Djasabra Atardi Lesa Pa Estudio di e Siman Aki ... - Joycita-ADV.nl

More documents

Recommendations

Info

Djamars Mei 14 UN GOBERNANTE NOBO FOR DI BETHLEHEM Den Mikeas su buki e beis ta kambia drástikamente for di tristesa pa speransa sublime. Por mira e speransa aki den un di e profesianan Mesiániko di mas famoso. Lesa Mikeas 5:2. Di ken ta papiando akinan, i kiko esaki ta siña nos di dje? Mira tambe Juan 1:1-3; 8:58; Kolosensenan 1:16, 17. For di un stat chikí di Hudea lo bini Un hende for di eternidat pa ta gobernante den Israel. Mikeas 5:2 ta un di e versíkulonan bíbliko mas presioso skirbí pa fortalesé e speransa di hende, ku ta spera ansiosamente riba e Lider ideal primintí dor di e profetanan. Su gobernashon lo trese un tempu di fortalesa, hustisia, i pas (Mikeas 5:4-6). David tabata nativo di Bètlehèm, un stat yamá tambe Ephrath (Génesis 35:19). Menshon di e stat aki ta enfatisá e orígen humilde di tantu David i Su futuro susesor, ku lo ta e Wardador Berdadero di e pueblo aki (Mikeas 5:4). Den e stat humilde di Bètlehèm profeta Samuel a ungi Jesse su yu hòmber mas chikí, David, ken mester a bai bira rei riba Israel (1 Samuel 16:1-13; 17:12). Ora e hòmbernan sabí a bin buska e “rei di Hudiunan” resien nasí, Rei Herodes a puntra ekspertonan den Beibel na unda mester bai buska (Mateo 2:4-6). Nan a kont’é di e pasashi aki, ku tabata predesí ku e Mesias lo bini for di e stat chikí di Bètlehèm. Pa inkomprendibel ku e ta pa nos mente finito i kaí, e beibi ei ku a nase tabata e Dios eterno, Kreador di shelu i tera. “For di dianan di eternidat Señor Hesukristu tabata un ku e Tata”.—Ellen G. White, The Desire of Ages, p. 19. Ounke kon inkreibel e idea tabata, e ta un di e bèrdatnan mas fundamental den Kristianismo: Kreador Dios a tuma riba Su Mes humanidat i den e humanidat ei El a ofresé Su Mes komo sakrifisio pa nos pikánan. Si bo tuma tempu pa meditá riba loke esaki ta enserá, i kiko e ta siña nos di tantu e balor di nos bida i loke nos komo individuo ta nifiká pa Dios, bo por tin un eksperensia ku ta kambia bo bida. Ora asina hopi hende ta lucha pa haña propósito i nifikashon pa nan eksistensia, nos tin fundeshi di e Krus, ku no solamente ta ankra nos den loke nos bida ta nifiká, pero e ta duna nos tambe speransa di algu muchu mas grandi di loke e mundu aki por ofresé.
Djarason Mei 15 LOKE TA BON Den komienso di Mikeas 6, Dios ta dialogá ku Su pueblo, menshonando tur e kosnan ku El a hasi na nan fabor. Komo kontesta, e adoradó ku ta bini den tèmpel ta puntra kiko e por hasi pa agradá Dios. Ta kiko ta un ofrenda aseptabel? Bisénan di un aña kisas, òf un multitut di karné, riunan di zeta, òf asta e adoradó su promé yu ku nase? Tin un progreso konstante di e tamaño i balor di ofrendanan menshoná den e teksto aki. Lesa Mikeas 6:1-8. Ki bèrdat krusial ta siña akinan? Pakiko esaki ta espesialmente importante pa nos, komo Atventistanan di Shete Dia? Kiko esaki ta bisa nos di e echo kon bèrdat ta muchu mas ku djis tin doktrina korekto i komprondementu detayá di profesia? Mira Mateo 23:23. E profeta ta deklará ku Dios ya kaba a revelá loke E ke. Dor di siñansanan di Moises, e hendenan a tende kiko Dios a hasi pa nan dor di Su grasia (Deuteronomio 10:12, 13). Mikeas su kontesta no tabata un revelashon nobo ku ta señalá un kambio den Dios su rekisitonan. Sakrifisio i servisionan saserdotal no tabata Dios Su promé preokupashon. Dios Su deseo supremo ta pa tin un pueblo ku ta aktua den hustisia pa nan bisiñanan, ku deboshon konsistente i amor pa Señor. E ofrenda di mas ekstrabagante ku hende por duna na Dios ta obediensia. Mikeas 6:8 ta e deklarashon mas kla di Dios Su boluntat pa Su pueblo. Esaki ta resumí tur siñansa profétiko riba religion berdadero: un bida ku ta mustra hustisia, miserikòrdia, i un relashon será ku Dios. Hustisia ta algu ku hende ta hasi ora e ta motivá dor di Dios Su Spiritu. E tin di hasi ku hustisia i igualdat pa tur, espesialmente esnan suak i sin poder ku ta wòrdu eksplotá dor di otronan. Bondat ke men pa mustra amor, lealtat i fieldat na otronan, libremente i boluntariamente. Kana ku Dios ke men pone Dios promé i biba di akuerdo ku Su boluntat. Pakiko ta asina fásil pa warda Sabat estriktamente, mas ku pa aktua hustu, stima miserikòrdia, i kana humilde dilanti Dios?
Page 1 and 2: Lès 7 Mei 11-17 Dios Su Pueblo Spe
Page 3: Djaluna Mei 13 ESNAN KU TA INVENTA
Page 7 and 8: Djabièrnè Mei 17 MAS ESTUDIO: “
Page 9 and 10: Sinembargo, tin solamente un Dios b
Page 11 and 12: Aktua den un forma ku ta sakrifiká

Djasabra Atardi Lesa Pa Estudio di e Siman Aki ... - Joycita-ADV.nl

Create successful ePaper yourself

Delete template?

Save as template?