Il-Mixja tal-Imhabba-Via Crucis, Randan 2013 - Marsaskala Parish

Riflessjoni
Pilatu huwa figura tassew interessanti! Minn fommu ħarġet waħda
mill-aktar mistoqsijiet profondi li għadha tidwi mad-dinja: X’inhi l-verità
Pilatu kien jaf li quddiemu kellu l-istess verità, l-awtur tal-verità. Pero’
tħawwad quddiem l-għażla bejn il-verità li hija Ġesù, u l-għajta tal-massa.
Ħafna drabi jiena nistaqsi lili nnifsi: huwa sewwa li ġeneralment
l-massa dejjem tirbaħ Xi kultant, kemm hi sfida kbira li toħroġ mill-ġibda
tal-massa biex tesprimi u tagħmel is-sewwa!
Ġesù, nammetti li jiena wkoll, mhux l-ewwel darba li minħabba
l-mistħija, minħabba l-biża’ li niġi mwarrba minn sħabi għamilt għażliet li
llum inħossni nistħi dwarhom. Mhux l-ewwel darba li jiena bħal Pilatu biex
ningħoġob minn ta’ madwari, ħsilt idejja minkejja li kont naf li l-verità mhix
dik li qed tgħajjat l-massa. Kemm–il darba ħsilt idejja biex nogħġob
lill-massa Kemm-il darba ħallejt lill-massa tiblagħni Kemm-il darba
ippreferejt nisma’ mill-massa aktar milli mill-kuxjenza tiegħi Kemm-il darba
iġġustifikajt l-għażliet ħżiena tiegħi bi kliem bħal: mhux kulħadd hekk qed
jgħid, mhux kulħadd hekk jagħmel
Mhux faċli li trawwem karattru sod; tgħix bih u fih. Id-dgħufija
tal-karattru hi rħisa wisq! Ġesù ħallas prezz għoli għall- irġulija tiegħu.
Pilatu ħasel idu mill-verità, imma ċappashom b’demm innoċenti.
Pawsa għar-riflessjoni personali.
Talba: Mulej, għini ma nħallix lili nnifsi ninġarr mill-massa. Għini ma nkunx
Pilatu ieħor quddiem il-verità. Ma rridx immewwet il-kuxjenza minħabba
d-dgħufija tiegħi. Mulej, għini ma nibżax mir-realtà tal-verità. Ammen
Glorja lill-Missier, lill-Iben u lill-Ispirtu Santu...eċċ
Nadurawk O Ġesù u nberkuk għax b’salibek u bil-mewt tiegħek inti fdejtna
7