GAASTERLÂN-SLEAT

GAASTERLÂN-SLEAT
www.fnpgaasterlan-sleat.nl
Dit FNP-jierferslach giet allinne oer de haadsaken oangeande de
beslútfoarming yn de riedsgearkomsten fan 2010. It is ús foarnimmen
om fan 2011 ôf ek oare saken yn it fraksjeferslach op te nimmen. It is
fansels net mooglik en beneam alle punten fan de wurklist.
12 JANNEWARIS 2010
It FNP-útstel oer de betingsten oangeande de takenning fan in fergunning
om in beam te kappen wurd oannommen: ‘In kapfergunning is nedich foar
beammen mei in omfang fan mear as 1 meter op 1 meter hichte’.
De ried wie unanym foar om Schaaf Bewaking & Beveiliging foar
€ 14.000,00 yn it sintrum fan Balk en op de jongereinketen tafersjoch
hâlde te litten. It giet om de perioade fan april 2010 oant en mei
septimber 2010 fan 23.00 ôf oant 05.00 oere ta.
9 FEBREWARIS 2010
FNP en PvdA wolle net meiwurkjen oan in wiziging fan it bestimmingsplan
fan Murns. Oan de Murnserdyk woe de famylje Postma in minykemping
foar campers begjinne.
De ried beslút unanym om 1 miljoen euro ekstra beskikber te stellen foar
in Multi Funksjoneel Sintrum yn Aldemardum.
9 MAART 2010
Dy gearkomste wie útskreaun om ôfskied te nimmen fan ôftredende
riedsleden. De útslach fan de riedsferkiezings op 3 maart 2010 hie soks
needsaaklik makke. Op eigen fersyk naam Ans Hellemons-de Graan út Riis
(FNP) nei 16 jier ôfskied fan de gemeenteried. Yn dy perioade wie sy 5 jier
fraksjefoarsitster. Boargemaster Hoornstra makke bekend dat Hare
Majesteit de Keninginne besletten hie om Ans te beneamen yn de Orde
van Oranje Nassau. Dat wie net allinne foar har riedslidmaatskip, mar ek
foar alle oare maatskiplike aktiviteiten.
ANS EN BOARGEMASTER HOORNSTRA De ,,ÂLDE” FNP FRAKSJE 2006-2010
Foto: www.balkstercourant.nl f.l.n.r.: J.Piersma; J.Volbeda en A. Hellemons
1

11 MAART 2010
De earste gearkomste fan de nije riedsleden. Fan trije FNP riedsleden
waard de eed ôfnommen (Sa wierlik helpe my God almachtich) en fan twa
riedsleden de belofte (Dat ferklearje en ûnthjit ik).
DE NIJE FNP FRAKSJE
Jan Volbeda Jeltsje Piersma Kees van Strien Jan G. Vogelzang Frâns Gerritsma
Foto’s: www.gaasterlan-sleat.nl
As fraksjefoarsitter fan de grutste partij nimt Jan Volbeda it foartou ta it
gearstallen fan in koalysje. Alle partijen wurde yn dat proses behelle.
13 APRIL 2010
Ynformateur Gerben Gerbrandy (FNP) fan Wymbritseradiel hat petearen
mei alle partijen hâlden. De útkomst wie in kolleezje fan FNP en CDA.
Tegearre hawwe wy 9 fan de 15 sitten.
FNP’er Bram Bonnema út Frjentsjer wurdt beëdige as wethâlder. Foar it
CDA wurdt Frans Veltman út Aldegea as wethâlder beëdige.
FNP Wethâlder Bram Bonnema
Foto: www.gaasterlan-sleat.nl
Guon boargers hawwe net stimd om’t hja gjin legitimaasjebewiis hiene. De
FNP trunet derby it kolleezje op oan om tenei dy minsken yn ’t foar in brief
te skriuwen om sa te wizen op de needsaak om sa’n bewiis oan te
freegjen.
De Van Swinderenstrjitte wurdt foarearst net foar alle ferkear ôfsluten. De
besteande situaasje bliuwt. Der kom wol in ûndersyk nei it ôfsluten foar
alle ferkear yn beide rjochtings. Yn de ferkiezingskampanje fan febrewaris
2010 hie de FNP al oankundige, dat dit jier foar de besteande situaasje
stimd wurde soe. Dêrnei wurde de útkomsten fan it ûndersyk dat
kommendeweis is, yn de beslútfoarming behelle. Spitich wie dat guon
minsken ûnrjochtlik buorkundich makken dat de FNP fan stânpunt feroare
wie.
2

11 MAAIE 2010
De FNP is akkoart mei in nije foarm fan bestriden fan de glêdens. Der
wurdt tenei net mear sâlt op de diken struid as der al snie leit, mar tenei
wurdt der al struid as de snie noch komme moat. De gemeente giet dus
oer fan ,,droech sâlt” struien nei ,,wiet sâlt” struien.
Mei trije stimmen foar, geane de partijen net akkoart mei it feit dat Anema
oer de grinzen fan it bouflak fan syn pleats yn Wikel hinne bouwe wol.
Anema wol bouwe op in plak dêr’t in perslieding fan Wetterskip Fryslân
leit. De lieding stie net op in tekening fan 2004 sadat Anema
kompensaasje hawwe wol om 10 meter oer de grinzen fan it bouflak
bouwe te kinnen. Dat punt soe yn de ried fan 13 april 2010 behannele
wurde. De FNP wie doe foarstanner fan it kompensaasjeplan. It is yn dy
gearkomste lykwols net oan in behanneling takommen. B en W hawwe it
ûnderwerp foar fierder ûndersyk fan de wurklist ôfhelle. Út de riedsstikken
fan 11 maaie 2010 docht nammers bliken, dat Anema op de hichte wêze
koe fan de perslieding om’t de lieding yn de eardere keapakte beskreaun
stiet. Dat wie foar de FNP oanleiding om syn foarnimmen foar
kompensaasje yn te lûken en tsjin te stimmen. It kommentaar bûten de
ried om wie, dat de FNP fraksje fan stânpunt feroare wêze soe. Mar
salang’t der net in definityf stânpunt ynnommen is, moat in foarnimmen
op grûn fan nije ynformaasje dochs oanpast wurde kinne?
15 JUNY 2010
Unanym wurdt besluten gjin tastimming te ferlienen foar it brûken fan
gemeentegrûn foar campers.
De FNP fynt dat it stypjen fan goede doelen, lykas ûntwikkelingswurk, net
in gemeentlike taak is. Grutte (ynter-)nasjonale rampen kinne mooglik wol
stipe wurde, as dêr troch in lokaal inisjatyf om frege wurdt.
Unanym is besletten dat € 300.000,00 ekstra foar it projekt ‘Mei de boat
nei it bosk’ beskikber steld wurdt. Dat hat fan gefolgen, dat de Luts
baggere en better befarber wurdt en dat der aardich wat oan ûnderhâld
dien wurde kin. De sydfearten wurde better foar rekreaasje geskikt
makke.
Foto: Âlde Balksterwei, Aldemardum rjochting De Wyldemerk
19-07-2010 (JGV)
3

6 JULY 2010
De FNP freget it kolleezje om it brief fan Pleatslik Belang
Harich/Rûgehuzen yn it noch op te stellen GVVP, it Gemeentelijke
Verkeers- en Vervoersplan, te behanneljen. Pleatslik Belang wiist op de
smelle diken, wylst it lânbouferkear mei hieltyd gruttere en bredere
ferfiermiddels dyselde diken hieltyd faker brûkt en wylst it tal fytsende
toeristen allinne mar tanimt.
Mei ynstimming fan de FNP komme der tenei gjin ‘speelautomaten’ mear.
Der wurde ek gjin nije fergunnings mear oan nije eksploitanten útjûn.
By de besunigings hat de FNP frege de ôfskriuwing fan it gemeentlik
materiaal nochris goed te besjen en lettere ferfangingsdata oan te hâlden.
Jeltsje Piersma wurdt beneamd yn de riedskommisje Partnerschap
Krzemieniewo.
14 SEPTIMBER 2010
MEI DE BOAT NEI IT BOSK
Riedsynspekje de Luts del
Foto 24-08-2010 (JGV)
Yn 2012 wurdt in Wettertoeristenbelesting ynfierd. Dy wie der oant no ta
net. ‘Lântoeristen’ betelje wol en dêrom komt dat no ek sa foar de
,,wetterrekreanten”.
Der komt in mooglikheid foar 12 persoanen om in startersliening oan te
freegjen. Betingsten: persoanen fan net âlder as 35 jier dy’t in
starterswenning yn Balk keapje wolle. It bedrach de persoan is op syn
meast € 20.000,00. De FNP woe dat dy regeling foar alle wenplakken yn
de gemeente jilde soe, mar de oare partijen tochten der oars oer.
De ried hat ynstimd mei it ‘Implementatieplan Nieuwe Werkwijze
Gemeenteraad en Gemeenschappelijke Regelingen’. De FNP hat oanjûn
oer twa jier in evaluaasje needsaaklik te finen.
4

6 OKTOBER 2010 DIEL II
De beslútfoarming oangeande de fúzjeplannen fan Gaasterlân-Sleat,
Lemsterlân en Skarsterlân stie allinne op ‘e wurklist. De oare twa
gemeenten hawwe tagelyk in riedsgearkomste. De partijen yn Gaasterlân-
Sleat en Skarsterlân stimden unanym foar dy fúzjeplannen. Yn Lemsterlân
stimden trije riedsleden tsjin. It fúzjefoarnimmen is dus oannommen. De
fúzje wurdt taret troch in stjoergroep fan trije persoanen. Ús
boargemaster sit dêryn.
Alle santjin fraksjefoarsitters binne beneamd yn de ‘Gemeenschappelijke
Begeleidingscommissie Herindeling’. De fraksjefoarsitters yn Gaasterlân-
Sleat sitte ek yn de eigen ‘Gemeentlike Begeliedingskommisje
Herindeling’. As wurknamme foar de fúzjegemeenten waard de namme
keazen: De Friese Meren. Dizze namme krige de mearderheid fan de 15
oanwêzige fraksjefoarsitters yn de Gemeenschappelijke Begeliedings
Commissie. Jan Volbeda, FNP-fraksjefoarsitter, wie tsjin de Hollânsktalige
namme.
12 OKTOBER 2010
(Oernommen fan www.gaasterlan-sleat.nl)
De rapportaazje ‘Blik op gezondheid van de jeugd in Gaasterlân-Sleat’
wiene alle partijen net oer te sprekken. De FNP wie fan betinken dat âlde
sifers brûkt binne en trunet oan op it aktualisearjen fan de gegevens.
It kolleezjeprogramma : ‘It seil net heger lûke as de mêst’ wurdt fêststeld.
It kontrakt mei Befeilingsbedriuw Schaaf wurdt ferlinge oan 1 april 2011
ta. Doel is om yn it sintrum fan Balk tafersjoch te hâlden en dragen fan de
jongerein om útjûnen hinne.
Der komt mei ynstimming fan de FNP net in frijwilligerspriis yn Gaasterlân-
Sleat. Omt de FNP hoecht der net in frijwilligerspriis te kommen.
2 NOVIMBER 2010
De troch de FNP oandroegen winsken yn de begruttingsgearkomste foar
2011 binne oernommen. Der komt omtinken foar Frysk taalbelied; der
komt in planologyske kaart, dy’t oanjout wêr’t al en net romte is foar
rekreative ûntjouwings; De oanlis fan bedriuweterreinen foar grutte
bedriuwen moat earst bepraat wurde mei de fúzjegemeenten. Foar it eigen
MKB wurdt útgongen fan besteande mooglikheden en ôfspraken. Foar de
jierlikse monumintedei sil € 1000,00 jiers beskikber steld wurde.
5

23 NOVIMBER 2010
De FNP pleitet foar in serieus ûndersyk nei de klachten fan famylje
Hiemstra yn Aldegea. Hja hawwe lêst fan it ferkearsplato foar harren hús
oer.
Yn it fragehealoerke hat de FNP fragen steld oer it troch B en W ynstelde
parkearferbod foar frachtweinen oan de Tjalke de Boerstrjitte yn Balk. De
FNP hat noed oer it plak dêr’t de frachtweinen no steane. It kolleezje seit
gjin parkearalternativen te hawwen. Se sille dy saak wol yn ‘e gaten hâlde.
TJALKE DE BOERSTRJITTE YN BALK
Foto 28 novimber 2010 (JGV)
De VVD die in berop op de Wet Algemeen Bestuursrecht by it fêststellen
fan it bestimmingsplan Sondel. Yn dy wet stiet dat de tariedende
riedstikken net allinne yn ‘e Fryske taal meie. It oanbelangjende riedsstik
wie allinne Frysktalich. Steande de gearkomste hawwe amtners it útstel
oersetten yn it Hollânsk, sadat Sondel syn nij bestimmingsplan hat. By de
behanneling fan it taalbeliedsplan yn de ried fan maart 2011 wol de FNP
dy gong fan saken besprekke.
It wetterplan ‘Wetter stjoert’ is mei fisy en útfieringsmaatregels foar in
goed wetterbehear yn Gaasterlân-Sleat fêststeld. De ûndersikers fan
Wetterskip Fryslân konkludearje: ‘Het water is in de afgelopen jaren
steeds schoner geworden en de staart van de buitenboordmotor is steeds
dieper te zien’. In hiele ferbettering ferlike mei it rampjier 1849 doe’t
likernôch 65 Balksters yn in pear wiken tiid troch in fersmoarge Luts oan
de goalera ferstoarn binne. It wetterplan is ta stân kommen mei in
foarum fan belangengroepearings. De FNP hat oanjûn dat de gemeente
fierder gean moat mei ‘t rieplachtsjen fan dy groepearrings. Der binne by
it wetterbehear meardere tsjinstridige belangen fan brûkers. De FNP hat
ek oandacht frege foar it smoargerioelwetter by it wetteroerstoart Sondel
fan it smoarrichwetterriool. Dêr komt in soad stank by frij.
Om’t de provinsje op dit stuit net foldwaande jild hat om alle projekten út
te fieren, binne troch it kolleezje de plannen foar ‘Sloten, de ideale stad’
yn de koelkast setten. It gemeentlik oandiel fan € 300.000,00 is oerbrocht
nei de Algemiene Reserves. De FNP hâldt de ûntjouwings oangeande dat
plan yn ‘e gaten.
6

21 DESIMBER 2010
Foto: www.sloten.nl
Gaasterlân-Sleat wurdt yn 2011 oansluten op it Burgernet. Dêr kinne
ynwenners harren foar oanmelde. By kalamiteiten wurdt fia it eigen 06nûmer
in berjocht oer dy kalamiteit efterlitten. De FNP hat it kolleezje
frege de bûtentsjinstmeiwurkers, brêgewachters ensfh. dêr ek op oan te
sluten.
Út it ‘Verbreed Gemeentelijk Rioleringspan 2011-2015’ docht bliken dat de
gemeenten ek de soarch oer it grûnwetter krije. Alle partijen hawwe
unanym foar de útfiering fan de maksimale fariant keazen. Dat hâldt yn
dat jiers foar in pear euro’s mear der ekstra maatregels by û.o.
klimatologyske reinwettersoerlêst nommen wurde.
De FNP hat ynstimd om de belestingtariven konfoarm de
ynflaasjepersintaazjes fêst te stellen. De tariven foar de ûnreplik guod
belesting wurde foar net-wenningen (bedriuwen) net ferhege. De FNP
fraksje hie fierder trije flaters ûntdutsen yn de tarivetabel foar de
begraffenisrjochten 2011. Steande de gearkomste binne dy saken
oanpast.
De nota Grûnbeleid Gaasterlân-Sleat is nei in yngeande diskusje fêststeld.
Dêr wie noch nea in aparte nota foar fêststeld.
De FNP hat de nedige fragen steld oer de 2 e finansjele rapportaazje 2010.
De útkomst is dat de gemeente fan’t jier yn earsten útkomt op in tekoart
fan € 173.250,00.
De leden fan de Welstandkommisje Hûs & Hiem wurde foar 1 jier
beneamd. In útstel foar in termyn fan 4 moannen is fuortstimd. Yn maart
2011 wurdt it kontrakt mei Hûs & Hiem yn ôfwachting fan in útstel foar in
mear eigentiidsk boubelied op ‘e nij besjoen. De FNP wol dy ynformaasje
yn ‘e beslútfoarming behelje.
Fan de list mei oandachtspunten is foarearst it FNP ûnderwerp oer in
ûndersyk nei de mooglikheden hoe’t it Gaasterlânske lânskip behâlden
wurde kin yn relaasje ta de opkommende leeljeteelt fuorthelle.
7

Yn it fragehealoerke freget de FNP nei mooglike bouplannen by Lutsmond-
Noord yn Balk. De tekst wie: De FNP-fraksje hat in kopy fan ‘e brief fan de
feriening fan eigners fan bungalow park Lutsmond Noord hân. Yn dy brief
meitsje de bewenners harren beswieren kenber tsjin de mooglike komst
fan nochris 100 rekreaasjewenningen njonken harren park. Dêr hat de FNP
fraksje in tal fragen oer:
- Is it planologysk mooglik yn it bedoelde gebiet de rekreaasjewenningen
te realisearjen ?
- Hat de ried ek noch foech omtrint it al of net trochgean fan dy plannen?
- Is it kolleezje fan doel de ried de mooglikheid te jaan harren fielen
omtrint dizze plannen kenber te meitsjen?
- Hat it kolleezje, lykas de FNP fraksje, each foar de beswieren fan de
feriening fan bewenners?
Wethâlder Bonnema dielde mei dat foar de mooglike bouplannen yn
Lutsmond Noord in wiziging fan in bestimmingsplan nedich is. Dêr kin de
ried dus noch oer beslute.
LUTSMOND NOORD BALK
Foto: 24-12-2010 (JGV)
DE FNP FRAKSJE FAN GAASTERLÂN-SLEAT.
Jan K. Volbeda, fraksjefoarsitter
Jeltsje Piersma
Kees van Strien
Jan G. Vogelzang
Frâns Gerritsma
8