ANTONI PIREDDA - REMUNDU PIRAS

ANTONI PIREDDA - REMUNDU PIRAS
Sadali, su 6 de Santu ’Aine de su 1974

Sadali 1974 ANTONI PIREDDA- REMUNDU PIRAS
2

ESÒRDIU
1. Piredda (1’06”)
Sàdali, fimis da tempus atesu
chi eo no bos aia visitadu.
De cantos anno che at passadu in mesu
de su contu mi so ismentigadu.
E dadu chi ocannu mi as pretesu
eco ch’in sinu tou so torradu
pro bos nd’atire in forma ispecïale
unu friscu saludu autunnale.
2. Piras (1’15”)
Fin bator’annos, de sas galas fora,
chi non b’aia cantadu piusu.
E-d-est ispantu si m’agato ancora
ca fin po mi ‘etare terra susu.
Tue ca l’as ischidu a s’ùltim’ora
in su programa tou m’as inclusu.
Ma da chi ‘e ch’’enner torra as tentu fide
un’àteru saludu aggradesside.
3. Piredda (52”)
In-d-una note cumposta ‘e fritura,
Sàdali, ses inoghe reunidu.
A mi nd’’atire a s’edade madura
narade chie bo l’at suggeridu.
Cando ch’apo cantadu in gioventura
mi azis iscultadu e cumpatidu.
Como cun sa matessi gentilesa
m’azis a cumpatire a sa ‘etzesa.
3

Sadali 1974 ANTONI PIREDDA- REMUNDU PIRAS
4
4. Piras (53”)
Però intantu no lis racumando
e ne cumpatimenti lis fentomo.
Tantu goi so ‘énnidu da domo:
goi so ‘énnidu e goi mi ch’ando.
A tie si t’an cumpatidu tando
ti poden puru compatire como
ma però deo no lis naro gai
ca no mi devo compatire mai.
5. Piredda (55”)
Remundu, de sas galas no ses nou
ca oramai connosches dogn’usu.
In dogni palcu deves dare prou
cando ‘e sas tàulas ti che ficas susu.
Chie faghet su piaghere sou
nachi campat chent’annos e piusu.
E si a tie géniu no faghet
lis podes narrer su chi ti piaghet.
6. Piras (49”)
Chi chelza cumpatidu ja bi creo
po no che ruer intro sos abbissos:
tenen de cumpatire sos permissos
però a contrafoltza no los leo.
Si cheren cumpatire l’’iden issos,
no b’at bisonzu ‘e lu pretender deo
(ca) no mi piaghet, no, a narrer goi:
pagadu primu e cumpatidu poi.

7. Piredda (53”)
Remundu Pira, prite a boghe in tronu
paret ch’apas s’idea ‘e cumandare?
Ma su meu est divesciu s’arrejonu
e lu deves cun calma analizare
poite chie cheret su peldonu
mi’ ch’est dovere de lu domandare.
Fingi chi sa domanda no bi esseret,
tando custu peldonu no nde cheret.
8. Piras (49”)
Sì, deo no mi chelzo peldonadu
e no domando cosas a s’indonu
tantu ja m’an intesu e cumproadu
e ischin si so malu o si so bonu:
ma nara, a lis pretender su peldonu
dae primu ‘e fagher su pecadu.
Po como sa domanda no l’ispreco,
ja m’an a perdonare a da chi peco.
9. Piredda (52”)
Remundu, léadi unu puntu fissu
e faedda che ómine assennadu.
Mi’, su dovere sou l’ischit issu
si lu at po su bonu bideadu,
ma no s’agatat ómine criadu
chi no apat su pecadu cummissu.
Pecados nde capìtat in totue
e bi podes pecare finas tue.
ESORDIU
5

Sadali 1974 ANTONI PIREDDA- REMUNDU PIRAS
6
10. Piras (58’’)
Ma deo no mi chelzo peldonadu
chen’aer fatu pecu, deves crêre.
Davìde su peldonu at domandadu
da chi . . . . . . . sa muzere,
tando cunfusu e totu umiliadu
cumpostu at su salmu ‘e Miserere.
E a su peldonu cun Deus s’est frimu:
però at fatu su pecadu primu.
11. Piredda (56”)
At s’argumentu divesciu arrejonu,
po chie at sa lughe ‘e s’intelletu.
Remundu, no ti fetas su padronu
ses tue puru umanu mansuetu
e s’apo antizipadu su peldonu
puite a sos pecados so suggetu.
E tue ti cres ómine maduru
e ses suggetu a pecare tue puru.
12. Piras (51’’)
Ma deo a su peldonu so contràriu
e no bi lis domando po favore.
Isco chi so un’ómine minore
e unu pagu rivolutzionàriu:
non so de fronte a unu cunfessore
cunfesséndemi in su cunfessonàriu.
Sì, chena perdonare ja mi ch’ando
però peldonu no nde lis domando.

13. Piredda (53”)
Remundu, est a ti fagher pagu onore
ca no mi paret rejone detzente.
Pensa chi ses un’ómine mazore
de fronte a unu pópulu imponente:
si su pópulu est su cunfessore
pensa chi tue ses su penitente.
De su peldonu si no t’interessas
nara puite tando ti cunfessas.
14. Piras (1’00”)
Ma no mi so nemmancu cunfessende
ca chena cunfessare ja m’imbaro.
(E) Si so calchi pecadu cumbinende
pecadore ja no mi dispiago:
deo ja so superdu, e mi cumprende,
e de pecados mios no nde naro.
(Ca) Cunfesso solu su pecadu meu
da ch’ando a cuddu mundu ‘e fronte a Deu.
15. Piredda (54”)
A ite ‘alen sas rejones tuas?
Est una parte fràgile e romasa.
E po chi in su perìgulu no ruas,
fàghelu oe e no b’istes a crasa.
Prite Remundu, si pecados asa,
comente naras tue ti los cuas?
Nara de custu pópulu a preséntzia
chi tenes sempre bruta sa cusséntzia.
ESORDIU
7

Sadali 1974 ANTONI PIREDDA- REMUNDU PIRAS
8
16. Piras (54”)
No, chi cunfessan cuddas femineddas
sos pecadeddos chi faghen in domo.
E naran a su predi maggiordomo:
peldònanos po custas cosigheddas.
Deo no mi las baltzo sa munneddas
Coment’e-i sas féminas de como.
Nât su diciu: pecadu cuerradu
est agiummai mesu peldonadu.
17. Piredda (55’’)
S’argumentu at diferente pannos,
lu giudichen sos bonos pensadores,
ca sos chi andan a sos cunfessores
an in s’ànima insoro pena e dannos.
Si cunfessan sos pecados minores
e si costoin sos pecados mannos,
oltres chi no est bonu unu devotu
cussu at leadu in giru a isse etotu
18. Piras (50”)
Eo in su cunfessare no bi creo
e a sos cunfessores naro nono.
Mancari chi mi nelzat: ti peldono
cussu peldonu no mi che lu leo.
Sos consizos de issu ja abbandono
ca tantu est un’ómine che deo:
de fronte a Gesucristu crocifissu
cantu bi poto deo podet issu.

19. Piredda (56”)
A ti remediare pone cura,
Remundu Pira, bógache ogni rusa.
Nois semus cantende in sarda musa,
est de sa poesia s’aventura
e si faghes brutìssima figura
no est dovere domandare iscusa?
Si no damandas peldonu a su dannu
tando ses unu tropu faci-mannu.
20. Piras (59”)
(Ma) Su peldonu no contat palte mia
e in custos peldonos no be-i creo
ca mi cunfesso cun Deus ebbia,
cun tegus cunfidéntzia non leo
ca su pecadu meu l’isco deo
e devet bistare intro s’ànima mia.
(E) Si mi cunfesso a Deus po favores
no chelzo che a mie pecadores.
21. Piredda (55”)
Ja ses a gira-gira e cola-cola
po costoire su pecadu feu.
Remundu, ‘e sos pecados si ses reu
imbenùjati a denanti ‘e s’istola
e no nelzas chi lu naras a Deu
ca no fizis cumpagnos de iscola.
Ca si sighis cun custa retentivas
no isco a ue est Deu si bi arrivas.
ESORDIU
9

Sadali 1974 ANTONI PIREDDA- REMUNDU PIRAS
10
22. Piras (48”)
(Ma) Cussu est divescia cosa est un’ammissu,
e ch’est lontana cussa cungentura.
Deo m’apo leadu su permissu
a criadore ca so criadura.
No bando a bi lu narrer in procura
ne racumando a mi lu narrer issu.
In Deu so católicu e bi creo
ma sos pecados mios los nar”eo.
23. Piredda (52”)
Che ses bessende dae sa chesura
cun ispìritu ‘e contraditzione.
It’est de peus, dabbi atentzione,
no ti lu lese a bufonatura.
Nachi no ti cunfessas in procura
e da poi no b’andas in persone.
Ispiégalu in peraulas jaras:
tando ‘e cale manera bi lu naras?
24. Piras (44”)
Deo li naro: “Deu, apo pecadu
e juto, inoghe, in s’ànima una nue.
Tue m’as bidu ca ‘ides totue
puite m’asa fatu e m’as criadu”.
Tue ti cheres ponner s’avocadu
ca no ses bonu a bi lu narrer tue.
E a s’ora ja pagas su pedale
ma tantu cuddu bi lu narat male.

25. Piredda (56”)
Ello, Remundu, prite as cambiadu?
Mi’ ch’iscultende sunu unu fiotu.
In custa vida su pius bonu e dotu
no este moltu sentza aer pecadu
poi no m’apo postu un’avocadu.
ja mi so cunfessende deo etotu.
Cun laras mias sa ‘uca l’abbelzo:
avocados perunos no nde chelzo.
26. Piras (37”)
Bene o male chi ti nde ses torradu,
mancar’a taldu arrivas a igue.
Primu a mi cunfessare m’asa nadu
ca satzeldotes bi nd’at in totue
ma a pena ch’as intesu s’avocadu
como naras chi bi lu naras tue.
Tando po galantómine ti leo
s’est chi lu naras e faghes che deo.
27. Piredda (48”)
Forsis, Remundu, m’as male cumpresu,
no nd’isco a ue cheres arrivire
ca un’isbagliu podet sutzedire:
de sos errores vivimos in mesu.
E s’apo nadu a mi cumpatire
mi’ chi no apo avocados pretesu
e no so arrivadu a cussu puntu
ca s’avocadu tue l’as aggiuntu.
ESORDIU
11

Sadali 1974 ANTONI PIREDDA- REMUNDU PIRAS
12
28. Piras (43”)
Ma deo no nde poto ‘ogare pese
si tue naras gai tale e cale.
Deo apo nadu: a bisu chi mi crêse
ch’ando a impignare unu legale.
O est deo ch’apo cumpresu male
o tue ispiegadu non ti sese:
tando ti poto narrer a congruos
chi sa culpa l’at unu ‘e nois duos.
29. Piredda (41”)
Non ti naro: ses faeddende male,
però devias cambiare istile.
Si che a mie fis bistadu umìle
no aisti chilcadu su legale
ca no b’intrat su códice penale
e ne b’intrat su códice civile
e ne b’at palte sa giurisprudéntzia:
bi est solu sa lughe ‘e sa cusséntzia.
30. Piras (41”)
(Beh) Tue mi ses faghinde unu regalu
e no mi paret, no, tantu deghìle.
Ne códice penale ne civile
t’apo tzitadu, mi’, po aggualu:
tue ca como ses in logu malu
che cheres cambiare su cuile.
Invece deo, mi’, no fato gai:
o bonu o malu no cambio mai.

31. Piredda (52”)
Su paragone chi as batidu a galu
no ti nd’apo cumpresu sa rejone.
As betadu faeddos de regalu
però sentza bi dare atentzione
e chi m’agato deo in logu malu,
Remundu, est una tua illusione.
No mi che altzo e ne pigo a sa nue
ma so in logu ‘onu cant’e tue.
32. Piras (40”)
Eo ammito chi ses in logu ‘onu:
in logu ‘onu no agatas dannu.
(Ma) Pone su peldonare in abbandonu,
no nelzas sa cantone ‘e totu s’annu
proite a domandare su peldonu
mi pares finas mesu facimannu.
No lu domandes gai a modu frimu:
po chi no peches pensabbe-i primu.
33. Piredda (55”)
S’arrejonas cun ànimu giocundu
nde dên gustare totu su sabore.
Tue ch’arrejonende ses profundu
nde dias aer méritu mazore
ca dogni esser chi naschet in su mundu,
jà l’ischis bene, est suggetu a s’errore.
E chie tenet memória frima
mi paret bene a bi pensare prima.
ESORDIU
13

Sadali 1974 ANTONI PIREDDA- REMUNDU PIRAS
14
34. Piras (52”)
(Ma) Tue ponner mi cheres in intrigu
e no mi pares cristianu ‘onu.
Pone su peldonare in abbandonu
e a su bonu sensu sias amigu:
no deves domandare su peldonu
si lu as meritadu su castigu.
Nara goi: perdonos no nde brago,
si deo l’apo fata‘eo la pago.
35. Piredda (54”)
Si mi faghes girare a pena ‘e fogliu
ma rispóndemi cun seriedade
ca ses fatende unu sacu ‘e degogliu
sentza b’aer peruna calidade.
Tue chi ses superbu amas s’orgogliu
mentres deo m’abbratzo s’umiltade.
E a l’ischis chi s’umìle ómine ‘onu
sentza pecare domandat peldonu.
36. Piras (45”)
No, chi deo so sempre impenitente:
peldonu no nde chelzo fentomare.
So ‘énnidu a inoghe po cantare
e canto cun sa limba e cun sa mente.
Tue pretendes de ti peldonare
tant’e frigare tota custa zente.
Però deo lis naro chi ti sonen,
si cantas male chi no ti peldonen.

37. Piredda (44”)
Para s’orija, iscùltami e cumprende:
cun megus no faeddes a casaciu.
Si pones fogu bi ponzo ghiaciu
ca sa calura nde so istudende.
Si dogni isbagliu chi faghes cantende
ti aèrana dadu unu rinfaciu
faghisti una figura tropu mala
e no dias finire custa gala.
38. Piras (49”)
(Ma) Deo chelzo a mi dare unu rinfaciu,
peldonu no nde chelzo po niente.
Ma tue ses unu pagu bucaciu
chi mi ses ofendinde veramente.
No este po ti dare un’istrapaciu,
però po faeddare seriamente.
Deo cumprendo totu a una pija,
no b’at bisonzu ‘e parare s’orija.
39. Piredda (54”)
Sos paragones chi ‘ogas a pizu
ti ponen sa morale a su bersagliu.
Cun-d-una limba a dópiu tagliu
de su perdonu no tenet disizu.
No bi nd’at unu chi no at s’isbagliu
ne unu chi no chelfat su consizu.
Solu Remundu tenet cussos lizos:
no cheret ne peldonu e ne consizos.
ESORDIU
15

Sadali 1974 ANTONI PIREDDA- REMUNDU PIRAS
16
40. Piras (53”)
(Ma) Deo da te no nde chelzo ‘e consizos
ca ja isco isbagliare solu-solu.
Però si peco e ti fato fastizos
non chelzo de su pópulu su dolu.
Ma tue paret ch’epas oriolu,
as de ti peldonare contivizos.
Po cussu impìgnadi a no sbagliare
cantu t’impignas a ti peldonare.
41. Piredda (41”)
Allu chi ses un’ora tichi-taca,
como bastante ti ap’iscultadu.
A su collega chi tenes afaca
prim’’e totu l’as tue rifaciadu
e s’apera peldonu domandadu
tue ite b’as postu dae busciaca?
Duncas, sa limba manténela in pasu,
no fetas mai de su ficanasu.
42. Piras (49”)
(Bah) Como nachi so sempre tichi-taca
ca m’’ides che atocadolza tocheddende
e ti dispiaghet a m’’ider afaca,
ma deo no ti so rimproverende:
anzis ti lu so nende cun fiaca
e mi pares guasi arrabbiende.
Canta che deo dulche, ista masedu:
essende ‘inu no sias aghedu.

43. Piredda (41”)
A lu lassas, Remundu, su meledu
e arrejonas pius genuinu.
Fato s’areste e fato su masedu
segundu a chie bi tenzo a vicinu:
si cheres binu m’agatas in binu,
cheres s’aghedu, m’agatas s’aghedu.
Eo so sempre cuddu, cunsidera,
duncas m’agatas de ogni manera.
44. Piras (40”)
Ma deo ista seguru no m’atzufo,
no apo mancu mustradu s’ispada
tantu chi bene e male ja m’iscufo:
perìgulu de morrer no bi nd’ada.
Deo si ti faghes binu ti che bufo,
si ses aghedu t’uso a s’insalada.
Aghedu ativu o sias binu cotu
ista seguru ja ti trato etotu.
45. Piredda (50”)
Cand’a cantare ti nde ficas reu,
unu pagu ‘e cómicas propagas
po diveltire su pópulu intreu
e cun cussas bessidas los apagas.
Però no toches de su ’inu meu
ca si nde bufas meda t’imbreagas.
E si ses cotu, si podet ischire,
mancu sa gala no as a finire.
ESORDIU
17

Sadali 1974 ANTONI PIREDDA- REMUNDU PIRAS
18
46. Piras (51”)
Deo pudo sa ‘ide a oju ‘e baga,
per’Antoni no chelzas tantu frìere
chi tantu deo ja so bonu a bìere
e de su ‘inu paura nd’apo paga.
A boltas a coricori fato rìere
a boltas ponzo su didu in piaga.
E tando a chie toco no si franghet
ca a boltas riet a boltas pianghet.
47. Piredda (52”)
Sos paragones chi cheres descrìere
no isco a ue los cheres annànghere.
Però Piredda ti lu faghet bìere,
da sos perìgulos si podet frànghere.
Si cherzo deo no mi faghes rìere,
si cherzo no mi faghes a piànghere.
Da chi sa palte mia si che toltat
de su póddighe tou no m’impoltat.
48. Piras (46”)
(E) Ja l’’ido chi ti ses faghinde mannu
e mi ses nende: deo no ti timo.
Ista seguru chi no ti soprimo
e ne ti chelzo in pena e in afannu:
deo ti jogo e no ti fato dannu,
no ti matano ca meda t’istimo.
Però a su mancu rispetu mi uses:
si no ti toco, mi, no ti nd’abbuses.

49. Piredda (52”)
Remundu, si ti nd’altzas a sa rea
comente ses poeta forte e prode
ma tue etotu a ti dare sa lode
mi diat parrer una cosa fea
e si as de jogare sa ‘idea
bae e giógadi cun calchi nebode.
Però Piredda est pius colossale
e si jogas cun megus giogas male.
50. Piras (41”)
(Ma) Tando ti ses boltende mesu in ira,
naras chi eo mi so dende lode.
Però so che un’ànghelu costode
e no ti chelzo jugher tira-tira:
dadu tue Piredda e deo Pira,
mi’ ch’aggiumai ja mi ses nebode.
Unu nebode mi paret Piredda
puite est una pira minoredda.
51. Piredda (48”)
Deo bi miro sa variedade
ma a su chi naro pénsabbi e atua.
Sa pira naro cun seriedade
comente naschet in punta ‘e sa frua:
sa mia est minore ‘e calidade
ma però no est fiza ‘e fiza tua.
Sa pira mia, siat fea o bella,
no bi passat peruna parentella.
ESORDIU
19

Sadali 1974 ANTONI PIREDDA- REMUNDU PIRAS
20
52. Piras
(No) Sa pira tua at diversu sabore,
. . . . . . . . . . . . . . . . . .
. . . . . . . . . . . . . . . . . .
. . . . . . . . . . . . . . . . . .
. . . . . . . . . . . . . . . . . .
. . . . . . . . . . . . . . . . . .
Àlvures innestadu at una chedda
ma est sempre bessida una piredda.
53. Piredda (42”)
Como as abbeltu un’ateruna janna
chi m’at postu unu pagu in bonumore.
As chilcadu su tou genitore
e as a babbu meu postu in canna:
isse innestadu at una pira manna,
babbu innestat una pira minore.
Ma però s’àlvure est bene frunida
e da poi est pius saborida.
54. Piras (43”)
(No) Tue ti das su ‘antu ‘e su sabore,
ma deo no ti dao sos persmissos.
Babbu tou no fut innestadore
e no at postu sos ispicos fissos.
Como po pregontare su sabore
proa, Piredda, e domàndalu a issos.
No ti la ‘oghes tue cussa grida,
narabbilis si issa est saborida.

55. Piredda (52”)
Ja ses Remundu cadredda cadredda
intro ‘e s’ou chilchende su neu.
Mi’ chi su frutu mi l’at dadu Deu
o siat manna o siat minoredda
e ringràtzio sempre a babbu meu
prite innestadu at custa piredda.
Ma est piredda chi at folte sa sanna
ch’’atit marranu dogni pira manna.
56. Piras (46”)
(Ma) Cussu lu cantas tue nende osanna
però as isparadu una caltucia.
Una pira minore po cundanna
at solamente ‘e pulpa una cosucia
puite at ossu meda e tropu bucia
no podet giugher pulpa che-i sa manna.
Est una pirighedda intro ‘e saltu
chi aggiumai est che-i su piraltu.
57. Piredda (49”)
Po su piraltu càgliadi a sa muda,
igue b’at un’àtera istrutura.
Ma sa pianta ‘e sa pira fozuda
comente l’at criada sa natura
Piredda est una pira minuda
e tue ses una pira madura.
Como tocat a tie a ti detzìdere,
chi ses pira madura faghe bìdere.
ESORDIU
21

Sadali 1974 ANTONI PIREDDA- REMUNDU PIRAS
22
58. Piras (46”)
(Ma) Tue ja cheres a ti lu mustrare
ma deo no nde mustro ‘e seguru.
Antzis penso ‘e mi la minimare
po mantenner sos ojos a s’iscuru:
da chi sa mia est pira ‘e mandigare
l’ischis, Antoni meu, tue puru.
Est po puntiglia chi non ti piegas
puite l’ischis però ti nde negas.
59. Piredda (49”)
Cand’abberis sa ‘uca s’Elicona,
dognunu devet esser soddisfatu.
Ajò, Remundu, benimus a patu
po cumprender sa zente ‘e custa zona:
si tue tenes una pira ‘ona
fàghela ‘ider subra su piatu.
Prite si l’asa e si no l’aciapas
est su matessi che cando no nd’apas.
60. Piras (55”)
(Ma) Comente cheres a la fagher bìdere?
Deo ti l’apo dada e presentada,
e pira sempre totu l’an giamada:
dae sa pira non podet devìdere
e ne b’at peruna cosa e mi nde impìdere
ca est sempre comente mi l’an dada.
(E) Lu poto narrer cun benigna mira
prite no est piredda chi est pira.

61. Piredda (52”)
Deo no chelzo fagher s’arrogante
però nd’apo cumpresu s’importàntzia.
Si tue ses una pira zigante
preséntala in custa circustàntzia
ca s’est madura e-d-est pius pesante
nde deves aer de pius sustàntzia.
Mentre mi paret chi a sas piras tuas
istanote li mancan totas duas.
62. Piras (52”)
(No) Est una sola pulida e bianca,
pira innestada e non pira ‘e saltu,
e l’apo presentada a facia franca
e sempre ch’est altzada in altu in altu.
Tue, Piredda, si mustras in banca
mandighende la lean po piraltu.
E no l’atzetan mancu a sos invitos
si ja no bi nde papan sos oritos.
63. Piredda (50”)
Remundu Pira, che sardu cantore
abbratza sa rejone decorosa.
Si tue as una pira pesosa
devet aer a dópiu valore,
ma deo ch’apo una pira minore
mi’ chi sa zente isetat paga cosa.
Tue po fagher s’interessu própiu
bisonzu chi lis rendas a su dópiu.
ESORDIU
23

Sadali 1974 ANTONI PIREDDA- REMUNDU PIRAS
24
64. Piras (46”)
Ma no creo sa zente chi amminetat
ne ti domandan meda in modu duru.
Tue chi ses Piredda ses seguru
e obbietzione no si fetat.
Ses pira minoredda e pagu isetat
cussu ja lu ses nende tue puru.
Tzeltu chi contu tue ti nde rendes:
chi pretèndene pagu lu cumprendes.
65. Piredda (51”)
Dae ch”essire dae sa mesura
un’arrejonu chi est pagu tzivile.
Ja chi de pira as chiscadu s’istile
as ingannadu finas sa natura
ca nachi aisti una pira madura
ch’arrivaiat a su campanile.
Como sa pira tua in-d-una gherra
si chi este cuende suta terra.
66. Piras (40”)
(E) Como mi ses guasi amminetende
d’esser prontu a dichiarare gherra.
M’as nadu so cuadu suta terra,
tzeltu cuss’ora la ses isetende
però a la segare perra-perra
mancari boriosu ses timende.
Pone mente e a mie ti piegas
ca mancari m’iscudas no mi segas.

67. Piredda (44”)
Pensa de mesurare ogni faeddu:
eo so calmu, non so furibbundu
poite ap’assennadu su chelveddu
no b’intro prima e mancu su segundu
e a segare sa pira ‘e Remundu
no b’at bisonzu ‘e leare s’’ulteddu
ca si l’iscudo cun duos matones
deo la fato in bator cabones.
68. Piras (41”)
Como m’as nadu: medi ogni faeddu,
comente chi no sia mesuradu.
Tue ti ‘antas chi ses assennadu,
chi nachi jughes sale in su chelveddu,
ma tue ses Piredda e ses piseddu
ca pagu sale in conca t’an betadu.
Inoghe andat bene chi mi pìtighes
ma contra su merìtu no mi crìtighes.
69. Piredda (52”)
Ajò, Remundu, no faeddes male,
faghe de mi cumprender sa manera.
Deo no chelzo esser triviale
ca no penso sa cosa a sa lezera
e nisciunu t’at faeddadu ‘e sale
ca che l’apo lassadu in sa salera.
Ma l’isco a caligunu nde bisonzat
e inue bi nde cheret si nde ponzat.
ESORDIU
25

Sadali 1974 ANTONI PIREDDA- REMUNDU PIRAS
26
70. Piras (41”)
(Ma) M’as nadu a cantare misuradu
e deo sa mesura no mi leo.
Poi m’as nadu chi fus assennadu:
chi fias assennadu ja lu creo.
Deo so gai mesu isconchiadu,
coment’’enit su tempus mi lu leo.
Però a malu puntu no mi ‘atas
e si so isbagliende mi cumpatas.
71. Piredda (52”)
A ite puntu che ses arrividu,
ca isetende ti fia inie.
Ell’a ite arrejonas de gasie,
Remundu, ite sa mente at favoridu,
si non cheristi a cumpatire a mie
como ti cheres tue cumpatidu?
Sa vena ti at fatu giru brutu:
in su ch’as criticadu che ses rutu.
72. Piras (46”)
Deo apo nadu a no esser severu
e mancu a mala ‘oza mi amminetes.
Si ses gelosu chi tenzo un’imperu
no dia cherrer chi mi nde lu ‘etes.
Tue chi ses católicu e sintzeru
custu tortu a Remundu no li fetes.
Tantu ‘io chi ses ómine ‘onu,
iscusa si domando su peldonu.

73. Piredda (53”)
Fatèndend’una calda e una frita
pensat niunu chi no faghet dannu.
Ma sa rejone ja l’amus descrita
sentza bi ponner s’umbra de s’ingannu.
Tue, Remundu, as un’imperu mannu
e Antoni Piredda una tanchita.
Da chi su pagu ch’apo no dissipo
de s’imperu ‘e Remundu mi nde impipo.
74. Piras (41”)
(Sì) Nàralu forte e impipadinde,
eo ja l’ido, ti nde ses impipende.
Cussa tanchita chi ti ses serrende
b’istan sos pes a pena, abbizadinde,
e deo rosighende-rosighende
a unu zero la so reduinde.
Bi podes piantare una chibudda,
a pag’a pagu no bi restat nudda.
75. Piredda (1’00”)
Cando faeddas de mala manera
d’illusu das s’idea miserina.
As un’imperu sentza frontiera
e no l’impedit peruna marina.
Ti contas una rica miniera
e a boltas no bi as mancu sa chijina.
E-i cussa sos imperos chi disizan
unu ‘e cussos a tie assimizan.
ESORDIU
27

Sadali 1974 ANTONI PIREDDA- REMUNDU PIRAS
28
76. Piras (38”)
Abbàidadi como, a sos congluos
ses arrivadu a mi narrer illusu.
Domanda custos chie ‘e nois duos
illusione nde at de piusu.
Però tue nd’as fatu usu e abbusu:
no t’abbizas de sos difetos tuos
ca cantende t’impompas de gosie
e poi illusu lu naras a mie.
77. Piredda (54”)
M’ana nadu s’esórdiu a finire,
e-i sa fine l’ap’a fagher deo.
Sun bugligheddas, podides ischire,
no si peldet perunu galateo.
Su chi tenz’eo no t’apo a tzedire
e de su chi as tue non ti leo.
O pagu o meda nde apat dadu Deu,
tue as su tou e deo su meu.
78. Piras (47”)
(Beh) Tando finimos de currer su palu,
però deo mancu e drestu so.
Est culpa tua si mi faghes malu:
tando ti naro, Piredda, chi no.
Ti poto tzeder cosa ‘e regalu
ma a mala ‘oza, mi’, no ti nde do.
Ca Deu po natura m’at fatu gai:
a mala ‘oza no nde tzedo mai.