Konsellu Seguransa - Unmit

64. Haree ba UNMIT ninia misaun ne’ebe atu ramata iha 2012 nia rohan, ha’u hakarak hahi’i
progresu kontínuu ne’ebe halo iha prosesu tranzisaun konjuntu. Iha kontestu ida-ne’e, ha’u fó
benvindu ba esforsu ne’ebe Misaun ne’e halo atu hasa’e ninia pesoál nasionál nia koñesimentu,
liu hosi programa kapasitasaun no formasaun integradu. Maski nia tenke foka ninia atensaun
atu kompleta iha 2012 servisu ne’ebe prevee iha ninia mandatu, UNMIT tenke halo mós esforsu
paralelu atu asegura katak funsaun ne’ebe nia hala’o daudaun no ne’ebe bele nesesáriu bainhira
nia ramata tiha ninia misaun, transfere ba Estadu nia instituisaun sira ka entrega ba parseiru
bilateral no multilateral sira ka ba Ekipa Nasoens Unidas nian iha país ne’e ka entidade sira
seluk atu kaer. Kona-ba ne’e, presiza halo implementasaun efetiva ba Planu Tranzisaun
Konjuntu, akompañadu ho revizaun regular, atu asegura katak nia responde duni
dezenvolvimentu sira ne’ebe akontese iha terrenu, no tenke sai hanesan prioridade xave ida ba
UNMIT, Governu no parte interesadu sira iha períodu oin mai. Ha’u hein katak objetivu sira
ne’ebe Planu Tranzisaun Konjuntu bele alkansa to’o 2012 nia rohan sei halo influénsia ba
desizaun finál kona-ba natureza no dimensaun Nasoens Unidas nia engajamento iha Timor-
Leste.
65. Haree katak iha nafatin nesesidade atu simu UNMIT nia apoiu iha área prioritária sira
ne’ebe prevee iha ninia mandatu iha períodu oin mai, liu-liu apoiu atu halo tan PNTL nia
kapasitasaun no dezenvolvimentu institusionál no asiténsia kona-ba eleisaun, ha’u rekomenda
atu hanaruk UNMIT nia mandatu to’o 31 Dezembru 2012. Liu tiha eleisaun, mak situasaun
seguransa permite, UNMIT sei hahú halo kedas redusaun ba ninia komponente polisiál, hahú
hosi distritu. Sei halo mós redusaun gradual ba númeru ofisiál ligasaun militár sira. Kona-ba
ne’e, ha’u hanoin atu aprezenta relatóriu ida ba Konsellu Seguransa, iha loron neennulu nia
laran, bainhira harii tiha Governu foun, ho sujestaun kona-ba dalan atu tuir hodi permite
UNMIT no Governu atu kompleta preparasaun ba Misaun nia retirada antesipada no halo planu
atu ikus mai harii Nasoens Unidas nia prezensa iha Timor-Leste iha períodu hafoin-UNMIT.
Ha’u husu ba parte intersadu hotu-hotu, inklui autoridade Timor-Leste sira, UNMIT no ekipa
Nasoens Unidas nian iha país ne’e no mós ba parseiru bilateral no multilateral sira, atu servisu
hamutuk nafatin no haka’as an hodi halo implementasaun efetiva ba Planu Tranzisaun
Konjuntu, tanba tempu ne’ebe prevee ba UNMIT atu ramata ninia misaun la barak ona.
66. Atu ramata, ha’u hakarak hato’o obrigadu ba ha’u-nia Reprezentante Espesiál, Ameerah
Haq, kona-ba ninia lideransa, no ba UNMIT nia pesoál tomak no ba ekipa Nasoens Unidas iha
país ne’e, kona-ba esforsu kontínuu ne’ebe sira halo hodi fó apoiu ba puvu Timor-Leste atu lori
dame, estabilidade no dezenvolvimentu ba oin. Ha’u hakarak mós hato’o obrigadu ba forsa
seguransa internasionál, kona-ba apoiu kontínuu ne’ebe sira fó ba UNMIT, inklui apoiu atu
mantein estabilidade iha Timor-Leste.