Djasabra Atardi Lesa Pa Estudio di e Siman Aki ... - Joycita-ADV.nl

Sinembargo, tin solamente un Dios bíbliko ku ta amor (Eksodo 34:6, 7; 1 Juan
4:16), i nos interpretashon di Skritura ta generalmente bruha i tin mester di wòrdu
koregí—no e karakter di Dios. Nos Dios ta e Dios di amor, bèrdat, hustisia, i libertat.
Preguntanan pa Diskushon:
1. Den lès di e siman aki, kua ta e versíkulo mas poderoso di Beibel ku ta duna
enkurashamentu na e kreyente en relashon ku bataya kontra maldat?
2. Kua ta nifikashon di Kristu Su viktoria riba krus, i kon esaki ta yuda nos
komprondé Dios komo e Dios di amor i hustisia?
STAP 2 -- EKSPLORA
Djis pa Maestronan: Mikeas ta un profeta di siglo ocho promé ku Kristu. Aña
750-686 P.K. El a biba den tempu di Isaias, i su mensahe ta dirigí na su mes
generashon, pero espesialmente na e remanente (e palabra aki ta aparesé sinku
biaha den e buki aki—Mikeas 2:12; 4:7; 5:7, 8; 7:18).
Kondishonnan ku e ta duna pa e sosiedat ku e ta biba aden parse manera
deskripshon ku e lo a usa si e tabata biba den nos sosiedat moderno awe (mira
espesialmente Mikeas 7:2-6): no tin niun hende piadoso; violensia i dramamentu di
sanger ta prevalesé tur kaminda, traishon ta reina entre amigunan, esnan mihó den
e pueblo ta manera un mata di sumpiña, esnan den poder ta aseptá plaka pasá bou
di mesa, huesnan ta korupto, tin konspirashon tur kaminda, bo no por konfia un
bisiña òf su amigu òf tin konfiansa den bo kasá, yunan ta den konflikto ku
mayornan, etsetera. Dios Su mensahe tin poder pa kura e relashonnan kibrá aki.
KOMENTARIO BIBLIKO
I. Loke Dios Ta Rekerí
(Repasá Mikeas 6:8 ku e klas)
E buki aki no ta skirbí solamente pa informashon; Dios Su Palabra tin poder pa
kambia su lesadónan. Mikeas ta lansa preguntanan hopi importante. Si Dios Ken E
ta—yen di amor, ta pordoná, ta miserikòrdioso, tin kompashon—ta kon nos por
agradá nos Dios? Kon nos por gana fabor dilanti djE? Dor di sakrifiká animalnan?
Dios no ta gusta ritonan, òf religion eksterno i formal. E ke mas. Akaso e ta pa
duna regalunan speshal? E ta pa sakrifiká nos yu ku a nase promé?
Apsolutamente nò! Asina, kon nos mester aserk’E? E kontesta kla ta wòrdu duna
den Mikeas 6:8: “El a mustra bo, O hende, kiko ta bon. I kiko ta loke Señor ta pidi di
bo? Pa aktua den forma hustu, pa stima miserikòrdia i pa kana humildemente ku bo
Dios” (NIV).
E tradukshon New Living Translation ta pone e palabranan aki asina: “Nò,
pueblo, Señor a bisa bo loke ta bon, i esaki ta loke E ta spera di bo: pa hasi loke ta
korekto, pa stima miserikòrdia, i pa kana humildemente ku bo Dios”.
Mikeas 6:8 ta e versíkulo di mas ekselente pa étika bíbliko i e ta deskribí e
berdadero estilo di bida Kristian. Pa por komprondé mas mihó loke Dios ta bisando
dor di Mikeas, nos tin ku sera konosí ku un rasgo krusial di pensamentu bíbliko
Hebreo.