Beleid t.o.v. Swangerskap - Goudveld Hoërskool

GOUDVELD-HOëRSKOOL
BELEID TEN OPSIGTE VAN DIE HANTE-
RING VAN SWANGERSKAPPE VAN
LEERDERS IN GOUDVELD-HOëRSKOOL.
1. Dit is die plig en verantwoordelikheid van die ouer van ’n leerder
wat swanger is om dit onmiddellik onder die aandag van die
skoolhoof te bring.
2. ’n Leerder wat vermoed dat sy swanger is, mag dit met enige
personeellid, verkieslik ’n senior dame, bespreek om sodoende
leiding te kry. Indien dit bevestig word dat die leerder wel swanger
is, is dit die plig van die personeellid om die feite onder die
skoolhoof se aandag te bring.
3. Indien ’n leerder of personeellid vermoed dat ’n meisie swanger is,
moet dit onmiddellik onder die skoolhoof of senior personeellid se
aandag gebring word. Die skoolhoof moet hierdie saak op ʼn
sensitiewe wyse hanteer en die leerder se ouers van die
moontlike swangerskap inlig.
4. Die maatreëls in punte 2 en 3 is om seker te maak dat die leerder
die korrekte gesondheidsorg ontvang en so ook die nodige
voorligting aangaande tienerswangerskappe.
5. Die swanger leerder moet die skool binne die eerste VIER (4)
maande van swangerskap verlaat en sal NIE toegelaat word om na
hierdie voorgeskrewe tyd enige eksamen van die skool af te lê nie.
Die stelsel van kontinue evaluering vereis dat ’n leerder voltyds in
die klaskamer moet wees. In sommige gevalle mag met
goedkeuring van die beheerliggaam van hierdie reël afgewyk word.
6. Geen leerder sal toegelaat word om gedurende die jaar waarin die
bevalling plaasvind na Goudveld-Hoërskool terug te keer nie. Die
leerder sal eers aan die begin van die volgende akademiese jaar
toegelaat word om dieselfde graad te herhaal.
7. Indien die leerder en/of haar ouers onderneem om die baba self
groot te maak, mag die baba op geen stadium die moeder na enige
aktiwiteit van die skool vergesel nie. Die leerder mag ook geen
ouerlike pligte tydens die skooldag en skoolaktiwiteite nakom nie.

8. Genoemde reëlings geld vir leerders in alle grade. Elke geval van
’n leerder in haar matriekjaar sal op meriete deur die
Beheerliggaam hanteer word. Indien daar spesiale reëlings vir die
eindeksamen getref moet word, sal die ouers/voogde van die
betrokke leerder verantwoordelik wees om die toesighouer teen ’n
vasgestelde tarief te vergoed.
9. Voordat ’n swanger leerder die skool verlaat, moet haar ouers ’n
vergadering met die skoolhoof belê sodat die inpak van die
swangerskap op die voortgesette onderwys van die leerder in
Goudveld-Hoërskool bespreek kan word.
10. Aangesien Goudveld-Hoërskool die Christelike waardes van die
Bybel onderskryf is die bespreking van ’n aborsie NIE ’n oorweging
nie. Indien dit onder die aandag van die bestuur van die skool kom
dat ’n leerder swanger was en ’n aborsie ondergaan het, sal die
saak ondersoek word en op meriete hanteer word. Die skoolhoof
sal met die ouers gesprek voer om te verseker dat die betrokke
leerder berading ontvang.
11. Indien ’n leerder weens mediese redes of na ’n verkragting ‘n
aborsie ondergaan, sal so ’n leerder direk na herstel van die
prosedure weer tot die skool toegelaat word.
12. By Goudveld-Hoërskool is die onderrig van lewenswaardes op so
’n hoë vlak dat ons van mening is dat geen leerder rede het om die
fisiese en emosionele trauma van ’n ongewenste swangerskap te
beleef nie.
13. Met hierdie beleid word geen leerder geskors of permanent uitgesit
nie, maar verseker dat leerders verantwoordelikheid vir hul dade
aanvaar en ingeligte keuses maak.
Hierdie beleid is deur die Beheerliggaam
goedgekeur en aanvaar.
......................... .................. ......................
Voorsitter: Datum Skoolhoof
Beheerliggaam