Dit moet werk - harties.org.za

Hartbeespoort Dam News
The First Online Newspaper in Hartbeespoort
Home This Weeks News Letters Contacts
Dit moet werk
Kormorant het verlede week in sy redaksionele kommentaar die
versugting uitgespreek dat die administrateur wat aangestel is
om die munisipaliteit van ondergang te red, nie moet probeer om
die wiel van vooraf uit te vind nie. Die kommentaar was gegrond
op verklarings in drie opeenvolgende weke van die vergaderings
wat gehou word en beplan word en rolspelers wat betrek word en
beplan word om betrek te word. Kormorant het die vrees van
baie van sy lesers verwoord dat resultate gemeet sal word aan
die aantal vergaderings wat gehou word - ‘n algemene
verskynsel in die wêreld van burokrate - en nie aan resultate nie.
Gelukkig wil dit nou voorkom of daardie vrees dalk ongegrond
was. Dit wil ook voorkom of die administrateur nie van plan is om
die wiel van vooraf te ontwerp of te herontwerp nie.
Stappe teen die bestuurder tegniese dienste is iets waarop
besorgde inwoners al lankal aangedring het. Trouens, daar is al
by twee geleenthede kriminele klagtes oor die besoedeling van
Hartbeespoortdam en die Krokodilrivier teen hom ingedien - in
Oktober verlede jaar deur ‘n opposisieraadslid en in Januarie
vanjaar deur die regering. Dit is verblydend om te sien dat die
administrateur nie, soos al te dikwels die geval is, stroomop wil
swem en probeer bewys dat hy sy eie wiel kan ontwerp nie. Wat
egter skrikwekkend is, is dat die Madibeng munisipale raad
daarin kon slaag om tweekeer na mekaar tegniese bestuurders
aan te stel wat nie lyk of hulle ‘n benul het van wat die werk
behels nie.
Die administrateur se planne, insluitende die herstel van die
infrastruktuur en die stryd teen korrupsie, lyk belowend en die
stappe wat hy reeds gedoen het, bemoedigend. Dis egter ‘n
stywe agenda en hy sal al die hulp wat hy kan kry nodig hê. In sy
verklaring vra hy dat mense die versoeking moet weerstaan om
die proses te ontspoor ter wille van eiebelang. Dit is ‘n geldige
versoek solank hy nie verwag dat daar geen kritiek sal wees nie.
Dit is belangrik dat die gemeenskap die hele proses krities
dophou, met valkoë selfs, en deur hulle onderskeie
gemeenskaporganisasies hulle volle ondersteuning gee, met die
nodige kritiek waar geregverdig.
Die administrateur het die eerste treë gegee om die omdraai-
29 April 2010
http://www.kormorant.co.za/2010/04Apr/29Apr/Editorial.htm
Page 1 of 2
2010/04/30

Hartbeespoort Dam News
strategie vir Madibeng in werking te stel. Hy moet hom nie nou
van stryk laat bring deur politiekery nie. Veral wat korrupsie
betref kan hy inmenging verwag. Hy wil ‘onervare kontrakteurs
en konsultante’ vasvat, maar baie, miskien die meeste van hulle
het hulle in daardie posisie ingewurm danksy hulle politieke
konneksies. Hulle politieke beskermhere sal ongetwyfeld vir hulle
in die bresse probeer tree.
Die administrateur se voornemens is lofwaardig. Hy verdien die
steun van elke inwoner. En as hy gekritiseer word, is dit nie
omdat hy nie ondersteun word nie, maar bloot omdat inwoners
resultate wil sien.
Vir te lank moes inwoners toekyk terwyl die uitverkorenes soos
aasvoëls op die munisipale skatkis toesak terwyl dienslewering
ineenstort. Die administrateur is gestuur om die aasvoëls te
verjaag en die munisipaliteit van ondergang te red. As hy die
planne wat hy uiteengesit het, uitgevoer kry, verdien hy ons almal
se dank en waardering. Maar ons moet sien dat dit werk.
Back to Top Back to Home
http://www.kormorant.co.za/2010/04Apr/29Apr/Editorial.htm
Page 2 of 2
2010/04/30