Omsendbrief no 2 van 2013.pdf

OMSENDBRIEF NO.2 van 2013
Geagte Ouers
28 Januarie 2013
Die nuwe skooljaar het vinnig weggespring met ‘n aantal aktiwiteite wat reeds
afgehandel is. Baie dankie vir elke leerder, ouer en personeellid se betrokkenheid en
positiwiteit!
GETALLE
Die amptelike tiende skooldaggetalle is as volg:
GRAAD SEUNS DOGTERS TOTAAL
8 68 165 233
9 116 174 290
10 96 155 251
11 84 164 248
12 77 155 232
441 813 1254
Ons is tans 54 onderwysers, waarvan 7 deur die Beheerliggaam, dus u as ouers, betaal
word.
ATLETIEK
Die jaarlikse Interklas atletiekbyeenkoms het op Woensdag, 23 Januarie plaasgevind,
nadat dit verlede Vrydag uitgereën het.
Alles het baie goed afgeloop en die leerders het entoesiasties deelgeneem. Die
matrieks het die Geesbeker gewen en die Gr.11’s het die atletiek vir die dag gewen.
Ons wens hulle baie geluk en bedank hulle vir die positiewe betrokkenheid wat as
voorbeeld vir die ander grade kan dien!
Die klaswenners in die onderskeie grade was as volg: Gr 8A, 9H, 10A, 11C en 12C.
Dankie, en baie geluk aan julle!
Op Vrydag, 25 Januarie, het ons skool ook ‘n tuisbyeenkoms aangebied wat
bygewoon is deur Uitsig, Hendrik Verwoerd, Cullinan en Silverton. Alhoewel hierdie
byeenkoms ook nie voltooi kon word as gevolg van die reën nie, wil ons almal wat
deelgeneem het en ook die ouers wat gehelp het met die kosverkope, bedank vir hul
betrokkenheid.
INTERHOëR SANGGROEP
Let asseblief ook daarop dat ons weer hierdie jaar ‘n INTERHOëR SANGGROEP
gaan hê wat die atlete by die interhoër gaan ondersteun. Alle nie-atlete wat belangstel

om deel te wees van hierdie groep, asook al die graad 8’s wat dit MOET bywoon,
oefen Dinsdag, 29 Januarie, direk na skool tot 3 uur. Dit is groot pret en ons skool het
verlede jaar baie goed gevaar met ‘n algehele 2e plek. Hierdie jaar wil ons die
Geesbeker wen! Kom almal neem entoesiasties deel en geniet dit! Ons gaan hulle
wys wat beteken BETER… BESTE … TUINE !!!!
BELANGRIKE DATUMS !!
Ons wys u graag op die volgende belangrike datums:
Prysuitdeling: In die dagboek aangedui op Donderdag, 31 Januarie. Hierdie
datum verskuif na Woensdag, 6 Februarie.
Die leerders begin op Maandag, 11 Februarie met ‘n TOETSWEEK.
Ondersteun en motiveer u kind om baie goed voor te berei. Hierdie toetse tel
baie punte vir die eerste kwartaal rapport. Die rooster is op bl.15 in die
dagboek.
Die volledige assesseringsprogram vir alle formele deurlopende assessering
vir die hele jaar, sal eersdaags aan die leerders voorsien word.
Tydens die toetsweek skryf die leerders aan die einde van die skooldag in ‘n
toetsperiode van ‘n uur lank. GEEN leerder sal dus tydens die toetsweek
toestemming kry om die terrein vroeër te verlaat nie.
Indien ‘n leerder tydens ‘n formele toets afwesig is, moet daar ‘n doktersbrief
ingedien word, anders sal die leerders NUL vir daardie toets ontvang en dit
kan ‘n druippunt op sy/haar rapport veroorsaak.
Die Graad 10-,11- en 12- leerders wat nie ‘n spesifieke keusevak het wat
tydens ‘n toetsperiode geskryf word nie, mag wel 13:00 huis toe gaan.
PARKERING
Slegs leerders met ‘n geldige lisensie mag met ‘n motor of motorfiets toegang tot die
terrein verkry. Alle motors moet op die strook agter die A-veld en hoofpawiljoen
parkeer word, en die motorfietse op die sementblad by die hoofingang. Daar mag
onder geen omstandighede op ander plekke parkeer of gery word binne die terrein nie.
Hierdie reëling geld ook vir na skoolure.
OP-EN AFLAAI VAN LEERDERS
Let asseblief daarop dat die leerders nie by die hoofhek of binne die skoolterrein op-
of afgelaai moet word nie. In die oggende en naskool veroorsaak dit
verkeersopeenhoping en die ander hekke word oopgesluit vir die doel.
NUTSMAN
Die skool benodig die dienste van ‘n nutsman (“handyman”). Enige persoon wat ‘n
grondige kennis het van algemene herstelwerk, kan aansoek doen. Dit sluit in:
elektriese werk, sweiswerk, skrynwerk, loodgieterswerk, ens. Die aansoeker moet
bereid wees om sekere tye na-ure te werk, en moet beskikbaar wees indien die skool
‘n buitemuurse program aanbied. Die suksesvolle kandidaat moet ‘n bestuurslisensie
hê en die salaris sal in ‘n onderhoud bespreek word. Indien u belangstel, handig ‘n CV
in by die ontvangskantoor voor of op Vrydag, 1 Februarie 2013.

SIEKEKAMER
Ons versoek alle ouers om nie u kind skool toe te stuur as hy/sy regtig siek is nie. Dit
gebeur dikwels dat sommige leerders slegs by die skool aanmeld en dan heeldag in
die siekekamer lê. Daar is slegs 2 beddens beskikbaar en die ruimte is regtig beperk.
Die siekekamer is eintlik net daar vir noodgevalle en/of beserings wat leerders
soms opdoen of vir leerders wat skielik by die skool ongesteld raak en wag dat hul
ouers hulle kom haal.
Indien ‘n leerder by die kantoor aanmeld omdat hy/sy siek voel,word die ouers
geskakel om die leerders te kom haal. Hierdie maatreëls is in plek omdat daar
ongelukkig soms leerders is wat skielik ‘n erge hoofpyn ontwikkel as hul huiswerk vir
die volgende periode nie gedoen is nie…(!)
Daar sal in die toekoms ook ‘n intekenregister by die siekekamer wees aangesien
dieselfde leerders gereeld daar is en dan aangemeld moet word.
HIGHSCHOOL SUPERSTAR KOMPETISIE, 4 FEBRUARIE
Ons skool se sangtalent neem aan hierdie groot kompetisie deel, geborg deur Cell C.
Op Saterdag, 26 Januarie het die oudisies plaasgevind waar 10 finaliste aangewys
is.Die wenner sal aangewys word op Maandag, 4 Februarie tydens ons jaarlikse
talentaand. Saam met ons skool se finaliste tree die baie gewilde Tuindwergies en
Kinky Robot [Martin Bester van Jacaranda FM se “band”!]op.
Die kaartjies vir hierdie groot aand is R60 per persoon en beloof om iets besonders te
wees! Die wenner van ons skool sal deurgaan na die interskole kompetisie waar hy/sy
dan sal deelneem teen die wenners van skole soos Eldoraigne, Menlopark, Pretoria-
Noord, Waterkloof, HTS Tuine, Zwartkops, Willowridge, ens.
Kom ondersteun hierdie leerders en kom geniet die aand saam met ons!
Kinky Robot Tuindwergies

JAARTEMA
Onthou om ons jaartema waar te maak in elkeen se lewe: Beter….Beste… TUINE!
Tuine-groete !
…………………………….
JG Tredoux
Hoof
30 APRIL by Hoërskool Tuine !
R80 per persoon