohin ang
anumang magiging kakulangan para harapin ang kanilang mga problemang legal dahil
sa kahirapan na kumita kahit konti. Nanawagan ang grupo sa pamahalaang Aquino na
makatotohanang kilalanin ang kabayanihan ng mga OFW sa pamamagitan ng
pagdadagdag at hindi pagbabawas sa pondo para sa legal na pangangailangan ng mga
OFW. Kung ipipilit anya ng gobyerno na bawasan ang naturang pondo ay dapat
liwanagin rin nila kung sino ang sisihin kapag nagdulot ito ng mas malalang problema
sa mga OFWs.
Semilya sa tubig
ITINANGGI ng akusadong Filipino American ang bintang na siya’y nagparaos at inihalo
pa diumano ang kanyang semilya sa bote ng tubig ng kaopisinang babae sa California.
Kasabay ng pagharap sa Santa Ana Central Justice Center nitong Setyembre 15, 2010
ay naghain ng not guilty ang Fil-Am na si Michael Kevin Lallana, 31, kaugnay sa mga
kinakaharap nitong kaso. Kasama ni Lallana na humarap sa korte ang kanyang
abogado na si Eduardo Madrid. Si Lallana ay nahaharap sa anim na misdemeanor
charges, kabilang ang depositing offensive substances at assault. Samantala, hindi pa
nagbigay ng pahayag si Lallana ukol sa mga kinakaharap na kaso. Inaresto ng pulisya
si Lallana nitong Agosto matapos na diumano’y magparaos at ihalo ang kanyang
semilya sa bote ng tubig ng kanyang kaopisina sa dalawang magkahiwalay na
insidente. Ayon sa biktima, nagkasakit siya matapos inumin ang tubig sa bote na
hinaluan umano ng semilya. Nakumpirma rin sa isinagawang laboratory test na
naglalaman ng semilya ang bote ng tubig.
REHIYON
Bahagi ng Mindanao muling nilindol
MULING nakaramdam ng bahagyang pagyanig ang ilang bahagi ng Mindanao kaninang
alas 2:43 ng madaling araw. Sa panayam, sinabi ni Ms. Nany Danlag ng Phivolcs-
Gensan, na sa General Santos City ay naitala ang intensity 3 o magnitude 4.5 na
tumagal ng tatlo hanggang apat na segundo. Natunton ang epicenter ng lindol sa 110
kilometers, south-east ng General Santos City at ito ay tectonic in origin. Wala namang
nasaktan o nasira man sa ari-arian. Ayon kay Danlag, walang kaugnayan sa naganap
na lindol noong nakaraang araw ang pagyanig kaninang madaling araw, dahil ang
sentro umano ng lindol ay ang south-west, habang kanina ay nasa south-east ang
sentro. Paliwanag pa ng Phivolcs, ang Gensan ay nakaranas na ng apat na beses na
pagyanig nitong buwan lamang ng Setyembre.
Ilang kaanak ng biktima, naniniwala sa panunuhol ng mga Ampatuans
IKINAGULAT ng ilang pamilya na biktima ng Maguindanao massacre ang akusasyon ni
prosecution witness Lakmudin "Laks" Saliao na nag-uugnay kay dating Presidential
Adviser on Mindanao Affairs Jesus Dureza na tumanggap umano ng suhol mula sa mga
Ampatuan. Inihayag ni Mrs. Merna Reblando, vice chairman ng Justice Now movement
(JNM) personal itong naniniwala sa ibinunyag ni Laks na tumanggap ng P10 milyon si
Dureza para mabasura ang hiwalay na kasong rebelyon na kinakaharap ng mga
Ampatuan. Dagdag pa nito na hindi niya maiwasan na maging emosyunal matapos na

malaman ang panunuhol ng mga Ampatuan sa mga government officials upang
mapagtakpan lamang ang kanilang kaso. Lubos naman nitong ikinatuwa ang patuloy
na pagbubunyag ni Laks sa mga nalalaman upang idiin ang mga Ampatuan sa
naturang masaker. Una rito, isiniwalat ni Saliao sa isinagawang pagdinig ng korte sa
kaso na inutusan siya ni former Maguindanao Governor Andal Ampatuan, Sr., na ibigay
ang P10 milyon na suhol kay Dureza.
Kumain ng atay ng tao, hinatulan
MAKALIPAS ang dalawang taon na pagdinig sa kasong manslaughter laban sa isang
adik sa droga, nabigyan na rin ng hustisya ang 14-anyos na babae na residente ng
Barangay Pugo, Bauang, La Union. Sa report, pinatawan ni Judge Rosemarie Alim
Molina ng Regional Trial Court Branch 33 ng reclusion perpetua o life imprisonment ang
akusadong si Rommel Jandoc, 30-anyos at residente ng Barangay Pugo ng naturang
bayan. Dalawang taon na ang nakalilipas noong Agosto 3, 2008 nang saksakin ng
suspek ang biktimang si Cathy Madriaga, at pagkatapos hiniwa ang dibdib nito, kinain
ang atay at hinigop ang dugo habang ito'y lango sa droga. Batay sa record,
nagulantang na lamang ang tiyahin ng biktima na si Gina de Guzman, dahil sa sigawan
ng mga kabataan na nakakita sa pangyayari. Nang puntahan ni De Guzman ang
insidente ay naaktuhan nito si Jandoc na nilalapang na ang duguang atay at puso ng
dalagita. Samantala, bilang reaksiyon lubos namang nagpasalamat si Gng. Janet
Madriaga, ina ng biktima sa naging hatol ng hukuman laban sa akusado dahil sa
nabigyan na rin ng katarungan ang pagkamatay ng anak. Bagama't hanggang ngayon
ay masakit pa rin sa pamilya ang nangyaring karumal-dumal na pagpatay sa kanilang
mahal sa buhay. Nang pumutok ang naturang balita, ay binansagan pa ang suspek na
noo'y 29-anyos lamang bilang "cannibal, nasiraan ng bait at sinapian ng masamang
espiritu" dahil sa ginawa nitong krimen.
Mister ng misis, nagtataka rin sa biglang uwi ng maybahay
TUMANGGI munang magbigay ng komento ang mister ng ginang na pinaghihinalaang
nag-iwan ng bagong luwal na sanggol sa basurahan ng Gulf Air flight sa Ninoy Aquino
International Airport (NAIA). Tanging sinabi ng mister na tumangging magpabannggit
ng pangalan na hihintayin muna nila ang imbestigasyon ng mga otoridad sa Maynila
ukol sa nasabing usapin. Una rito, nagtungo sa Flora, Apayao ang ilang ahente ng
National bureau of Investigation (NBI) upang imbitahan ang ginang para sa kaukulang
pagtatanong kanya dahil sa pangyayari. Sa panayam kay Insp. Jefrrey Vicente, deputy
chief of police ng Flora, Apayao, pumayag naman ang mister na sumama ang kanyang
asawa sa mga NBI agents. Ayon kay Vicente, sinabi ng mister na nagtataka sila sa
biglaang pag-uwi ng kanyang maybahay mula sa Qatar dahil sa kanilang pagkakaalam
ay tatlong taon ang kanyang kontrata kung saan umalis siya noong Hunyo ng 2009.
Sinabi pa ni Vicente na may dalawang anak ang ginang sa Flora, Apayao at ito na ang
pangalawang pagkakataon na umalis para magtrabaho sa ibang bansa. Nakiusap
naman ang ilang pamilya na 'wag na lang isapubliko ang pangalan ng mister at
kanyang misis.
'All-out war' vs colorum vehicles
NAGDEKLARA ng all-out war campaign laban sa mga colorum at out of line public utility
vehicles sa Metro Manila ang bagong hepe ng Land Transportation Franchising
Regulatory Board (LTFRB). Ayon kay Atty. Nelson Laluces, bagong chairman ng LTFRB,
sinisimulan na ng ahensiya ang pag-iimbentaryo sa mga pampublikong sasakyan na
naglipana sa kahabaan ng Edsa bago walisin ang mga colorum at out of line vehicles.
Sinabi pa ni Laluces, hindi rin tatanggap ang ahensiya ng mga prangkisa sa mga lugar
sa Metro Manila na sobra na ang dami ng kanilang bilang. Ito anya ang isang ugat ng
matinding trapiko sa isang lugar bukod sa pagsama pa dito ng mga nabiyaheng
colorum vehicles. Sa gagawing pag-imbentaryo ng mga nabiyaheng bus sa kahabaan
ng Edsa ay kasama nila ang Land Transportation Office at Metro Manila Development

Authority. Inaasahan anyang matatapos sa buwan ng Oktubre ang pag-imbentaryo sa
naturang mga sasakyan. Batay sa record ng LTFRB, may mahigit sa 5,000 ang
tumatakbong bus sa araw-araw sa kahabaan ng Edsa.
12-anyos ibinugaw sa mayor
NASA balag ng alanganing masuspendi sa puwesto at makulong ang isang alkalde sa
bayan ng San Marcelino sa Zambales matapos magsampa ng reklamo ang mga magulang
ng 12-anyos noong Linggo. Base sa naantalang ulat ni P02 Lolita Dela Cruz na
isinumite kay P/Chief Insp. Cesar Cabling, hepe ng Olongapo PNP Station 1, kinilala ang
suspek na si San Marcelino Mayor Jose Rodriguez (Partido Lakas-Kampi). Sa paunang
pagsisiyasat, lumilitaw na noong Linggo ng hapon (Setyembre 12) ay ibinugaw ng isang
alyas Jodie ang biktima kay Mayor Rodriguez sa halagang P5,000. Napag-alamang
nadiskubre ng ina ang transaksyon matapos mabasa ang mga text messages na ipinadala
ni Jodie sa cellular phone ng biktima na naiwan nito sa bahay sa East Tapinas,
Olongapo City. Sa ilang text messages ni Jodie sa biktima na ibubu gaw siya kay mayor
kung saan sila magkikita sa terminal ng bus sa Olongapo City. Dito na humingi ng
tulong ang ina ng bata kay Cabling na agad namang nakipag-ugnayan sa Olongapo
City Social Welfare and Development Office at mga pulis-San Marcelino. Natunton
naman ang biktima sa resthouse ng mayor sa Barangay Linusungan sa San Marcelino
Gayon pa man nagulat ang mga magulang ng biktima at ilang tauhan ng Stand Anti-
Violence Now, Yukobari Foundation, Buklod Center, Wed Pro at CSWD na hindi
inimbitahan at inaresto si Mayor Rodriguez. Nagsampa na ng kaukulang kaso noong
Lunes ang ina ng biktima kasama ang ilang kawani ng OCSWD habang sumailalim na
medical examination sa James Gordon Memorial Hospital ng biktima.
2 Tsino timbog sa P39-milyong shabu
DALAWANG pinaghihinalaang Chinese big time drug trafficker ang nasakote ng mga
operatiba ng Regional Anti-Drug Special Operations Task Group (RAIDSOTG) kasunod
ng pagkakasamsam ng 9.5 kilo ng shabu na nagkakahalaga ng P39 milyon sa drug-bust
operationna isinagawa sa Timog Avenue, Quezon City kamakalawa. Kinilala
ni RAIDSOTG head, Chief Supt. George Regis ang mga suspek na sina Mousong Chen,
alyas Mr. Chen, 34, ng Marilao, Bulacan at Qingliang Chen, alyas Cindy Tan, 38, dalaga,
tubong Fujian, China ng Binondo, Maynila. Ayon sa ulat, nasakote ng mga pulis na
nagpanggap na buyer ang mga suspek sa may Scout Tobias malapit sa kanto ng Timog
Avenue, sa Quezon City sa akto ng bentahan ng shabu. Nakumpiska sa mga suspek
ang tinatayang nasa 9.5 kilo ng shabu na nagkakahalaga ng P39 milyon, isang itim na
Toyota Altis (ZFV-143) at isang cellphone na gamit sa iligal na operasyon ng mga
suspek. Nakuha rin sa mga suspek ang buy-bust money na ginamit ng mga pulis.
Nahaharap ngayon ang mga dayuhang suspek sa paglabag sa Republic Act 9165 o
Comprehensive Dan gerous Drugs Act of 2002.
‘Vulca Seal’ tinitira ng mga adik
ANG roof sealant “Vulca Seal” na ginagamit na pantapal sa butas ng bubong ang
ginagamit ng ilang drug addicts sa Muntinlupa City upang sila ay maging “high.” Sinabi
ni “Danny,” 46-anyos jeepney barker sa Alabang, ito ang kanilang pamalit sa rugby,
habang sumisinghot ng Vulca Seal mula sa isang plastic bag. Aminado siyang halos
lahat ng kinikita niya sa pagtatawag ng mga pasahero sa pampasaherong jeepney ay
napupunta sa bisyo niyang ito. Ayon naman sa isa pang Vulca Seal addict, maluwag
ang mga awtoridad sa panghuhuli sa katulad nilang mga adik sa roof sealant. Dadalhin
lamang sila ng mga pulis sa presinto at hihingi sa kanila ng pangyosi at pagkaraan ay
palalayain na sila, pahayag ni Rico. Anila, mula sa rugby na synthetic adhesive, lumipat
sila sa Vulca Seal makaraang haluan ng mustard oil ng rugby manufacturers ang
kanilang adhesive upang sumama ang amoy nito at hindi magustuhan ng mga adik.
“Nakahihilo kasi yung amoy noong bawang kaya ayaw na namin ng rugby kahit na mas
sulit yon,” pahayag naman ni Danny.

BALITANG ABROAD
UK visit, malaking hamon sa Santo Papa
LONDON, England - Nasa Britanya na si Pope Benedict XVI kaugnay ng kanyang apat na
araw na pagbisita kasama na ang Scotland. Sinasabing malaking hamon umano ang
pagtungo ng Santo Papa lalo na at pinagkukumpara ng iba ang huling pastoral visit
doon ng kanyang pinalitan ang yumaong charismatic church leader na si Pope John
Paul II noong 1982 na sinalubong ng daang libong katao. Ang Britanya ay itinuturing na
isa sa "Europe's most secular countries" kaya usap-usapan din na baka hindi gaano
karami ang makibahagi sa kanyang public functions. Sa kabila nito positibo ang
pananaw ng mga local Catholics sa lugar na magtatagumpay pa rin ang pagbisita ng
Santo Papa sa harap ng problema rin sa global child sex-abuse scandal na
kinasasangkutan ng ilang pari. Nataon naman sa pagdating ni Pope Bendict ang pagback
out ng dapat sana'y kasama sa kanyang pagbisita na si Cardinal Walter Kasper
dahil sa umano'y pagkakasakit nito. Ang 77-anyos na si Kasper ay may partisipasyon
sana sa isasagawang ecumenical talks kasama ang kinatawan ng Church of England.
Naging kontrobersiyal pa ang statement ni Kasper nang sabihin nito na ang paglapag
sa UK ay mistulang nasa Third Word country kung saan ang mga Christians ay biktima
ng diskrimasyon "an aggressive new atheism." "When you land at Heathrow you think
at times you have landed in a Third World country," pahayag ng cardinal sa isang
panayam.
1,000 trabaho para sa na-trap na 33 Chilean miners, naghihintay
CHILE - Mahigit sa 1,000 mga trabaho ang naghihintay sa 33 Chilean miners na 40 araw
ng nasa ilalim ng lupa matapos ma-trap sa isang minahan. Ilan sa mga job offers mula
sa dalawang dosenang kompanya para sa naturang mga minero ay ang bulldozer
driver, mekaniko, electrician at iba pa. Napag-alaman na ang pagkaka-trap ngayon ng
mga minero ang siyang naitalang pinakamatagal na sinosolusyunan. Mula noong
Agosto 5 kasi hanggang sa ngayon ay wala pa ring pinal na plano ang mga engineer
upang maihaon na ang mga minero. Sa ngayon ay patuloy nalang ang komunikasyon
sa mga ito gayundin ang pagbibigay sa mga ito ng pagkain at gamot sa pamamagitan
lamang ng napakakitid na butas.
Isyu ng Israel at Palestine sa Jewish West Bank, patapos na?
JERUSALEM - Dahil sa may magandang progress ang pag-uusap ng Israel at Palestine
tungkol sa pinag-aawayang Jewish settlement sa West Bank, posible umanong matapos
na ang naturang isyu. Ito ay batay sa obserbasyon ni US envoy George Mitchell
matapos ipagpatuloy ng dalawang kampo ang direct peace talks . "I will say that the
two leaders are not leaving the tough issues to the end of their discussions, " ani
Mitchell. "We take this as a strong indicator of their belief that peace is possible."
Napag-alaman na ang pagpapatayo ng kabahayan ng Jerusalem sa pinag-aagawang
teritoryo ay siyang pangunahing dahilan kung bakit naantala ang peace talks sa
pagitan ng dalawang panig. Bagama't una nang sinabi ng Palestine na babagsak ang
peace talks kung hindi ma-extend ang moratorium ng Israel, tiniyak naman ng
Palestine na matitigil din ang karahasan laban sa Israel. Para sa Jerusalem "partner in
peace" nila ang Palestine. Una rito, aminado ang US na hindi nila kaagad makakamit
ang breakthrough sa apelang kapayapaan mula sa magkabilang panig. Samantala,
hindi nabanggit sa napag-usapan nina Israeli Prime Minister Benjamin Netanyahu at
Palestinian President Mahmoud Abbas kung kailan sila muling maghaharap.
Pamilya sa Hungary, napilitang lisanin ang bahay dahil sa pagsulpot ni
Satanas

INABANDONA ng isang pamilya sa Badapest, Hungary ang kanilang bagong renovated
na bahay matapos sumulpot ang isang tila imahe ni Satanas. Ayon sa may-ari na si
Laszlo Csrefko, naligo ang kanyang asawa nang makita ang dalawang sungay ng
demonyo sa isa sa mga tiles ng paliguan. Napasigaw at napatakbo aniya sa takot ang
kanyang asawa dahil sa nakakatakot na titig nito. Hindi rin maalis ng mga ito ang
imahe kahit ano pang paglilinis ang gawin dito at palaging malamig ang temperatura
sa banyo kahit pinapagana nila ang heater. Samantala pinaplano na ngayon ng Csrefko
Family na magpasaklolo sa isang exorcist para mataboy ang mga masasamang espiritu
sa kanilang tahanan.
ISPORTS
Nagpakitang ‘Gilas’
SINUNOG ng mainit na opensa ng Smart-Gilas Pilipinas ang Japan-Hamamatsu Phoenix
upang makabuenamano ng 88-72 panalo kahapon sa paglarga ng 4th Asian Basketball
Association Club Championship sa Haining, China. Naglalaro man na kulang sa mga
tauhan dahil sa nagpapagaling mula sa knee injury na si Fil-Am guard Marcio Lassiter,
hindi naman ito ininda ng RP team nang maglista ng double-double si American import
Marcus Douthit. Gumawa ang reinforcement, na kandidato para sa naturalization, ng 21
points at 13 rebounds habang sumuporta naman si guard JV Casio ng 16 markers,
limang assists at tatlong steals upang pabagsakin ang reigning Japanese BJ League
champion. “It’s a good start, hope the team could sustain its good showing,” ayon sa
text message ni Smart-Gilas team manager Frankie Lim. Maagang lumayo ang Smart-
Gilas, 24-19, sa first quarter ngunit nakabalik ang Japan upang agawin ang bentahe,
37-38, sa halftime. Agad na kumilos ang 6-foot-10 na Douthit sa pagdomina sa shaded
lane, habang kinontrol naman ni Casio ang run-and-gun offense ng tropa upang mu ling
mauna, 62-55, papasok sa payoff period. Ginagamit ng Smart-Gilas Pilipinas ang torneo
bilang preparasyon sa Asian Games sa Guangzhou, China sa Nobyembre 12-27.
Shaq O'Neal, sinampahan ng kasong computer hacking ng dating tauhan
FLORIDA -- Nahaharap ngayon sa kasong computer hacking at destruction of evidence
si NBA star Shaquille O'Neal. Ang kaso ay isinampa ng dating employee ng basketball
player na si Shawn Darling sa Dade County, Florida. Batay sa alegasyon, Si Darling ay
nanilbihan kay O'Neal mula taong 2007 hanggang Nobyembre 2009, kung saan sa
nabanggit na mga panahon, inutusan umano ni Shaq ang complainant na burahin ang
mga impormasyong may kaugnayan sa ilang legal issues, na naka-save sa email
account nito. Nakipagsabwatan rin umano si Shaq sa mga law enforcers para taniman
ng ebidensiya ng "child pornography" ang computer ni Darling. Binanggit rin sa
reklamo na may hawak na mga ebidensiya si Darling ng mga extramarital affairs ni
O'Neal.
Phelps ‘di na ‘d best
HUNT VALLEY, Maryland --- Mismong ang longtime coach ni Michael Phelps ang
nagsalita noong Lunes na hindi na ang 14-time Olympic gold medalist ang
kasalukuyang pinakamagaling na swimmer sa mundo. Sinabi ni Bob Bowman na si
Ryan Lochte ang may hawak nito. Tinalo ni Lochte si Phelps sa 200 individual medley at
200 backstroke finals sa U.S. national championships noong isang buwan bago
sumungkit ng anim na gold medals kumpara sa lima lang ni Phelps sa Pan Pacific
championships. “Obviously, Ryan Lochte is the best swimmer in the world this year. No
question,” ani Bowman. “That will be a huge challenge for Michael going forward,
hopefully a motivator.”
Roger Federer, 'absent' muna sa Davis Cup
BASEL, Switzerland - Hindi muna maglalaro sa Davis Cup si Roger Federer para umano
sa mahabang pahinga nito bilang paghahanda sa susunod na season. Bagama't
nakapasok sa semis ng katatapos lamang na U.S. Open, bigo namang masungkit ni

Federer ang tropeo matapos na talunin ni Novak Djokovic. "I need some extra time to
relax after the intense weeks in North America so I can finish the year strong," ani
Federer. Sa Oktubre, inaasahan ang pagsali ni Federer sa Shanghai Masters.
SHOWBIZ
Ina ni MJ, kinasuhan ang promoter nito dahil sa pag-hire kay Dr. Murray
LOS ANGELES - Sinampahan ng kaso ng ina at mga anak ni King of Pop Michael Jackson
ang concert promoter nito dahil sa mabilis na pag-hire kay Dr. Conrad Murray upang
maging personal physician ng singer. Nakasaad sa kasong isinampa ng pamilya ng
King of Pop, naging pabaya umano ang AEG Live pagdating sa pagkuha ng susubaybay
sa kalusugan ni MJ. Anila, hindi man lang daw siniguro ang background ni Murray. "AEG
did not provide a doctor who was truly looking out for Jackson's well-being and did not
provide equipment," bahagi ng statement ni Katherine at mga apo. Ang AEG Live ang
humawak sa mga huling concerts ni MJ bago ito pumanaw. Si Murray ay una na ring
kinasuhan ng involuntary manslaughter o hindi sinasadyang pagpatay ng tao matapos
na sumobra ang pagpapa-inom kay Jackson ng Propofol. Nagtagumpay naman si
Murray matapos i-anunsyo ng hukom na hindi nito maaaring suspendihin ang medical
license ng doktor sa California na matagal nang hinihiling ng California government na
bawiin, kasunod ng pagkamatay ni Jakcson.
Toni Gonzaga: Robin Padilla, walang kinalaman sa away namin ni Mariel
MARIING itinanggi ng TV host/actress/singer na si Toni Gonzaga na may kinalaman ang
boyfriend ni Mariel Rodriguez na si Robin Padilla sa kanilang biglaang pagputok na
bangayan. Ayon kay Toni, hindi niya inaasahang makakarinig siya ng mga hindi
magagandang pahayag laban sa kanya at mula pa umano sa kanyang itinuring na
mabuting kaibigan. Giit ng singer, hindi siya nagseselos kung kaya't hindi sila OK
ngayon ng kapwa TV host. Sa ngayon ay nais nalang daw ng aktres na mag-move on
at ayaw ng palakihin pa ang isyu dahil baka maaakusahang parte lang ng kanyang
promotion para sa bagong proyekto ang nangyayari. Nang tanungin kung mapapatwad
ba nito ang kaibigan, "time heals all wounds" ang isinagot nito.
Maselang bahagi ng katawan ni Lovi, nilaro sa Youtube
NAKA-post sa Youtube ang sexy pictorial ni Lovi Poe para sa Bench Body. Classy ang
mga Bench Body billboard ni Lovi pero daring siya sa video ng behind-the-scenes
shoot. Pilyo ang nag-shoot ng video dahil may mga eksena na nakatutok ang kanyang
kamera sa maselang bahagi ng katawan ni Lovi. Hindi nag-iisa si Lovi sa video na
napanood namin dahil kasama niya sa first part si Rocco Nacino. Kung matapang si Lovi
sa pagsusuot ng bra at bikini sa pictorial, naging conservative naman si Rocco na
topless at denim jeans ang suot.
Robin Padilla, ibabalik na kay Liezl Sicangco ang bunso nilang si Ali
HANDA ng ibalik ng action star na si Robin Padilla ang bunso nitong anak na si Ali sa
ex-wife na si Liezl Sicangco. Sa darating na Setyembre 20, ipapahatid na ni Robin sa
kanyang manager ang bunsong si Ali sa Australia kung saan naninirahan ang bagong
pamilya ni Liezl. Kasabay nito ay pasasamahin rin daw ni Robin ang kanyang abogado
upang maisaayos na rin ang kanilang divorce papers ng dating asawa. Kung maaalala,
galit na galit ang dating misis ni Robin dahil sa pagpapabaya umano ni Binoe sa
kanilang mga anak lalo na sa bunso nilang si Ali. Minsan na ring sinisi ni Liezl si Mariel
Rodriguez na siyang kasalukuyang girlfriend ni Robin sa kawalan nito ng oras sa mga
anak.
J.Lo, pumirma na ng kontrata bilang judge sa 'American Idol'

LOS ANGELES - Kumpirmadong magiging isa sa mga judge ang singer/actress na si
Jennifer Lopez sa reality singing competition na "American Idol." Ayon sa ulat, pumirma
na ang singer ng isang taong kontrata sa nasabing kompetisyon kung saan nakapaloob
umano doon ang $12 milyon na kita. Una rito, maraming pangalan ang umugong na
papalit sa iniwang puwesto ng talk show host na si Ellen de Generes na umalis kasunod
ni Simon Cowell. Nariyan ang pagnanais nina Mariah Carey at Shania Twain na maging
American Idol judge.
BALITANG A-KYUT
Lalaking may pinakamalaking pagkalalaki sa buong mundo, nagkakaproblema
NANATILI pa ring walang trabaho ang American national na si Jonah Falcon na kinilala
bilang nilalang na may pinakamalaking ari sa buong mundo. Sa katunayan
nagkakaproblema na makahanap ng trabaho si Falcon dahil sa nai-publish ang kanyang
mabigat na dinadala sa iba’ ibang uri ng media na siyang nagiging dahilan ng
pagkahiya nito. Sumusukat lang naman ito ng bonggang 13 .5 inches na swak na swak
para sa acting role ng mga pornographic materials. Sa kabila nito, wala namang
panlasa si Falcon na tikman ang mundo ng pornograpiya bagama’t hindi ito kontra sa
mga malalaswang eksena. Sa ngayon, nanatili pa rin sa piling ng kanyang nanay ang
unemployed na binatilyo sa Manhattan Apartment sa New York City, U.S.A. at patuloy
na naghahanap ng mapapsukang trabaho.
ALAM MO BA…
Pinay beauty queen na tumanggi sa korona
KILALA nyo ba kung sino ang Pinay beauty queen na dapat sana’y unang Asian na
naging Miss World ngunit tinanggihan nya ang korona bilang protesta. Nobyembre
noong 1973 nang katawanin ni Evangeline Pascual ang Pilipinas sa patimpalak na Miss
World na ginanap sa Royal Albert Hall sa London. Tabla ang naging boto ng mga
hurado kina Pascual at Miss USA na si Marjorie Wallace. Dahil dito, kinailangang
bumoto ang chairman of the board ng mga hurado na si Gregory Peck - isang aktor
mula sa US. Si Wallace ang pinili ni Peck at naging first-runner up si Pascual. Ngunit
ilang buwan ang nakalipas, inalis kay Wallace ang korona bilang Miss World dahil
inuuna umano nito ang pakikipag-date sa mga kilalang personalidad kaysa tungkulin
ng isang Miss World. Nang isalin ng pamunuan ng Miss World ang korona kay Pascual
bilang first runner-up, sinasabing tinanggihan ito ng Pinay sa paniwalang hindi naging
patas sa kanya at sa mga Asyano ang naging desisyon ng hurado noong araw mismo
ng patimpalak.
PAUNAWA
Ang mga balita at impormasyon dito ay kinalap at iniayos ng Brent & Strauss
Integrated Communications, Inc. para sa mga marinong Pilipino. Kung nais na
patuloy pang makatanggap ng suskrisyon, mangyaring mag-text o tumawag sa:
• Tel. +63 919 4172448 • Fax +385 51 403 189 • Email: news@jadranpismo.hr