Grace Links 32 - The Gospel Echo Ministry

GraceLinks Series # 32:
“They were Fruitful and Increased Greatly in Number”
“Amate Hau a, Nasia takin Pung Hi”
Text: “Israelte Egypt ngam Goshen ah teang a, amate hau in, pung ma ma uh
hi.” Genesis 47:27.
Joseph in a Suapuite Pharaoh taw Kimu Sak:
1. Joseph in a suapuite 5 teal in, Pharaoh taw kimu sak hi. (Gen 47:2)
2. Pharaoh in, “Bang na seam nu ziam” (v.3) a ci ciang Joseph hilhkholsa
(Genesis 46:33,34) bangin, “Ka pu ka pate bangma in tuucing ka hi uh hi,”
(Gen 47:3) ci hi.
3. “Canaan kialtun nasia lei a, ngantha natu mun om ngawl ahikom Egypt ah
hong peam (sojourn) khu hi. Goshen ah hong teang sak tan topa,” ci in ngen
uh hi. (v.4) PT kamciam se Canaan ahikom, Egypt ah ten sawm hi ngawl a,
a peam tu bek pai ahi hi.
4. Pharaoh in Joseph tungah, “Egypt ngam na mai ah om hi. Nang hong zuan
na pa le na suapuite Egypt ngam a hoih bel na – Goshen ah teang sak in. Na
muan a om le ka ngante uk suak sak in,” ci hi. (v.6)
Joseph in Pa Jacob le Pharaoh Kimu Sak:
1. Joseph suapuite le Pharaoh a kimu se “zumvai” - “official” hi a, Pa Jacob
taw a kimu se “aituam” - “private” le mealheak thu ahi hi. First Minister
ahi Joseph ii pa ahi kom in, Pharaoh in, “Na pa mu nuam khi hi,” a ci tha tu
hi.
2. Jacob se kumpi inn mu ngei ngawl ahihang, leitung kumpi sang alianzaw PT
taw a kizom tawntung pa ahiciang, leitung kumpipa mai ah ak-ngual ngawl
hi.
3. “Kumpipa na khansau ta hen! Nungta tawntung ta in!” (2Sam 16:16; 1 Ki
1:25; Dan 2:4) ci bang kammalte Jacob in zangh ngawl a, Jehovah PT
kamsangpa ahi bangma a khut lamto in Pharaoh kumpipa thupha pia hi.
(Gen 47:7)

4. Pharaoh in kum bangza pha ni ziam a ci ciang Jacob in, “Khualmi ka hi kum
130 pha hi,” ci hi. Jacob in ‘Kamciam Canaan’ le lua ma ma ngawl in,
leitung nuntak se khualmi – peamta ahi phawk hi. Ama lam-et se, Canaan
hi ngawl, van Canaan, PT khut taw a kivawt van khuapi ahi zaw hi. (Heb
11:13-16)
5. Jacob bangin khualmi ahi eite zong, ii lam-et lei hi ngawl, van ahi zawk hun
lam mangilh tha ba tawng!
Jacob Kum Za-le-Sawmthum:
1. Joseph ulian a sua lai kum 30 (Gen 41:46), anhau hun kum 7 (Gen 41:47-49)
le a ki-man-sa kialtun hun kum 2 (Gen 45:6) gawm leang Pharaoh le Jacob
ki mu lai Joseph kum 39 hi. Kum 130 pan 39 dok leang Joseph pian lai
Jacob kum 91 ahi hi. Joseph pian se Jacob Padanaram ah a om zawk kum 14
bo-kuan hi a, 91 pan 39 dok leang, Esau kita in, inn pan a tai lai Jacob kum
77 ahi hi.
2. Pu Abraham kum 175, Pa Isaac kum 180 nungta a, Jacob in apu apa banla
kisa in, “Khualmi ka hi kum 130 hi a, ka pu ka pa ka bat ngawl kawm pan
ka tuasia ma ma hi,” (v.10) ci hi.
3. Esau kita in Canaan pan Haran tai, Haran ah Laban in theam tawntung
ahiciang, Laban taisan in Haran pan Canaan zuan, Esau in Jacob thasawm in
ngalkap 400 taw muak, Canaan kialtun ciang Egypt zuan in tai laleau, Jacob
khan se thinngim takngimna vive – hi te theampo kei hong langdo siat hi ci
tu ngawl thudang a om bua hi. (Gen 42:36 cf. 47:9)
Israelte Nasia takin Pung:
1. Pa Jacob innkuan Joseph in Goshen ah teang sak a, anvaak (Gen 47:12) hi.
Goshen se tai 40 bang a sau Nile Delta leitang hi a, Egypt ah ngamhoih bel
ahi kom (Gen 45:10 cf. 1BC 464) thaw ankham na mun ahi hi. Neisa lamsa
hau a, a khanto bek hi ngawlin, mihing zong pung ma ma hi. (Gen 47:27)
2. Mihing pung ci se, “Minam lian kong suak sak tu hi,” ci-in Beersheba ah PT
ii Jacob a kamciam (Gen 46:3) ahizong, Abraham tungah kamciam (Gen
15:14 cf. 22:17) ahizong, Adam tungah, ‘Pung ta vun,’ ci thupha piakte
(Gen 1:28) ahizong Jacob innkuan tungah tung ahi hi.
3. Exodus 1:8 ah “Joseph a he ngawl kumpi thak khang ´ a ci se, Hyksos te
hun bo in ‘dynasty’ thak khat hong khang ahi hi.
4. Israelte khangto in Egypt ngam sung dim (Exodus 1:7) a ci se, Hebrews-te
tenna Goshen (Gen 47:11) ngam dim a son na ahi zaw hi.

Egypt Kial Joseph in DongHuu Seam:
1. Egypt ngam sum theam po Joseph in an taw theak a, tua sum theampo
Pharaoh kumpi in nga hi.(v.14)
2. A kum kik ciang Egypt ngam nganno theampo Joseph in an taw theak hi. A
ngannote aneite ma in keam sak a, ngan-an Joseph in pia hi. (vs. 16,17)
3. A kum kik ciang Egypt te in, “Ka leitang uh le ka pumpi bek ma om lai hi
hong lei tan,” a ci ciang, leitang le Egypt mi theam po Joseph in Pharaoh a
tu lei hi. (vs. 18-20)
4. Vaihawm ol tu in khuano mite ansaal om na khuapi sung zuan sak hi. (v.21)
5. Thiampite se kumpite in upat pia hi. Hyksos kumpite in zong thiampite
langdo ngawl a, Joseph in Egypt thiampite a thusim ngawl hangin, kumpite
zataak bangin thiampite leitang laksak ngawl hi. (v.22) Ta sia ngeina in
kizangh top hi.
6. Lo pan an piang 20% se Pharaoh in nga a, 80% lotho te in nga hi.
Jacob Thi-na le Egypt ah Anuntak Kum 17:
1. Jacob se Egypt a ten zawk kum 17, ama kum 147 a phak dong nungta hi.
(v.28)
2. Ano pan tangval dong Canaan a ten kum 77, Padanaram ah kum 20, Canaan
ah kum 33 a ten kik zawk ciang, Egypt zuan a, Egypt ah kum 17 teang hi.
3. Jacob a thi nai ciang Joseph sam a, “Egypt ah hong phum heak oo, ka luang
hong pua in, ka pu ka pate taw hong sial khawm to,” a ci se, Canaan se
‘Kamciam Ngam, Egypt se tawmvei peam na mun bek hi a, asuan, apaalte
Canaan ngam ah cia kik tu ci PT kamciam phawk nginge hi. (v.30)
Joseph ii Kamciam Piak Jacob Lungkim:
1. Joseph in, “Pa, kumpi thu le la, buaina tatuam om si, ka komlak ka manlak
taw, kei zong ka luanghawm ii mipuite Canaan a zot ciang puak sak sawm
lel meak veang (Gen 50:25), ii pata luang pua khawm sak lel leang na lung a
kim nap bua ziam maw ci se ngawl in, “Na ci bangin kong vawt tu hi,” ci pai
hi. (v.30)
2. Jacob in, “Kiciam in,” a ci ciang Joseph kiciam hi. Tase ciang lu-thung
sang ngaa in, ciangkhut tungah ki-ngaam kawm in, PT zataak piakna le
lungdam ko-na nei hi. (v.31) Jacob pu-huai kum 147 pha in a thi tu ciang,
Egypt taw lungkim ngawl in, Canaan ma ci vinven a, TOPA lungdamko in
PT biakna nei va leng ka ngaisut ciang, “Hong it zaw ing – More love to
thee,” la ka phawk san a, Jacob tungah ka bul hi.

“Ka husan-na tawp dong, Hong pok lai tong; Kikhen laitak in zong, Hong
pok lai tong; Tua-ma hong nge-ngen tong, Hong it zaw ing, Topa; Hong it
zaw ing, Hong it zaw ing,” ii thi nai ciang, Jacob taw hi la ii sa khawm batu
ziam
3. A thuzawp huai, ta-ciim Joseph le PT zakta Pa Jacob hang in TOPA in Israel
innkuante nei le lamh taw thupha pia in, pung sak hau sak in hi. Israel mi
pung in Egypt ngam dim sak hi. Tua thupha se nu le pa thuniitna, PT
zataakna pan hong pai hi ci in ka ngaisun hi.
4. Ta bang thupha a san kawm pan, Joseph le Jacob te in simlei thupha
sangin, van thupha, Canaan sangin van Canaan thinbot zaw tawntung uh hi.
Eite zong Canaan maw, van Canaan – simlei thupha maw, van thupha; simlei
ah zawngkhalna thuak ka leang, hau ka leang, van hau na mitsot zaw in,
sawltak Paul bangin hau dan thiam, zawn dan thiam (Philippians 4:12,13) in,
Israel innkuan thupha a pia TOPA in ii tan tek tu thupha hong pia ta hen!
Amen.