40 DAE GEBEDSKALENDER 2 JANUARIE TO 10 FEBRUARIE 2006

40 DAE GEBEDSKALENDER 2 JANUARIE TO 10 FEBRUARIE 2006
Dag 31-40
Woensdag 1 Februarie 2006
Dag 31: NOODROEP VIR GOD SE SIGBARE TEENWOORDIGHEID
1. Noodroep vir meer van God se heerlikheid in die kerk
Oordenking: Jesus het Petrus drie keer gevra of hy Hom liefhet. Teen die derde keer was Petrus so
diep aangeraak deur Jesus se vrae dat hy gesê het; Here, U weet alle dinge, U weet dat ek U liefhet.
Jesus het drie dinge van Petrus gevra en die een ding het Hy herhaal: Laat my lammers wei, pas my
skape op, laat my skape wei. Hoeveel voedsel verskaf die herders van vandag vir die skape in hulle
kudde? Sommige leiers stel dit voor asof om Jesus te volg 'n eindelose lys van moets en moenies is.
Somtyds lyk dit onmoontlik om ooit alles reg te doen. Hoe nederig is ek en jy werklik waar ons leiding
gee in die gemeente? As 'n prediker, selgroepleier, berader, kinderkerk-leier, ens., hoeveel liefde is
daar in jou hart teenoor die mense onder jou geestelike sorg? Bied ons hulle genoeg geestelike
voedsel?
Uit die Woord: Vader, ons is almal skuldig dat ons U skape in die kerk op een of ander manier
verwaarloos. Ons bid nie en ondersteun mekaar nie soos ons behoort nie. Ons steek mekaar in die
rug, beskinder en kritiseer mekaar (1Pet. 2:1). Vader, vul U kerk met die suiwer geestelike melk, van U
Woord (1Pet.2:2). Laat ons soos Jesus sê: "My voedsel is om die wil te doen van Hom wat My gestuur
het, en om sy werk te voltooi" (Joh.4:34).
2. Noodroep vir meer van God se heerlikheid in die regering
Neem die tyd om God se gesag en outoriteit oor Suid-Afrika te proklameer (Joh.3:27-36). Verklaar
profeties in die geloof dat alles aan die Here behoort, dat alle gesag en mag op aarde, ook regering
ondergeskik is aan God. Proklameer Jesus Christus as die Here oor alles (Joh.17:2).
3. Noodroep: Draai die gety van rassisme
Die "apartheid" bewind was gedeeltelik gebou op die fondament van rassisme en het 'n grootskaalse
uitwerking gehad van onregverdigheid, vernedering en die bevoordeling van sekere mense in die land.
Bid asseblief vir genesing vir dié wat as gevolg van apartheid, in hulle menswaardigheid gely het. Vra
dat dié wat voel dat hulle beter is as ander, tot die besef sal kom dat God alle mense gelyk gemaak het
en dat elke menslike wese met respek en eerbied behandel moet word (Spr.14:21,31;17:5).
Donderdag 2 Februarie 2006
Dag 32: NOODROEP VIR GOD SE SIGBARE TEENWOORDIGHEID
1. Noodroep vir meer van God se heerlikheid in die kerk
Oordenking: Verkondig die kerk nog die eenvoudige en volledige evangelieboodskap? Hoeveel
mense het in die afgelope tyd in jou gemeente na Christus gekom? Selfs al preek ons die mees
geestelik volwasse boodskap, moet dit steeds so eenvoudig wees dat selfs die minste van die wat die
diens bywoon tot geloof in Christus sal kom. In essensie is die getuienis van Jesus Christus die gees
van alle profesie, die inspirasie van alle prediking en die vertolking van God se wil en voorneme. Is
Jesus Christus die middelpunt van jou lewe—ook van jou getuienis en van jou prediking?
Uit die Woord: Vader, ons bely dat ons maklik gefassineer word deur die bo-natuurlike aard van
geestelike dinge. Ons raak so gefassineerd deur die bo-natuurlike dat ons van U grootsheid vergeet.
Laat ons nie langer juig omdat bose geeste aan ons onderwerp nie, maar juig omdat ons name in die
Hemel opgeskryf is (Luk.10:18). Mag Jesus Christus weer sentraal in die kerk wees. Die naam, gawe
of roem van enige mens mag nie nie die plek inneem van die Lam van God, want Hy alleen is waardig
om daardie plek te kry.
2. Noodroep vir meer van God se heerlikheid in die regering
Bid dat God die harte van elke gelowige sal aanraak om vir die regering te bid. Dat die kerk haar
verantwoordelikheid sal opneem om vir die regering in te tree. Vra dat Christene nie langer die regering
sal blameer vir wat verkeerd is nie, maar sal begryp dat die kerk die mandaat en die
verantwoordelikheid het om as priesters voor God in te tree vir die land.
3. Noodroep: Draai die gety van rassisme
Bid dat die vrede van God wat alle verstand te bowe gaan, die harte en gedagtes van alle mense wat
gebuk gaan onder die juk van rassisme, sal vol maak. Vra dat hierdie vurige pyl volledig verwyder sal
word uit elke hart in Suid-Afrika. Bid dat alle bose magte wat die vure van rassisme aanblaas, verbreek
sal word en dat dit volkome vernietig sal word.
Vrydag 3 Februarie 2006
Dag 33: NOODROEP VIR GOD SE SIGBARE TEENWOORDIGHEID

1. Noodroep vir meer van God se heerlikheid in die kerk
Oordenking: Verwag die Kerk regtig Jesus se wederkoms? As ons sê ons berei die weg vir Hom voor
(Mark.1:3). Wat beteken dit? Eerstens beteken dit dat alle mense Jesus Christus moet leer ken. Maar
ons moet ook elke dag in die voortdurende bewussyn en verlange na Jesus se koms lewe. Glo ons
regtig in Sy wederkoms? Paulus se finale opdrag aan die Tessalonisense was: Mag God, wat vrede
gee, julle volkome aan Hom toegewyd maak en julle geheel en al, na gees, siel en liggaam, so bewaar
dat julle onberispelik sal wees wanneer ons Here Jesus Christus weer kom! Hy sal dit ook doen, want
Hy wat julle roep, is getrou (1Tess.5:23-24).
Uit die Woord: Jesus Christus, ons bely dat ons so besig word in ons werk vir U, dat ons vergeet om
uit te sien na U wederkoms. Vader, stort 'n nuwe verwagting van Jesus se koms uit in U kerk. Laat die
kerk gretiglik voorberei sodat ons U bruid, sonder vlek of rimpel kan wees, want die bruid behoort aan
die bruidegom (Joh.3:29).
2. Noodroep vir meer van God se heerlikheid in Zimbabwe
Bid asseblief vir al die mense wat huise en besittings verloor het gedurende die "operasie skoonmaak"
in 2005. Bid dat mense die vryheid sal hê om hulle bekommernis uit te spreek, dat hulle 'n wetgewende
stelsel met gesag sal hê waaraan die president en die kabinet onderhorig sal wees. Vra vir die
instelling van 'n neutrale kabinet wat die voorspoed van al die mense in Zimbabwe sal dien en
bevorder.
3. Noodroep: Draai die gety van rassisme
Aan die wortel van rassisme sal ons trots, onsekerheid, vrees en minderwaardigheid vind. Rassisme
kom voor in elke land en volk ter wêreld. Geen nasie, ras of taal ongeag of dit in Suid-Afrika is of in 'n
ander land, is vry van die kloue van rassisme nie. Laat ons ons harte en gedagtes ondersoek vir elke
vorm van rassisme en haat teenoor 'n ander etniese, kulturele, of rassegroep of persoon. Laat ons nie
"ja maar" en "kyk wat het hulle aan ons gedoen" gebruik as 'n verskoning om nie te vergewe nie.
Vergifnis bring 'n ondenkbare vryheid as jy net eers die eerste stap geneem het om iemand te vergewe
of om iets reg te stel wat jy aan iemand anders gedoen het.
Saterdag 4 Februarie 2006
Dag 34: NOODROEP VIR GOD SE SIGBARE TEENWOORDIGHEID
1. Noodroep vir meer van God se heerlikheid in die kerk
Oordenking: En in die kerk is daar mense aan wie God 'n bepaalde taak gegee het. Ten eerste is daar
apostels, ten tweede profete, ten derde leraars; verder is daar dié wat wonderdade kan doen, dan dié
wat genadegawes ontvang het om mense gesond te maak, om hulp te verleen, om leiding te gee of om
ongewone tale of klanke te gebruik (1Kor.12:27-28). Bid ons as gelowiges gereeld vir die mense in
leiersskap? As hulle preke nie so goed is nie, of hulle sukkel met goeie leierskap, bly ons dan weg van
die kerk of veroordeel ons hulle swakhede? Of bid ons ernstig vir hulle vir meer genade en om 'n
persoonlike deurbraak te kry? Verstaan ons dat hulle manne en vroue net soos ons is? Het ons
werklike begrip en meegevoel met ons leiers?
Uit die Woord: Vader, ons bely dat ons nie altyd met respek van ons leiers praat nie. Ons eer hulle nie
as mense wat deur U aangestel is nie. Ons ondersteun hulle nie in gebed nie en ons doen ook nie
moeite om hulle gereeld met 'n woord of gebed te bemoedig nie. Vergewe ons ons sonde. Wil U ons
asseblief elke dag leer en herinner om hulle te seën, om goeie dinge vir hulle te begeer, sodat hulle
werk 'n vreugde en nie 'n las sal wees nie (Heb.13:17). Mag hulle vervul wees met U Gees om die
werk te kan doen waarvoor U hulle aangestel het (Hand.4:31).
2. Noodroep vir meer van God se heerlikheid in die regering
Bid dat God wysheid en begrip aan alle regeringsleiers sal gee om geregtigheid en reg, volgens
Bybelse beginsels, toe te pas. Dat hulle wysheid sal hê om strategies, op praktiese maniere, probleme
soos armoede, korrupsie, MIV/VIGS, misdaad, verkragting, molestering van kinders en rassisme, aan
te spreek en op te los.
3. Noodroep: Draai die gety van rassisme
Selfs vandag nog ervaar mense rassisme by mekaar wanneer dinge op so 'n manier gedoen of gesê
word, dat dit 'n ander persoon verneder. Dit kan wees van wit na swart, van swart na wit, van bruin na
swart, van swart na bruin, van swart na Indiër, ens. Vra die Here om jou hart te bewaar van rassistiese
optrede in jou daaglikse lewe. Bid ook dat God mense sal oortuig van rassistiese gedrag. Bid dat God
die mense van ons land sal bevry van die gevolge van rassisme, hetsy van haat en bloedvergieting
tussen stamme of die verbreking van verbonde en ooreenkomste, ens.
Sondag 5 Februarie 2006
Dag 35: NOODROEP VIR GOD SE SIGBARE TEENWOORDIGHEID
1. Noodroep vir meer van God se heerlikheid in die kerk
Wie nederig is, dien die Here en ontvang rykdom, eer en lewe (Spr.22:4).

Oordenking: Wat is ware rykdom en eer? Dié rykdom is insig in die geheimenis van Christus
(Kol.4:3). Die enigste eer wat ons kan neem omdat ons iets reg gedoen het is omdat ons Christus
gekies het. Daar is regtig niks anders wat vir ons die ewige lewe kan gee nie. Tog ontplof die kerk
amper van aardse rykdom en die eer van mense, terwyl die wêreld steeds sterf sonder die kennis van
Christus. Sal enigiemand onder hierdie omstandighede gewillig wees om aardse rykdom prys te gee
sodat Christus in my lewe op die troon kan wees? (Fil.3:7-9).
Uit die Woord: Vader, vergewe ons vir ons gebrek aan onderskeiding wanneer dit gaan oor ware
rykdom, eer en lewe. Ons is so arm en het U leiding so nodig. Wees U kerk genadig en laat ons weer
die blydskap ervaar van iemand wat deur U verlos is (Ps.51:12). Mag dit weer waar wees van U kerk
vandag dat wat eers vir ons 'n bate was, ons nou as waardeloos beskou ter wille van Christus, ja, nog
meer: mag ons alles as waardeloos beskou, want om Christus Jesus, ons Here, te ken, oortref alles in
waarde. Dat ons ter wille van Hom alles sal prys gee en as verwerplik beskou sodat ons Christus as
enigste bate kan verkry en een met Hom kan wees: vrygespreek, nie omdat ons die wet onderhou nie,
maar omdat ons in Christus glo (Fil.3:7-9).
2. Noodroep vir meer van God se heerlikheid in die regering
Laat ons tot God roep en vra dat Hy Sy guns oor Suid-Afrika sal uitstort. Loof Hom vir Sy genade,
barmhartigheid en liefde wat ons reeds ervaar. Dank God dat Hy soveel genade oor ons uitstort. Prys
Hom dat Hy ons nie oordeel volgens ons goddeloosheid nie en ons nie totaal as nasie vernietig nie.
3. Noodroep: Draai die gety vir vroue en kinders
Vroue uit alle kulture word op een of ander manier onderdruk. In sommige kulture en godsdienste word
vrouens as minderwaardig beskou en moet hulle minderwaardige posisies inneem, baie hard werk en
word hulle deur mans met minagting behandel. Dit veroorsaak baie lyding, gevoelens van
minderwaardigheid, verwerping en emosionele pyn in die lewens van vroue. Bid asseblief vir vroue wat
onder sulke omstandighede gebuk gaan. Vra vir hulle herstel en genesing. Bid dat hulle God se liefde
vir hulle sal aanvaar en verstaan.
Maandag 6 Februarie 2006
Dag 36: NOODROEP VIR GOD SE SIGBARE TEENWOORDIGHEID
1. Noodroep vir meer van God se heerlikheid in die kerk
Oordenking: Sedert die dood en opstanding van Jesus Christus het God besluit dat die ryke
verskeidenheid van sy wysheid deur die kerk bekend gemaak sal word aan elke mag en gesag in die
hemelruim, soos Hy Hom van ewigheid af al voorgeneem het om dit deur Christus Jesus, ons Here, tot
uitvoering te bring (Ef.3:10-11). Wat is die verskeidenheid van God se wysheid? (Spr.8). Joh.1:1
verduidelik dat die wysheid van God, Jesus Christus self is. Wat is die sentrale punt van die kerk van
vandag se lering? Dit is dat om Christus te ken ons redding is. Christus is ons redding. Is Christus
sentraal in alles wat ons leer?
Uit die Woord: Vader, ons as U kerk roep om genade. Laat ons fokus nie langer op elke mag en
gesag in die hemelruim wees nie, maar laat ons fokus wees om Christus, in al Sy heerlikheid bekend te
maak (Ef.3:10).
2. Noodroep vir meer van God se heerlikheid in die regering
Die hele kwessie van grondhervorming is baie sensitief. Bid asseblief dat die regering die saak met
groot wysheid en sensitiwiteit sal aanspreek. Vra dat dit bevredigend hanteer sal word en dat daar
geen bloedvergieting sal plaasvind as gevolg van misverstande nie. Bid vir 'n groot mate van begrip en
geduld in die harte van almal wat in die proses betrokke is.
3. Noodroep: Draai die gety vir vroue en kinders
Diskriminasie teen vroue in terme van salaris, leierskap- en bestuursposte, vind steeds plaas. Bid dat
dit reggestel sal word en dat vroue regverdig betaal sal word vir hulle werk en dat hulle erkenning sal
ontvang vir hulle gawes en leierskapvermoëns en op gelyke voet vir werksaansoeke oorweeg sal word.
Dinsdag 7 Februarie 2006
Dag 37: NOODROEP VIR GOD SE SIGBARE TEENWOORDIGHEID
1. Noodroep vir meer van God se heerlikheid in die kerk
Oordenking: Paulus het Timótheüs aangemoedig om sekere mense te verbied om vals leerstellings te
versprei, en hulle met verdigsels en eindelose geslagsregisters besig te hou. Sulke dinge gee eerder
aanleiding tot twisgesprekke as dat dit die vorming bevorder wat God deur die geloof gee (1Tim.1:3-4).
Spreek die kerk vandag die probleem van valse leerstellings aan en word sterk standpunt ingeneem
daarteen? Herken en onderskei ons valse leerstellings, verdigsels en leringe wat bloot mensgemaakte
reëls, eerder as die ware lewegewende Woord van God is? (Matt.15:9).
2. Noodroep vir meer van God se heerlikheid in die regering
Die invloed van vakbonde op besluitneming, wetgewing en hoe die regering optree moet nie onderskat
word nie. Bid dat God ons sal beskerm teen toegewings aan dwase en onredelike versoeke. Vra dat
wergewers hulle werkers eerlik en regverdig sal betaal.

3. Noodroep: Draai die gety vir vroue en kinders
Statistieke van molestering en verkragting van kinders in Suid-Afrika is die hoogste in die wêreld.
Molestering en verkragting is die twee ergste dinge wat met 'n mens kan gebeur. Bid dat God aan ons
sal openbaar hoe om te bid sodat die vestings in ons samelewing volledig vernietig kan word. Vra ook
vir die fisiese en emosionele genesing van kinders en volwassenes wie se lewens hierdeur benadeel
is.
Woensdag 8 Februarie 2006.
Dag 38: NOODROEP VIR GOD SE SIGBARE TEENWOORDIGHEID
1. Noodroep vir meer van God se heerlikheid in die kerk
Oordenking: In hierdie moderne tyd is daar steeds baie mense groepe wat nie 'n Bybel of selfs 'n
Bybelgedeelte, in hulle eie taal het nie. Een seker manier om die nasies dissipels te maak en om die
evangelie aan hulle te bring, is om vir hulle 'n Bybel in hulle eie taal te gee. Hoeveel dra die kerk by tot
die vertaling van die Bybel in die oorblywende tale van die wêreld? Kan ons meer doen? Is dit met die
moderne tegnologie moontlik om die taak binne die volgende tien jaar af te handel?
Uit die Woord: Vader, ons bid dat U die Kerk sal inspireer om met 'n nuwe ywer te sien dat die Bybel
in elke taal van die wêreld vertaal sal word. Gee asseblief baie guns, baie gewillige diensknegte en dat
die wat bekwaam is vinnig en sonder ophou sal werk om die werk af te handel. Ons bid ook vir al die
nodige hulpbronne om voortdurend beskikbaar te wees vir die werk van Bybel-vertaling. Laat U opdrag
tot aan die eindes van die aarde weerklink, laat U Woord vinnig beweeg (Ps.147:15).
2. Noodroep vir meer van God se heerlikheid in die regering
Suid-Afrika gaan gebuk onder 'n abnormaal hoë werkloosheidsyfer. Werkloosheid veroorsaak dat
mense hoop en waardigheid verloor en waardeloos voel. Bid asseblief vir wysheid vir die regering om
op kreatiewe wyse vir mense te help en werk te skep. Bid ook vir meer buitelandse beleggings in Suid-
Afrika en meer buitelandse sakebetrokkenheid en vertroue in Suid-Afrika.
3. Noodroep: Draai die gety in die media
Die media speel 'n deurslaggewende rol in die vorming van mense se menings in en oor die land. Bid
vir meer Christene om hulle plek in te neem in radio, televisie en die gedrukte media. Vra dat die
waarheid gedruk en uitgesaai sal word met integriteit, liefde en met meer billikheid. Alhoewel daar 'n
verdraagsaamheid in die media is oor verskeie sake, is daar 'n toenemende onverdraagsaamheid
teenoor die Kerk en spesifiek oor die verkondiging van die evangelie. Bid dat God die harte van
nuusskrywers en redakteurs hieroor sal verander.
Donderdag 9 Februarie 2006
Dag 39: NOODROEP VIR GOD SE SIGBARE TEENWOORDIGHEID
1. Noodroep vir meer van God se heerlikheid in die kerk
Oordenking: Die kerk is God se antwoord vir die wêreld vandag (Ef.3:10). 'n Bekende spreker het
onlangs gesê: (geparafraseer) Die kerk is so gebroke en stukkend, vol swakhede en met baie tekorte,
maar God het die oorwinning behaal en die wêreld gered juis deur Sy Seun se gebrokenheid en
vernedering aan die kruis. Hoeveel te meer sal Hy nie weereens die wêreld verstom en die eindtyd oes
inbring, deur Sy kerk, wat Hy met Sy kosbare bloed gekoop het nie! Laat ons nie moeg word nie, maar
volhard sodat God se planne in ons leeftyd openbaar kan word.
Uit die Woord: Vader, ons bid U dat U deur U Gees uit die rykdom van U heerlikheid aan ons die krag
sal gee om innerlik sterk te word, dat Christus deur die geloof in ons harte sal woon en dat ons in die
liefde gewortel en gegrondves sal wees. Mag ons in staat wees om saam met al die gelowiges te
begryp hoe wyd en ver en hoog en diep die liefde van Christus strek. Mag ons Sy liefde ken, liefde wat
ons verstand te bowe gaan, en mag ons heeltemal vervul word met die volheid van God (Ef.3:14-20).
2. Noodroep vir meer van God se heerlikheid in Zimbabwe
Bid dat 'n seisoen van opbou en herstel van die land en die mense van Zimbabwe sal aanbreek. Vra vir
betekenisvolle deurbrake in die volgende paar maande. Bid dat die skande en vernietiging stop gesit
sal word en dat mense van alle rasse sal hande vat en mekaar sal help. Vra dat die nasie waarlik uit
die as sal opstaan en 'n getuienis van God se genade en barmhartigheid sal wees.
3. Noodroep: Draai die gety in die media
Bid vir Christentydskrifte, -radio en -televisie uitsendings, dat dit altyd in die waarheid en geregtigheid,
in eerlikheid en liefde, in genade en vergifnis gegrondves sal wees. Vra vir Christene wat in die media
betrokke is vir vrymoedigheid en vryheid om hulle werk met integriteit te doen en om te volhard in wat
reg is en dat hulle vervul sal wees met die Heilige Gees.
Vrydag 10 Februarie 2006
Dag 40: NOODROEP VIR GOD SE SIGBARE TEENWOORDIGHEID
1. Noodroep vir meer van God se heerlikheid in die kerk

Oordenking: Ons het vir 40 dae tot God geroep met berou en sondebelydenis. Laat ons aan Hom
hulde bring vir Sy liefde vir die kerk in Suid-Afrika.
Uit die Woord: Vader, ons bring aan U 'n lofsang. Ons sing 'n nuwe lied tot eer van die Here, ons sing
tot sy lof in die vergadering van sy troue dienaars. Die Here is goed vir sy volk, Hy kroon die hulpeloses
met oorwinning. Sy troue dienaars juig oor sy mag, jubel selfs as hulle op hulle beddens gaan lê. Die
roem van God klink uit hulle mond (Ps.149). Prys God in sy heiligdom, prys Hom hier onder sy magtige
hemelgewelf! Prys Hom oor sy kragtige dade, prys Hom in sy magtige grootheid! Laat alles wat asem
haal, die Here prys! (Ps.150).
2. Noodroep vir meer van God se heerlikheid in die regering
Bid by name vir die president, die adjunk-president en die premiers van die nege provinsies. Vra dat
God hulle vandag sal seën in hulle werk, hulle gesinne en hulle persoonlike lewens. Bid dat elkeen die
geleentheid sal kry om Jesus Christus te kies as Here en Verlosser, en dat hulle met wysheid sal kies.
Dank God vir die antwoord op elke gebed wat ons gebid het, soos Hy wil en in sy tyd en seisoen.
3. Noodroep: Draai die gety in die media
Godslastering en lelike taal neem toe in die media. Daar is ook toenemende spot met Jesus Christus
en met mense wat 'n morele lewe lei. 'n Verhaal is nie "interessant genoeg"as dit nie bedrog, owerspel,
omkopery, of dreigemente insluit nie. Bid asseblief dat hierdie gety sal omkeer. Dat programme wat die
moraal van mense afbreek nie langer uitgesaai sal word nie. Vra veral dat artikels, programme en
rolprente met baie geweld, lelike taal, seks en naaktheid drasties sal verminder in al die media. Bid dat
meer tyd en energie spandeer sal word oor hoe om mense te help en vry te maak wat in hierdie dinge
vasgevang is.