Skiednis fan Lippenhuzen - Lippenhuizen

Skiednis fan Lippenhuzen
Tsjalling Harkeswei (2)
Troch W. van der Sluis
Gie der ris in ko as baarch dea, dan moast
der ek wer hiel wat barre. De auto, dy’t de
kadavers ophelje moast, koe fansels net by
de buorkerij komme. De boer moast dan it
kadaver nei de slûs bringe, wêr‘t fan
gemeente wegen in kadaverbak makke wie
en dêr moast it deade bist yn brocht wurde.
(foto 1) Earst moast dat bist yn in pream as
bok laden en dan nei de slûs tafarre en dêr
it bist út de boat wrotte en yn de bak
bringe; in hiel geskuor wie dat! Men kin
dan ek wol begripe, dat de minske, dy ‘t
dêr wennen, net altyd like wiis wiene mei
al dy barten en bartsjes en de smelle
paadsjes lâns de feart. Op gearkomsten fan
Plaatslik Belang waard dan ek geregeldwei
krimmenearre oer in minne barte as in min
ûnderholden paad.
Foto 1: Kadaverbak. by de slûs en op noch in
pear plakken yn Lippenhuzen stie der ien
Sa klage Dokter Fischer yn oktober 1896
oer de minne en dêrtroch gefaarlike tastân
fan de draai oer de Djippe wyk ( njonken
Haaie Jelsma ) en by widdo Ponne (
tsjinoer no Sieger Veenstra ). Om ‘t de
eigners net yn Lippenhuzen wenje, sil de
sekretaris Freark Dijkstra J.P. van der
Sluis út de Himrik, L. Jansma út
Bakkefean en de erven van Lynden út De
Sweach oanskriuwe om dêr ferbettering yn
te krijen. In heal jier letter is der allinne fan
Van der Sluis berjocht kaam, dat hy
genegen is reparaasjes út te fieren. Fan de
beide oaren is neat heard. Plaatslik Belang
wiist dêrom in Kommisje oan, dy ‘t in
kostenberekkening meitsje sil en dêrnei
mei de eigners prate sil oer it opknappen.
Dat hat blykber goed wurke, want yn de
gearkomste fan oktober 1897 wurdt sein,
dat men dy wiken wer goed oerkommen
kin, mar dat in oare barte net bêst mear is
en ek dêr sil men efteroan.
Yn 1916 freget Sierd de Jong oan it
bestjoer fan Plaatslik Belang of de swiere
planke oer it begjin fan de Buorsterwyk net
ferfongen wurde kin troch in draai.
Skippers, dy’t de Buorsterwyk yn farre
wolle, kleie dat hja dy planke der hast net
ôfkrije kinne en noch minder der wer op.
De foarsitter seit dat al ferskate kearen by
de gemeente frege is om in draai, mar dat it
neat oplevere hat. Mar men sil it wer
besykje. Twa jier letter freget De Jong
noch ris nei dy planke oer de Buorsterwyk,
want der wie koartlyn in skip tsjin it stalt
oanfearn, om‘t it de bocht nei de wyk net
goed naam hie. No wie dat stalt wol wer
makke, mar dôchs soe it in grutte
ferbettering wêze as der in goeie draai mei
in gruttere ynfariepening komme soe en
mei in oerhaalkeatling. Dat keatling wie
nedich om de draai ticht te lûken as in
skipper as kweajonges de draai iepen
efterlieten. Plaatslik Belang sil wer ris in
fersyk nei de gemeente stjoere.
Yn maaie 1916 freget Plaatslik Belang fan
de Himrik as Lippenhuzen ek meiwurkje
wol om in stik paad tusken Lippenhuzen en
De Himrik oan de noardkant fan de feart
Foto 2: It paad by de feart mei op de
eftergrûn de slûs.
1 DE HARKER

wat breder te krijen. It stik paad leit tusken
in hege boskwâl en de feart en is sa smel,
dat by nacht wol ris ien yn de feart rekket.
Plaatslik Belang sjocht de needsaak fan
ferbreding wol yn, mar de bosk en it paad
binne eigendom fan de famylje Harinxma
thoe Sloten en dy binne net sa tasjitlik,
want de romte tusken bosk en feart moat sa
grut wêze dat it ûnderhâld oan de feart dien
wurde kin en dat is it gefal! Neat oan te
dwaan dus.
Yn oktober 1918 komme yn de gearkomste
fan Plaatslik Belang de paden lâns de feart
wer ris oan de oarder. Yn de notulen
stiet:“H. Nijboer wijst op de minder goede,
hier en daar absoluut onvoldoende toestand
der voetpaden en ganghouten( barten )
over de wijken aan de zuidkant der
vroegere Compagnonsvaart, nu Provinciaal
vaarwater.Is er niets tegen de
verwaarlozing door eigenaars of gebruikers
te doen?”
Plaatslik Belang makket him derôf troch
Nijboer de rie te jaan by de belutsen
minsken lâns te gean om harren te wizen
op harren ferantwurdlikheden. Douwe van
der Sluis fynt dat Nijboer der net allinne
mei dwaande moat en seit him derby te
helpen.
Foto 3: In planke oer de wyk by
Johannes v.d.Tuin.
Yn de winter fan 1918/1919 binne hja de
minsken by lâns west om oer de tastân fan
it paad en de planken te praten. De beide
mannen kamen nei al dy gesprekken ta de
konklúzje , dat wol men de tastân echt
ferbetterje, dat dan oer alle wiken in goeie
barte mei oan beide kanten in leuning en in
stalt komme moat. Oer de kosten dêrfan
hawwe hja in deskundige frege en dêr
kaam út, dat men der minstens f 4400,00
foar nedich hie en dan earder mear as
minder! De gearkomst fan Plaatslik Belang
fûn dat wol safolle jild dat men earst fan
fierdere stappen ôfseach, want dat bedrach
krigen hja dôchs net byinoar!
Wytse
DE HARKER 2