Ligji i Kuvendit të Kosovës nr. 02/L-28 mbi procedurën ... - Unmik

Neni 41
Dorëzimi i kërkesave për fillimin e procedimit administrativ në zyrat e përfaqësive
diplomatike ose ato konsullore
41.1. Kërkesa e personit të interesuar për fillimin e një procedimi administrativ mund të
dorëzohet edhe në zyrat konsullore ose në ato të përfaqësive diplomatike jashtë territorit
të Kosovës të vendosura në ato vende ku palët e interesuara banojnë në mënyrë ligjore
ose gjenden përkohësisht.
41.2. Përfaqësitë diplomatike ose zyrat konsullore i nisin kërkesat e personave të
interesuar për fillimin e procedimit administrativ në adresë të organeve kompetente të
administratës publike me postë diplomatike brenda 2 ditëve të punës nga dita e marrjes.
Neni 42
Dërgimi i kërkesës për fillimin e procedimit administrativ me postë
42.1. Kërkesa e personit të interesuar për fillimin e një procedimi administrativ mund të
dërgohet me postë të regjistruar (rekomande) dhe në formë elektronike.
42.2. Komunikimi i dokumenteve elektronike është i lejueshëm, përderisa pranuesi i
dokumentit e lejon qasjen elektronike.
42.3. Një dokument i shkruar zyrtar mund të lëshohet ose pranohet në mënyrë
elektronike, përveç nëse ligji këtë nuk e lejon. Në këtë rast dokumenti duhet të përmbajë
nënshkrimin elektronik i cili rregullohet me akt të veçantë.
42.4. Dokumentet elektronik që lëshohen në pajtim me paragrafin 2 dhe 3 mund të
zëvendësojnë dokumentin e shkruar.
42.5. Dokumentet që në rrugën elektronike i dërgohen organit publik duhet t’i përmbushin
kërkesat ligjore të përcaktuara me dispozitat për dorëzimin e dokumenteve një organi
publik. Nëse dokumenti i dërguar në formë elektronike nuk i përmbush këto kërkesa,
organi publik e njofton parashtruesin e kërkesës për mangësitë formale ose përmbajtjesore.
Neni 43
Regjistrimi i kërkesës për fillimin e procedimit administrativ
43.1. Pavarësisht nga mënyra e dorëzimit të kërkesave të personave të interesuar për
fillimin e një procedimi administrativ, organi që merr kërkesat i regjistron ato në një
regjistër të posaçëm në pajtim me dispozitat pozitive.
43.2. Regjistri i kërkesave për fillimin e procedimit administrativ përmban informacionin
e mëposhtëm:
a) numrin e kërkesës;
b) datën e dorëzimit;
c) objektin e kërkesës;
d) numrin dhe emërtimin e dokumenteve që i bashkëngjiten kërkesës, dhe
e) emrin e kërkuesit.
43.3. Kërkesat e personave të interesuar për fillimin e një procedimi administrativ
regjistrohen sipas radhës së dorëzimit. Ato kërkesa që vijnë në të njëjtën dërgesë postare
konsiderohen si të dorëzuara në të njëjtën kohë.
15