Ordenanza fiscal n.º 6 - Concello de Monfero

ORDENANZA FISCAL NÚMERO 6
REGULADORA DA TAXA POR OUTORGAMENTO DE LICENZAS DE
APERTURA DE ESTABLECEMENTOS
Artigo 1.º Fundamento e natureza
En uso das facultades concedidas polo artigo 106 da Lei 7/1985, do 2 de
abril, reguladora das bases de réxime local, e de conformidade co
disposto no artigo 20.4.i) da Lei 39/1988, do 28 de decembro,
reguladora das facendas locais, este Concello establece a "Taxa por
outorgamento de licenzas de apertura de establecementos", que se
rexerá pola presente ordenanza fiscal, redactada conforme ao disposto
no art. 16 da Lei 39/1988 citada.
Artigo 2.º Feito impoñible
Constitúe o feito impoñible deste tributo a prestación dos servizos
técnicos e administrativos previos ao outorgamento da necesaria licenza
para a apertura de locais ou establecementos, calquera que sexa a
actividade que neles se realice.
Para tal efecto, terá a consideración de apertura:
a) A instalación por primeira vez do establecemento para dar comezo ás
súas actividades.
b) A variación ou ampliación da actividade desenvolvida no
establecemento aínda que continúe o mesmo titular.
c) A ampliación do establecemento ou calquera alteración que se leve a
cabo neste ou nas súas instalacións e que requira unha nova actuación
dos servizos municipais para a súa viabilidade.
d) O cambio de titular da licenza do establecemento.
Entenderase por establecemento industrial ou mercantil toda edificación,
construción ou instalación, así como as superficies, cubertas ou sen
cubrir, abertas ou non ao público, que non se destinan exclusivamente a
vivenda e que:

a) Se dedique ao exercicio dalgunha actividade empresarial, fabril,
artesá, da construción, comercial ou de servizos que estea suxeita ao
imposto sobre actividades económicas.
b) Aínda sen desenvolver aquelas actividades serven de auxilio ou
complemento para estas, ou teñan relación con elas de xeito que lles
proporcionen beneficios ou aproveitamento, como por exemplo, sedes
sociais, axencias, delegacións ou sucursais de entidades xurídicas,
escritorios, oficinas, despachos ou estudos.
Artigo 3.º Suxeito pasivo
Son suxeitos pasivos desta taxa, en concepto de contribuíntes, as
persoas físicas e xurídicas, así como as herdanzas xacentes, as
comunidades de bens e as demais entidades que, carentes de
personalidade xurídica, constitúen unha unidade económica ou un
patrimonio separado, susceptible de imposición; que sexan titulares da
actividade que pretendan levar a cabo ou que de feito desenvolvan, en
calquera local ou establecemento.
Artigo 4.º Responsables
1.-Serán responsables solidariamente das obrigas tributarias
establecidas nesta ordenanza todas as persoas causantes ou
colaboradoras na realización dunha infracción tributaria. Nos supostos de
declaración consolidada, todas as sociedades integrantes do grupo serán
responsables solidarias das infraccións cometidas neste réxime de
tributación.
2.-Os copartícipes ou cotitulares das herdanzas xacentes, comunidades
de bens e demais entidades que, carentes de personalidade xurídica,
constitúan unha unidade económica ou un patrimonio separado,
susceptible de imposición, responderán solidariamente e en proporción
ás súas respectivas participacións das obrigas tributarias de ditas
entidades.
3.-Serán responsables subsidiarios das infraccións simples e da
totalidade da débeda tributaria no caso de infraccións graves cometidas
polas persoas xurídicas, os administradores daquelas que non realicen
os actos necesarios da súa incumbencia, para o cumprimento das
obrigas tributarias infrinxidas, consentisen no incumprimento polos que
dependan deles ou adopten acordos que fixesen posible as infraccións.
Así mesmo, tales administradores responderán subsidiariamente das
obrigas tributarias que estean pendentes de cumprir polas persoas
xurídicas que cesasen nas súas actividades.

4.-Serán responsables subsidiarios os síndicos, interventores ou
liquidadores de quebras, concursos, sociedades e entidades en xeral,
cando por neglixencia ou mala fe non realicen as xestións necesarias
para o total cumprimento das obrigas tributarias devindicadas con
anterioridade a ditas situacións e que sexan imputables aos respectivos
suxeitos pasivos.
Artigo 5.º Base impoñible
Constitúe a base impoñible da taxa, a cota tributaria do imposto sobre
actividades económicas correspondente, sen reducións ou outras
bonificacións.
No caso de ampliacións, variacións da actividade ou outras alteracións, a
base impoñible constituiraa a cota tributaria do IAE que resulte como
consecuencia destas.
Artigo 6.º Cota tributaria
A cota tributaria será a seguinte:
a) Establecementos ou actividades para cuxa autorización sexa preciso
que polo órgano ambiental correspondente se formule unha declaración
de impacto ambiental ou de efectos ambientais, unha cantidade
equivalente ao 200 por 100 da base impoñible, é dicir da cota tributaria
do imposto sobre actividades económicas que corresponda.
b) Establecementos cuxas actividades se consideren molestas,
insalubres, nocivas e perigosas, unha cantidade equivalente ao 150 por
100 da base impoñible.
c) Os demais establecementos mercantís, industriais e comerciais, non
comprendidos no apartado anterior: o 100 por 100 da cota tributaria do
imposto sobre actividades económicas.
Para os establecementos ou locais que non tributen polo imposto sobre
actividades económicas, xa sexa porque se trate dunha actividade
exenta do pagamento deste ou ben porque tributen mediante outro
sistema ou modalidade, a cota que deberán satisfacer será de 20.000
ptas.
Se nun establecemento ou local que pertenza a un único titular se vai
exercer máis dunha actividade industrial ou mercantil, e polo tanto sexa
necesaria a obtención de varias licenzas e conseguintemente o
pagamento de distintas taxas de apertura, a cota que se deberá

satisfacer será a maior que corresponda, e aplicaráselle un recargo do
50 por 100.
No caso de desistencia formulada polo interesado con anterioridade á
concesión da licenza, as cotas que se deberán liquidar reduciranse ao 50
por 100, sempre que a actividade municipal se iniciase efectivamente.
A cota tributaria extinguirase por unidade de local.
Artigo 7.º Exencións e bonificacións
De conformidade co disposto polo art. 9 da Lei 39/1988, do 28 de
decembro, non se recoñece ningún beneficio tributario, agás os que
sexan consecuencia do establecido nos tratados ou acordos
internacionais ou veñan previstos nas normas con rango de lei.
Artigo 8.º Devindicación
Devindícase a taxa e nace a obriga de contribuír no momento de se
resolver o expediente; desde que o local ou establecemento onde se
vaia desenvolver a actividade se utilice ou estea en funcionamento sen
que obtivese a preceptiva licenza ou desde que se produza algunha das
circunstancias establecidas no número 2 desta ordenanza.
A obriga de contribuír, unha vez nacida, non se verá afectada, de ningún
xeito, pola denegación da licenza ou pola concesión desta condicionada á
modificación das condicións do establecemento, nin pola renuncia ou
desistencia do solicitante unha vez concedida.
Artigo 9.º Declaración
As persoas interesadas en obter unha licenza de apertura de
establecemento industrial ou mercantil presentarán previamente, no
Rexistro Xeral, a oportuna solicitude, coa especificación da actividade ou
das actividades que se han desenvolver no local, acompañada da
declaración dos elementos tributarios da actividade para determinar as
cotas do imposto sobre actividades económicas.
Se despois de formular a solicitude de licenza de apertura se variase ou
ampliase a actividade que estaba previsto desenvolver no
establecemento, ou se alterasen as condicións proxectadas por tal
establecemento ou ben se ampliase o local inicialmente previsto, estas
modificacións deberán poñerse en coñecemento da Administración

municipal co mesmo detalle e alcance que se esixen na declaración
prevista no número anterior.
Artigo 10.º Liquidación e ingreso
Finalizada a actividade municipal e unha vez ditada a resolución
municipal que proceda sobre a licenza de apertura, practicarase a
liquidación provisional correspondente pola taxa en función da
declaración que se indica no parágrafo anterior, que será notificada ao
suxeito pasivo para o seu ingreso directo nas arcas municipais, nos
prazos que sinala o Regulamento de Recadación e utilizando os medios
de pagamento que neste se establecen.
Unha vez fixada a cota tributaria do imposto sobre actividades
económicas, practicarase a liquidación definitiva que proceda, de cuxa
cota se deducirá a liquidada na provisional, e ingresarase a diferenza nas
arcas municipais ou devolveráselle ao interesado, se así procedese, o
exceso ingresado. A liquidación provisional elevarase automaticamente a
definitiva no caso de que non houbese diferenzas.
Artigo 11.º Infraccións e sancións
En todo o relativo á cualificación das infraccións tributarias, así como das
sancións que a estas lles correspondan en cada caso, estarase ao
disposto nos artigos 77 e seguintes da Lei xeral tributaria e na demais
normativa aplicable.
Disposición final
A presente ordenanza fiscal entrará en vigor o mesmo día da súa
publicación no Boletín Oficial da Provincia, aplicarase a partir do día 1 de
xaneiro de 1999, e permanecerá en vigor ata que se modifique ou
derrogue expresamente.
Publicación definitiva: BOP núm. 299, do 31-12-1998