April 2011 Nuusbrief - The Potato Foundation

potato nuus
UITGAWE DRIE: APRIL 2011

Paasfees ‘n Tyd om stil te staan
As ons hierdie jaar aan April 2011 dink,
dan is die volgende op almal se lippe: Jy
hoef SLEGS drie dae verlof te neem om 11
dae aanmekaar af te hê! Baie besighede
sluit die hele week en watter ekonomiese,
onproduktiewe, middel-van-die-jaar
vakansie is dit nie vir werkgewers nie!
Onderwysers vra met rede waarom die
regering nie die skoolvakansie in hierdie
tydperk beplan nie, want hulle gaan nie
deur hul skoolwerk kom nie.
Ten spyte van onderwysers en werknemers
is almal se vakansies bespreek en wag ons
angstig dat die tyd nader kom. Dit is soos
Kersfees in die middel van die jaar! Vir die
wêreld is dit soos Kersfees – Kersvader
verruil net sy pak vir die Paashaas en ons
steek eiers weg in plaas van geskenke
onder die boom. Maar as Christene het
ons soveel meer om na uit te sien! Die
Here se hele koms word in hierdie tyd
gekristaliseer. Hy het aan die kruis vir ons
sondes gesterf EN hy het op die derde dag
opgestaan uit die dood. As Christene vier
ons Paasfees vanaf 22 tot 25 April 2011.
Ons moet hierdie tyd gebruik om stil te
staan in Sy teenwoordigheid om sodoende
die Here se LIEFDE in Sy volheid te ervaar.
Ons wens elke vrywilliger ‘n heilige,
geseënde Paasfees toe!
Food from Heaven
Dankie aan Willow Ridge High School
Mens kry hoop vir die toekoms as jy ‘n
skool soos Willow Ridge High School in
Die Wilgers besoek en al wat jy sien is hoë
GEHALTE personeel en leerders. Lanklaas
het ons ‘n skool teëgekom wat so ‘n passie
het om te gee en ‘n verskil te maak in hul
gemeenskap. Sulke skole lewer die leiers
van more op!
Ons het op Maandag, 7 Maart 2011, op die
skool se uitnodiging, die kinders bewus
gemaak oor die nood van ons behoeftige
gesinne wat sukkel met kosvoorraad.
Die kindertjies van Blessings Crèche and
Orphanage Centre tesame met Spuddy
Buddy het vir hulle gesing. Die onderwysers
en leerders se reaksie was oorweldigend en
hulle het ongelooflik baie onberfbare kos
vir ons ingesamel!
Graag wil ons hul skoolhoof, Mnr. André du
Plessis en die wonderlike onderwyseres wat
alles georganiseer het, Me. Riette Moller,
al die personeel en VERAL die leerders
van Willow Ridge High School uit ons hart
bedank. Saam het hulle ‘n groot verskil in
die families in ons voedingskema se lewens
gemaak!

Pieter is verras met hierdie geskenkies
Belangrike datums
Angels without wings
Nog ‘n manier om uit te reik
Omkring hierdie datums op
jou kalender
1 April 2011 – “Gekkedag”
13 April 2011 – Scrabble-dag
15 April 2011 – Potato Kaalvoetdag!
Julle mis uit as julle nie
deelneem nie.
16 April 2011 – Vrywilligersdag!
ONS SOEK HANDE ASSEBLIEF!
22 April 2011 – EARTH DAY
23 April 2011 – Wêreld-boekedag
Skoolvakansie: 25 Maart tot 8 April 2011
Angels without Wings fokus daarop
om families te ondersteun met kinders
wat lewensgevaarlike siektes of
lewensveranderende toestande het. Hulle
dienste wissel vanaf iets so kleins soos die
verskaffing van etes aan ouers terwyl hul,
hul tyd en energie langs ’n hospitaalbed
spandeer tot by hul bekendste projek,
‘Home away from Home’. Hulle help
families ook om mediese uitgawes te dek
om te verseker dat hul kinders die beste
moontlike sorg ontvang.
Hulle grootste behoefte op die oomblik
is nommer 3 en 5 doeke, baba-blikmelk
en epizone room. Ons wil graag hierdie
organisasie help deur die kindertjies in
die hospitale saam met Spuddy Buddy
te besoek. Baie van hierdie kinders bly in
hospitale vir meer as ses maande sonder
dat iemand hulle ooit kom besoek, want hul
ouers bly net te ver om te kom kuier.
Ons was op Donderdag, 24 Maart 2011
so opgewonde om ’n baie spesiale
pasiëntjie te besoek. Pieter (5) lê in Steve
Biko Akademiese Hospitaal se chirurgiese
kindersaal na ’n operasie waar sy dikderm
verwyder is. Hy is ’n weeskind en sy
aanneemouers woon in Middelburg wat
dit moeilik maak vir besoeke. Ongelukkig
kon ons geen foto’s neem nie, maar Pieter
was lekker verras met ’n geskenkpakkie wat
nagklere, inkleurboeke en kryte, boeke en
karretjies ingesluit het.
Hospitaalbesoeke word opgedeel tussen
Steve Biko Akademiese hospitaal en Dr.
George Mukhari hospitaal. As jy saam met
ons hierdie hospitale wil besoek, kontak
ons by karina@thepotatofoundation.co.za.
Vind meer uit by http://www.
angelswithoutwings.co.za/home1.html

The Harvest Projek
Om opreg te bid – net soos ‘n kind
Een van die hoogtepunte by ons Harvest
projek dié maand was toe ons die
kinders geleer het om te bid. Met hierdie
handdiagram (links bo) kon ons die kinders
leer waarvoor om te bid:
• Duim – Die vinger is die naaste aan
ons as ons ons hande ophou. Die duim
staan vir die mense naaste aan ons – ons
familie en vriende.
• Wysvinger – Die vinger is ’n sterk
vinger en word gebruik om te
wys. Die wysvinger herinner ons
om vir ons onderwysers, skole en
onderwysdepartement te bid.
• Middelvinger – Dis die langste vinger
en herinner ons aan die mense wat ons
lei. Hier bid ons vir die regering, vir wyse
besluite en dat God ons leiers sal lei in
elke besluit.
• Ringvinger – Die vinger is ons swakste
vinger en herinner ons om te bid vir
siekes en mense wat ons liefde nodig
het.
• Pinkie – Die kleinste vinger herinner
ons dat ons vir onsself moet bid. Ons
onthou dat God ons perfek gemaak het,
in Sy beeld.
By ons skole het ons die kinders in ’n ry laat
staan, en elkeen het ’n onderwerp gekies
vir wie of wat hulle wou bid. Dit maak ons
nederig om te sien hoe die kindertjies bid
as ons hulle nie voorsê nie! Wow, hulle bid
so opreg. Een van die seuntjies het ’n ander
maatjie se hande gevat en hom gehelp om
te bid, en toe sit die trane maar vlak in ons
oë. Nou verstaan ons net weereens hoekom
die kinders so kosbaar is vir God.

Martin by Sophy van die Boitumelo Community Home Centre
toe Potato daar gaan speelgoed aflewer het
Nuwe projekte Drie projekte waarby JY betrokke kan raak
Voordat ons ’n projek-instansie aan julle bekend stel, doen ons eers ’n volledige
behoeftebepaling sodat ons die korrekte inligting kan deurgee as iemand navrae het. Dit is
vir ons baie belangrik dat ons kan identifiseer met die waardes van die instansies wat ons
ondersteun.
Indien ’n besigheid, skool, groeigroep of enige individu ’n projek wil loods kan hulle ons
skakel en dan kan ons ’n projek aanbeveel, uitwys wat die grootste behoefte by ’n instansie is
of ons kan ook die projek namens hulle behartig.
Hier is drie instansies van wie julle meer volledige behoeftelyste op ons webwerf kan kry:
Eldaa Children’s Foundation (ECF) – Die doel van EFC, wat in die hart van Ga-Rankuwa
geleë is, is om hul minderbevoorregte gemeenskap te help. Dit is ’n dagsorgfasiliteit wat tans
na 40 kinders omsien. Hulle werk uit ’n baie klein huisie met net drie kamers. Tans benodig
ECF basiese benodighede, soos tafeltjies en stoeltjies, ’n stoof en yskas.
Boitumelo Community Home Centre (Sophy’s Home) – Boitumelo Community Home
Centre is deur Sophy Msiza begin om behoeftige kinders te help. Sophy het tans 32 kinders
wat in die huis bly, meestal weeskinders, straatkinders en pleegsorgkinders wat deur
maatskaplike werkers na haar gebring word. Sophy ontvang nie geld om vir meeste van die
kinders te sorg nie. Haar doel is om die kinders in haar sorg die beste onderwys te gee sodat
die kinders ’n beter toekoms kan hê.
Vos Community Centre and Creche – Die CMR (Christelike Maatskaplike Raad) is ’n
organisasie wat, tesame met ander organisasies, ’n maatskaplike diens lewer aan behoeftige
kinders, families en gemeenskappe. Hulle doel is om ’n vroeë kinderontwikkeling diens te
lewer aan ten minste 120 van die mees behoeftige kinders in Sunnyside, deur twee etes per
dag en algemene maatskaplike dienste aan hulle te voorsien.

Getru Eloff en Christi Warren
oorhandig die toerusting aan die
adjunkhoof, George Parker van
Laerskool Gen Beyers
Go Green Projek
Earth hour op 26 Maart 2011 was ‘n
wêreldwye geleentheid wat deur die World
Wildlife Foundation gereël is. Op hierdie
dag word besighede en huishoudings
gevra om alle nie-essensiële ligte en
elektroniese apparate af te skakel vir ‘n UUR
– 20.30 tot 21.30 – om bewustheid te skep
oor klimaatsverandering.
Ons het met die oploop tot en met 26
Maart die kinders bewus gemaak van
wat dit beteken om elektrisiteit te spaar
en die positiewe uitwerking wat dit op
die omgewing sal hê. Vir diegene wat nie
elektrisiteit het nie, het ons geleer om hulle
hulpbronne spaarsamig te gebruik. Ons
uiteindelike doel was dat die kindertjies
Ons doen ons deel vir Earth Hour
hulle ouers sou herinner om die ligte af te
skakel.
Het jy onthou om dit by jou huis te
doen? Indien jy vergeet het, is daar nog
‘n geleentheid om jou steun vir ‘n groener
aarde te gee.
EARTH DAY
Earth Day is ‘n dag wat bedoel is om
bewustheid te skep en ‘n waardering te
kweek vir jou omgewing. Earth Day word
nou globaal gekoördineer deur Earth Day
Network en word in meer as 175 lande
gevier. In 2009 het die Verenigde Nasies
22 April (toevallig hierdie jaar op Goeie
Vrydag) geallokeer as Mother Earth Day.
Help ons herwin
Indien jy ons kan help met
gebruikte papier skakel
asseblief ons kantoor. Ons
gebruik ongelooflik baie
papier in ons projekte.
DANKIE AAN:
SANSAS
Op 22 Maart 2011 het die South African National
Accreditation System (SANAS) verskeie rekenaars en
kantoortoerusting aan Laerskool Generaal Beyers in
Danville geskenk nadat ons die skool genomineer het.
‘n Spesiale dank aan Getru Eloff en Christi Warren van
SANAS wat die oorhandiging en al die moeite gedoen
het om die goedere aan die skool te skenk.
METRO
Metro skenk op ‘n gereelde basis vir ons klere en niebederfbare
goedere. ‘n Spesiale dankie aan Bonnie
Eekhout met wie ons elke keer korrespondeer! Hierdie is
voorwaar ‘n maatskappy wat vir sy gemeenskap omgee!

Vrywilligersdag, 16 April 2011
‘n Spesiale Paasfeesdag vir die kinders van Salem
Gemeente in Danville
Ons het jou hulp nodig om dié dag
‘n sukses te maak!
The Potato Foundation en Salem Gemeente in Danville (by die Danville Kamers) span kragte
saam en reël ‘n uitstappie vir die kinderkerk se kindertjies voor Paasfees. De Haven Oost troue
onthaalplek en restaurant (http://www.dehavenoost.co.za/) is die gasheer vir die dag. Daar is
lekker oop spasies asook ‘n mini-dieretuin! Ons beplan ‘n dag propvol pret, maar is gefokus
daarop om die Paasboodskap effektief aan die kinders oor te dra. Ons program sien kortliks
soos volg daarna uit:
10vm – 12nm: Boeresport, springkasteel, gesigverf, dierevoer en sakkies verf (elke kind
ontvang ‘n sakkie waarin hy of sy paaseiers huistoe kan vat)
12vm – 1nm: Etenstyd
1nm – 2nm: Praktiese lesing oor Paasfees
2nm – 3nm: Paaseiers jag!
3nm:
Huistoe-gaan tyd
Hier is hoe jy betrokke kan raak.
Ons benodig die volgende:
• Tent (Ons kort eintlik net skaduwee!
Daar is ‘n 150m strook wat ons gebruik
waar geen boom is nie!)
• Kruis (‘n Grote waarop ons elke kind se
naam kan graveer.)
• ‘n Springkasteel of twee
• Padkos en koeldrank vir wanneer
kinders op die bus klim
• Paaseiers (soos in BAIE!)
• Klanksisteem
• Bruin papiersakke wat die kinders kan
verf
• Bus
• Dan die heel belangrikste… Ons kort
JOU as vrywilliger om ons te kom help!
Kom geniet die dag saam met ons en
maak ‘n verskil in ‘n kind se lewe! Kontak
asseblief die kantoor of epos martin by
martin@thepotatofoundation.co.za.

Bly op hoogte
‘n Vinnige manier om op hoogte te bly en aktief deel te neem aan ons aktiwiteite is
om ons webwerf, Facebook-bladsy of ons op Twitter te besoek. Jy gaan uitmis as
jy dit nie doen nie!
• www.thepotatofoundation.co.za
• http://www.facebook.com/pages/The-Potato-Foundation/130107300360975
• http://twitter.com/#!/ThePotato1
Kom leef jou passie uit en
maak ‘n verskil!
Kontak The Potato Foundation
Telefoonnommer: 082 967 6258
Faksnommer: 086 612 6532
E-pos: info@thepotatofoundation.co.za
Webwerf: www.thepotatofoundation.co.za