OD SENJA DO ZVIJEZDA_katalog učeničkih radova_2022.
Create successful ePaper yourself
Turn your PDF publications into a flip-book with our unique Google optimized e-Paper software.
TEA ŠPANIĆ , 1. razr.
SŠ P.R.VITEZOVIĆA, Senj
mentorica: Radica Turina
DRAGI VITEŽE
Čula san i pročitala dost o Tebi. A no ča mi je bilo posebno
važno je da si iz Senja i da si ovdi živil neko vrime. Prvo san o Tebi
znala skoro pa niš, jedino da je Tvoj spomenik zad srednje škole u
ku ja sad gren i ka nosi Tvoje ime.
I to je to, al sad se usudin reč da znan više o Tebi. Pa tako
znan da si rođen ovdi, u Senju, da Ti je majka bila Senjkinja, a otac
iz njemačke familije. U Senju si finil pučku školu, a gimnaziju u
Zagrebu. Puno si putoval i tako učil. Bil si vridan. Volil si libre,
posebno povijest i zemljopis. Živil si u Rimu, bil po Austriji i Ugarskoj.
Postal si uvažen pa Te Senj 1681. leta mencoval za svog poslanika
u Ugarski sabor. Divin Ti se ča si u ratu protiv Turčinov bil u
borbama ko pravi Senjanin. Svaka Ti čast.
Kako si volil libre, otprl si u Zagrebu knjižnicu i uredil
štampariju. Štampal si kalendare i svakakove letke. Volila bi da
san Te poznavala i da san naučila kako se to dela jerbo mi je vajk
bila želja da i ja čagod štanpan.
Isto tako znan da si bil pegula (da Ti sve ni išlo niz dlaku).
Štamparija Ti je izgorila u požaru i ondat Ti je oduzeta, ča ni u redu
i ni pošteno jer se svakon to more dogodit.
Znan da Tvoj život ni bil baš kako bi Ti til jerbo su Ti umrli žena i
sin, al zaspravlje ni bil za ne Tvoje besede kadi si rekal da se ne bi
vratil u nijedan dan svog života. Ja verujen da ni sve bilo tako
crno i da si imal lipši momentov. A no ča bi poručila svin ljudin ki
su Te ostavili, kad Ti je bila najveća potriba, kad si se boril za
koricu kruva, da se nisu lipo ponili prema Tebi i da to ni bilo ljucki.
Par besedov ča se mene tiče: Ti si kriv ča ja danas moran
pisat -č i -ć. Moja profesorica dobro zna da mi je to slaba točka. I
jerbo si Ti to predložil, morala san se i to učit da navučem dvojku.
Dragi Viteže, prvo svega,Ti si čovik ki je bil školan i vridan.
Ti ćeš vajk bit zapisana povijest ka nikad neće bit izbrisana ni
zaboravljena. Znaju Te i slave. I naša Hrvacka danas.
Tea, Tvoja školanka iz prvog razreda gimnazije